15/8/15

15/8/15   SAT   RAIN*

今日都算係節目豐富的一天! 朝早返工前要揍咗笨元返去學乒乓球先, 但朝早都落住雨喎, 就試吓撘6號, 落車後行少D, 好在都冇咩雨, 又因時間關係, 我9:15已經揍咗佢返學校, 我都知早得滯架啦, 但都冇辦法! 買埋早餐返到公司都9點幾, 但11點前又要出去揍多佢一次, 好在係星期六啫冇咩所謂! 12點幾老公揍柏仲嚟換柏仲, 因為子元要去踼波, 我就揍番柏仲返屋企, 放工去買KFC同飯團返屋企食, 柏仲除咗食哂蘑菇飯, 仲食我D飯團, 佢近來食雜糧都食多咗, 比少餐奶佢係啱! 玩吓執吓嘢, 2點幾3點出門口, 約咗家寶上個free的pre-n! 其實有D似康傑嗰時D預備班, 都係唱歌玩大肌肉, 去課室上堂, 食茶點做手工咁! 唔洗坐定嗰D柏仲都OK, 喺課室上堂就完全唔肯坐, 我係咪要開始train吓佢, 否則返學時點算! 唯一要坐嗰part而又肯坐就係等食, 都算係咁! 上完就call老公過嚟, 因為佢已上咗程生屋企, 預咗今晚去荃灣廣場食高速列車壽司, 過到去差少少行到就落大雨, 有遮都濕哂! 去到先攞飛架啦, 但真係多人到你唔信, 仲有百幾二百張枱先到, 無奈之下唯有找地方行吓先再食, 程太有雪糕卷去咗食雪糕先, 跟住諗住去Aeon行吓玩具部啦, 點知…裝修喎! 得好少嘢行, 但我地都買到嘢, 本來只係幫柏仲買咗幾罐飯仔, 咁程太又幫婷婷睇吓褲仔咁, 排緊隊時見到櫃面有件跳跳虎泳衣, 100咋喎幾抵! 之後去番一田嗰邊睇玩具, 我仲買到我好想買的紙包飲品盛載器, $22咋又係好抵! 等到7點幾, 終於有位啦, 不過D枱係for 6人, 我地5大4小, 真係迫到呢, 結果程太, 程生, 婷婷, 佢契爺坐一邊, 我, ALEX, 子元敏瑩柏仲坐一邊! 不過都幾好玩GE, 係咁點架車就係咁送嚟! 不過都只係快食, 少爺們冇咩耐性! 食完就走啦, 子元疲勞過度發燒呀, 咪飛的返去囉, 沖完涼就醒哂冇事喎, 早D返到都好, K.O.咗柏仲休息! 我都真係好攰了!

14/8/15

14/8/15   FRI   HOT

星期五啦, 唔洗揍佢兩隻嘢就直接返工, 買個北海道早餐, 返去食完就吹吓水吓自己嘢, 然後又食午飯啦, 下午開始做埋商會條數, 放工前完成到12月了, 又要等另一秘書搞掂1-3月我先有得再做, 估唔到自己做得咁快! 放工去惠康入吓貨, 因天氣轉壞, 老公先同程生婷婷返屋企, 我去小童接佢兩個去游水, 見敏瑩話比子元知買咗POOH的TSUM車比佢時但原來子元已經買咗, 敏瑩有D失望個樣好得意, 不過子元話唔緊要, 我本身都想要多幾架之後, 敏瑩又開心番! 返到去屋企原來嫲嫲已經將D飯餸預備得差不多, 所以我都唔係好多嘢要搞, 咁啱程生佢地幫子慧買嗰D衫又攞咗過, 於是講講吓子慧佢地游完水就上埋嚟食飯, 真係超級熱鬧呀, 又要幫兩位小姐沖好涼先食飯, 食完吹吓水咁已9點幾, 洗埋碗後大嗰3隻入咗房玩好耐, 細嗰兩隻就喺廳玩囉, 柏仲10點幾都要瞓啦, 食埋奶就放佢入房瞓, 我地都仲hea咗陣, 所以佢地都差不多11點先走呢, 今個星期五真係夠哂熱鬧!

13/8/15

13/8/15   THU   RAIN

今日我要揍柏仲入青衣, 因為子元要去乒乓球! 簡直係超快手出門口, 因為見到得番6分鐘有車, 我都唔知係點趕得到! 入到去食埋早餐先返工, 朝早都係做吓自己嘢, 冇咩特別! 午飯都係睇電視啦, 知道樓上有開倉, 但袋嗰D我都係唔啱, 都無謂睇! 下午點都要做吓商會D數架啦, 所以時間都過得好快! 食埋個TEA就放工啦, 去接笨元返屋企, 都算乖啦! 返到去沖涼後煮飯, 柏仲依然好搗亂, 簡單煮完食完餐飯都係8點, hea陣早D打暈仲仲, 大家都有寧靜的日子! 見有時間就幫子元包埋D書, 但最終又係唔夠包書膠, 即係又要買! 趕咗子元入房瞓又自由啦, 睇埋新聞我已經頂唔住, 喺梳化又瞓咗幾轉啦!

 

12/8/15

12/8/15   WED   HOT

今日老公揍住兩個, 我就去返工啦! 買咗個北海道牧場餐廳的早餐返去食, 真係幾豐富! 食完都係做吓自己嘢hea吓啦, 午飯後都係睇吓電視, 下午要開會, 其實都係講無謂嘢, 但都要聽架啦, 開完都晏晏地所以冇叫tea, 咁放工後去攞相, 順手買埋相簿, 因為都有一年的相未入, 比起子元細個, 柏仲真係曬少咗好多相! 去小童接埋子元就返去, 先沖個涼, 柏仲一見哥除衫又要除, 真係比佢激死! 等我地快沖完睇住佢, 嫲嫲就煮飯啦, 不過柏仲都好衰, 成日攞D嘢掟子元, 咁我又喺到分緊相, 冇陪住佢玩! 冇辦法下兩個都要鬧架啦, 因子元都會搶住D車仔唔比仲玩, 都係要叫佢兩個慢慢學吓相處! 食飯後子元又喺到凶仲, 比我罰佢入房5分鐘, 我個人已經火火地啦, 跟住有人敲門, 原來係垃圾佬, 問嗰D垃圾係咪我地掉, 我本身已經火緊, 咁我就好顛婆咁走去話幫佢執番, 我當時係一個好顛GE樣, 可能個阿叔心諗死囉, 惹著個顛婆! 我的EQ真係好差架, 所以唔好惹我! 之後再分好埋D相, 八點幾嫲嫲諗住走時老公就返嚟啦, 柏仲見老公沖涼, 佢又走去除褲, 真係頂佢唔順! 最終同佢換埋片食埋奶就打暈佢, 跟住就叫子元分好新加坡D相, 就要佢去瞓啦, 我地就入埋D相睇吓電視瞓覺!

11/8/15

11/8/15   TUE   HOT

今日又要返工啦, 朝早揍仲仲入去嫲嫲到, 今朝仲仲好扭計, 咩都用喊用扭, 我係唔會答應佢架, 結果喺巴士到係咁扭, 我只係分散佢注意力, 冇因為佢喊而得逞! 落到車護士長見到佢, 仲仲又唔啋人, 因為今朝冇心情呢! 同嫲嫲食埋早餐我先返工, 全朝都係執番D相同寫日記, 要寫3日GE嘢真係唔少! 所以食lunch前都未寫完, 因為又要做吓公事呢! 下午就做吓自己嘢, 找吓相曬大相咁, 放工入青衣, 返到去仲仲剛沖完涼, 就餵埋佢食粥, 又係到周屋玩, 或者叫搗亂! 等我地食埋飯就撘巴士返去啦! 我都攰到瞓咗! 返到去仲仲又係要沖涼, 但佢已經沖咗嘛, 又喺到扭地, 我又火啦, 捉佢上大腿想打架啦, 但又知火起嗰道力好重, 最終冇打落去只係打落梳化, 都足以令佢停一陣! 咁等老公沖埋涼就捉佢食奶瞓, 子元本應做埋功課先瞓, 但佢又做做吓瞓咗喺枱, 咪叫佢明天起身做埋佢囉, 我今日都攰, 喺梳化瞓咗幾轉先入房瞓呢!