31/5/19

31/5/19.   FRI.    WARM

終於捱到星期五啦，今朝老公揍仔返學我就返工啦！買埋早餐返去食完就開工，冇嘢做都要搵啲嘢做吓啦，無端端又要開會咁，開埋啲垃圾會都唔知想點，之後組織完，都係要同阿姐報告一次先穩陣！午飯後幾位飯腳話上去睇煲，但比人搶到八八九九啦，所以都係行咗個圈就走，返到office我真係唔想得個坐字囉，所以去咗搵人吹水，下午都係做吓嘢啦，時間都過得快，我又周圍吹水呢，星期五應該係咁！放工閃人買埋餸返屋企，因為老公請咗病假睇佢個背部，所以要買餸返去煮呢！慢慢煮等佢地返到就開飯，之後都係如常洗碗打掃，捉仲爺去咗瞓覺就沖涼摺衫休息！

30/5/19

30/5/19.    THU.    WARM

今朝佢地都算早起到身出門口，搞掂哂佢地老公就揍佢地返學，我先慢慢梳洗出門口！返到公司都係做嘢啦，阿姐又一早出咗去喎，總之都係要做嘢，但總算捱到星期四了！午飯後就hea囉，可以點啫，本來心情都OK, 咪又係關於啲email囉，大公司就係呢啲煩， 要求black and white到一個點！放工返去等開飯啦，睇埋啲功課就開飯，食完洗碗抺地等，個人唔係幾好情，仲爺唔知係咪feel 到，叫我唔洗講故事等daddy講！

29/5/19

29/5/19.   WED.    RAIN+

今朝雖然子元佢地係遲咗少少出門口，但都不至於會遲得咁緊要嘛，但就因為有架旅遊巴同架的士玩嘢，搞到塞車塞到去瑪嘉烈，見到子元打卡都08：00：26我就心知遲到，加上程生又問子元有冇遲到，我就係咁找資料睇吓有冇supporting可以找到，打去學校備個案都好，最終返到公司，睇多次e-class，係show8：00但又話準時喎，真係一天都光哂！今日堅係冇嘢做，真係打機睇書都打到悶睇到悶！終於到食午飯，提早食咗先因為收到料開倉，又上咗去睇煲，但其實都冇咩買，跟手反而去咗買消毒劑，5個差不多級數的一齊吹水先啱口嘴型嘛！ 下午阿姐放假，我梗係放縱啦，自由足全個下午，放工先收到電話，話出去食，咁都不大問題，一時又話美孚一時又話長沙灣，咁我都要返去接咗子元先，又再返番長沙灣，咁食飯都冇咩，係走時叫仲爺收機又唔肯即刻收，大包咪又係到鬧囉，但真係好嘈囉，一點面子都唔留比人，我真係唔識同佢溝通架！快手返去趕得切睇倚天，然後咪沖涼同捉仲爺瞓覺，子元啲功課做極都做唔完咁，都唔知係功課多定佢做得慢！

28/5/19

28/5/19.    TUE.    WARM

今朝又要揍仲爺返學，所以都要早啲叫佢起身出門口！買埋早餐返公司食啦，然後就係搵啲嘢做吓囉，朝早啲時間真係好難過，做嘢其實都係做吓樣，等下午阿姐放咗假就可以自由了！午飯同阿La食生日飯，但E-max間韓國嘢真係好一般，份量又少，唔怪得知咁少人食！下午返去先填咗個税表，然後都係打機吹水睇小說啦！放工去啟業買餸，然後才撘巴士返去，煮得嚟佢地8點半已經返到，又係掛住睇倚天啦，沖完涼搞掂埋兩位少爺瞓覺，就可以休息吓！

27/5/19

27/5/19.    MON.    RAIN

又到要返工的日子，真係好想射波休息吓，但休息又有咩好做呢，都係返工吧啦！買埋早餐返去食完就開工啦，但其實今日都係冇咩好做，基本嘢做哂又唔係好想打機喎，所以都係睇吓尋秦記，午飯後都係打機咋，下午啲時間過得勁慢，又冇人吹水喎，真係過得好難！睇住小說咁捱到放工，返屋企後要幫手開飯，期間又要趕仲爺做功課，食完就叫子元幫手，快啲完成咗洗碗抺地等就可以睇倚天，然後又要趕仲爺去瞓覺，比練習笨元做，我都唔想太緊張考試，放鬆啲好！

26/5/19

26/5/19.   SUN.    RAIN

今朝本來笨元要過海比賽，仲爺就中午後踢波架，但兩個都因為落雨唔洗踢！出去食個早餐，再去街市買齊兩餐餸就可以回家閉關！先同仲爺做埋啲功課，子元就做練習咁啦，但要兩邊走都係唔掂，顧得一邊顧唔到另一邊！食咗午飯就繼續啦，還要幫仲爺錄埋個畢業謝師宴上影片！幾經辛苦先叫做錄到呢，又要夾喘時間唱歌喎！然後放仲爺比DADDY溫點書，但原來叫男人教呢啲係搵自己笨呢，鬧多過教真係好煩！所以差不多搞掂笨元就去救吓佢啦，今日都叫做溫夠啦，落去惠康買啲日用品食品等等！回來煮埋老公未煮完的晚飯，邊睇電視邊食啦，沖完涼早啲趕佢地瞓，然後我就要幫仲爺隻畢業公仔裝身，縫到手指都痛，不過又真係幾靚仔！

25/5/19

25/5/19.    SAT.    HOT

今日都係充實的學習溫習日啦！朝早8點幾起身，揍子元去補英文， 我就同仲爺食大家樂早餐，然後去咗遊樂場比佢玩完一輪就返去接子元，回家後開long table一邊做功課一邊溫書，夠實充實，期間我仲可以出吓facebook post呢！1點多才出到門口揍仲爺去音樂，條友仔入到地鐵先話急尿，好在有個嬸嬸叫我可以上去問番工作人員，佢地可以比我地去到廁所呢，結果差不多2：15才去到學意樂呢，我就行陣食咗個午餐買埋麥當當才去接仲爺，撘171返得屋企都差不多5點，只係幫子元對咗功課，6點幾7點出咗去葵芳食晚餐，食咗間泰國嘢好食呀！老公就送我同仲爺返屋企，佢同子元去踢波，返去沖涼睇電視捉仲爺瞓覺，我就打吓機摺埋啲衫！

24/5/19

24/5/19.   FRI.    WARM

終於捱到星期五啦，仲爺今朝竟然賴尿，都唔知幾點已經比佢嘈醒過兩次，跟住又發埋哂啲奇怪夢，好辛苦！一齊揍咗子元返學諗住去公司樓下食早餐啦，點知塞車塞到咩咁，仲爺食得嚟都好晏，返青衣時又塞車，所以下次都係唔好車我返去啦，去東九龍實在太難遇時間！今日真係超閒，閒到我差不多睇咗一日小說，又幫阿同事找吓啲升小資料咁啦，終於捱過咗一日啦！放工老公嚟接我，返去預備好煮飯啲嘢，揍咗仲爺去小童就返去煮飯，程家揍埋仲爺一齊來開飯，飯後都係大人吹水組路就玩啦，11點到佢地走啦，我地咪沖涼休息囉！

23/5/19

23/5/19.   THU.    COOL RAIN

今日老公要返工啦，所以我地要各自返工返學，揍咗仲爺去青衣我就返工，今日開始真係冇咩要忙，完全可以hea！食完早餐都係hea, 只係停時間過！午飯後打機，下午都係冇咩好做，打吓機又睇吓小說等等，夠鐘返去就順路喺啟業，買埋菜先返去，因為今晚食腸蛋飯咋！返到去見到仲仲喺梳化瞓咗，等老公買埋叉燒回來，就叫仲仲起身做埋啲功課！食完飯睇埋功課都差不多11點，好攰！

22/5/19

22/5/19.   WED.    WARM

今朝老公都係請假，仲爺又一早起咗身，所以齊齊揍子元返學後就直接過九龍灣，食埋早餐仲爺先返學我就返工，其實都係做吓嘢啦，不過都係唔係好想做，多餘嘢，阿姐講嘢堅係冇用腦去同下屬溝通，經常性家長式咁，邊有人鍾意同佢溝通！做到午飯就食嘢打機啦，下午都係邊做公事邊做私事，放工返去後接埋子元，就喺長沙灣食埋飯先返屋企，快手沖完涼睇電視，要睇倚天嘛！跟住都係捉仲爺瞓覺對功課等等啦，嫲嫲今日過來接哂啲衫，咁晚上就輕鬆好多啦！

21/5/19

21/5/19.   TUE.    WARM

今日老公射波，因為知道今日有粗重嘢做，佢又扭傷咗頸，所以都係請個假好啲！咁就可以揍仔返學，我就可以輕鬆啲返工！返到去都係做嘢，仲食咗好豐富早餐，因為之前食得少好失落！做咗一朝又係時候食飯，食完都係休息吓啦！下午又係做嘢呢，快啲做好想自由吓，但都係冇機會！放工老公嚟接我，睇吓仲爺受傷的眼角啦，中午時學校打嚟話仲仲打網球時比同學個拍打到眼角損咗，咁都唔算好嚴重，少少腫都流血啦，不過佢地好得快，小心同佢處理傷口就得！返屋企就慢慢執屋煮飯，等子元佢地踢完波返嚟，睇埋倚天就快啲洗碗抺地等等，還要睇埋子元功課，打暈埋仲爺先有得沖涼休息！

20/5/19

20/5/19.   MON.    HOT

又變番星期一啦，真係好唔想返工，鬼叫你窮呀頂硬上！揍咗仲爺入青衣比嫲嫲就返工啦，今日其實都冇咩趕，所以可以慢慢做，午飯後都係打吓機啦，下午出埋啲通告就休息吓打吓機啦， 反正阿姐又出咗去！放工直接返屋企， 今晚嫲嫲出咗嚟， 因為老公OT，返到去就有飯食，然後都係睇吓電視啦，仲有要同子元對功課溫習，條友唔片唔得！

19/5/19

19/5/19.   SUN.    VERY HOT

今朝7點幾仲爺就大聲播歌嘈醒我，咪出去片佢囉，但之後都瞓得唔好，又記掛住唔知醒，因為子元10點又要補英文！最終都9點多起身，子元補英文我地就去食早餐，跟住仲爺就返去溫默書，再幫子元對功課，等老公帶咗仲爺去踢波就同子元溫書，仲有兩星期就大考，今次事關重大，我都唔敢放鬆，先同佢溫左最弱的中文，又要手練習等等，仲爺踢完波就回來一齊去麥當當食午飯先，回來繼續！到6點幾都叫做溫埋常識，跟住叫佢做數學，我地就去咗買餸，喺屋企食真係扺好多嘛，又冇咩地方要去，無謂為出去而出去，食完睇吓電視咁，明天又要返工返學啦！

18/5/19.

18/5/19.   SAT.    VERY HOT

今朝老公返早，子元又一早要去比賽，所以我瞓到9點幾10點先起身啦，煮好早餐同仲爺食埋，就要捉佢做功課，其實淨番唔係好多，但因為玩緊，基本上係唔願做，所以寫嗰幾句句子足足寫咗差不多2個鐘，搞到我又發顛！因為我唔可以咁伴住佢做架嘛，我都有我的家務要處理！換咗兩張床單算係咁啦，沖個涼先出門口，因為冇開冷氣嘛，今日真係好熱！揍仲爺去學音樂，真係好遠！喺個商場悶到都唔知食咩好，唯有等吓美心個tea啦，跟住又要買麥當勞比仲爺，然後接埋仲爺就可以撘巴士返去，今日肯定好塞車，我落車時已經差不多5點，返去還要捉仲爺做埋啲功課摺埋衫咁，子元就自己努力啦，老公就瞓覺！到7點多叫醒佢出去食晚飯，終於試到上次間米線，都算唔錯！食完車我地返屋企，佢就帶埋子元去踢波，我就同仲爺返去囉！得佢一條友時其實都算合作的！比佢睇幾part變型金剛就要去瞓啦，我還有家務要做呢！

17/5/19

17/5/19.   FRI.    HOT

終於到星期五啦， 今個星期好似過得好慢咁！老公要返早，我揍仲仲入青衣交收然後返工啦，今日都好趕喎，Shuttle塞車差啲遲到！今日堅係冇嘢做，但又唔得成日打機，時間過得超慢！午飯叫咗外賣，試咗間新嘢，食粉嗰啲都幾好食啦！ 食完我就去咗買餸，因為今晚合唱團完就上嚟食飯，太耐冇煮咁多人大，幾難預份量！等到差不多9點15先返到，飯就好快食哂，係再吹吓水，洗碗抺地等等，佢地都11點先走呢！

16/5/19

16/5/19.   THU.    HOT

今日笨元放假，老師偷懶日嘛，但佢都要係起身揍仲仲返學呢！我就如常返工啦，返到去都係食早餐做嘢啦，今日都係打下機又做吓嘢咁過，午飯後就係打吓機啫，下午預好時間做口水多過浪花時先入士多房寫水樽，咁就差不多做足個幾鐘，聽哂就做完啦，可以出返去再做其他嘢，然後又放工啦， 撘巴士返到去都係半個鐘咋，真係超快！嫲嫲覆完診一齊去咗食上海嘢，食完快手回家睇倚天，今晚好hea呀，都係早啲瞓啦！

15/5/19

15/5/19.   WED.    HOT

今日老公係放假可以揍仔，我就如常咁返工啦，IVY請咗病假，我嗰邊好寧靜，應該做吓嘢啦，有嘢咪做吓咁囉！但時間過得好慢，幾耐先等到1點有得食，今日食意粉，我食咗兩盒呢！下午都係做嘢啦，話咁快又放工啦，行出去撘巴士，返到去對定功課等食晚飯，然後都係睇倚天再休息啦，今晚又好眼瞓！

14/5/19

14/5/19.   TUE.    HOT

今日老公又係放工返嚟接仔返學我就返工啦，只係買咗包做早餐原來真係唔夠飽！朝早好努力咁做吓嘢先，因為下午大部份人都出哂去開會，可以自由呢！午飯後都係打吓機啦，要到3點幾先走哂啲人，先同Catherin吹吓水，跟住又同mandy佢地吹，吹到差不多放工呢，老公嚟接我，但因為塞車都7點幾先返到去，返去煮埋飯等老公揍咗子元放踢波返嚟，邊食邊睇埋倚天，跟住都係要洗碗執吓佢地功課啦，今日都好眼瞓，老父今晚終於唔洗返丄，可以早啲一齊瞓 。

13/5/19

13/5/19.   MON.    HOT

今朝7點幾就要起身，因為買咗飛睇伏仇者呢，老公放工回來煮早餐，食埋先出門口，約咗Joe佢地睇，不過今次只係梓行可以嚟，梓朗而家只可以醫院同屋企架咋！去到買埋嘢食就入場，仲爺當然都係屈蛇啦，睇3個鐘嚟講佢兩隻細都算係咁，冇走出位，但仲爺睇到鞋都甩埋真係服咗佢！子元就睇得好投入，我都睇得好投入，睇到會流淚添！不過真係要睇齊哂咁多套先睇得掂呢一集囉！完場去食埋嘢就分頭了，返屋企老公睇住仲爺，我就幫子元溫一溫書先，4點多要出門口，子元又要足球比賽呢，個豬仔又真係睇得幾好喎， 但睇到12碼時到佢即時死亡環節射失咗，佢就好唔開心，不過呢啲都係成長嚟嘅，必需要經歷先學習到！最終睇埋A隊爭埋季軍先回程，返長沙灣快食個晚餐睇埋倚天就回家，老公送咗我地返去佢就返工了！

12/5/19

12/5/19.   SUN.    HOT

今朝老公放工返嚟就揍咗子元去比賽，我就瞓到9點幾先起身，仲爺走咗入子元房玩LEGO，實比阿哥發現啦！唔係太想煮早餐，所以齊齊食咗件蛋糕飲咗嘢就算，hea吓幫子元睇埋功課，又打吓機咁， 本來諗住同仲爺砌LEGO，但見佢個LEGO櫃咁亂咪想同佢砌番散哂嗰啲囉，加上子元佢地又返咗嚟，老公又想瞓吓先，於是就差不多2點幾先出門口去食啲嘢行吓！最終去咗南山邨食車仔麵，隻笨元仲好傻豬咁爭住比錢，算唔算係請我食個母親節午餐呢！食完去咗影吓南山邨個影相景點就返屋企，仲有3星期就考試，但好似係我勤力啲囉，已經睇定大約範圍先，唔係都唔知點同佢溫，今次真係要見人，我仲緊張過佢呀！晚飯老公煮咖哩飯，好好食呀！9點幾佢又出門口返工啦，明早買咗飛睇伏仇者4呀，又要睇早場呢！

11/5/19

11/5/19.   SAT.    HOT

今朝未夠8點就比人嘈醒，真係好慘，所以老公整咗早餐都冇咩胃口食，老公揍咗笨元去音樂，我就同仲爺做功課，佢真係要做幾個鐘，因為做吓又行開，做吓又停下咁，真係做到12點幾，又要出門口啦！過去學音樂嘛，老公就去左嚟瞓， 揍咗仲爺過去就食嘢啦，接佢放時就買麥記，返到嚟老公剛好買完餸，咁就可以揍住啲仔，我去咗惠康買嘢，跟住返去都係預備吓煮母親節晚餐，阿媽奶奶佢地全部上來食，我其實都係忙忙碌咁啦搭，最終9點幾都走哂 我就清潔埋再沖涼睇電視呢！

10/5/19

10/5/19.   FRI.    COOl

今朝兩隻仔早咗起身，所以可以一齊出門口，揍咗子元返學就直接返工，老公同仲仲一齊喺公司對面食埋早餐，佢就再揍仲爺返學！返到公司都係hea吓再開工啦，一開就冇得停，真係好慘呀，點解今個月咁忙架，成日要人做埋啲無謂嘢，可惡！午飯其實真係唔想提公事囉，所以嗰時聽吓La姐講廢話都好好笑，但佢地反咗面冇得一齊食飯，真係幾悶吓！下午都係做啦，唔係可以點呢，不過都係未達標架，我想做好的都未做得哂，激死！放工撘巴士返去真係好快，今日子元又唔洗踢波，就不如喺屋企食埋飯仲爺先去小童，都係老公揍咋嘛，我可以喺屋企睇電視係最開心呢！晚上佢又要返夜啦，我就K.O.埋兩隻豬可以自由時間！

8/5/19

8/5/19.   THU.    COOL

今日又係揍仲爺入青衣同嫲嫲交收啦，跟住都係買早餐返工，今日返半日啫，下午去覆診又可以放半日！返到去其實都冇咩，但阿姐成日自我想像啲嘢就常係真，然後又話人唔報告比佢聽，咁我真係唔識做囉，今次我問心無愧，只係因為佢係上司我係下屬，佢講就啱我講咩都錯，咁根本就係佢錯！為咗少少事搞咗我一朝真係好煩囉！午飯快食完出門口過去，過到門診啱啱好，個醫生就真係hea 到你唔信囉，3點唔洗已經攞埋藥可以走，就去長沙灣幫子元攞埋佢張身份證口呢！然後就去咗食tea, 因為還要去接仲爺呢，食完tea 回來做功課，7點幾才煮飯，因為都未肚餓！晚上K.O咗佢地還要摺埋衫先有得瞓！

8/5/19

8/5/19.   WED.    RAIN

今日都係要揍咗仲爺返學先返工，老公就瞓過龍遲到啦，我地就準時囉！返到公司食埋好難食的蕃薯做早餐就開工啦，又係好忙咁，或者係呢排都唔好太閒先，廢事煩！午飯後都係打吓機啦，下午啲人上哂嚟開會好嘈，不過我都係照做嘢啫！放工都仲落緊雨，但都照撘巴士返去啦，塞埋車都係7點返到屋企，快到呢！今晚要煮飯，老公唔識煮嫲嫲買的餸，所以我又要煮又要洗，不過睇住電視咁又好快做哂，還要對埋兩位少爺的功課呢，11點幾先有自由時間！

7/5/19

7/5/19.   TUE.    COOL

今日都係如常咁返工返學啦，老公放假可以揍仔，我就唔洗咁辛苦啦！返到去都係食個早餐先啦，今日只係食蕃薯咋，跟住都係做嘢啦，今朝都係冇停過手，點解可以咁忙架！午飯後吹吓水睇吓機咁啦，同埋老公話奶奶過唔到錢比我地，今個月點搞呢，老公真係要學識點開源節流啦，唔係永遠都唔會儲到錢！下午都係做吓公事又做吓自己嘢，捱到放工先嚟落雨，不過笨元就唔洗踢波，我就用咗最慢但最唔洗淋雨的路徑返屋企，返到去都算有飯開啦，跟住就係洗住碗睇電視等等，對功課沖涼打暈埋啲仔就摺衫啦，兩日冇摺又摺餐死！

6/5/19

6/5/19.   MON.    COOL

5月又突然凍番，真係好奇怪的天氣！今朝要自己揍仲爺入青衣，佢又喺到慢吞吞咁激死人！揍咗佢就返工啦，今日都真係有嘢做架，扮哂嘢都要係咁做啦，仲打機呀！午飯後同Mandy去咗759買紗巾，同佢傾吓BB嘢幾開心嘅，好過成日都係講公事呀，打工真係為錢架咋，完全唔係為咗要升，所以真係唔好搞我！下午都係忙啦，其實我都唔想咁忙架，真係好Q煩！放工我都係去撘巴士，Mandy又跟我一齊試吓撘，雖然有雨又塞車，但其實都仲係快囉，真係好正！返到去有飯食，嫲嫲出咗嚟煮飯，老公揍咗子元入大埔足球比賽呢！食完飯捉仲爺做埋啲功課，睇埋倚天就沖涼，還要睇功課等等才有得休息！

5/5/19

5/5/19.  SUN.    RAIN

今日雖然放假，可以瞓到幾時起身都得，但10點幾都要郁身啦，仲爺一早醒咗啦，笨元就唔係早我好多， 梳洗完整好早餐佢地食，然後就同仲爺做埋啲功課，又差不多要執嘢出去，揍仲仲去踢波呢！點知去到又落雨，等咗陣都可以再踢，但都踢唔足，下次再補！回程行返去撘巴士都幾遠又落住雨都幾煩，最好笑仲爺無端端講，話佢6歲計數就會識架啦，叫我忍耐吓喎！頂。。。呀。。。有冇咁好笑呀！返到去沖好涼執好嘢先醒起仲爺未溫默書，但我地又要出去食嘢，都唔溫得咁多， 隨緣啦！去長沙灣食完嘢就去咗mega box行，因為老公要去將軍澳踢波，所以行完就過去，但因為落住雨咁其實都唔係太好feel！好在踢咗半場就走得，時間關係返長沙灣食埋晚飯就返屋企啦！

4/5/19

4/5/19.   SAT.    COOL RAIN

又一個忙碌的星期六，8點多起身準備出門口，子元9點要補英文，我就同仲爺喺大家樂食個早餐， 然後過小童報名，抽到第一時段第22個，基本上報咩都得，不過我地就唔算好多嘢啱報，不過要報的都好快搞掂，咁就過去接番子元，返屋企兩位少爺就做埋啲功課啦，做到差不多1點又要揍仲爺去學音樂，子元就獨留在家啦，佢都識照顧自己架啦！學完音樂撘171返嚟撘咗好耐呀，差不多5點先返到，做埋啲功課囉，K3就要學退位的減數，痴線架！做完功課接埋子元就去食晚飯，佢地話要食KFC喎，咁快食完就回家，又要睇電視咁！老公都冇咩機會吹吓水，佢又要幫子元諗條好深嘅數，食完嘢回家佢有佢打機，明天返早佢又早瞓啦！我同子元就睇埋Mavial電影先瞓！

3/5/19

3/5/19.   FRI.    WARM

終於到星期五啦，今日都夠哂忙，時間都過得好快！老戈就揍哂啲仔返學我就返工啦，食埋早餐做嘢啦，轉個眼已經放飯，實在係太快啦，都係睇吓電視吹吓水咁啦，下午更加冇停做到5點多，幾廿樣嘢一齊嚟，仲要開箱喎，有貨返嘛，都話唔洗出街都買均天下！放工老公嚟接我，仲爺瞓咗瞓到返上樓都繼續瞓，係去合唱團先肯起身！等佢唱完就同程家晚飯吹吓水咁啦！差不多11點先返到去，仲要快手沖涼趕佢地去瞓！

2/5/19

2/5/19.   THU.  WARM

放咗日假又要返工啦，老公回來接仔返學我就返工啦，返去都係食早餐開工啦， 朝早都唔算多嘢做，食完個午飯又未停過手啦，雖然好多人出出入入，但我地都係好快手好專心咁做到囉， 係阿姐先咁多事實，又話嗰兩位經理嘈，又話做唔到嘢，真係好冇適應能力！放工竟然落雨，但落到樓先發現，唯有痴啦！落雨天去撘巴士，三加車都客滿，又要塞吓車咁，但我都唔洗7點已落到車，真係又比我發現到更平更快的方法！落車等老公嚟接我，佢去咗接埋嫲嫲再來接我，去咗荃灣食中菜咋，食完落樓下影吓TSUM TSUM就回程啦！沖完涼Barry上咗嚟，攞咗啲手信比我地食，仲打機打到11點幾先走呢！

1/5/19

1/5/19.    WED.    HOT

今日放假一天，老公又返夜，今朝瞓瞓吓佢就返咗嚟瞓啦，我都瞓到10點幾先起身，見到兩個又喺廳打機就火都嚟，鬧番兩隻嘢入房做功課，跟住起身梳洗囉，叫醒埋老公12點幾先出去食個早午餐！然後直接入沙田啦，因為要參加同事囡囡的生日會，時間尚早喺附近商場行個圈先，去到都係玩啦，又波波池又有機打，又可以唱吓K咁，共玩3個鐘又食吓嘢咁啦，5點幾散場就去買埋餸再返屋企煮飯食，仲爺瞓咗笨元做埋功課老公打機，食完飯睇電視清潔吓啦，10點到老公要返工啦！