27/5/14

27/5/14   TUE   VERY HOT

今日都係阿媽過嚟睇住柏仲, 咁我如常咁揍笨返學啦, 今日早早去到巴士站就遲有車, 熱死! 買埋早餐返公司, hea吓做吓自己嘢啦, 冇咩特別, 又冇人吹吓水都幾悶吓! 午飯時間都有睇吓電視但呢套真係好一般, 唔係咁有動力睇! 下午老細返過嚟, 又有D無謂嘢要做啦, 寄部即影即有相機去澳洲咁, 都好消耗吓我D時間, 食埋tea放工就撘巴士去, 真係太熱啦行得返去會溶, 諗住返到樓下百佳先買蘿蔔冇問題, 點知咁大間超市係冇得買, 得一pack嗰D, 照買咗先囉! 返到去柏仲剛飲完奶, 但阿媽話佢有咳, 唉…一聽到就煩! 先同笨元沖好涼再同豬仲涼埋先啦, 搞掂埋笨元D功課, 叫佢自己溫默書, 見佢真係有比心機溫就唔迫佢默比我睇住, 因為下星期一放假, 再下星期先默呢! 至於柏仲都唔算好扭, 不過真係有咳, 所以比佢食咗支猴棗睇吓點先啦! 晚飯後仲要洗埋碗, 先得閒, 老公已K.O. 咗柏仲, 咁由得笨元玩陣就瞓覺啦, 因為11點仲要餵奶, 唯有齊齊喺廳瞓吓先, 瞓到11點半先起身餵埋餐奶, 隻豬仲飲得3安就唔飲, 初頭係有幾聲咳, 跟住拍拍吓佢就瞓番咪算囉!

26/5/14

26/5/14   MON   VERY HOT

今朝真係勁趕, 其實都唔係晏起身, 不過掛住玩柏仲就遲咗少少出門口, 架巴士又早咗, 搞到要危險過馬路囉, 好在最終都趕得到! 買埋早餐返工啦, 老細11點幾走咗返嚟, 好在冇做緊咩衰嘢啫, 佢都係返嚟簽吓嘢就閃, 都好GE唔洗下午食食吓飯見到佢嘛! 午飯試咗大家樂個新的天使麵, 一般啦! 下午勁free, 但冇咩做都幾悶吓架! 終於等到放工啦, 行過美孚買接骨木花汁, 仲要買茄子同備番D成藥, 見到有星星餅忍唔住買咗比柏仲, 得閒比佢試吓先! 老公要去元洲邨揍番笨元, 因為揍唔切要好趕咁打比敏瑩公公叫佢揍埋, 老公放工去揍再喺美孚會合! 買齊哂嘢返屋企都6點半, 馬上沖涼先, 柏仲喺學行車係咁大空漫遊, 見開飯就走去飯枱等食咁, 但又唔知自己未識食喎! 洗埋碗又要同笨元睇功課, 老公全程同柏仲玩, 笨元溫習埋就自由啦, 不過都係要陪佢玩, 柏仲已經比daddy玩謝瞓咗! K.O.埋笨元就睇電視啦, 開咗套所謂恐怖片睇, 都少少驚啦, 11點幾叫醒柏仲餵埋佢都差不多瞓啦, 點知到兩點幾老公聽到佢咳再嘔咗少少水出嚟, 應該係口水續親, 但都要同佢換衫換被先可以再瞓!

25/5/14

25/5/14   SUN   VERY HOT*

今日老公朝早去踢波, 所以我醒嗰時已經唔見咗佢, 得番我兩隻小豬! 八點幾起身餵咗柏仲先, 仲要捉笨元做好珠心算先可以砌新買盒禮物, 初頭都口黑面黑架, 最終咪做得好快囉, 食埋早餐同佢一齊砌添啦, 柏仲唔瞓住咪一齊玩囉, 一邊同笨元砌lego, 一邊同豬仲玩轉身, 佢終於比我影到佢轉身啦! 老公十點幾十一點返咗嚟, 但都冇出去買嘢因為實在太熱了, hea到咁上吓老公就揍笨元去踢波, 我就照顧我隻柏仲啦, 瞓到1點多就沖涼食奶, 之後咪同佢玩囉, 玩咗大半個鐘我都要煮午餐, 邊食邊睇running men, 豬仲就喺枱邊口郁郁, 但都冇嘢啱佢食! 食完嘢要哄佢瞓啦, 而家扭人抱佢瞓, 好在都係哄一陣就算啦, 我就邊做吓家務邊睇電視啦, 到6點佢先肯起身, 食埋奶出得門口已6:45, 大家都遲咗所以BOOK咗位間酒樓都冇留位, 於是去番aeon嗰邊, 最快攞到位的是食咖哩咁就食呢間, Carlie都啱啱到, 大家一家四口咁食個飯啦, 佢地3個小朋友係咁圍住柏仲玩, 初頭都OK, 到開餐時就唔肯啦要抱住嚟食但又手郁郁! 老公食完就交比佢, 我可以安心食! 食完我地就上咗去phoebe屋企睇B, 個半月的BB軟綿綿架, 差4個月咁大分別呢, 不過我記得柏仲個半月時都冇咁軟身呢! 玩到十點多要閃了, 返到去快手沖涼K.O.笨元, 柏仲比我放咗落床仔後頂唔順自動關機, 咁等我地沖好涼搞掂哂先叫醒佢食奶啦!

<4個小朋友!>

 <反瞓仲!>

 <相差4個月大的BB~>

<交換嚟抱吓先!>



24/5/14

24/5/14   SAT   HOT

今日都係一早揍笨元去畫班啦, 交低柏仲比老公我就閃了, 好在等一陣就有巴士, 仲早過敏瑩佢地到, 由於程生佢地帶埋婷婷嚟, 所以我一揍二上畫室, 搞掂先買埋早餐仆返工! 放工時老公趕唔切過嚟公司, 唯有喺美孚會合咋, 佢地又冇得玩柏仲! 喺美孚食美心咋, 食完老公揍笨去踢波, 我就揍番柏仲返屋企, 由於老公已幫柏仲沖咗涼食咗奶, 冇咗呢兩樣嘢做變咗難瞓覺啦, 唔理咁多先吸咗塵先, 嘈都唔怕未瞓嘛, 跟住條友仔喊到顛哂, 唔抱唔得, 噯咗陣終於瞓到, 咁我就可以做埋D家務, 真係做死我, 點解間屋可以咁dirty! 仲有摺埋D衫都已5點, 柏仲醒咗食奶, 跟住就出門口去奧海城同老公會合, 因為我要買過對波鞋嘛, 最終買番當時都睇中但嫌貴嗰對, 整定! 跟住想去黃埔同程生佢地晚飯, 佢地啱啱出門口就嚟車埋我地, 過到黃埔先睇咗傢俬, 佢地諗法好多, 要大量儲物空間, 連我地睇中嗰隻組合床都覺得唔夠, 咁真係好難搞! 敏瑩就係咁要公主城堡, 生女呢就要接受! 睇完就去食嘢, 程太選咗間食拉麵, 少少貴啦但幾好食, 去埋反斗城笨元買咗佢份評估禮物, 就開開心心返屋企, 不過返到去太夜唔可以玩住, 沖完涼要佢即刻瞓, 因為佢話要做埋D珠心算再砌喎, 太夜啦!

<熟睡中的寶寶!>

 <愛玩自拍!>

 <哥哥幫到手!>

23/5/14

23/5/14   WED   RAIN

好彩今日又有順風車返學咋, 勁大雨囉! 今日老公請咗假, 只要揍笨元就可以了! 跟住程生仲車埋我返工, 買埋個早餐返到去都未夠9點呢! 今朝有兩個同事請假, 所以我要開門呢, 再慢慢食早餐, 老細今日唔返, 基本上都冇咩做, 係咁做吓自己嘢囉, 中午飯後睇吓新劇咁啦, 下午又係冇咩做, 主力係到睇吓關於去新加坡旅行D嘢, 所以都係上吓網咁啦, 夠鐘放工去萬寧又買吓嘢就返屋企, 笨元已經做緊功課, 又要睇吓佢功課, 所以都唔得閒理柏仲, 幾衰吓! 今日派咗評估表, 老公話又要破費, 因為佢又全A, 要買禮物, 老實講呢D錢都洗得開心GE! 比佢食少少嘢就出門口去合唱團, 我推柏仲出去佢地就撘車, 柏仲新車落地呢, 應該幾舒服, 好快就瞓咗! 送咗佢地上去就去晚飯, 柏仲都醒咗架好在頭半場都比我地好好咁食, 係坐到尾先唔多肯要抱啫! 夠鐘老公先去接咗佢地先, 我地埋好單先走! 又要續埋會, 比佢地玩到9點半先走! 回家後沖完涼仲要玩到11點幾先瞓, 我都勁攰, 餵埋柏仲都喺梳化瞓咗!

22/5/14

22/5/14   THU   RAIN

今日又有順風車入青衣, 仲要1家四口入哂去, 時間關係先車咗佢地返學, 程生再車陸生去茶水站交低柏仲比嫲嫲, 佢就入一田買BB車! 我又有車載番我返工, 超正! 返到公司慢慢嘆吓個早餐就hea吓啦, 上吓網咁又一朝, 中午飯後只係總監同老闆娘佢地返, 所以冇咩影響, 照樣做好公事就做自己嘢, 食埋tea就放工, 老公下午已偷走返咗青衣, 咁我都唔洗咁急返去, 又要攞相又要幫老公去七仔換公仔, 但找咗4間都冇得換要訂, 咁都要訂架啦, 返到去一會就有飯食啦, 食完撘早D班車返去, 又要沖涼又要做珠心算又要默書, 點先可以訓練到佢自己溫埋默書後執書包校服呢?! 柏仲9點已經唔多頂得住要開餐, 於是開咗7安比佢飲哂就瞓, K.O.埋笨元我地就hea吓睇吓電視咁啦, 11點就瞓啦, 不過柏仲1點左右喊醒咗, 又唔知發咩夢, 好在噯一噯又瞓番都可以啦!

<高難度動作!>

21/5/14

21/5/14   WED   RAIN

今日有程生車我地入青衣, 真好! 先車我上嫲嫲到放低柏仲, 跟住揍埋子元返學再嚟車番我去公司, 又慳錢又慳時間, 慢慢買埋個早餐返工, 都係寫吓日記hea吓咁啦, 冇咩特別! 午飯後咪睇電視囉, 老細開會唔返, 好free! 下午都係做自己嘢啦, 食個細細的tea又放工啦, 返到去笨元當然又掛住睇i-pad啦, 睇完佢功課叫佢寫番今日學的字, 咁佢又寫得出就放過佢啦! 到咁上吓柏仲又醒咗, 就一齊入房玩, 真係好怕笨元會整到柏仲! 老公返嚟就開飯啦, 放柏仲喺床仔佢又唔肯, 於是放佢喺車仔囉, 咁佢又好地地喎, 望住我地流哂口水咁好搞笑! 食完抖陣先走, 柏仲繼續坐吓車仔, 佢條友無所事事就係到咬手把, 幾傻樣呀! 回家後沖好涼陪柏仲玩陣, 又搞掂笨元D嘢先可以餵奶, 開足7安比柏仲食得哂仲瞓埋, 所以我地都11點就瞓啦!

<好似小吉呀!>