30/4/22

 30/4/22.    SAT.    COOL

今日係生日假期嘅開始，九點幾先起身，原來仲仲要去踢波，咁就快手煮早餐食完出門口，踢完第一場，返屋企抖一陣，又要再出去睇第二場，今次去哥哥學校個足球場踢，真係好曬，睇咗一半我已經頂唔順，要返上車等。跟住就直接去嘅時候屋企BBQ，我哋帶晒麻雀設施過去，所以等兩位爸爸切好咗個燒烤爐，就一邊燒烤一邊打麻雀，實在係好chill嘅娛樂！由天光玩到天黑，流水席咁樣食嘢，飽到上心口，最終差不多12點先至走！

29/4/22

 29/4/22     FRI     COLD

今日本來抱住開心的心情返工, 因為見個表係跟Samia嘛, 點知一返到去首先就比條麻煩上司捉咗入房話做咩3個月的檢討, 佢講嚟講去又係用電話單嘢, 仲有就係唯一一次接唔到Bella嗰次, 老實佢成日個口話冇問題, 但佢不停重覆其實就好有問題, 最慘係因為Samia今日有Test, 我冇得跟佢之餘又要跟Bella, 然後今日仲要有好多外在環境問題影響到, 絕對唔係好過! 好在同今日做代課嗰個即時舒發咗先, 佢又唔會再返嚟見到呢到啲人, 同佢講就最好! 同埋Break時Bella 因為外在環境發生的事又要躲去AL1, 全世界又因為咁要撤退, Celia連Bella個朋友都叫走埋, 但堂Pat接手時, 佢即刻叫番個朋友返來, 因為咁樣先可以快啲解決到, 又一次證明上司只係識講唔識做, 原來全世界都係咁! 好在香港人有對抗白痴上司免疫力, 再加上最尾一堂Pat嚟cover時, 佢知我3:15要走, 早5分鐘叫我走啦, 我都怕怕架, 但佢一句Celia gone, 我即時覺得原來做下屬就會明大家諗咩, 即係唔係我問題而係上司問題! 放工去公園接仲仲, 佢又要玩...比佢玩到4點多先走, 回來一陣就要出去睇樓, 本來都抱好大期望, 但都遇咗係舊啲, 不過最大問題係樓上個花園放咗好多垃圾, 即係條友企理極有限, 所以都係要重頭嚟過, 好灰! 去龍鳳買埋嘢就回家煮飯休息!

28/4/22

 28/4/22      THU.    COOL

今日都係照常咁返工返學家，學校轉咗吖早返門，都係好事，仲仲可以早啲入去我都安心啲，我返到去，又冇寫明我第一堂去邊個課室，唯有自作主張就算， 10點就去Reception等Bella嚟，都估到佢第一堂會心情唔好，因為要上法文堂嘛！佢傳統就喺度自己寫字，係咁寫I want to die，完全唔知佢想點，落咗堂又冇嘢喎，之後嗰三堂亦好正常，我就放咗個早飯，所以放學後咪好肚餓囉！學生午飯時我煮係罰企，見到Letty個Bio老師，就成機問吓佢關於science科啲嘢，都有得著架！終於捱到放工就去公園接仲，佢又係煮要玩陣先，結果4點先走，回家抖得一陣就要出去接德，老公今晚宴意大利飯，係好食但煮咗好耐，咪又夜咗做其他嘢囉！仲仲又突然咳番喎，明明好釋架啦嘛，希望食吓藥就好啦！

27/4/22

 27/4/22     WED     COLD

今朝同仲仲去到學校發現已經開咗門仲要冇咩人喺到, 又睇唔切鐘喎, 但點都唔會遲呀, 都係8:30出門口咋嘛, 好在聽住收音機, 睇到啲節目知道未夠鐘啫但都嚇親! 返到去攞齊嘢就去課室等, 因為今日係Bella, 所以第一堂又係炒散, 去咗year 7的音樂堂, 主力教一個學生彈琴, 所以時間都過得好快, 10點又要去番門口接Bella, 但見到今日個時間表都知唔好過, 因為有法文堂! 果然明明英文同小息時都幾好, 但到法文時完全唔知咩事佢衝咗出課室, 我又唯有跟出去, 都用方法氹番佢入課室, 捱到cover嚟到我就可以食午飯, 然後又返去企番45分鐘啦, 佢地放飯嘛, 跟住之後返課室又嚟, 今次躲咗喺枱底一堂, 我又唔可以咩都唔做, 點都要交吓差, 見到有SLT行過就再call吓佢啦, 嗱! 我有做嘢架! 完咗法文佢又回復正常去上history! 等到放學閃人啦, 直接返屋企先, 仲爺要玩公園就由得佢啦, 等我做吓嘢先, 攞埋支結他再去接佢4點半去學嘢, 我又要幫佢推架單車返去, 又要去買餸, 再去接番仲爺再去接德仔, 回來基本上都係仲爺揍住佢, 我係咁喺廚房整嘢, 快手餵咗佢食飯! 等佢閃咗我可以休息吓等老公煮飯啦! 早啲食完仲有時間做吓公務, 喺英國買樓真係唔係易事!

26/4/22

 26/4/22     TUE     COOL

今日都係忙碌的一天啦, 揍咗仲爺返學就返工, 跟住year 8就唔會有空閒時間, 首先數學堂要上3樓, 佢地行完上去又話要去廁所, 我又要跟落去一次, 到上上吓堂有個學生要走, 我又要帶佢去reception, 又行一次, 夠皮! 小息佢地更加行啦, 都唔比人休息吓! 跟住兩堂英文以為又要喺Ms Rice下捱兩個鐘, 點知原來佢冇返, 我都開心架, 雖然代課係會令學生失控, 但總好過應酬Ms Rice! 捱完上半場放個飯就返去再嚟過, 最後頂埋堂音樂就閃人, 接咗仲爺就返去啦, 我想返去休息吓同埋搞搞啲電郵關於買樓嗰到, 總之都係煩啦, 所以見到有另一間有個盤OK又約去睇, 希望今次成事啦! 叫老公車我去買餸接埋德仔先回家, 佢又要來來回回接送兩位少爺踢波啦! 我就揍住德仔, 煮埋晚飯囉, 因為今日要分開食, 所以煮啲碟頭飯算, 今晚係蘿蔔牛腩飯呢! 總於等佢地食哂洗埋碗終於可以沖涼休息啦!

25/4/22

 25/4/22     MON     COOL

今朝一睇電郵知道自己要跟Samia全日ART考試, 就馬上要諗有咩可消磨時間, 咁都係睇書架啦, 因為睇書應該唔會比人投訴啦, 所以我就全日五個鐘都喺課室睇harry potter囉, 當咩娛樂都唔可以有時, 有得睇書總好過呆坐! 結果真係睇咗五六十頁呀! 小息時小息, 放飯時放飯, 準時就放工, 馬上飛車去接仲仲, 因為Mandy今日唔幫我接, 佢嗰兩個上after school class, 好在都趕到雖然係最尾一個! 返屋企小休一陣又要出去買餸揍德仔, 回來後不久, 兩位少爺又出去踢波啦, 咁德仔就冇人同佢玩! 因為我都係掛住睇電視, 係咁架啦, 我唔係啲好有愛心的人呢! 夠鐘就煮飯先, 等老公回來煮埋啲餸, 睇住電視咁開飯啦!

24/4/22

 24/4/22     SUN.    COOL

今日我完全冇出過街！只係仲爺要踢波，所以老公帶佢去就得，食完早餐我就開咗套劇嚟睇，都係Do姐介紹嗰啲啦，有15集，估唔到我會一日睇哂囉，所以咩地方都冇去，超市都唔想去啦！咁就過咗一日！不過煮有做家務架，洗衫摺衫吸塵抹地等等，仲教埋仲爺做功課！晚上睇哂先沖涼瞓，都要12點啦！

23/4/22

 23/4/22.    SAT.    COOL**

今日係子元14歲生日！但都唔算點大肆慶祝，只係買咗蛋糕切，同約咗張家一齊食晚飯！朝早仲爺要去練波，襯佢踢緊時就去買蛋糕同汽球，返去接番仲仲就回家準備睇波，老公去買午餐，回來邊倉邊睇，再等埋Letty佢地嚟一齊切蛋糕，打吓機吹吓水咁，5點幾出門口去餐廳，book咗食海鮮，試吓英國海鮮係點玩，咁整體係好食，又吹水都吹到8點幾先走，返屋企再吹過，比佢地再打吓機，10點先散，兩個細仔明天都要比賽呢！

22/4/22

 22/4/22     FRI.    COOL

今日都係照常返工返學，返到去攞好嘢就去課室會合，今日跟Samia ，諗住都係如常咁上堂啦，點知原來佢哋要準備GCSE, 今日全日都係GEO教做卷，我就來悶死！我都冇咩可以做，咁就坐埋一邊聽住收音機發呆，咁當然適當嘅時候要行行企企做吓嘢啦，小息其實都係轉咗去第二間房門咁解，食完飯返去繼續捱到佢哋放飯，咁就返大房清下電郵， 2:15又要返去悶過啦！臨入課室之前嗰個麻煩上司又走嚟我講話有學生話佢知我上堂攞部手機睇電影，其實聽完都知唔合理，佢可唔可以用下個腦分析下先再問我，手機我係有攞出嚟但係都係睇吓時間望吓message，要講電話我都會出課室，所以話有陣時啲人讀到書都冇用做嘢都唔識變通，聽完我真係覺得好煩，一嚟好想知邊個低能學生講佢知，二來其實佢知唔知好多學生都唔鍾意佢，因為佢真係好唔識變通！所以放工之後急需要搵人抒發，咁就同Icy響WhatsApp吹左一輪水，其實已經好咗好多！放工返到嚟又要快手教佢地去打籃球又要買餸又要準備好啲嘢，然後過去揍德仔，今日冇人陪佢玩嘛，坐喺度陪我悶吓啦，等佢走咗我就可以準備晚飯啲嘢，佢哋打完籃球返嚟叫老公煮埋佢咁就可以食飯，我開咗套電影嚟睇，係上流寄生族，結果睇晒先至執碗，跟住又繼續掛住睇電視成10點幾先至沖涼！

21/4/22

 21/4/22     THU.     WARM

今日都係照常咁返工返學，返到去攞齊野就去課室，都係跟住個學生行啦，上堂要幫手嘅事就講唔使嘅時候咪坐吓囉，午飯時間可以食足九個字真係非常好，睇手機睇吓劇咁幾開心呀，夠鐘又返課室，不過食飽飯上堂真係好眼瞓！夠鐘就準時放學啦，最鍾意就係咁！去到公園仲仲都係想玩，但我又想教咗子元點樣去球場先，所以比仲仲去公園玩，我就返屋企先，教咗子元點去球場，帶埋佢去火車站搭火車，咁我就去返公園，比仲仲玩到四點幾，先至去接埋德返屋企！今日都係仲仲湊住德德多，我都係要煮下飯，打機等夠鐘佢阿爸來接走佢，然後又要準備晚餐，老公去球場接埋子元返嚟就開飯！

20/4/22

 20/4/22     WED     WARM

今日都係如常咁返學啦, 揍咗仲爺我就返工, 今日好彩都算輕鬆, 跟Bella而佢又好正常, 咁就可以好好的過! 如常上堂, 仲有兩堂science同Letty一齊上, 最好笑係嗰堂唔知點解有3個學生都唔舒服要去reception, 結果我就行咗幾轉, 咁就過咗半個鐘, 午飯都係快食架啦, 反正都冇咩做其實半個鐘真係夠! 下午都係照上堂啦, 但就遲咗放學囉, 不過去到公園唔見仲仲又唔見Mandy, 原來Amus肚痛佢又掛住同老師講嘢, 出到嚟唔見有人後就唔記得咗, 唔緊要我去學校接番就得, 好少事! 返到屋企做咗啲公事先出門口, 又要揍仲仲去結他, 又要揍子元去剪頭髮, 仲要去接德, 忙忙碌碌咁囉! 今日大家都餓老公就早啲煮飯, 有粟米肉粒飯加叉燒呀, 幾正! 食完飯睇埋場阿仙奴對車仔先休! 

19/4/22

 19/4/22     TUE     WARM

今日又開始要返工返學啦, 返回正常的一天, 一早起身就忙碌地整早餐整飯等等, 遇鬆啲時間出門口, 因為都怕自己體力不夠, 最終都順利返到學校, 今日算係易過, 啲堂都唔太悶, 但反正我都未上軌道, 都係遊魂狀態, 所以我都冇咁好心機理佢地, 聽就聽唔聽就罷! 午飯可以食耐啲, 因為個學生話佢唔食飯唔洗睇住佢, 下午算係順利完成準時收工返去接仲仲, 比佢玩到差不多4點回家, 收拾吓打咗幾個電話就出去接德仔! 今日兩個都要踢波, 但分兩場踢, 所以老公來來回回做司機, 但要等到佢第二輪回來先煮飯食唔掂, 下星期要再諗諗點安排! 

18/4/22

 18/4/22.    MON.    HOT

今朝瞓到八點幾先起身，本身冇諗住有咩做，都係去中超買啲嘢返屋企清潔下Hea下就算，點知炮哥叫我哋去街，仲要係去阿仙奴主場酋長球場，老公梗係即刻應承啦，主力都係睇下野姐冇乜所謂！大半個鐘車程過到去，其實都係喺主場出邊行過圈，再去精品店，結果仲爺就買咗件阿仙奴波衫，仲要拖埋自己名，咁就洗咗一舊錢！影完相就冇準備去午餐，諗住去公園野餐，仲要買食物，結果喺公園附近搵到超市可以買到三文治等等，買完就揸車過去搵位泊，然後就去公園野餐，真係好英式生活！食完嘢佢哋就掛住踢波，仲要踢踢下波又喊，贏又喊輸又喊都唔知佢喊乜！之後佢哋去咗遊樂場玩足，我哋大人就放空下啦吹吓水，五點幾等炮哥返嚟接埋張家就各自返屋企啦，明天又要返學都係早啲瞓覺！

17/4/22

 17/4/22     SUN.    HOT

今日係第二日旅行，主要都係過樸茨茅夫探Givens，喺酒店食早餐，都係啲簡單all day breakfast，只係可以任食咁解，食完返上房執埋嘢，10點出發去givens屋企，大半個鐘已到，佢地嗰到好多新屋，但就真係比較鄉村啲！傾到sunny返嚟都12點幾，出發去掘蛋，都係啲細路玩，大人吹吓水咁啦，掘完蛋就去玩公園，玩到兩點多就去飲茶，吹水吹到5點幾先走呀，真係好攰呀！入埋油仲要揸兩個鐘車返去，冇力煮飯啦，買pizza食就算，返到嚟仲要執拾洗衫等等！食完晚餐就排隊沖涼，佢地打吓機咁就早啲休息啦！

16/4/22

 16/4/22.    SAT.    HOT

今日係期待已久的旅行！8點幾起身食早餐執埋啲嘢，10點多出門口啦，順利用咗個幾鐘就去到修咸頓，先去老公朋友屋企，吹咗陣水，佢帶我哋出去食嘢，食四川菜超正，我飽足一日呢！差不多三點就去酒店check in，預期中的細房一間，簡單比你住一晚有地方瞓同沖涼咁解！放下行李就出番市中心遊覽，先泊好車叉電，跟住follow行程睇景點，博物館外打卡，睇吓歷史景點，然後去修咸頓主場，都係打卡睇吓精品店就走，去咗碼頭睇海睇船睇日落，好耐冇見過海啦！徰返停車場隔離個商場食晚餐，都係食西餐咋，食完揸車返酒店都9點幾，係時候沖涼打機休息，明天繼續！

15/4/22

 15/4/22     FRI     WARM

今日老公都有假放啦, 瞓醒捉佢地起身食早餐再出街, 子元就例牌唔肯出去架啦, 咁就同仲爺去咗睇玩具, 順手買埋玩具比丁丁佢地, 冇理由兩手空空咁, 所以都要買啲嘢! 跟住就去埋Costco入吓貨, 事頭佢地都有去, 臨走時齊齊買熱狗, 我一個人要買10隻熱狗, 嚇死人咩! 回來後都係食吓嘢收拾吓休息吓, 睇吓明天出發南下要帶咩咁! 6點多佢地過到嚟開party, 其實都係食餐飯吹吓水咁啫! 又傾到10點幾11點啦!

14/4/22

 14/4/22     THU     COOL

今日都係冇出過咩街啦, 都好慳好多! 起身梳洗整早餐, 食咗幾日藥好似好咗啲, 但有時都係咳得好勁! 食完早餐咪陪吓仲仲又覆吓電郵咁囉, Broker嗰到都跟得好足, 希望之後都順利完成收樓等等, 基本上係可以即住架啦! 今日都係比較輕鬆, 掛住同仲爺打吓機睇吓電視咁, 好好享受埋個假期! 午飯煮烏冬咋, 食埋琴日啲廚餘! 下午繼續自娛, 夠鐘就出去買菜揍德仔, 又係唔肯行架, 但遲啲冇仲爺引佢都唔知佢會唔會唔肯行, 要我抱咁遠我唔掂呀! 今日都順利食哂啲飯, 輕鬆收工! 老公煮飯我打機, 食完食好碗就沖涼休息啦!

13/4/22

 13/4/22     WED     COOL+

今日都係喺屋企留守啦, 都冇咩地方好去! 朝早瞓醒咪整早餐食囉, 跟住都係做吓公務, 搞mortgage嗰啲文件都已經令人很疲勞, 又要揍住仲爺, 佢成日都好多嘢問咁! 午飯簡單地整番琴日啲廚餘咋, 下午叫做可以閒少少啦, 摺埋啲衫睇吓電視, 3點幾出去買埋餸回來整好又要出去揍德啦! 老公放工回來後講話若而家我地諗住買嗰到轉唔到freehold會好煩, 咁我話今日三房嗰間個agent有再call我, 我又拒絕咗人一次喎, 不過都要回頭草咁問多次啦, 電話電郵來回幾次, 佢就話個業主接受我地個offer, 老公計過370000都頂到, 只係現金流會得番少啲咁解, 但用多30000就可以買到個freehold係好抵! 咁唯有期望一切順順利利啦, 已經即刻send email比哂broker同律師, 希望明天佢地睇到可以幫到手快手搞掂啦, 其實我一向心儀呢間三房, 係老公初時計過數話唔得, 又有間平啲出現先變咗現在呢個情況, 點都好啦, 呢啲時候真係要祈禱啦!

12/4/22

 12/4/22     TUE     COOL

今朝完全記錯咗子元練波時間係10點, 所以hea到差不多9點先起身就出事, 一睇個月曆發現係9點喎, 即時大叫佢地起身出門口, 好在都趕得切9點幾去到, 咁我同仲爺就煮早餐食囉, 然後就要的起心肝處理吓屋啲嘢啦, 因為要覆email, 老公今日請咗假, 有時多個人喺到同意吓咁都安心啲! 加上舅父仔打電話來傾吓佢地應該5月中過來, 雖然住得唔近, 佢地選址Norwich, 但都會喺London留一留先, 咁到時就可以見啦! 唔覺唔覺都搞到12點幾先出去食午餐, 近近地去broadway食all day breakfast, 之後又要趕去接子元啦, 點知佢又遲放, 又要去事頭到攞外賣嘛, 又有炮菜又有夾餅! 因為老公又幫子元搵咗另一間球會有得踢波, 要今日過去, 但笨元又話比人踢到腳又攰, 但老公都係要佢去, 去睇吓先都好呀! 所以車咗我地回家佢就出去, 咁我又要搞掂啲銀行過數又要預備去揍德仔, 忙忙亂亂咁, 點知5點幾佢地就返, 原來因為個球會練星期二四, 咁可以下星期四先練, 咁子元就可以休息囉! 我就繼續揍德啦, 自從佢有煎蛋做餸就食飯食得好好之後, 我都輕鬆好多! 晚飯老公搞掂我可以睇電視, 但8點又比佢地爭咗去睇波, 睇到加都10點幾囉! 車仔輸咗仲爺好似買好大咁, 勁唔開心又唔出聲! 好搞笑!

11/4/22

 11/4/22     MON     COOL

 今朝的起心肝打去GP睇醫生, 咁咳法都唔係辦法, 最終電話問診完11點後有得攞藥, 佢都係開咗隻抗生素比我咋, 仲有我要求多支氣有得聞吓, 希望去旅行前可以好番! 咁打完電話終於可以煮早餐食, 等到差不多11點打去GP問埋係咪已經有藥先出門口, 順手去埋超市買吓嘢先返去, 又要煮午餐佢地食啦, 簡單食烏冬咋, 食完就摺埋啲衫吸塵抺地, 好忙碌! 跟住又要出去接德仔啦, 今日佢都好乖咁食哂飯, 可能因為啲人出哂去冇人陪佢玩加上有煎蛋就食哂囉! 等佢走咗我又要準備晚飯, 等老公回來煮! 今日有飲咖啡原來真係會頭痛, 冇法啦又冇奶沖唔到點飲!

10/4/22

 10/4/22     SUN     COLD

今日都冇出過街, 星期日其實都冇咩地方好去, 子元又唔洗踢波啦, 咁瞓到自然醒咪起身梳洗煮吓早餐, 但都捉老公幫手煮吓囉! 食完諗住摺埋衫出吓去, 但其實都唔知要去邊, 咁子元又問打唔打機, 咪打咗轉Mario囉, 跟住仲爺又話繼續打, 最終打到差不多4點幾利記對曼城先停, 真係好hea的生活! 之後都係hea過啦, 除咗電視, 其實真係冇咩活動! 晚飯後都係沖涼休息!

9/4/22

 9/4/22     SAT     COLD

今朝子元要去練波, 仲仲就唔洗, 咁就唔洗走兩個場啦, 仲爺帶埋波去草地踢飽佢啦! 好在今日都唔算太凍, 都可以陪佢踢吓, 不過條友仔同我搶波時比佢kick跌咗我囉, 好在係草地咋, 老人家咁跌一跌唔掂呀! 等子元踢完返去又係時候睇波, 去咗買飯團加麵包做午餐, 係中間出咗去超市再買啲嘢咁囉, 都係全個下午喺屋企啦! 晚餐食扒同意粉, 咁又一日啦!

8/4/22

 8/4/22      FRI     COLD

今日子元自己出去踢波, 所以整好早餐比佢食, 我同仲仲就喺屋企休息吓囉, 同佢做埋英文功課就開始整雲吞啲料, 包得嚟子元都返啦, 咁就食雲吞做午餐, 但因為啲片冰完再解凍, 好痴住好難包, 我又怕唔知有冇變, 所以都係包住一碗料先, 其他或者要再買片先可以包! 下午開始又係時候煲吓劇, 都有做吓家務! 但其實真係唔多想郁, 老公早咗放工回來, 因為約咗去睇樓, 過到去睇...好似冇預期咁好, 一來有啲舊, 二來個地點真係幾遠, 加上係印度人區, 好似唔係好夾, 同埋都真係幾住宅區, 我地返學有難度, 花園係大但唔係好實用咁, 或者都係去番Stanley Aver 算啦, 天父自有安排! 返到屋企就要煮晚餐, 個個都肚餓啦!

7/4/22

 7/4/22     THU     WIND

今日子元要去練波, 要自己撘巴士去, 咁諗起隔離係有個遊樂場, 反正都冇咩忙, 就問仲仲去唔去玩, 佢實係去架啦, 所以就食完早餐快手換好衫出門口, 齊齊撘巴士, 車程都唔係好耐, 去到都未夠10點, 都叫子元自己過球場, 我就同仲爺玩遊樂場, 但今日真係好大風, 大到吹得郁人嗰隻, 不過仲爺都玩咗成個鐘, 又要我拍片, 手都彊! 同Ivy喺Whatsapps吹咗一輪水咁,佢遞咗信啦, 冇講移民所以阿姐都好努力留佢, 因為而家唔可以請人, 佢地應該都幾煩! 最後躲咗入去體育館入面, 個工作人員好好, 仲比我地去埋廁所先走! 跟住去球場嗰邊睇吓子元踢成點, 11點幾就走啦! 又要等番巴士返去, 去超市買埋啲餸就回家! 第一時間煮粥, 同預備炒麵, 等子元回來就可以食! 下午開始又追吓劇啦, 仲有同仲爺做吓功課咁! 夠鐘佢又跟埋我去揍德仔, 回程時接到阿Lee同佢媽媽, 又吹咗陣水啦! 返到去都係比佢地放電然後煮德仔餐飯, 今日整咗流心煎蛋佢就食哂啦喎! 老公沖好涼就煮晚餐, 我又可以繼續睇劇, 食完洗埋碗沖埋涼就可以休息!

6/4/22

 6/4/22     WED     COLD

今日基本上係冇出街, 如果唔係要揍德仔都唔會出去! 朝早其實好早醒咗, 好在老公出門口後都瞓番一陣, 8點多起身整早餐, 等佢地食完可以做吓嘢, 我都好多電郵要覆, 真係令人好煩惱! 又要做嘢又要教仲仲做功課咁, 子元係冇溫書啫, 叫佢換床單嗰啲都做哂! 跟住捉佢落嚟計劃吓點溫書, 編埋時間表比佢, 我都真係好大量囉, 打機同溫書一半, 佢真係溫先好! 午飯後可以休息吓, 睇劇摺衫咁, 又開咗套舊劇嚟睇嘛! 4點幾仲爺跟埋我出去買餸再去接德仔, 我整好飯的時間老公又返到嚟, 仲比佢見到炸魚薯條, 跟住又唔食飯囉, 可惡! 咁都冇法啦要同佢阿爸講, 咁佢話個仔唔迫得, 咁我唯有算啦, 其實個小朋友成日流鼻涕又咳咁, 點會有胃口食嘢! 等老公煮晚餐時我就繼續睇劇, 晚飯時佢地要睇波就比佢地睇啦, 咁又一日假期啦!

5/4/22

 5/4/22     TUE     COLD

今日兩位少爺要去踢波, 但唔同年級唔同時間, 所以朝早就先揍仲爺去, 排隊入場後佢就自己搞掂, 我地就返屋企做吓啲公務, 再叫子元準備, 11點幾又要出門口, 先係接番仲仲, 子元就自己等入場, 我地就去咗Costco買吓嘢, 之前明明係有啲嘢平, 但最終咖啡都係冇平, 可惡! 行完買埋嘢食就回家食, 老公去揍番子元, 我同仲仲喺屋企睇吓電視咁, 夠鐘就去菜檔買埋菜再去接德, 今日整咗炒飯佢叫做食多咗啲, 但都真係唔夠囉, 加上佢爸爸接佢時話睇番佢條生長線跌到落15%, 老實佢成日咁夜晚唔瞓點長肉, 食嘢又唔係真係食得多, 好難搞! 差不多7點叫醒老公起身煮飯食, 整得嚟又11點幾先瞓到架啦! 

4/4/22

 4/4/22     MON.    RAIN

今日老公請咗假，因為要揸架車去驗喎，仲要成個鐘咁遠，咁起身食完早餐咪出去囉，點知去到了解咗又話冇book到，其實呢度做嘢係咁架啦，佢又唔識問清楚，搞一輪得個吉！最終再book過囉！咁就去附近食個午飯，找到間可以食all day breakfast的，又真係幾好味，食完咪回程囉，摙一陀又要做家務，老公就去咗休息，佢都有啲傷風，成日都好攰咁！做好家務就去買餸接德仔，5點幾老公話更個要去練波，咁佢地就出哂去，得我揍住德仔大家鬥無所事事！等佢閃咗我就煮飯，要睇吓鐘意的劇令自己開心吓先得！

3/4/22

 3/4/22.   SUN.    COOL

今個星期日子元唔使踢波，咁就計劃下去遠啲地方啦，反正聽日大家都唔使返工返學！所以琴晚就搵咗資料去肯辛頓宮，同埋自然歷史博物館，食完早餐收拾好就出發喇，揸車過去都係半個鐘嘅事，拍好車先行咗去肯辛頓宮，冇俾錢入場就主要睇吓外圍嘅地方，其實有好大個公園好大個池塘都已經好好睇啦，影咗好多靚相，行到12點幾，就去返自然歷史博物館嗰邊準備入場，因為book咗2:00 ，我就可以早入去。其實我都唔知有咩睇，淨係知道應該有恐龍，不過都係睇佢哋啲骨，但整體嚟講成個博物館仲爺都好鍾意睇，子元就一般啦，佢淨係識打機睇片！唔覺唔覺我哋都睇到四點幾先至走，返去攞車返屋企都係5:00左右，但係都好眼瞓，於是我瞓咗一覺先至開始煮飯，今晚簡單啲食香菇肉燥飯，同埋魚蛋菜菜就算啦！

2/4/22

 2/4/22     SAT     COLD

今朝都算瞓到自然醒, 雖然都未夠8點, 但都OK啦, hea到8點幾先起身煮早餐, 兩位少爺又要去練波嘛, 不過今日都真係幾大風, 喺球場睇仲仲時都真係好凍! 等子元踢完, 去買埋飯團回家, 咁又可以做午餐, 約咗點半去睇屋, 都係去睇吓咁解啦, 原來係二三樓嚟架, 不過門口可以泊到車, 但冇咩發展空間, 應該都唔會諗架啦, 去八吓咁解! 返屋企後咪網上睇吓有咩盤囉, 都send咗啲出去問吓架啦, 始終而家嗰間都未係最理想! 睇到咁上吓都攰啦, 又係時候休息吓, 摺吓衫睇吓電視咁, 因為未有劇追, 就開啲電影睇吓, 結果就一路睇自選到沖涼呢! 晚飯食韓國嘢, 其實就係炸雞, 韓國炒粉絲同餃子! 

1/4/22

 1/4/22     FRI     VERY COLD SNOW

 今日我雖然請咗假唔洗返工, 但都係要揍仲爺返學, 所以都係如常咁起身, 好似好耐冇揍過仲仲入學校咁啦, 佢亦都習慣咗連摟都唔洗摟我啦, 咁見到啲耐冇見的香港家長朋友就出咗一輪水啦, 因為太凍都唔吹得耐, 返屋企就開始做公務, 都搞屋嗰啲嘢, 要接個電話啦, 睇好多文件啦, 開始已經要咁, 真係成事我真係唔敢想像! 12點幾快手食咗個午餐, 真係諗唔到食咩, 見雪櫃仲冇盒廚餘薯仔就食埋佢算! 接咗仲仲大家都去公園, 咪比佢玩一陣囉, 點知真係玩咗一陣就大風大雪, 要馬上走啦, 回家又開始hea吓, 老公今朝話病請咗假, 咁佢就可以車哂啲細路去打籃球, 我就邊睇劇邊摺埋啲衫, 睇埋之前Do姐介紹啲"語義錯誤", 原來我都好鍾意睇BL劇, 真係好靚仔好正! 睇完剛好時間煮飯, 今晚食羊腩煲, 好味到呢!