28/2/22

 28/2/22.    MON.    COOL

今日都係如常咁返工返學，喺屋企終於找到方法睇到更表，返到去就唔洗咁急！不過今日都係悶架啦，但悶都好過忙！午餐躲起嘆完先慢慢返去，終於等到放學啦，去公園接返細佬，俾佢玩一陣，然後返屋企，我又要準備出去買啲餸然後接德仔，返到嚟都係預備晚飯啲嘢啦，等德仔走咗老公就煮飯，今晚食鴨腿湯飯，真係好好食！之後都係係咁追倚天屠龍記，睇到10點先肯完！

27/2/22

 27/2/22     SUN     COLD**

今日冇出過街呢, 朝早瞓到8點幾起身, 子元今日要比賽, 仲要作客上到Harrow, 所以我同仲仲喺屋企算, 摺衫吸塵抺地做家務, 等佢地跟完回來買嘢食, 食完都係睇吓電視啦, 老公又要睇波喎, 最後要射12碼射到第11球先掂! 之後子元又要睇倚天啦, 一路到食完飯都睇到10點幾先肯瞓!

26/2/22

 26/2/22   SAT.    COLD

星期六都係休息咁過啦！朝早起身煮好早餐快啲食完又要去球場啦，兩個都要踢波，踢到12點多返到屋企，佢哋就沖涼休息，我同老公做出咗去Broadway買嘢食嘢先，喺prime mark 買咗啲都幾抵嘅嘢，返嚟買埋午餐比佢哋食再買啲菜咁又返屋企休息吓，等仲嘢睇完波，就叫佢做埋啲功課，今日都算做得快，同埋而家知道咗其實唔使全本做晒，就快咗好多！煮得晚餐嚟都已經八點幾，真係好肚餓，又係邊食邊睇倚天屠龍記，所以沖完涼搞得來成11點幾佢哋先去瞓覺，不過明天星期日都唔怕啦，哥哥踢波又踢12點！

25/2/22

 25/2/22     FRI.    COLD

終於到星期五啦，都係咁返工返學啦，其實啲英國人有時都幾盟塞，做嘢都唔識靈活變通，我學生喺hall聽緊talk，我去開個email返今日個安排，其實都唔係咁大問題，我都唔明點解咁緊張，其實放飯嘅時候都有半個鐘係冇人跟住佢㗎啦，真係唔明有咩分別！第一堂原來係想cookery，忙忙亂亂咁，跟住就上RE，其實冇嘢要搵人嚟扮做都真係幾辛苦！放完Rick到最唔想嘅英文堂，因為又係嗰個好麻煩嘅Mrs Rice上，佢真係令人好大壓力！其中一個學生一上堂又話唔舒服，個Miss就叫我帶佢出去reception，但係帶到佢出嚟其實又唔知做乜，最終reception就call佢屋企人來接走佢，不過搞咗成個幾鐘，真係等到吽咗，不過都好嘅起碼唔使喺課室望住Mrs Rice個樣，又唔使做嘢只係坐悶啲姐！終於等到我負責個女仔食完飯，我可以自由時間啦，然後返去上嗰堂英文，我竟然可以100%唔明，都真係幾難！最後嗰堂上food Technology，第一次同letty同一個課室上堂呢，不過呢堂又係好悶，睇在佢上完就放工嘅份上忍埋佢！返到去屋企又要快手整好啲嘢帶佢哋去搭巴士去打籃球，然後我就買餸返屋企整好又要去揍德仔，做好晒啲日常，佢走咗我就摺衫煮飯等佢哋打完波返嚟食飯，子元梗係又要一邊睇倚天一邊食啦，結果睇到10點幾十一點先瞓！

24/2/22

 24/2/22     THU.    COLD WIND

今朝出門口就落雨，真係好慘！仲仲去到學校門口，有家長喺度，放低佢就可以走喇！返到學校，就晒數準備去開工啦，今日都係同Sammi一齊，所以都係輕鬆嘅，不過係費事再打機啦，佢哋真係好奇怪，用下手機啫，唔使話cancel咗個group，就係為咗唔洗喺課堂時用WhatsApp聯絡，咁咪即係斬腳趾避沙蟲！悶悶地想完晒全日嘅堂，又係時候準時收工，去公園接埋仲仲，俾佢玩陣遊樂場就返屋企，又要預備出去買啲今晚嘅餸，然後又去接德仔。等老公煮好今晚嘅餸，又要整魚香茄子又炸雞髀，簡直係試用過炸窩！

23/2/22

 23/2/22     WED     COLD

今日揍仲仲返學要去正門嗰邊, 好在有同學仔喺到, 我又可以快手放低佢就返工! 今日又係輕鬆系列, 上吓堂維持吓秩序咁, 夠鐘就放飯, 今日都叫做食耐咗少少, 因為返到去都係悶! 到佢地放飯時諗住可以喺大房休息吓, 點知大房又被徵用, 最終去咗library, 夠鐘上埋最尾嗰堂就放工啦, 去公園接埋仲爺就回家, 收拾吓又要揍仲去學結他, 又要去揍德德, 返到嚟又煮飯咁, 其實都好忙! 而家每日都充實到冇咩自由時間呢! 

22/2/22

 22/2/22.    TUE.    COLD

今日終於可以踩單車返工，感覺真係良好！放低仲仲喺學校門口，咁我又可以好快返到學校，有時間啲嘢先去課室！今日都係屬於輕鬆系列，上嘅堂都點有趣，又數學、體育同音樂！不過係食飯時間遲啲要等到1:15先可以食！放學都要準時，返到去快快手手搞掂又要湊佢哋去搭巴士打籃球，然後去買餸返去整好又要去湊德仔，今日阿德都好乖，成日都攤係梳化！可能佢知冇人同佢玩都費鬼事肉。等佢阿爸你湊番佢我又要煮飯摺衫，等老公湊佢哋踢完波返嚟又準備開飯啦，之後又掛住睇倚天搞到10點幾先至沖涼休息！

21/2/22

 21/2/22     MON     WIND

今日放完term break返學啦, 一出門口上單車, 點解有啲怪聲又咁慢, 馬上停車睇睇, 原來有條軚爆咗, 即係唔踩得啦, 即刻要諗點算, 收番哂啲單車入屋, 攞細佬架滑板車, 快手揍咗佢返學先, 然後諗住有佢架滑板車, 快得幾多得幾多, 但都知實遲到架啦, 所以send 咗落whatsapps先啦, 其實都唔算遲太多9:05都返到去, 已經馬上去滙合, 好在今日都係跟samia, 可以輕鬆啲, 上完兩堂英文小息, 類似自修堂嗰啲, 係我部門個老師上, 我食完飯返嚟, 佢同我講開有一日散job時喺一班英文堂時, 嗰個老師話我嗰堂冇咩幫手又睇手機, 咁我就好記得係邊堂啦, 嗰日教緊修辭, 我完全唔明, 係咁google translate先知佢講咩, 咁你教啲嘢咁深, 個妹又唔係唔上堂, 全班得嗰5條友, 其實都唔知佢想我幫咩, 阿頭都好明白咁, 佢話唔係怪我我當係真架啦! 上完呢堂去番大房, 之後上埋最後一堂就放學, 今日我要等埋letty, 因為要痴佢車放學, 好在今日子元放早, 可以去揍仲仲, 又冇嘢學! 返到去又係要做住家務咁啦, 4點幾又要去揍德德, 老公回來馬上幫我睇吓架車有冇得救, 好在換咗軚可以, 希望唔再有事, 今朝踩咗架板車真係好辛苦! 

20/2/22

 20/2/22     SUN.   RAIN

話咁快到最後一日假期啦！都係好似平時啲星期日咁過啦，起身煮早餐，子元去比賽，我就喺屋企做家務煲劇！同阿媽傾完電話，就出去中超買嘢，但丁麵又冇，好灰！買完回來又繼續睇劇，晚餐打邊爐，搞到10點幾先沖涼休息！

19/2/22

 19/2/22.    SAT.    RAIN

今朝子元要去練波，煮好麵俾佢哋食完出去，點知仲爺又話要去打籃球，但係我未整得切嘢，咁就不如老公回程序接我哋先出去，但去到球場先發現唔記得帶籃球，唯有去玩遊樂場先！返到嚟佢哋又唔會出去㗎啦，咁我同老公就去Costco攞埋張會員卡，然後去買下肉，老公仲買咗部炸嘢用嘅機，因為呢度啲火好唔夠，成日都炒唔到嘢，咁不如直接買油炸鍋，咩都可以炸，有排玩！買完再買埋午餐返嚟，食完又開始無所事事，上網整下野，打下機咁又唔係時候食晚飯，沖完涼子元又話要睇倚天屠龍記，咁就一齊睇到10點幾先休息，今晚老公整咗牛油果冰沙，不過唔夠甜味！

18/2/22

 18/2/22     FRI     WIND

今日term break最後一日啦, 但竟然只係困喺屋企, 因為今日打風呀, 第一次感受英國打風係點呢! 老公朝早照返工, 但到我起身不久, 佢就話回程中, 因為woking嗰邊開始停交通, 所以公司都要閂門! 不過佢返到嚟都係打機, 同埋煮咗餐午飯啦, 我地都唔好得好多, 搞掂咗點幫嫲嫲報關寄嘢過嚟, 就開始打機, 其實都打咗好耐, 因為仲爺又喺到話輸, 好煩, 比我叫佢收機! 然準備好晚餐啲嘢叫老公煮! 又雞肶又牛腩煲又雜菜咁, 飽得滯!

17/2/22

 17/2/22.    THU.    COLD

今日老公請咗假去見工，所以朝早喺到阻住哂啲流程，我又有遇佢早餐咁佢煮麵又阻住我個爐咁，又多一堆嘢要我洗，總之就麻煩啦！食完早餐同仲爺做功課，老公12點幾一點就見完工啦，不過佢話應該機會不大！做好功課出咗去，老公之前成日想去食一間蒲撻，又真係幾好食！跟住都正式要找地方食午餐，去咗食一間越南粉，出咗嚟食嘢都預咗八九磅一個食物㗎啦！食完行咗陣街，但真係冇咩好行，所以都係返屋企，又要去買餸又要去接德仔，時間都好趕！我晚餐整咗個炒飯俾佢食，係老公整，佢順手整埋自己明天個午餐！之後都係食晚飯沖涼，然後再食糖水，今晚有幻彩明珠，再咁研發落去，應該成個松記食開嘅嘢都整得七七八八！

16/2/22

 16/2/22     WED     RAIN

今朝唔想食麵做早餐, 所以出咗去超市買嘢, 返到嚟整pancake煙肉等等! 跟住又要趕仲爺去做功課, 今日好少少, 做到12點幾啫, 跟住我就煮午餐, 邊睇上流戰爭邊食啦, 食完又冇咩好嘢睇喎, 好衰咁撩仲爺打機, 子元又一齊打咁, 又借啲二唔溫書啦, 玩到4點幾要去接德仔啦, 有啲落雨又大風咁, 過兩日好似打風咁, 好在唔洗返學啫! 回來都係準備晚飯咁啦, 咁又一日啦! 晚飯時要睇電視, 啱啱做宵夜嘛, 一齊搬張枱去電視面前食呢!

15/2/22

 15/2/22     TUE     COLD

今日唔係因為要揍德仔都唔會出門口, 反正全日都係咁落雨, 都唔想出去! 朝早瞓到8點幾, 起身煮完早餐食, 10點就叫佢地去做功課, 仲有同婆婆嫲嫲講吓電話拉, 12點幾煮午餐食, 可以邊睇上流戰爭邊食嘛, 之後都係叫仲爺快啲做好埋功課啦, 我就到差不多夠鐘去接德仔, 隻友仔今日食飯食得唔好, 搞到我發哂火, 最終叫仲仲同佢搶食佢先繼續食呢! 休息吓處理吓公務, 食完晚飯洗碗沖涼休息! 第二日假期又咁過咗啦!

14/2/22

 14/2/22     MON     COLD RAIN

 Term break的第一天又是情人節, 但其實咁多年都冇咩特別慶祝, 我都唔係嗰啲好鍾意慶祝節日的人! 老公今日請咗假, 朝早揍咗子元去球場試腳, 回來後處理埋申請另一間銀行戶口的事, 再要親身去一次, 因為要做identity proof, 老公都要去問番點解張卡未寄到, 個原因真係好痴線, 佢竟然寄咗去香港個地址! 咁咪安排寄嚟分行, 星期六嚟攞囉! 午飯時間去咗食日本拉麵, 仲買埋飯團! 又返番broadway因為老公想買多件羽絨, 啲褸唔夠暖呀! 買埋菜就回家, 收拾吓咁, 老公又要去接番子元, 我就4點幾先去接德德, 今日冇煮飯比佢呀, 買咗三文魚飯團, 佢咪又食得好開心! 晚餐老公整牛扒啦粉啦焗大菇啦, 都多到食唔哂! 未洗碗已經好眼瞓, 琴晚太夜啦玩得, 今日又7點就已經醒咗, 好蝕! 

13/2/22

 13/2/22.    SUN.    COLD

今日係聚會日子，不過朝早仲爺要比賽，又趕頭趕命咁出去，其實10點先開始呢！打一個鐘就吹足一個鐘，攞命！返屋企等仲爺沖好涼，12點到就出門口，約咗Ealing友去榮業飲茶，因為冇得訂位都要去到等，終於等到兩張大枱，叫咗嘢食都好快到，食吓吹吓水咁，呢間食物好食啲喎！2點幾埋單過中超買嘢，本來諗住之後去打保齡，但原來Booking好快full晒，最終去咗Keith屋企，一玩就玩到10點幾，咁都好唔打保齡又慳返啲錢，反正都係想搵地方吹吓水，你哋屋企又夠大啱晒玩啦！

12/2/22

 12/2/22     SAT.    COLD*

今日子元要練波，咁仲爺又唔洗，咪跟埋去打吓籃球，回家後我地去買午餐，回來食完睇吓波，3點幾出去行街，淨係我地兩個，因為啲細唔想出去喎，我地自己行仲開心，鐘意行嗟就行咩，幾好！睇到6點幾買埋餸先返去，老公煮斧頭扒好要時間，9點幾先開飯呢！

11/2/22

 11/2/22     FRI.     COLD

返埋今日放term break啦，正，雖然都係要睇住佢哋，但係都叫做放假！咁朝頭早細佬去學校門口，大把人睇住佢，我可以快閃！返到去睇咗更表，都係跟Sammi啊，可以好輕鬆咁過一日！遇上每堂都只係跟着佢，加上今日啲老師都唔係好積極，有冇咩科我係強項，都教唔到佢哋，所以坐足一日，其實都幾悶，不過坐喺度有人工收仲可以點呢！食過午飯等到3點3，可以收工啊！子元話佢趕唔切車去接仲仲，咁我就快手踩過去湊咗佢返屋企換衫又要追巴士，咁先可以講到勤少班車去籃球場！買埋少少餸就返屋企整埋個蘿蔔牛腩唞一唞，又要去接得唔得！今日都算幾合作啦，其實有時都唔係好洗理佢，係煮飯時要抱住佢有啲攰！等佢返咗屋企我又要煮下飯然後繼續睇上流戰爭，食完晚飯洗碗沖涼都10點啦係時候休息！

10/2/22

 10/2/22     THU.    COLD

今日都幾凍吓，阿哥淨係着短袖加西裝褸返學逗號都唔知佢咩構造！湊咗仲仲返學校，交咗佢比同學睇住我就可以即刻返工，返去見到今日同Samia，勁開心！因為可以好輕鬆，跟住佢去上下堂就可以啦！ 11點幾去食午飯，有啲失望，今日嗰個千層麵好少，仲要配青豆！食完就返去繼續上咗架，打機打到就嚟冇電，問老師攞本出解書睇吓，幾有上進心！佢哋唔返返咗去大房，一齊睇吓YouTube聽吓歌，介紹咗佢哋聽Mirror，不過佢地唔識唔多肯聽，但比佢地睇mirror啲樣時，佢地首選靚仔都係姜濤！夠鐘要去上堂，上埋數學可以準時收工返去接仲仲，準備好晚餐就去揍德仔！然後都係晚間的日常！

9/2/22

 9/2/22     WED.    COOL

今日返工有啲趕，因為朝早多咗嘢整，要整自己個餐盒。揍仲仲去到學校門口，佢見到同學仔喺度，叫我可以返工啦唔使睇住佢，真係大個仔啦！返到學校，快手睇吓自己跟邊個妹妹，好彩今日嗰個係輕鬆系列，果然佢頭三堂都上英文，頭兩堂就睇電影睇下書，我又可以Hea下，第三堂我放飯，所以得返半堂其實都冇咩做！跟住到佢食飯，食完佢都係玩下broadgame，咁啱Lettie坐佢附近又可以同佢吹緊水，話佢知今晚去Costco，不過淨係大人去，佢可以借啲意輕鬆吓喺屋企！下午上咗兩堂都有所獲益，今日呢個算係好乖！準時收工去公園揍番仲仲，佢同女神玩緊，我就俾佢玩多陣先，不過返到屋企佢又手慢腳慢，搞到遲咗上堂，下次都係早啲出門口，唔係就蝕晒！接完阿德返屋企，快手煮晚餐俾佢食，因為叫咗佢爸爸早啲來接，咁我哋就可以去Costco行耐啲，順手申請埋會員證，咁以後我哋自己去都可以啦！入完課順手買埋晚餐返去食，本身拍唔到車㗎，好在前面架車係隔籬屋有兩句，可以叫佢泊前啲，等我哋泊到，如果唔係就差唔到電啦。食完飯pack埋啲肉就可以沖涼休息，都已經11點幾！

8/2/22

 8/2/22     TUE.    COLD

今日如常咁揍仲返學，交比同學我又趕返工，今日跟個year12諗住輕鬆，但都有攰位，首先頭兩堂佢未返我要做散工，上咗兩堂英文，小息後侷返咗就去上business，係旖飯自由囉，食飽去課室等，遇正火警演習，又要行番落去，攰死！放學閃人，見子元仲未上到巴士馬上call Mandy揍仲爺。返到屋企剛好，準備好就出門口，送咗佢地上巴士就回家預備晚餐，差不多5點要去揍德仔，只有我揍時就會定啲郁得發顛囉！等佢走咗又開咗煮飯，然後摺衫，食飯洗碗做家務，又變番好充實的日子，趕佢地做埋溫習，而家我知學校運作，子元冇得偷雞！

7/2/22

 7/2/22     MON     COLD

今日又要返工啦, 老公幫我將架單車轉番波, 起步唔洗咁用力好好多, 揍咗仲仲返學校有人交托就馬上閃, 返到學校都8:55, 快手泊埋車去office, 睇email又唔見有send今日更表比我, 其實佢地都幾甩漏! 找到我今日跟邊個, 就去課室等啦, 點知完全唔見佢喎, 去reception問完又話要我攞住walker talker返去課室等, 其實個妹今日遲返, 家長又唔打電話通知, 講真都唔知係咪佢自己唔返! 終於第三堂出現, 數學嘛我都係照教, 放飯啲細路又走哂去, 其實我唔明要排好隊有幾難, 係都要走咗去為咩! 喺飯堂見到Letty又吹咗幾句, 之後出咗去操場, 我偷拍咗Letty send比佢地睇笑吓! 下午堂返去上埋數, 都有教吓啲想學的學生, 最尾一堂諗住去到課室就安全啦, 點知落樓梯時佢又同啲同學玩推推撞撞, 結果又話撞到個頭頭痛要去reception, 叫佢都唔聽唯有由得佢, 等佢去到其實reception個女士都見慣佢地啲招數, 幫佢打咗電話, 佢家人梗係唔會理佢, 最終喺reception坐咗10分鐘咪返課室囉! 最尾上Bio, 雖然我唔太明但教計數部份都冇問題, 終於放工啦! 去公園接埋仲仲回家可以休息吓先去接德仔, 今日都合作, 老公又早返到幫到手! 晚飯後hea陣洗碗沖涼又可以休息!

6/2/22

 6/2/22     SUN     COLD

今日唔係下午自己出去買吓嘢, 門口都唔洗出呀! 朝早點幾起身啦, 子元要踢波嘛, 點知9點幾時又話場地太泥唔踢, 但對家應該又話要踢, 最終轉咗場轉咗時間, 遲咗1個鐘先開波, 咁佢地就照出去, 我就同仲爺喺屋企, 摺吓衫做吓家務咁, 打比阿媽講陣電話, 肚餓就蒸糕食, 期間一路繼續睇晧蘭傳, 好好睇嘛, 之後咪一路睇到差不多4點, 真係要出去買吓食物, 唔想放工趕頭趕命去買, 回來又要整埋隻雞明天可以蒸, 準備好晚飯就等大廚搞掂埋佢! 今日唔記得飲咖啡, 下午開始已經呆呆地好辛苦!

5/2/22

 5/2/22.    SAT.    COLD

今朝早未夠八點我就起身，摺埋啲衫又要煮早餐，兩個都要出去踢波，九點幾出門口，揍咗子元去球場跟住就到仲仲，佢今次係第一次練波！其他老公就去銀行問吓個銀行咭戶口點搞，都係煩㗎啦但係都要做！ 11:30踢完，先來接左我哋再去折返煮完返屋企沖涼，全部都泥鴨咁，又要洗鞋又要沖涼等等，出去食中午餐就返屋企，老公要開始整九大簋，我都要執一執間屋摺埋餘下嘅衫！仲有要同仲仲做埋功課！ Letty佢哋一家五點幾過到嚟，梗係要開枱啦，然後食盆菜，仲有要洗碗，不過有時頭嘅手工芝麻糊，我就買咗湯圓，算係開咗過年啦！玩到11點幾先走，大家都好攰，不過其實好想繼續打麻雀，好好玩！

4/2/22

 4/2/22     FRI.    RAIN

星期五啦，好耐未試過咁期待星期五！今朝出門口嘅時候就開始落大雨，仲諗緊出唔出門口，細佬先好笑，佢話你當好似花灑咁咪得囉，又係嘅反正都濕架啦！揍到佢去學校，已經見過有家長喺度，咁我就放低仲仲即刻出發返工，返到去都差不多九點，真係有啲趕。不過今日對我好好，只係跟year 12行行企企食飯幾味，先去圖書館做啲庇護工場工作，到1點半先有得放飯，去飯堂得返炸魚薯條，咁都要食㗎！剛剛去我哋大房食，佢哋又同我一齊傾吓偈，有啲返工嘅感覺！食完飯返去住書本繼續等放工，今日叫咗子元去學校直接揍仲仲返嚟，時間上改唔配合得啱啱好我返到嚟佢哋就返到啦，快手收拾好多走去巴士站會合勤少上車！我再要去買菜買肉，返到屋企放低啲嘢又要出去接德仔，今日仲要得我一個揍，真係筋竭力疲！等我預備好晚飯啲嘢老公回來煮，可以抖抖，食完飯就洗磅沖涼，今晚仲有波睇喎，盃賽要踢到十二碼呢！

3/2/22

 3/2/22      THU.    COLD

今日終於星期四啦，我開始有嗰種唔係好想返工嘅感覺，不過咁係正常嘅！喺屋企又嫌悶返工又見攰！今朝揍咗仲仲去學校門口，就將佢交托俾你識嘅家長我就閃啦，牛下女車神咁沖去返工，時間都係好趕。今日要處理嗰個唔算太複雜，所以某程度上都算輕鬆，只係最尾嗰堂之前，個女仔話頭痛，我覺得佢係扮嘢，不過老師又俾佢早走，就由得佢啦我唔理咁多，又唔關我事！咁我就可以準時放工。不過我想print幾份時間表都好似好複雜，都係用返自己方法聽日返去影落手機算，大不了自己影完攞返嚟再print就算喇！3:30就去到公園接仲仲，不過佢要玩遊樂場最終4:15先至走，不過真係太過趕，因為之後仲要湊德德，我隻腳攰到想死！完全冇得抖直到佢爸爸來接走佢，我仲要吸塵抹地，摺埋衫抖左唔夠10分鐘，又話要開飯，然後就洗碗，我真係攰到GG！

2/2/22

 2/2/22     WED     WARM*

今日都係咁同仲爺去到學校, 差不多夠鐘我就走先, 佢要自己入學校啦, 其實係有少少唔放心架, 但都冇法啦已然8:40, 我又要牛下女車神咁先趕到返工! 返到去check email又係跟琴日條女, 真係有少少唔開心架, 但都要做架啦, 佢有佢上堂我有我自閉, 反正我都幫唔到啲咩! 小息時佢又跑咗去, 我第一次都有追, 追到之後佢又嚟, 咁比佢下一堂個老師見到, 就話叫我唔洗搵佢, 佢點都會嚟上堂, 到時等我鬧佢, 我即刻放鬆哂, 啱架啦我唔洗再跑, 等佢比人鬧吓! 真係好想同佢講我打份工架咋, 你有你我有我咁, 河水不犯井水, 大家夠鐘就放工放學係最好! 好在午飯佢今日冇遊街, 我只係喺飯堂企喺到睇住佢就可以! 不過今日最尾嗰堂又遲放, 我去埋個廁所先都已經3:20先走到, 去公園接番仲仲, 比佢玩多陣就要返去, 4點半又要學音樂, 我又要買嘢又要揍德德, 其實好攰! 鬼叫你窮呀頂硬上! 返到去入咗廚房忙, 老公同時返到, 佢地三仔爺係咁食嘢, 引到德仔又食, 到食飯時, 原來仲爺又開咗ipad佢睇, 兩嘢夾擊吓咪食到好差囉, 又迫我鬧人! 等佢走咗我終於可以休息吓, 等食飯然後洗碗仲涼休息!

1/2/22

 1/2/22      TUE.    COOL

恭喜發財！今日係年初一，但係我哋全部都要返工返學，第一次去英國過農曆新年，超級武器瞓！不過都要係時候適應吓，其實都係過吓節啫，冇乜所謂！今日仲仲終於可以返學，一齊踩單車去到學校，因為預得鬆咗，所以早咗好多，終於等到有一個認識嘅家長到咗，可以將仲仲交托俾佢，其實仲有幾分鐘都入得學校，不過做得幾多得幾多！我最終8:52返到去，都算早㗎喇！不過今日冇人交大我要點樣照顧嗰個同學，淨係交低張學生證俾我，話俾我知係L4，所以我就唯有快啲去開電腦download佢嘅時間表，咁我先可以處理好佢！去到L4搵唔到佢，之後先知原來佢成日親轉堂周圍走，咁我唯有喺佢下一堂個課室度等，呢堂上數學，我好有信心係咁教啲小朋友，其實都year 9點解啲數好似香港小五小六咁簡單，轉堂佢又周圍走，又要趕佢去返課室門口等，點知呢堂轉咗去Hall聽talk，咁我又自由自在咁坐咗一個鐘！放break嘅時候，佢又係周圍行，跟到我死，終於肯去課室啦，安頓好佢我就去飯堂食飯，有我自由嘅半小時！到佢放飯，去飯堂食飯又唔坐定，最終比訓導主任捉咗去鬧，其實我心諗抵你啦，好好坐喺度食餐飯都唔得！鬧完又放返佢走，我又要跟住周圍行佢仲想跑快啲賣甩我，又話唔放飯其實唔使跟住佢！咁我當然唔會俾佢啲方言呃到，你咪有你講囉我有我跟，只係攰啲咁解！放完飯又唔肯入課室，其實想多兩堂就放學啦搞咁多嘢做咩啊！你想放學我想放工姐，無謂為難大家！終於都放工啦我快手打卡閃人去揍仲仲，原來唔可以有得佢放喺學校放到3:30 ，所以最終要寫電郵同學校講，以後除咗屋企人就有Mandy接放學。返到嚟又係快手換好衫出門口，佢兩個要去打籃球，送咗佢哋上車我又去買餸然後接德德返屋企，點知阿哥打嚟話中途無端端叫晒全車人落車，又要等下一班車先可以上車！好在最終都安全去到目的地！我同德兩個就二人世界，都係煮下飯整吓野捉佢玩吓，不過佢阿爸成6:45先來接返佢，好彩我今日都唔係早接佢冇蝕！等佢哋打完波返嚟開飯，食完洗埋碗沖埋涼都10點啦，而家嘅生活真係充實到一個點！