25/12/16

25/12/16   SUN   WARM

聖誕節活動係康傑小聚會, 全日嗰隻, 又農場又BBQ, 約咗11:15喺科大等, 我地準時入到去, 泊好車等齊人就出發去農場“清新地”, 要行落山, 真係唔易行的山路, 仲要拖住仲仲, 堅係腳軟, 我諗都真係行咗15分鐘先落到去, 先嚟一個導賞, 睇吓咩植物咁, 跟住就有得種一棵薄荷葉, 我地4個人所以種咗4棵, 好在自己咁啱有個膠袋袋住啫! 玩完呢兩樣就自由活動啦, 佢地都係放吓電, 話吓遊樂設施, 本來話2點走, 但又要等佢地一個二個整燒魚餅, 又要合照等等, 結果3點多先至走得! 要爬番嗰條路上去啦, 我地都算行尾, 不過行到一半, 老公就交咗仲爺比我, 佢要行返落去救D婦孺, 幾經辛苦終於行返上嚟, 又要抖一輪, 就攞車去BBQ場, 有人透爐有人睇住小朋友, 我都係要全程揍住仲仲啦, 比佢玩咗陣吹泡泡, 等透好爐食物又未攞到嚟, 唯有燒吓麵包頂住肚先, 食物終於到了, 叫子元自己燒幾轉食飽咗先可以再玩, 其實我好攰, 又要留意住佢地, 又怕佢跌, 天黑齊又要留意佢地會跑咗好邊, 所以真係好攰! 到8點幾佢都開始攰, 慢咗啦! 所以執嘢時就先同佢換衫抺身放咗佢上車, 我地再執嘢, 返去車時佢已經瞓咗, 10點多其實已回到家, 仲爺瞓到好冧, 所以由得佢做臭豬算, 明天才沖涼, 我地就要執嘢洗衫等等, 12點幾才瞓!

 

 

 

 

 

 

 

 

 

 

 

 

 

 

 

24/12/16

24/12/16   SAT   WARM

平安夜, 要返工, 都係半日啫! 不過今朝太好瞓, 完全唔知醒, 8:45先起身, 所以差不多9:30先返到去, 深哥已經上咗嚟, 快手食埋個早餐就寫嘢, 都寫到11點幾, 又要幫子元找專題的資料, 好在1點前已搞掂, 老公嚟接我一齊去食午餐然後回家, 笨元踢緊波, 我同仲仲返去等佢瞓吓先, 子元回來快食D嘢就要出門口, 因為要去圖書館抄閱讀記錄冊, 找到5點就過小童再抄, 跟住夠鐘就合唱團報佳音練習, 我就返屋企, 仲爺醒咗出去食晚飯, 8點左右要去第一個點等佢地, 今年只係3個點咋, A出口後就橋底, 然後就噴水池, 都係跟住佢地睇啦, 最後一站gloria佢地到咗一齊睇, 然後就去麥當勞after party, 都係比佢地再吹吓水啫, 連晴家都嚟埋, 玩到10點幾11點到要回家了, 明天又要出去玩!

 

 

23/12/16

23/12/16   FRI   WARM

老公今日返啦, 10點鐘已起飛, 所以我返到公司佢已經起飛咗! 今日奶奶出嚟揍, 因為子元要學嘢, 9點揍到佢地去大快活會合, 我就返工啦! 都係做吓公事做吓自己嘢咁, 午餐出咗去食, 因為有人sponsor可以食聖誕餐, 我地就去咗食日本嘢, 之前一早訂咗枱架啦, 不過都冇想像中咁好食囉, 好在都係貼番$34啫! 下午老細冇返, 所以都係輕鬆地過, 仲去買咖啡飲! 放工老公嚟接我呀, 佢已經載埋子元去小童, 阿媽返屋企咁架啦, 返去攞埋子元游水D嘢就去小童等, 等佢地放得嚟換埋衫都6:45, 揍咗佢地去泳池, 程生同婷婷上咗嚟, 兩個細終於可以一齊玩吓! 本來嫲嫲係同我地一齊食GE, 但總之大包就話佢到咗美孚, 但我地要等子元游完水沖埋涼8點幾先食得, 佢地幾個唔知點溝通, 總之奶奶又驚個囡要等, 老公就覺得大包成日一相情願人地就佢, 最終奶奶就仆到出去回合個囡, 唉…真係唔知佢地點! 咁我地咪夠鐘就去接兩個大GE, 車咗佢地返西九我地一家就去食飯囉, 試咗間新GE西餐, 不過不失啦! 食完去松記買埋糖水就回家! K.O.哂佢地我就沖涼, 笨元到我出嚟11點幾都唔去瞓, 咪比我丙囉, 咁我地就hea到點幾先瞓!

22/12/16

22/12/16   THU   WARM

今日要揍兩個入去青衣啦, 想撘的士D的士都唔比我撘, 所以都係等巴士, 入到去都9點了, 快手settle咗佢地就走啦! 落巴士諗緊買咩早餐, 本想買份大的, 但又怕太晏唔係咁好, 於是去咗聖安娜, 但又唔見有我想食嗰隻, 咪想出番去囉, 見馬路過得就想跑, 但冇為意仲有一級樓梯, 結果……跌了個四腳朝天, 真係好樣衰, 咁啱有兩個女仔喺前面就扶起咗我啦, 好在真係冇咩事, patpat夠肉厚! 返到去都係做吓自己嘢啦, 午飯都係睇吓電視打吓機hea吓咁, 下午班高層返咗嚟又開會, 梗係要開啦又出事, 都唔明總監係點! 放工閃人啦, 返到青衣我隻小仲仲啱啱瞓醒, 佢下午又比阿哥撞到個頭, 不過應該就冇咩GE! 食完飯睇埋電視就返去, 比佢玩陣我吸塵抺地先, 差不多1個星期冇抺, 搞掂就K.O. 隻仲仲啦, 然後我就沖涼啦, 子元就敷mask! 之後叫子元收拾吓佢究竟仲欠咩公課未做, 但都係要同佢執手尾, 佢真係好亂又成日話搵唔到嘢! 搞掂我都唔對功課住, 放假先對啦, 我都敷番個mask先, 趕咗子元去瞓先摺埋D衫, 老公明天就返啦!