26/6/15

26/6/15   FRI   HOT

今朝揍子元校車時落雨, 柏仲又醒咗, 唯有揹住佢落去, 又抱又攞遮真係唔掂! 返上樓後開奶比佢都肯飲, 不過佢4隻小臼齒已腫到好厲害, 真係見到都慘! 摺埋衫就出門口啦, 如常撘廿幾分班車入青衣, 因為老公今朝要interview, 所以我揍柏仲入青衣, 點知回程時就慘啦, 剛上葵涌道就開始塞, 想走都走唔甩, 原來美孚橋面炒車, 結果15分鐘內的車程, 足足1個鐘先返得到公司, 陰公! 朝早都係做吓自己嘢啦, 午飯後休息吓但又唔敢瞓怕會攝親, 但下午返番位後都係頂唔住瞓咗陣, 食埋頭痛藥叫做好DD啦! 放工要去買餸, 返去放低嘢又要出番去接佢地去游水啦, 子元又顛顛地, 佢冇電時又會係到失控自娛真係好煩! 揍咗佢地去泳池咪返屋企囉, 程生同陸生睇住兩隻細, 我就沖個涼再煮飯, 等佢地返到嚟沖好涼剛好食得, 柏仲已頭圍用膳後被K.O.瞓覺, 唔洗開細枱食, 齊齊上大枱, 食完洗好碗抺好地, 柏仲又喊醒, 出大牙出得好辛苦囉佢, 成日扭! 到子元瞓咗後, 柏仲都喊醒咗幾次, 半夜又係咁, 我真係冇覺好瞓!

25/6/15

25/6/15   THU   HOT

今日水運會, 請足全日假, 朝早老公先揍柏仲入青衣, 我就同子元執拾行裝, 約咗9點喺朗豪坊等, 順利出到去, 喺麥記會合食早餐先, 跟住9:50就入場睇戲啦, 侏羅紀世界呀, 都幾緊張不過好公式的劇情囉, 但總括係好睇GE! 睇完12點多, 但因為食咗好多popcorn唔餓, 所以去到佐敦都冇食嘢住, 去咗泳池視察吓環境等入場, 真係等到點幾先入得, 老公夠鐘就去咗見工, 諗住佢見完可以返過嚟, 點知見到我地散水佢先見完, 咁無謂過嚟啦! 運動員先入咗場, 過一陣就到家長入, 霸咗靚位同埋程生, 靜瑜媽, 子慧媽佢地坐啦, 我地都真係夠哂嘈架啦, 開幕禮前有熱身, 比佢地落副池游吓, 真係好可愛! 終於正式賽事, 有排先到子元, 不過都有其他一年級比賽嘛, 一樣好可愛, 白豚D阿sir都好有危機意識, 有個落咗水未開池但可能緊張扶唔穩, 水又浸過頭, 個阿sir即刻跳落水救番佢, 又有水中工作人員負責拍片咁, 都真係幾pro! 玩到3點多, 終於到浮板賽啦, 女子完先男子, 我地有程生拍片, 咁我咪影吓相囉, 但太遠都影唔到D咩, 最終到男子啦, 子元嗰組有8個人佢游第3, 都算係咁啦, 全程好專心咁游冇望隔離! 等佢地游哂幫佢地換好衫就等散場啦, 準時5點走得, 馬上去食個麥記先, 跟住撘地鐵返去沖涼, 老公揍咗柏仲返嚟就食嘢啦, 隻豬點都唔肯食, 後來先發現到佢生菲滋, 所以唔肯食, 咁由佢先, 等佢同子元玩吓啦, 點知玩玩吓因為笑得太激動, 嘔喎! 想唔沖涼都唔得, 笨元都幫到手架啦, 清理完餵埋奶就打暈仲仲, 再叫子元執好嘢瞓覺啦, 9點幾叫做自由了, 老公不久回來, 沖完涼食西瓜睇埋電視瞓覺了!

24/6/15

24/6/15   WED   HOT

今朝都係如常咁揍子元校車, 只係唔洗揍柏仲入青衣, 同老公一齊食咗早餐就返工啦, 朝早要開會, 好在sales的會都好快完, 人走了又可以做自己嘢, 午飯後都係好專心咁睇吓電視啦, 不過琴晚都睇哂咁滯, 冇咩所謂! 下午都係做吓自己嘢又做吓公事咁啦, 放工可以直接返屋企, 因為媽直接揍咗子元返去, 咁我返到去就等開飯啦, 不過因為食咗tea, 唔係太肚餓, 所以唔多捧場呢! 食完洗碗抺埋地就同佢地落去約咗Letty佢地去玩滑板車, 咁就玩到9點, 返去沖好涼然後打暈柏仲啦, 明天笨元水運會呢要抖足精神!

 

23/6/15

23/6/15   TUE   RAIN

今日返工時好大雨呀, 好在朝早揍子元上校車時冇雨啫! 食完早餐返工啦, 老公又冇帶key要行返轉頭攞比佢, 搞到我都唔可以去咗子元學校交咗封證明信先! 返咗咗公司後都係做吓自己嘢先, 因為跟住要開會, 大陸組落嚟開會, 我好似聽緊外星文咁但又要take minute喎, 真攞命! 終放叫做搞掂都放lunch, 快手攞封證明信過去, 入到學校真係好嘈, 老師真係可以claim職業性失聰! 跟住去買少少嘢食返去伴隻艐啦, 夠哂飽, 邊吃邊睇J2但喺自己位睇, 因老細們在! 下午佢地都好晏先走, 真係阻住哂, 好在我都有嘢做吓, 寫埋D會議記錄! 放工就咁喺公司樓下接子元就得, 跟住過美孚會合老公食大家樂, 再行返屋企咋! 返去佢地沖好涼諗住叫老公還番櫈比炮哥, 咁佢揍埋子元柏仲過去, 佢地就留咗喺到玩咗個幾鐘呀, 開心到呢, 我就喺屋企hea吓咁囉! 9點幾佢地先返到嚟, 馬上K.O.咗兩隻嘢就睇媚娘, 睇埋幽靈先瞓!

22/6/15

22/6/15   MON   RAIN

今日時晴時雨, 朝早照揍咗子元上車就返屋企餵奶摺衫啦, 之後同老公去食咗早餐就返工, 朝早都係做吓自己嘢啦, 午飯要去買多少少嘢加料因為得隻艐, 食完嘢咪睇吓電視咁囉, 呢套劇要好專心先睇得掂! 下午老細返咗嚟, 好在有嘢喺手有得做吓, 但都唔頂得幾耐, 佢又吹水吹唔停咁, 可惡! 放工後直接返屋企, 子元冇去踢波啦, 但老公照有得去踢因為冇雷暴, 可惡! 咁返到去沖好涼食飯啦, 其實只係食粥, 但我真係唔夠, 等佢地瞓哂再食杯麵! 食完拖好地就陪佢地玩陣啦, 但柏仲真係唔掂, 玩玩具好暴力, 教佢又唔聽, 淨係顛跑跳衝! 8:30打暈仲仲, 可以同子元玩吓, 9:30打暈埋佢, 我就食住杯麵睇媚娘, 老公買咗糖水返嚟, 又食過, 10點幾就瞓啦!

21/6/15

21/6/15   SUN   RAIN

今日柏仲6點幾醒, 已經算對我好好, 子元又醒埋話佢睇住柏仲, 咁我就放佢出去, 叫做瞓7點幾就起身, 今朝又係要揍子元去畫班嘛, 食完早餐去行吓, 程生話想買海綿水槍, 找咗幾間最終只找到1支, 照買咗先, 揍咗子元返去就執拾行裝去游水啦, 1點多過到去敏瑩屋企, 食咗嘢先再換衫, 去泳池買飛, 點知…游得嗰半個鐘…雷暴喎, 要上水! 真係勁無癮! 咪返上去排隊沖涼囉, 由細沖到大啦, 陸生同子元都冇沖, 抺身換衫就算, 我就沖咗最細嗰兩隻先, 等敏瑩沖好再到我沖, 然後餵柏仲食咗奶就打暈埋佢, 終於可以自由吓, 睇吓卡通打吓機咁啦, 到5點多真係要捉醒柏仲啦, 因為要去奧海城食飯, 話咗我地去找位, 由於周圍都爸爸餐, 最終找到美心茶記, 咪主力等嗰間囉, 我就帶住兩個喺反斗城睇玩具, 有位又差不多時間啦, 就過去餐廳, 都係叫餸食飯啦, 子元又主力打機, 係咪要stop吓佢唔准再打機呢, 不過開飯後佢都停GE, 對住佢地加上咁少餸, 梗係要快手食, 又要餵柏仲又要照顧吓子元, 都忙忙地, 都係聽佢地講嘢多過講啦! 柏仲先搞笑, giv仔抱住佢同丁丁話, 本身佢今餐飯都勁怕羞架啦, 比人抱住更加驚, 係咁望番住我地, 之後仲低哂頭扁咀, 最終喊添啦! 老公話講笑話, 佢地屈柏仲見到丁丁流口水, 柏仲覺得委屈所以喊, 真相係點真係唔知啦! 抱番佢之後比個奶咀佢咬吓, 仲可愛囉, 估唔到柏仲都識怕羞! 食完去咗麥記食甜品, 不過我地都真係食完就走, 柏仲同子元都眼瞓, 飛的返去子元已熟睡, 幾經辛苦捉佢起身沖涼, 先搞掂柏仲瞓咗老公就負責子元, 我都可以沖埋涼休息!