5/1/15

5/1/14   MON   COOL

今日又要返工啦, 朝早如常要捉醒阿笨啦, 柏仲熟睡中, 揍咗子元上校車就返上樓食吓我D倉鼠糧脆片早餐啦, 柏仲醒咗就餵佢啦, 執好嘢就出門口, 好彩撘到架42, 入到去放低柏仲我就走啦, 反正都唔食早餐! 返到公司都係做吓嘢, 老細返嚟同佢傾吓annual dinner D嘢, 最終佢都係九唔撘八架, 話人多叫佢cut咁D商會唔好請又唔出聲, 吓吓都一圍架嘛, 但個阿媽請親戚嗰D, 一兩個都話人地多, 比我係佢阿媽, 真係想生舊叉燒好過生佢! 佢走咗咪齊齊係到鬧佢囉, 真係比佢激死! 下午都係做吓自己嘢啦, 忙吓忙吓咁都唔知自己做咗咩! 放工返去阿媽到接笨元啦, 笨元梗係搞搞震啦, 都真係令人激心架! 返到屋企叫佢沖涼先, 我就整餸, 條友又沖得勁耐啦可惡! 到我沖好涼又掛住幫佢睇功課忘記咗D飯燶咗少少, 8點唔洗開到飯, 洗埋碗都未夠9點, 又要幫子元搞埋D手尾, 我真係覺得自己冇停過! 到9點幾又到柏仲要食奶, 哄唔掂佢瞓交比老公, 都係扭, 就由佢喺床喊囉, 唔洗5分鐘瞓咗! 終於有得抖, 但我11點未夠已經瞓, 超攰!

4/1/15

4/1/15   SUN  COOL

諗起今日要做公事就唔開心! 朝早如常搞掂兩隻仔, 跟住叫醒老公睇實柏仲, 就揍笨元去畫班, 食埋早餐揍咗佢地就去惠康買餸返屋企同老公交更啦, 佢出去揍笨元我就喺屋企睇住柏仲, 豬仔仲都算合作, 我要去整餸時佢自己喺廳玩, 好獨立咁, 但老公話若佢單對單時, 柏仲係咁要佢抱住架, 個仔咁痴你我都冇法! 到12點幾佢買埋飯返嚟, 我快食完就出門口了, 1:45準時過到去上環, 佢地都setup得七七八八, 咁都係行行企企啦, D老人家知道嚟緊會有嘢派, 就開始係到排隊, 等到2:30都仲未有得派就係到鬧, 冇人叫你排架, 痴線! 終於開幕禮完成咗就開始派, 好在一早將D三合一分番開3份嚟派, 唔係實唔夠派! D阿排真係好有毅力, 排完又去隊尾排過, 真係見足佢三五次! 留番一箱之後等黎耀祥先嚟派, 佢真係好呀, 嚟2個鐘就收5萬! 喺我地個攤位企咗都唔夠3分鐘又比人捉咗去做訪問! 最後再等總監話可以就派埋D貨尾, 嗰班阿婆又排過, 堅! 到四點幾派哂可以執嘢啦, 收好放番上佢地車到, 太老闆娘話去食嘢就去痴咗個雲吞麵食埋先走啦! 返到去諗住同笨元溫書架, 點知條友個讀報告喺無人看管下根本冇咩進展, 又要同佢做好哂都7點囉, 我都冇精神溫, 唯有出去食飯算, 過咗AEON食咖哩飯囉, 柏仲都食到搶! 回家後沖涼瞓覺, 我地就休息吓打吓機按吓腳咁啦!

<我可愛嘛?>

 <還是這樣可愛?>

 <柏仲的1歲相架!>

3/1/15

3/1/15   SAT   COLD

今朝柏仲又7點多開始嘈, 但我都開始可以佢有佢喊我有我瞓了, 只係佢D喊聲會透入我夢入面囉! 差不多8點起身梳洗返工, 今日都忙呀, 冇法啦明天又要OT去嗰咩鬼假人行人坊, 都要做preparation架! 好在都有時間做吓自己嘢, 就係找柏仲的1歲相架D相出嚟曬啦, 選好整埋啱size就放工攞去曬, 再去買埋飯就回家, 食咗飯就執拾吓叫笨元溫咗陣書再揍佢去乒乓波, 我就要去攞相啦, 再周圍行吓D超市呀咁, 夠鐘就買埋雞蛋仔再去接笨元, 撘地鐵返嚟後先去買米線, 等嗰時又去咗759 shopping, 咁又洗咗錢啦, 唉! 回家後再齊齊出去借書, 因為要做好嗰本讀書報告, 食完米線後只係做得少少咋, K.O.哂佢地瞓覺先有得休息!

2/1/15

2/1/15   FRI   COLD

2015年第一日開工了, 心情一般啦! 朝早順利準時起身出門口, 柏仲好好瞓, 到8:15都唔知醒, 要換片換醒佢, 食完奶馬上閃, 以為架42走咗啦, 因為已經過哂8點半, 點知撘緊小巴出去時又見對頭有42, 可惡! 好在我出到去都好快有42A啫, 入到去唔食早餐啦, 因為喺屋企食咗脆片, 係咁二keep吓! 返公司後做吓自己嘢啦, 又吹吓水咁, 午飯要落去買飯, 下午老闆們返過嚟, 為咗傾Annual Dinner D嘢真係好火, 都唔明做老細點可以做到咁cheap精, 又冇腦, 唉…我都唔想再多講, 總之就係對員工好差好差啦! 下午都忙架啦, 放工後先去買餸, 返屋企攞游水嘢就去小童揍笨元去游水, 然後去圖書館借書比笨元做功課! 返到去再煮飯啦, 不一會老公同柏仲就返嚟啦, 煮到咁上吓就去揍笨元, 回家沖完涼食飯, 快手食完洗碗拖地, 終於清潔完可以餵埋柏仲食奶瞓覺, 再要搞掂笨元做功課, 真係人都顛, 都唔記得咗今日係柏仲13個月大添! 笨元搞到11點多先瞓, 其實都幾慘, 以前佢點會要咁夜瞓, 我地就睇埋星星先瞓!

1/1/15

1/1/15   THU   COLD

Happy New Year! 唔算大肆慶祝的元旦, 但都是不過不失啦! 朝早老公去踢波, 柏仲8點左右就醒了, 放咗佢上床, 齊齊hea到8點幾, 笨元又入埋嚟一齊玩, 起身後先餵奶, 然後煮早餐, 食完同佢兩個玩, 都玩咗好耐呀, 等老公12點幾返嚟, 先有機會執吓笨元溫書D嘢, 本來諗住等我出埋卷就去吓街, 返嚟再做, 但點幾兩點柏仲飲完奶瞓咗, 咁咪由得佢瞓啦, 叫子元先做好卷, 柏仲3點幾醒咗就可以出街, 先去美心食個晏, 再撘西鐵去荃灣, 玩咗遊樂場先再行商場, 都有買吓嘢呀, 我買咗襯裙的絲襪, 又買咗tomica的snoopy車仔, 子元都買咗架柯柏文, 最後去咗Aeon嗰邊間西餐食埋嘢就回家了! 沖好涼要笨元先自行溫習, 再做埋我馬上出嗰份卷, 算佢啦都識, 咁又執書包校服等等瞓覺了, 已經10點幾, 柏仲喺我沖緊涼時已經比老公K.O.咗! 我地都hea到12點幾瞓啦, 明天又回復原狀返工返學!

<很不錯的合照呀!>

 <玩得好開心!>

<而家好鍾意自己玩!>

 <哥哥霸哂嚟玩!>

 <柏仲只可停咗先坐吓!>

31/12/14

31/12/14   WED   COLD

2014年咁就完結啦, 今年都真係過得好快, 好多大改變, 好多嘢要適應, 大致上都冇話適應唔到GE, 總之都算係開心快樂的一年啦! 今日繼續係要返工GE, 奶奶出咗嚟揍佢地, 可以瞓晏D, 兩隻豬仔都未起身, 但我8點多都要醒啦! 搞掂佢地食咗脆片就出門口啦, 盡人事減吓啦! 返到公司都係做吓私事又做吓公事啦, 因為都真係好多好多嘢做咁, 做極都做唔完架喎! 午飯後去銀行, 好忙好忙, 下午都係好忙好忙, 5點幾準時閃人啦, 去買埋今晚打邊爐的菜就回家啦, 奶奶去咗wet, 阿媽過嚟幫子元溫書後順手接更, 咁我返到佢就走啦, 老公都好快返到, 各有各預備嘢啦, 7點幾開始打得邊爐, 慢打型式, 兩隻細又可以周屋走, 都係好事! 食完洗埋嘢, 沖埋涼就K.O.咗柏仲先, 子元比佢hea多陣先瞓啦, 我太攰了, 坐咗喺梳化都瞓咗, 同周公一齊倒數, 老公話叫過我都唔醒! 所以佢等我瞓到點幾醒啦先一齊返房瞓!

<2014除夕晚餐!>