10/5/15

10/5/15   SUN   HOT**

今日係母親節, 我就話係激母親節囉! 首先朝早柏仲又係6點就醒啦, 但真係唔洗咁早嘛, 我咪K.O.番佢囉, 點知又唔知醒啦, 瞓到8:45先醒, 出廳見到子元喺到睇緊電視, 我咪話佢做咩唔叫我地起身囉, 9點鐘畫班嘛, 於是老公快手同佢出門口, 我就同柏仲後join, 我梳洗完佢都醒啦, 咁食埋奶就出門口啦, 過到食埋早餐就去買吓餸, 主力係買今晚條魚, 然後去咗萬寧買尿片, 用埋張優惠卷後都平咗好多, 行返去接笨元放畫班, 我就返屋企, 但柏仲唔多肯瞓, 我都邊做家務又邊試吓哄佢, 都係唔瞓, 咁咪快手煮個肉碎粥佢食, 點知食到一半佢就迷啦, 咁佢先肯瞓, 我就可以休息啦, 到3點多佢醒啦, 咪整番熱個粥比佢食囉, 餵到咁上吓老公就返, 等佢地沖好涼, 食咗D麥記呀KFC等, 睇完Running man就去超市買買嘢, 回家後同子元溫默書, 初頭叫佢自己溫住先又呆又發脾氣, 結果等我餵完奶, 又要入房哄佢, 咪快手溫好囉, 好在奶奶早過嚟, 幫手睇住柏仲, 因為陸生已經開始煮緊飯, 終於溫好咪大家齊齊玩吓等食囉, 陸生真係煮得好慢, 我知慢工出細貨, 但真係唔好咁慢囉, 煮咗足足3個幾鐘! 所以8點多先有得食, 食完阿媽同怡都閃先啦, 仲要執手尾有排搞, 好在老公自己執埋手尾洗埋碗, 咁我只係抺地, 同柏仲沖埋涼食埋奶可以瞓, 子元就話要睇綠燈就比佢睇到10點幾先瞓!

 

 

9/5/15

 

9/5/15   SAT   HOT

今朝柏仲又晨早起身啦, 我喺得星期六可以瞓晏少少咋嘛, 咁都唔放過我! 8點幾要起身啦, 搞到9點多先出到門口, 老公就揍柏仲入嫲嫲到, 然後同子元去剪頭髮, 所以我放工就入咗青衣, 奶奶煮咗飯嘛, 因為大包又喺青衣喎! 入去食完飯hea咗陣就走啦, 點知落緊雨喎, 咁都要走架啦, 柏仲好好奇落雨呀, 但我又要抱佢又要拿遮真係好攞命! 好在都好快有巴士, 出去小童入簽抽暑假活動, 跟住行過去荔天同老公會合, 子元去咗學乒乓球, 我地就去大快活食嘢, 柏仲都真係幾行得, 由小童行到宇晴軒, 8成都係佢自己行! 去到再食少少嘢啦, 跟住就去咗AEON買吓嘢, 夠鐘就去接番笨元, 但勁大雨囉, 所以買好嘢就一齊撘的士返去算! 沖好涼各自處理一個, 我都要同子元做好功課囉, 晚飯只係食麵同雞翼咋, 但老公都整咗好耐, 真係唔係好明佢點解要煮咁耐囉! 食完洗埋碗抺埋地就K.O.柏仲啦, 子元邊有咁早肯瞓不過都係hea多陣就瞓啦, 我地都係睇吓電視咁啦, 11點多就瞓!

8/5/15

8/5/15   FRI   HOT

今日老公仲可以放多一日假, 所以佢揍柏仲入青衣, 我就返工啦, 柏仲今朝竟然8點先知醒, 所以我可以閒吓啦, 佢好似知以後一定要同哥哥一齊出門口冇得瞓晏D咁, 今日瞓番夠佢! 叫得老公起身執得嘢嚟都晏啦, 仲要買早餐返去食, 真係有D晏! 朝早都係做吓自己嘢, 午飯後都係hea吓啦, 又同個網友繼續找找新加坡旅行資料啦, 一路都冇為意架, 老細突然4點多走返嚟喎, 好在之前剛剛心血來潮做商會的會議記錄, 攤到一枱都係嘢啫, 否則又比佢話我冇嘢做! 之後都一路做嘢做到放工, 今晚就好忙碌, 先返屋企執好嘢, 程生打嚟話可以渣車嚟接我過小童, 上去同佢地換好衫, 就過深水埗游泳池啦, 放咗佢地入去, 又返荔欣同老公會合, 接番柏仲, 佢又跟我地車過咗泳池睇子元游水, 因為佢踢波踢10點, 唔趕但又唔啱時間一齊食飯, 之後我同程生就上元州接婷婷, 最好笑係敏瑩婆婆攞玩具比柏仲玩, 婷婷就係咁搶番! 一齊又去番泳池接放水啦, 叫咗子慧媽先去幸福邨茶記擺住叫餸等我地! 終於接咗佢地啦, 就2個大人揍住5個細路, 先去茶記, 我仲要1揍5上去, 程生去接程太過來! 叫好哂餸有得食, 安頓哂D細GE食嘢, 程太佢地都到啦, 好忙亂咁食完餐飯, 程生先送咗佢一家返屋企, 再回程車我同子慧媽返去, 佢話自己變咗小巴司機, 好搞笑! 返到去我光速搞掂佢地兩個瞓覺, 本來都想子元做吓功課先, 但做唔夠5分鐘就瞓咗, 都係叫佢快D瞓算啦! 我可以安心地沖個涼, 終於可以攤抖吓時都10點幾啦! 跟住又到Barry拍門, 老公約咗佢上嚟交收隻戒指, 馬上比咗錢佢架啦, 不過佢好似想等老公返嚟先, 咪由得佢坐囉, 反正我大把嘢未做, 搞掂哂嘢就坐埋梳化睇電視啦, 坐到12點佢都話攰, 冇再等老公返嚟交貨, 不過佢走咗不久老公都返啦, 仲買咗糖水我食, 我食完都喺梳化瞓咗, 差不多1:15佢沖好涼食埋嘢休息完先叫醒我呢!

7/5/15

7/5/15   THU   HOT

今朝老公要返工, 6:45就出咗門口, 細嗰隻起咗身, 大嗰隻又唔肯起, 辛辛苦苦搞掂佢出門口啦, 返到屋企就到隻細啦, 不過今日嫲嫲出嚟, 都可以唔洗趕, 冇咩做就執吓屋囉, 我呢D人真係好衰, 唔可以停吓休息吓GE! 等嫲嫲嚟到我就買早餐返工啦, 返到去都係hea, 因為本來老細話下午要過商會咩做訪問, 跟住又話唔洗, 比佢玩死, 又要call個記者話今日唔得! 9點幾老公打嚟, 話佢入到去大埔, 個師傅話公司未交D資料比佢, 今日唔開得工住, 要等公司小姐們send咗資料比佢先得, 真係比佢玩死, 又要明天先再通知邊日開工, 不過應該都係下星期架啦! 我今日就hea過啦, 同個網友係到討論吓佢7月去新加坡D安排, 其實佢有時都幾搞笑, plan行程等應該係好好玩架嘛, 但佢就淨係係咁問人, 而家網上世界咁豐富, 咩都找到啦, 不過我都係當消磨時間啫! 下午老細返咗嚟咪做吓樣做吓嘢囉! 放工就返屋企先, 返去見到柏仲個新光頭仔look, 好曵仔樣! 嫲嫲又話唔煮飯喎, 夠鐘過去接咗笨元就去森記食, 不過我就唔係好舒服, 都冇咩心機食, 咁慳GE我食完都話撘的士返去, 沖好涼先K.O.咗柏仲, 再要幫子元睇功課, 邊睇邊溫默書, 真係堅多功課, 攞命! 搞掂哂都10點, 本來10點幾都想瞓, 但因為笨元冇西服了, 要等機衫乾埋先瞓得, 所以11點多先瞓, 勁攰!