10/8/15

10/8/15   MON   HOT

34歲生日啦! 過咗3字頭, 時間過得特別快! 由於子元11點幾要學圍棋, 所以都要等佢學完嘢先去得街! 8點多起身, 等老公起埋身就去食早餐, 點都要試吓呢間北海道牧場, 一睇子元搶住食就知好食! 食完去咗圖書館, 然後老公揍柏仲返屋企先, 我就揍子元去小童學嘢, 然後又行返屋企! 返到去就唔願郁, 叫老公快D諗吓冇得去沙灘咁去邊, 佢找到去迪欣湖有嘢玩, 咁就一於去迪欣湖! 叫老公去接子元, 我就執吓嘢, 因為都要帶衫帶水帶飲品, 執緊時柏仲又醒咗, 佢醒咗就冇辦法執嘢, 等老公返嚟先再執囉, 約埋嫲嫲喺美孚等, 快食個麥記就撘巴士入去, 撘E車入到大嶼山有架R8巴士直到迪欣湖, 非常好! 先喺遊樂場玩住等, 老公就去問清楚買飛玩單車同踩船仔D嘢, 最終先租咗一個鐘家庭單車, 可以圍繞個湖踩, 不過踩位有4個, 但腳就得3對踩, 但有個唔多用力, 你話死未, 真係踩到腳軟! 踩完一個圈後就再沿途找地方落車睇吓景, 食D嘢咁, 都幾舒服GE! 不過落得車耐柏仲就唔肯坐定喺車, 好可惡! 最後嗰段要我抱佢坐前面玩住軚佢就肯, 難為我又要踩又要抱實佢! 咁就玩咗一個鐘, 天氣好轉可以踩船, 不過要先安頓好柏仲, 嫲嫲又唔踩GE! 咁開咗奶比佢食我地就閃咗去踩船, 只要咗半個鐘, 夠哂皮啦! 不過又幾好玩GE, 係子元成日做D危險嘢比佢嚇死囉, 又彎身玩水, 又突然企起身, 真係比佢嚇死! 上岸後搵番嫲嫲同柏仲, 喺遊樂場玩多陣換吓衫飲吓嘢, 就撘番車出青衣食晚飯! 出去嗰程冇位坐, 真係抱到我手都軟埋, 堅係冇人會讓座, 咁啱有人落車先比我地找到兩個位咋! 柏仲落車已瞓咗, 行去青衣城食上海嘢, 我全程揹住柏仲食, 真係腰骨都痛, 臨食完佢先醒, 比咗D餸尾佢食囉, 有麵有包咁都OK啦! 食完就撘的士返屋企, 攰到爆, 沖好涼就K.O.埋兩個, 可以休息了!

 

 

 

 

 

 

 

 

 

 

 

 

 

9/8/15

9/8/15   SUN   HOT

今日都算有節目架, 朝早去學畫班, 我地就去食早餐買吓嘢咁, 接番佢之後就去買生蠔今晚食, 返到屋企我要K.O. 柏仲, 老公出去攞蛋糕, 幾經辛苦打暈咗佢, 我就可以抺吓地執吓嘢先, 因為又買咗一堆嘢返嚟嘛! 諗住仲仲瞓醒就去斧山道游水, 唔係太餓就煮咗丁麵食咋, 過到去泳池竟然大排長龍, 結果排咗半個鐘先入到去, 快手換好衫就去玩, 柏仲初頭都唔知咩事, 但知道原來可以咁玩喎, 就不停要瀡滑梯啦, 難為我地要抱住或拖住佢上上落落咋, 最大嗰條梯足足玩咗有20次呀, 佢完全唔怕, 跌咗入水中時嘗試浮自己上嚟, 見佢唔得就抱番佢上水, 佢一D都冇驚, 好堅! 子元就主力玩D低B嘢, 水槍呀浮床呀咁, 玩到5:25就好閃啦, 因為一收池衝入去更衣室實迫爆, 好邪地喺更衣室撞到maymay喎, 咪叫子元跟住排隊沖身囉, 快手搞掂就出去啦, 食吓燒賣抖吓涼先, 跟住就撘巴士返屋企! 我地沖涼老公就煮大餐, 有牛扒, 老公開生蠔, 沙律, 意粉, 最後仲有蛋糕! 等食時柏仲又食奶, 食蕉, 食飯仔, 咁佢先滿足D, 可見佢喺水到真係出咗好多力玩! 切蛋糕食埋就比仲仲瞓啦, 我都攰到爆, 四肢無力! 不過最驚係晚上開始真係又雷又雨, 明天都係去唔成沙灘架啦!

 

 

8/8/15

8/8/15   SAT   VERY HOT*

星期六子元要乒乓球, 老公又要一齊出去食早餐, 結果咪一齊出去囉, 食完佢揍咗子元去學校先, 我帶咗仲仲上公司玩陣, 等老公揍咗子元先嚟接番佢! 咁我放工就買午餐返去食啦, 食完仲仲就醒, 餵埋飯佢食飯, 老公3點幾就出咗門口, 佢今晚又去飲又踢波, 好忙囉! 我就喺屋企睇住兩隻嘢, 子元狂睇咗6個鐘電視, 不過睇之前我趕佢做咗作業, 加上又冇街好去, 因為真係太熱, 如果唔係我都諗住帶佢地去公園行吓! 到6點幾就煮晚飯, 我最簡單就係煮意粉架啦, 今次用肉丸茄汁煮, 轉吓口味啦! 食完就同佢兩個沖好涼先, 到8點幾打暈咗仲仲我就可以沖涼, 比子元睇到10點就趕佢去瞓, 我就等到老公返嚟先瞓呢!

7/8/15

7/8/15   FRI   HOT

今朝我照樣返工啦, 柏仲差不多8點先起身, 算係咁啦! 買早餐返工, 返去都係hea吓啦, 寫吓日記吹吓水, 話咁快又放lunch, 食完飯睇吓電視啦, 下午都係吹吓水, 無咩特別嘢做咁啦, 夠鐘就食tea, 食完就放工, 約咗老公去惠康入吓貨, 買吓飲品杯麵啦, 跟住就過番小童接笨元去泳池, 老公就去買米線, 回家等仲仲沖好涼就餵咗飯佢食先, 又要落去接子元, 交學費比SIR時, 講開子元學成點, 佢話子元會比人學得慢, 因為佢好怕水, 又要堅持自己點游, 唔係好肯聽人講, 然後顧得換氣隻腳又唔記得踢, 不過佢話冇學唔識GE, 慢D啫! 但都要話吓佢, 等佢唔好咁自我, 要聽阿sir教囉! 返屋企沖完涼食埋嘢, 我先K.O.咗柏仲再安心去沖涼, 就到子元瞓覺, 因為仲有三機衫未摺, 足足摺了個幾鐘, 腰骨都斷! 11點幾好眼瞓啦, 要早D瞓!

6/8/15

6/8/15   THU   HOT

今朝都係一早比仲仲嘈醒啦, 真係想佢可以瞓晏D, 我要求唔高, 八點得架啦! 起身後我都有D衰掛住睇電視遲咗出門口, 老公又要揍子元去乒乓球, 咁佢就一齊出門口, 但推B車真係慢好多, 買得早餐我返到去都過哂9點半, 真係慢好多架! 諗起太耐冇曬過相, 都係時候的起心肝去曬吓, 曬咗未入又另一回事嘛! 做咗一朝, 又上網hea吓咁, 午飯後都係睇吓電視啦, 下午hea 完就曬埋子元D相, 放工攞去曬, 然後接笨元返屋企, 如常咁沖涼煮飯啦, 食完老公出咗去買六合彩, 跟住我就快手洗碗抺地, 笨元做番好佢D作業就可以玩, 9點多K.O.咗柏仲, 等子元瞓埋就上網search吓個廁所廚房D設計囉, 我地係咁, 習慣諗一大輪先, 總會實現GE, 慢慢囉! 本來11點幾去瞓架啦, 但因為大家都肚餓, 都係起身食個杯麵, 哈哈, 肥住瞓!