10/1/15

10/1/15   SAT   COOL

今日係特別的一天啦, 因為下午約咗醫生幫子元做全方位評估, 加上朝早佢又要去足球比賽, 所以朝早佢兩父子一早出咗門口, 我就同柏仲晏D先, 其實叫咗阿媽幫手睇今日架啦, 只係怕佢要太早過嚟辛苦, 所以就叫佢10點左右嚟公司揍, 咁咪帶咗柏仲返去公司玩囉, 佢梗開心啦, 難為我抱到手軟, 推車又唔係咁! 仲要去買埋早餐先返嚟, 真係好攰好攰! 10點多阿媽嚟接咗柏仲先可以做吓自己嘢, 星期六冇咩趕我都唔會做架啦! 放工就落去KFC會合食D嘢就過金鐘啦, 約咗睇醫生! 準時2點過到去, 大人好多嘢填, 小朋友就玩玩玩, 子元不知幾開心! 首先係家長見醫生, 未見前子元喺房玩緊, 林醫生都觀察緊子元架啦, 傾GE都係想知我地想問咩問題啦, 咁基本上由細到大的特點呀, 等等都講嘢, 醫生總括係覺得我地其實已經一路幫咗佢好多同好留意到佢, 例如鏡面字呀嗰D, 咁傾咗一個鐘左右啦, 就到子元做test啦, 我地又唔知佢係點做GE, 咪等囉, 等佢做完就到番我地去聽結論啦! 其實個結論同我地一直的估計都接近, 首先子元ADHD的評估只係51%, 即係擲界位, 唔需要食藥, 只要多提醒及放電, 佢慢慢大就會控制到! 第二樣係讀寫障礙, 反而呢樣係嚴重D, 因為佢空間感呀圖形模仿方面只得幼稚園程度, 所以引至佢寫字方面裝字有困難! 呢樣我都覺架啦, 但唔知係比較嚴重囉, 醫生要我地報職業治療, 會有專家教佢方法點改善! 最後一點亦係比較安慰的是子元是資優生, 仲要係最高的2%嗰組, 不過佢係要協助嗰隻囉, 咁係不幸中之大幸, 若佢又ADHD又讀寫, 又只是中等, 咁就會變得好難教好難改囉! 咁醫生都好樂觀GE, 佢話佢情況其實可以改得到, 掌握到方法後佢就可以發揮到佢GE才華! 有咗了解有咗方法, 叫做可以去一步步改善囉! 簽埋授權信比醫生同學校聯絡, 埋單成為9K, 之後治療逐次計, 諗起都赤但又唔得唔比! 完成就走啦, 快手返屋企揍番柏仲, 同埋阿媽去長沙灣食埋飯再返屋企囉, 洗白白休息啦, 今日真係好攰咁!

 

9/1/15

9/1/15   FRI   COLD

今日都係如常咁叫醒子元返學啦, 又要揍埋隻仲落去, 返上嚟後叫醒老公, 因為佢琴日又漏哂D嘢喺奶奶到, 所以今日佢揍仲仲入去! 我就慢慢執好間屋先出門口, 買少少早餐就返工, 今日又係忙忙忙啦, 上午都仲吹到吓水, 下午老細返咗嚟, 係咁要force佢答我Annual Dinner D嘢點做, 否則都唔知幾時先決定到, 於是下午D時間轉個眼就過咗, 不過我今日都要準時閃, 因為要先買餸返去, 再去小童揍佢地去游水, 換衫時真係打仗咁, 執到我死死吓, 跟住走難咁去到泳池, 差不多入得, 撞到子慧媽又吹咗陣, 程太嚟到就返屋企啦, 又要煮飯嘛, 不一會老公揍咗柏仲返嚟, 咁hea咁佢地就踢波的踢波, 揍放游水的去揍, 我就煮埋個飯, 等佢地齊人沖好涼就開飯, 困住柏仲喺客廳啦, 點知佢爬梳化企上几仔走出嚟, 嚇鬼死我! 洗埋碗抺埋地程生佢地就走啦, 咁我就叫子元看住柏仲等我沖涼, 然後比佢地入房玩陣我執番好間屋就餵奶, 餵嗰時叫子元換睡衣刷牙入房等我啦, 等我K.O.咗柏仲, 就諗住去哄笨元, 點知隻傻豬攰到自己瞓咗, 真係可愛! 終於可以休息了, 已10點幾11點, 剛好可以睇吓星星, 等老公踢完波返來都12點幾, 佢沖完涼又話腳攰要按腳, 結果點幾先瞓呢!

8/1/15

8/1/15   THU   COLD*

今朝又係趕啦, 都唔明點解日日都咁趕, 已經唔係遲起身架啦! 仲要出到lift先發現子元冇打呔, 又要仆返入屋攞, 落到去啱啱好趕到校車呢! 返上樓餵奶執好嘢又出發啦, 今日又好啱咁等到42, 順利入到去, 放低柏仲又閃了! 返到公司都係買少少嘢食啦, 朝早都係做咗自己嘢先, 跟住忙個死人Annual Dinner啦, 總之條PK講一句就做死人啦, 下午佢返咗嚟, 襯佢心情OK時快手問吓嘢囉, 不過都係煩架啦, 咁樣擺又唔啱, 咁樣擺又唔啱, 都唔知佢想點! 我真係去睇一次場, 不過睇完佢都係唔滿意, 係佢眼中冇滿意! 總之過得自己過得人啦, 唔洗再理佢D無理要求! 又搞到6點先走得, 真係蝕哂! 喺番琴日嗰檔買咗薯仔, 今晚食西餐嘛! 返到去阿媽就閃了, 今晚都冇同子元溫書, 我今次會唔會真係放得太鬆呢? 只係沖完涼要佢溫普通話, 點都要remind吓掛! 柏仲佢地返到嚟, 又唔再溫啦, 等老公沖埋涼煎牛扒, 食完洗埋碗都八點幾九點, 叫老公乾衫時, 個乾衣機竟然唔郁, 咪打去煤氣公司叫佢明天找人嚟整囉, 但就要掠咗子元套校服先, 唔係明天冇得著! 10點前K.O.咗子元啦, 柏仲9點幾係到嘈, 開奶比佢又飲得4安, 又要落地玩, 最終930齊齊各噯隻, 10點可休息了!

7/1/15

7/1/15   WED   COOL

柏仲開始習慣番要早起咁, 次次我入去梳頭時佢就醒, 想賣甩佢都唔得, 唯有帶埋佢落去囉! 返上樓搞掂哂就出門口啦, 勁好彩撘到42入去, 返到公司附近仲早就去買少少早餐啦! 朝早都忙呀, 要預備吓下午D嘢, 不過都仲可以吹吓水, 午飯後就慘啦, 真係要快手預備齊D嘢, 然後開始忙亂的開會, 我呢D跑腿, 又要去買蛋tat, 然後咁啱又勁多電話找我, 所以個會都開唔到D咩, 好在有另一個同事記錄, 有時真係覺得不被專重到一個好可惡的地步! 之後開Annual Dinner個會仲火, 邊有老闆為反對而反對GE啫, 總之你講咩都反咗你先, 跟住你叫佢睇清楚佢又唔睇, 問佢咁做得唔得又唔答, 都唔係做嘢! 仲由得D仔女入埋嚟開會加把嘴嗰隻, 佢老婆都叫做有家教, 識叫D細路收聲, 有D咁GE老細真係前世! 對員工係咁都算啦, 對個阿媽都係咁, 有衰嘢就話係阿媽決定, 認屎認屁時就係自己, 都半百啦, 真係退化呀佢! 搞到我6點多先走, 好在阿媽今日早揍咗笨元返去溫書啫! 咁我買D菜就返去煮飯啦, 食完洗埋碗都要再幫佢溫吓書架, 話哂明天大考, 我真係做唔出全放手! 9點幾完成哂就可以瞓啦, 我仲有好多手尾嘢要執啦, 10點幾先叫做坐定喺到睇陣電視, 老公就話睇埋新聞先瞓呢!

6/1/15

6/1/15   TUE   COOL

今日都係咁啦, 朝早拖醒隻大, 隻細應瞓又唔瞓, 結果又要帶埋佢落去, 返嚟後摺吓衫餵埋奶啦, 差不多時間就出門口, 等巴士時又撞到護士姨姨, 佢話架42有排都未到, 佢撘的士上荔景轉小巴, 載埋我, 真係好人! 咁我又好快入到去啦, 交低柏仲就返工啦, 今日工作上都忙呀, 又要prepare明天開會D嘢, 諗起都煩! 午飯後睇星星啦, 老細今日唔返, 都係好事, 唔好阻住我做嘢! 放工去接笨元啦, 見到婆婆仲同佢溫緊書, 今次都係靠婆婆同佢溫習, 希望OK啦! 回家後同笨元計時沖涼, 然後做網上功課, 我諗住沖涼老公已經同柏仲返到, 咁不如就煮埋飯先啦, 所以早咗食飯, 830已搞掂, 就叫笨元做英文份pastpaper, 做足一個鐘, 我可以沖涼同柏仲玩陣餵埋奶先! 未夠10點捉佢瞓埋, 我自己都冇力了, 10點幾想睇電視都瞓咗!