10/9/14

10/9/14   WED   HOT

今朝子元勁難先叫到佢起身, 本來已經遲咗少少出門口, 出到lift口見有人在就冇為意, 等我見到飛lift時先發現條友冇按制喎, 我真係忍唔住出口鬧人, 因為真係會火起! 好在未至於最後一個, 但車已到了, 我叫笨元快時佢依然快唔到你就更火! 上到車仲要咳, 真係怕佢會嘔, 希望冇事啦! 返到上樓柏仲仍在睡, 6點幾時喊醒過架! 結果我咪摺埋衫先囉, 8點佢就起身啦, 食埋奶落樓已8:25, 都冇諗要趕車, 諗住撘小巴出去撘42A, 但小巴去到圖書館時見對面有42, 加上有人落車, 咁我都落啦, 跑番過去撘42好過, 果然8:10班車又係冇咗架! 入到去食埋早餐先返工啦! 返到嚟都係做吓自己嘢啦, 午飯後D老細都返哂嚟, 冇癮! 下午要做吓公事, 跟住又要開會, 又要叫外賣咁, 忙到放工閃人了! 今日返青衣, 因為阿媽今日要off, 老公放學揍咗去嫲嫲到, 但條友喺嫲嫲到就放肆啦, 咩都唔做淨係睇i-pad, 到我返嚟要佢收嘢做埋D功課就黑面啦, 我都算抑壓住道怒火架啦, 最終都完成埋囉! 不過最驚嚇都係返到嚟見老爺係到及準備走囉! 等老公返埋嚟就開飯啦, 有我最愛的雲吞呀, 柏仲都食咗D皮呢! 我起碼食咗十幾隻, 真係超正! 之後同笨元玩咗陣就回家了, 計啱時間撘巴士回家, 快手沖好涼執好書包練埋小司儀台辭就要瞓啦, 我就餵埋柏仲囉! 但我都超攰啦, 11點就要瞓, 冇法啦, 而家吓吓6點半就要起身, 真係好攞命!

<最愛雲吞!>

 <睇到柏仲兩隻牙嘛?>

 <大大張地墊好好玩架!>

9/9/14

9/9/14   TUE   HOT

今日係中秋補假, 柏仲早早又係到嘈囉, 點解放假唔可以瞓晏D呢! 七點幾八點梳洗完就餵埋奶啦, 然後等老公起埋身就出去食早餐, 冇咩要買所以10點幾返番屋企啦, 老公負責K.O.柏仲, 我就要對付子元, 對功課睇手冊檢查好執書包, 真係足以激到你嘔血! 叫做完成哂啦, 我都冇咩力但仲要做家務! 難得老公自動自覺起身就叫佢煮午餐, 我就餵柏仲食咗通粉, 出街前食埋支奶! 老公話撘巴士去Mega Box, 撘得唔耐但等得耐囉! 去到先行反斗城, 買咗Tiger份生日禮物同埋柏仲張地墊, 由於未夠鐘食奶所以周圍行吓先, 6點多食完奶就到我地食晚飯, 試咗新嘢食韓食家, 都幾好食, 可惜油煙大笨元係咁咳, 去廁所時仲嘔添! 7點幾回家啦, 老公本來想撘的士, 我反對, 又唔係超時間, 唔好浪費無謂錢! 返到屋企都係8點幾9點, 沖完涼兩個細瞓咗都係10點多, 咪同平時差不多, 睇電視到12點左右就瞓啦, 睇電視時先諗到今日係相識12周年, 不過結婚後其實都冇咩諗呢D日子架啦!

<兩兄弟好可愛!>

 <子元用咗$5零用嚟玩架!>

 <韓燒正!>

  

8/9/14

8/9/14   MON   HOT

今日係中秋節, 但大家都如常要返工返學, 朝早照樣捉笨元起身帶埋柏仲落去送校車啦, 跟住就餵奶等嫲嫲到, 同老公一齊食埋個早餐就返工了, 今日都係得個軀殼返去啦, 寫吓嘢做吓自己嘢, 大老闆娘食晏前已返過嚟, 搞到人地做自己嘢都做得唔安樂! 午飯後都係hea吓啦, 最慘係冇位喺嗰邊食, 只可喺自己位食, 人地家爺仔乸喺哂到, 邊有位坐啫! 下午完全係倒數收工的狀態! 4點閃人去揍笨元回家, 嫲嫲今日嚟煮嘛, 返到去先沖好涼再同柏仲玩吓, 反正明天都冇咩搞就唔迫笨元做嘢住! 老公就要整個火車燈籠比佢, 搞到我又要睇住柏仲! 等大包嚟埋七點幾開飯啦, 柏仲唔多肯食, 笨元就食得好多, 食到八點幾等嫲嫲洗埋碗就落去賞月, 只係沿路行出去美孚, 本來想去公園嗰邊, 但因為人多同埋兩隻仔開始攰, 只係去咗麥記食雪糕就回家, 笨元回程係到扭眼瞓, 結果佢坐咗柏仲架車瞓咗, 老公就抱住柏仲, 仲要好邪咁撞到笨元幼稚園的老師呢! 返到去都要捉佢起身沖涼, K.O.哂兩隻嘢終於可以休息, 都11點囉, 好攰!

<好環保玩咗幾年的燈籠!>

 <好圓好大的月亮!>

 <姑姐係咁捉住佢地合照!>

 <柏仲捱住牆可以企穩啦!>

 <仲企得好開心添! 有燈籠玩!>

 <落街賞月!>

7/9/14

7/9/14   SUN   HOT

今日回歸平靜, 但朝早依然一早比人嘈醒, 我要求唔高, 8點得架啦, 點解吓吓6點就醒! 拖到7點幾8點先理佢, 最搞笑係柏仲飲完奶又瞓番喎, 本來我都想再瞓架, 但又有幾機衫要摺, 咪摺囉反正都係我做架啦, 跟住笨元起咗身, 佢話要睇魔雪就一齊睇啦, 原來真係幾好睇架喎, 10點幾柏仲醒啦, 就叫埋老公起身出去食早餐買吓嘢咁, 入咗好多嘢飲, 應該夠今個月飲架啦! 回家後老公就帶子元去踢波, 得我同柏仲困獸鬥, 好在隻豬都合作, 12點多餵咗通粉半碗佢食, 跟住點幾食埋奶就瞓咗, wancy本來話3點先嚟, 最終1點就嚟咗, 細GE瞓緊大GE未番, 咪同我吹住水先囉! 3點多柏仲醒咗啦, 可以同佢玩吓, 子元就3點幾返啦, 最後wancy 3點幾要走了, 送咗佢落樓我返上去食嘢, 之後老公又瞓, 佢已經10點先起身, 可以又瞓, 其實係咪應該調轉呢, 佢睇仔我瞓! 到6點幾出門口過阿媽到食做節飯, 阿婆阿嫲都喺到呢, 柏仲食咗小半碗飯OK啦, 佢不斷要周圍爬, 好忙咁囉! 9點鐘要走啦, 柏仲開始作眼瞓, 飛的返去沖涼, 食奶時都已經開始扭, 老公又開到支奶唔夠暖, 真係比佢激死, 最終搞掂哂我先有得沖涼休息!

6/9/14

6/9/14   SAT   HOT

今朝未夠6點柏仲就醒咗, 實在好殘忍! 搞到我都冇咩得瞓, 子元六點幾都比柏仲嘈醒埋, 佢就起身睇電視, 所以到7點時我就捉咗柏仲出廳放喺學行車, 由得子元看住佢, 我點都瞓番半個鐘先, 7點半起身後就餵埋柏仲啦, 然後送笨元去畫班再買早餐返工! 都係hea啦, 又諗吓去澳門嗰時要帶咩食咩囉! 12點幾老公就揍咗笨元同柏仲過嚟, 柏仲唔肯食奶, 於是帶埋支奶嚟, 但佢都係唔肯食, 反而就食群群D包, 都由得佢啦! 比佢地玩到攰啦, 落到樓都未行到巴士站已瞓咗! 返到去照瞓到2點幾, 我都未食完午餐佢就叫, 咪開番支奶比佢囉, 飲哂喎仲不特止, 再瞓番添, 好似知道今日有活動咁, 瞓到4點先起身, 比D通粉佢食吓先, 只係食咗好少咋, 佢今日好似冇咩胃口咁! 笨元佢地3點幾返咗嚟, 執埋嘢4點半出門去入青衣, 去希霖生日會, 去到剛剛有得玩, 比埋柏仲玩添, 可以係咁爬佢不知幾開心, 之後都係周圍吹吓水咁啦, 又要同笨元抺吓汗, 跟住等食嘢啦, 同老公輪住揍吓柏仲咁, 又要留意住子元唔可以太激! 佢條友食嘢時就唔願食因為掛住再去玩, 真係比佢激死! 係咁要揍住柏仲其實都幾攰架, 食飽飽D細路又玩過, 幾難先捉哂佢地返嚟影大合照! 影完再可以玩, 因為個場book 到9點半, 但我地9點都要走啦, 柏仲8點幾已經瞓咗! 落到巴士站追唔到車, 唯有行去撘地鐵, 咁樣笨元就唔會瞓著! 返到去快手沖好涼K.O.哂兩個終於有得抖啦!

<勁開心有波玩!>

 <完全啱柏仲爬的斜路!>

 <又有地方扶住企!>

 <笑得幾開心!>

<有個地方任佢爬!>

 <而家可似依住牆企穩!>

 <有車渣喎!>

 <大合照!>

 <同主角影吓相!>

 <休息時間要打機!>

 <又打!!>

<柏仲企到好得意, 要我抱...救佢!>