18/4/15

18/4/15   SAT   WRAM

今日都係一個普通的星期六啦, 但柏仲6點幾就醒, 哥哥唔洗返學喎, 唔好咁早叫醒我啦! 比佢上咗大床, hea到8點要起身啦, 因為子元要補畫班, 所以要叫佢起身出門口, 趕到8:40班車所以去咗買麥記比佢, 快食完就上去畫班啦! 我就買埋早餐返工, 喉嚨仲係好痛, 食吓粥囉唯有! 返到公司都係hea, 做吓自己嘢啦, 時間過得都算快, 吹吓水咁柏仲又上嚟啦! 玩到放工就回家, 子元就黑口黑面囉, 因為叫佢做功課又做得衰咪比daddy刷哂囉! 揍咗柏仲返去就求奇整D嘢食齊齊食, 然後咪玩吓又做吓家務咁囉, 3點幾老公突然揍埋子元返嚟喎, 原來子元話唔舒服, 唔去打乒乓球, 咁叫佢沖完涼咪休息吓囉, 然後就陪佢做埋D功課, 陪佢做又好快做哂喎, 柏仲黃昏時瞓咗一覺, 等佢醒咗我地就去咗大家樂食晚飯, 比笨元踩吓單車咁, 等佢有得郁吓, 晚飯回來沖涼瞓覺, 柏仲試咗兩晚crying control program, 開始意識到扭冇用, 係咁二陪佢一陣吹兩講水, 最多放佢瞓番低幾次就放棄! 可以舒服一點了! Hea吓睇吓電視咁又瞓啦!

 

17/4/15

17/4/15   FRI   WARM

今日如常咁揍笨元返學啦, 柏仲又係6點就醒咗, 比我瞓埋嗰大半個鐘都唔得GE! 揍完佢返上嚟又係食奶啦, 叫醒老公要出門口了, 佢揍柏仲入去, 我就返工啦! 返到去都係做自己嘢, 午飯後hea吓咁啦, 喉嚨好痛冇咩心情, 應該係生咗好多菲滋喺喉嚨嗰隻! 下午老細都唔返, 咁就最好啦, 可以自由吓! 放工先返屋企攞游水嘢去小童接佢地, 見到子元咳得好西利喎, 老公又唔話我知, 我又冇帶氣喺身, 又趕住要揍佢地去深水埗泳池, 唯有頂硬上, 換好泳衣落樓下會合埋子慧, 一揍三過泳池, 又要再返屋企攞氣比佢聞, 咁樣一來一回都幾喺嘢, 剛好8點去番泳池, 但都等到8:10先見佢地出嚟, 子元又咳又嘔咁, 聞咗氣叫做好D啦, 但都仲係咳, 齊人慢慢行去晚飯地點, 陸生程生已在, 快手叫嘢食, 混混亂亂食咗餐飯, 大家吹吓水咁, 都幾好架, 起碼有幾個星期要咁吹! 9點幾各自回家了, 返到去快手叫子元沖涼食藥瞓覺, 柏仲都係沖涼食奶瞓覺, 唔知係咪夜定琴晚行駛咗Crying control program有用, 佢今晚冇咩扭, 一陣就自己瞓咗! 咁我喺房都hea咗陣冇問走GE! 到我沖埋涼執埋嘢都12點, 馬上瞓覺, 超攰!

 

16/4/15

16/4/15   THU   WARM

今日都食哂D消炎藥, 但依然唔好, 睇怕都要去藥房配吓藥! 朝早起身柏仲明明瞓緊, 到我地就出門口時佢就起身走出廳, 咪要帶埋佢落去囉, 但因為太晏冇得上車坐! 返上樓食埋奶就等daddy起身可以出門口入嫲嫲到, 我就返工啦! 朝早都係做吓自己嘢啦, 午飯後老細返咗嚟, 好在下午佢有嘢做, 未夠3點就走咗, 可以自由D做吓自己嘢, 都係做吓旅行D手尾, 計清楚用咗咩錢等等! 放工就去接笨元, 條友仔好眼瞓喎, 其實我都眼瞓! 但都要頂住, 好在有奶奶煮飯等等, 返到去柏仲又瞓咗, 咁我可以同子元沖好涼先, 食飯前柏仲醒咗, 咪一齊食飯囉, 飯後有奶奶洗碗, 我真係好耐未試過咁悠閒! 可以睇子元功課, 佢又好生性喎, 雖然有做漏, 但你唔鬧佢, 佢又好快好合作咁做番, 仲執埋書包等! 所以都比佢同柏仲玩, 我就可以抺吓地先, 老公亦都返到, 等佢沖埋涼可以睇住柏仲我就同子元溫默書, 下星期又默英文啦! 默好書比佢玩陣先瞓, 我就餵埋柏仲然後實行“crying control program”, 用咗半個鐘, 出出入入唔知幾多次, 好明顯柏仲係要人陪先肯瞓, 但我係絕不手軟架! 先係噯吓佢陪吓佢, 但一開門佢就喊, 關門佢就爬出嚟, 等咗一分鐘入去抱番佢落床, 如是者都四五次, 我關哂廳燈等我出房時冇咁大差別, 同埋我唔出房住, 而係佢一站起我就放佢瞓低, 放咗十幾次, 佢嬲嬲地咁用被遮住自己唔再爬起身, 咁我出咗房佢都冇再喊, 可能都攰, 亦知道冇得再陪瞓, 放棄咗, 算係第一晚成功啦, 老公話佢明天都想試吓睇吓得唔得喎! 一時痛苦都係為佢長遠好啫! 搞掂D細就可以係咁打機, 哈哈, 12點幾先瞓!

 

15/4/15

15/4/15   WED   WARM**

今日要返番工啦, 不過個人都浮浮地, 柏仲晚上又成日醒, 等佢食哂西藥就比D珍珠末佢食先得! 由於想食咗藥先, 所以喺屋企找D嘢食咗先, 冇買早餐了! 老公又係喺屋企揍住仲仲, 我就返工了! 不過今日真係好浮呀, 個人呆呆滯滯咁! 呆吓呆吓又一朝, 點知食飯前先整單送貨不成, 明知喺人地玩嘢都要搞到佢, 激死! 最終叫佢送嚟office, 再找司機車過去囉, 最終都叫做搞掂咗啦, 返到公司一陣又開會啦, 幾鬼眼瞓呀! 開完做埋D手尾, 老細走咗整埋D嘢就走人啦, 老公去咗揍笨元學珠心算, 咁我直接返屋企, 柏仲剛瞓醒, 又係到嗲仔, 沖個涼都喺門口嘈你, 不過有奶奶睇住我都放心慢慢沖! 之後執吓屋, 煮飯等老公揍笨元返來, 仲有大包都過咗嚟食, 混混亂亂咁食完飯, 好在奶奶幫我洗碗, 咁我就搞掂笨元功課, 抺埋個地咁囉! 都算早早搞掂D嘢, 但我又好早開始眼瞓, 餵完奶老公k.o.柏仲, 我就K.O.子元, 仲K.O.埋自己, 陪佢時喺佢張床瞓埋, 係老公噯完柏仲出嚟唔見我先入子元房找我呢! 可能瞓咗陣啦醒D, 都未瞓得著, 12點多先再瞓!

14/4/15

14/4/15   TUE   WARM

今朝簡直係用意志力抬自己起身, 捉咗笨元起身返學, 返到屋企真係頂唔住, 喺梳化抖吓睇吓點啦, 但愈來愈占寒占凍, 應該返唔到工啦, 到八點幾九點免強起身煮咗D粉食咗就食藥, 等老公起身食埋早餐睇住柏仲我就瞓, 足足瞓咗三四個鐘呢, 又要起身食藥啦, 再去大快活食tea, 跟住老公出咗去銀行, 我就同柏仲返去先, 再整番熱D粉比佢食, 然後就食藥, 但我又唔係好瞓到, 到5點多時先再瞓, 但老公又要去接番笨元, 柏仲又唔肯瞓, 所以我都係冇咩得休息, 柏仲喺房同廳出出入入十幾廿次後終於爬咗上床喺我手臂上瞓咗, 但6點幾老公佢地又返咗嚟, 我都冇理啦, 由得佢一揍二, 食飯先叫我, 都只係食咗少少咋, 冇咩胃口! 沖好哂涼就睇子元功課, 好在佢都做哂, 跟一跟就得, 等佢瞓咗, 老公又K.O.咗柏仲都瞓啦! 柏仲近來都瞓得唔好, 半夜醒之餘哄佢時又多要求又要搞好耐先瞓, 點算好呢!