19/1/17

19/1/17   THU   COOL

今朝仲爺一聽到鬧鐘就一齊起身, 想賣甩佢都唔得, 一齊落去再同loletta吹埋水, 返上樓又要快手啦, 趕到返學校都差不多開門! 食埋早餐返工啦, 今日都係冇咩特別嘢趕, 所以就照做吓自己的廚房設計, 改裝番昨天老公的意見! 午飯後都係hea吓, 跟住就執咗個櫃用來放水機, 晏D老細返咗嚟, 係咁過嚟講嘢啦, 因為嗰邊冇咗個對象佢講嘛! 不過今日就算, 佢唔知發咩神經, 又比bonus喎, 大老闆娘已經比咗架啦喎, 不過有錢梗係收啦, 知我今年諗住裝修幫補吓嘛! 放工返去接笨元啦, 跟住返屋企換衫執嘢去跳彈床, 等老公嚟到塞得車出去都7點幾, 不過跳到9點架嘛, 所以都唔怕, 但最慘係…我肚餓, 加埋做運動喎之後就更加餓啦! 不過佢兩個都玩得開心GE, 係要睇住仲仲辛苦D囉, 因為太多危險位, 同埋佢實在咩都唔怕, 都唔知佢幾時會跌, 我自己又跳吓, 都幾係攰! 玩到9點要走啦, 喺附近茶餐廳食埋嘢就回家, 快手同佢地沖涼瞓覺, 我都要快手沖涼, 好攰啦, 攰到衫都冇摺!

 

 

18/1/17

18/1/17   WED   COOL

今朝仲仲都扭計, 知道自己遲咗起身冇得落樓就喊, 著衫時又扭! 返到學校先好笑, 係咁低住頭, 除咗鞋就攞住衝去鞋櫃, 都冇望清楚鞋櫃到咗未, 衝到去唔見個櫃先打個突, 佢真係好詼諧! 返到公司都係做吓公事做吓自己嘢啦, 今日主力係到計劃吓個廚房點搞! 午飯後都係hea吓睇電視啦, 下午老細返咗嚟, 都唔算煩住GE, 有經理比佢煩嘛! 咁我咪又繼續做自己嘢囉! 放工去接子元同子慧, 問佢兩個中文派咗…咩成績, 子元得60.5, 其實我都預咗死亡之卷係差, 但剛剛合格都要D時間調節! 行返去先order壽司, 跟住去大家樂交收咗子慧比慧婆就買埋燒雞餐, 再去攞埋壽司就撘小巴返屋企! 老公佢地7點到返到, 就開餐食嘢, 不過仲爺都唔係好食, 我地邊食就邊講吓我整起咗GE廚房設計啦, 大致老公都話OK, 係要再fine tune吓! 仲爺今日同個地下好親近, 跌咗幾次喊咗幾次! 8點幾老公車嫲嫲返去, 我就同佢兩個沖涼瞓覺啦, 子元就去做埋改正, 但一路改都一路話唔識, 老實我睇完都要D時間去諗點改, 比我做呢份卷我都唔擔保高分! 10點多趕埋子元去瞓我地就可以沖涼, 之後都係摺吓衫, 老公就睇吓D裝修囉, 都要計劃吓!

17/1/17

17/1/17   TUE   COOL

今朝都係如常咁返學啦, 仲爺又喺出門口前起咗身, 局住帶埋佢, 點知兩個爭出門口爭到唔記得攞視藝袋, 落到校車先發現, 我又要跑上去幫佢攞番, 好在校車肯等埋佢咋! 跟住返上去同仲爺換衫返學啦, 不過今日係daddy揍佢, 我就去同荔天班阿媽食早餐, 因為今日買書, 食完早餐吹完去買, 返得公司都係9點幾啫! 之後都係做吓公事做吓私事咁啦, 今日都唔算太忙, 係中午老細返咗一陣啦, 下午又返咗陣, 好在我都有D公事攞出嚟做吓啫! 放工去接笨元啦, 又要攞埋D書又要買餸都幾係重, 回家快手煮飯, 子元就自己做埋視藝, 係佢最叻的水墨畫! 跟住都係食飯洗碗吸塵抺地, 老公去咗踢波, 我比子元同仲仲溫完書就沖涼, 仲爺唔肯坐定溫嘛, 我就出動衣架囉! 打完一次叫做坐定囉! 跟住都係沖涼瞓覺啦, 睇吓笨元今日派的卷, 數學琴日派咗得71, 今日派英文77, 常識87, 都算啦, 佢都係錯D唔小心, 咁嚟緊食咗藥, 睇吓係咪真係集中好咗, 少咗唔小心! 10點幾趕佢去瞓, 我仲要包埋佢D書同摺衫, 老公11點幾回來, 條友沖完涼走去食麵搞到我又食埋一份, 可惡!

16/1/17

16/1/17   MON   COOL

又要返工啦, 今朝開始返學前要食埋粒藥, 所以要比塊餅佢食咗先, 點知食完藥飲得水多, 又跑去校車, 所以臨上車前嘔, 都唔知會唔會嘔番D藥出嚟, 係都冇法! 揍咗佢就返上去搞掂埋隻細細粒啦, 點知今日都係遲咗, 一來佢仲有份畫線未做, 二來又唔合作咁囉! 返到公司就寫番幾日日記啦, 又要開會咁, 都幾忙吓! 午飯後係睇吓電視咁, 老細返過嚟一陣, 所以都冇阻住! 放工即閃去學校接子元同子慧, Gloria有一堂唔洗上, 可以喺美孚交收番子慧, 咁我買埋餸就回家, 煮煮吓又要落樓揍仲仲, 因為老公去踢波, 咁子元本來想同仲爺溫書, 但仲爺完全不領情, 所以子元溫溫吓都冇心同佢溫, 我又煮好飯啦, 就食飯先囉, 食完兩個又掛住睇電視, 我又要吸塵抺地, 所以比佢地睇到8點半就要佢地去沖涼, 然後K.O.仲爺再處理笨元D嘢, 又新手冊又功課又未做的視藝咁, 佢自己都搞到11點幾, 所以觀察唔到佢今日有冇失眠, 我都好忙咁摺衫, 都12點幾先瞓呢!

15/1/17

15/1/17   SUN   COOL*

今日都係忙碌地去玩的一天! 朝早hea到10點幾先梳洗完啦, 執得嘢嚟出去食早餐都食唔切, 結果子元就買subway比佢食完就食藥, 可以觀察吓食咗藥有咩分別, 咁佢去咗學鼓我地就食早餐, 接番佢就再去接嫲嫲, 去愉景新城, 因為子元今日要表演呢, 雖然只係提供一個場合比佢地表吓咁解, 但話哂都喺個商場對住D人要喺個台喎! 去到我先整杯咖啡先, 頭痛到爆! 跟住就同仲仲買咗返學鞋先, 然後等3點去報到, 然後就等3點幾開始第一個表演! 唔知佢係食咗藥真係定咗, 定係因為緊張啦, 佢真係冇咩話悶又嘈又郁咁喎, 一路等到佢第7個時好淡定咁表演喎, 不過呢到D音響麻麻, 所以其實唔係好聽得清佢打鼓個聲, 但堅係唱得好喎! 完場就可以放佢地去玩食錢樂園啦, 都玩咗好耐, 又放血咁囉, 晚餐去食牛陣, 都係烚烚吓咁啦但又幾好食喎, 食完回家啦, 仲爺都要係咁二溫吓書, 話哂明天考試, 外判咗比子元同仲爺溫, 佢竟然學足我D方法去同仲仲溫, 睇到都想笑, 仲爺溫溫吓想閃番入房瞓覺都唔得, 比子元捉番出嚟, 要佢做埋卷先准瞓, 笑死! 沖完涼我都係要摺衫啦, 一大堆等緊! 子元食咗藥, 其中一樣副作用係失眠, 咁佢今晚真係瞓唔到, 一來今朝8點幾先起身啦, 二來今日晏食藥, 返學日子早食應該就不大問題!

 

 

14/1/17

14/1/17   SAT   COOL

今日公司annual dinner, 但今日一日都好忙, 朝早子元畫班完就回家, 都係執定陣間annual dinner D嘢都有排執, 2:00又要出發去林醫生到, 渣車塞吓又行錯吓路, 去到啱啱3點, 都要等一陣, 我地講咗話趕, 咁都比我地一次過睇咗先, 叫做4點多已經搞掂, 今次都決定咗食藥, 所以都係討論食邊隻藥, 咁因為8個鐘嗰隻係膠囊裝, 12個鐘係硬身, 所以一定要試咗8個鐘嗰隻先! 配好藥走得, 老公車我過尖東, 啱啱5點左右趕到, 但因為D物資未到, 我咪化妝先囉! 其實都化得好求奇, 叫做有化就算! 出到嚟已經係忙到甩碌, 咩briefing都係我, 不過都有時間影吓相咁啦! 7點幾開始叫人入席, 大致上都順住去GE, 係老闆成日喺中間時間走咗去唱歌, 打亂哂D時間囉! 但大致上都順利, 遊戲亦冇出咩意外, 10點幾都差不多可以散, 但要等埋架車, 再車總監返去就可以回家! 整好哂佢地D嘢都點幾先瞓!