4/1/16

4/1/16   MON   COOL

今日係柏仲第一日返學的日子, 我都覺得自己有點緊張! 朝早老公要煮午餐盒比子元, 所以同我一齊起身, 佢有佢煮我有我梳洗同捉子元起身, 都準時出到門口, 返上樓見仲仲都瞓緊, 但因為要預番時間入青衣, 但見一定趕唔到撘44, 咁就不如撘番46X, 車密D易跟D, 換好衫食埋奶, 攞好書包梗係要影吓相啦, 出到lift口又影吓相, 入到去太興食早餐又影, 跟住一路行去學校又影, 真係好開心! 去到學校門口梗係要影啦, 9點多佢地早會操完咗就可以入去, 吳老師同陳副校都出嚟迎接柏仲, touch wood佢都好乖, 只係周圍望清楚咩事! 陳副校都趕我地出去啦, 咁我地都好合作GE! 之後老公就返工, 我就去銀行入埋錢先返工! 今日公事超忙, 真係差不多冇停過, 午飯吳老師打嚟報告吓柏仲今日情況, 話上英文堂時都好專心, 不過就唔多肯坐定同玩每樣嘢都唔玩得耐, 另外又成日要痴住吳老師, 玩玩吓又會去搵佢, 食茶點食一塊餅又想去玩唔肯坐, 要吳老師guide住, 飲嘢時飲咗奶又唔肯飲水囉! 總括柏仲都算合作架啦, 慢慢嚟啦! 午飯後下午又要開會又十萬樣嘢做, 放工都未做得完, 返到去只在附近惠康買D餸返去煮咋, 8點幾完成哂所有嘢, 柏仲先西利, 2點幾瞓到6點, 可以8點半再瞓, 叻豬! 我又要跟功課, 子元又話眼瞓, 所以比佢瞓啦! 搞掂埋柏仲的回條, 摺埋衫都11點啦, 我真係勤力過7-11!

3/1/16

3/1/16   SUN   COOL

今朝瞓到8點幾9點先起身啦, 唔出去食早餐啦叫老公煮就算, 我就同子元睇吓仲有咩功課未做, 執吓整吓食埋早餐我又摺衫喎, 想同佢溫吓書都冇, 11點半又要出門口啦, 約咗程生佢地食飯後交子元比佢載去考奧數, 我地就去咗759shopping, 都唔算買得好多, 都係飲品同餅多, for子元帶返學啫! 買完行返去時柏仲喺車仔已自我催眠了, 所以返到屋企我地就好多時間收拾, 我都係呢到執D嗰到執D, 又要預備吓陣間同子元溫書D嘢啦, 柏仲好襟瞓到4點幾我諗住出門口先醒, 不過我就要過去程生屋企同子元溫書, 老公就帶住柏仲買飯比嫲嫲等等! 過到去同佢地溫書, 都叫做溫咗2個鐘, 因為明天又英文評估又普通話口試, 子元同敏瑩溫書真係差好遠, 不過兩個一齊溫反而冇咁大壓力咁, 可以轉吓模式! 差不多8點程太瞓哂就齊齊落去買平壽司, 食完都10點先走, 返去真係要快手, 明天齊齊要返工返學呢, 不過同子元執嘢時先發現專題有嘢未做哂, 整埋都11點幾先瞓, 我都12點多先沖涼呀!

2/1/16

2/1/16   SAT   COOL

今日子元節目豐富, 朝早去體操, 我都唔知醒, 8點多才齊齊趕, 只可以買個包在巴士上食, 揍完佢我就返工, 差不多放工老公就揍咗仲仲上來, 我地去買飯團返屋企食, 行到一半就要抱, 以為佢好快瞓啦, 點知根本就唔係, 仲要呃我抱足佢全程又唔瞓, 返到屋企叫佢瞓佢就話坐定定, 咁咪比佢食埋飯先瞓囉, 都陪咗佢半個鐘先瞓著! 跟手我就要的起心肝執嘢, 主力係執玩具, 因為要整理吓, 柏仲成日攞D唔啱佢玩GE嚟玩, 不過執吓又抖吓咁, 結果執到柏仲瞓醒都未執完, 好在都近尾聲, 不過又要摺衫啦, 好在柏仲見玩具執咗位, 都係到勁探索, 搞掂就準備入沙田晚飯, 老公同子元踢完波就直接自己入去, 我同柏仲出去撘86, 撘咗差不多一個鐘呢! 入到去都係食餐飯啦, 柏仲又係到扮怕羞咁chok可愛囉! 8點幾撘車返去沖涼瞓覺, 明天唔洗畫班, 可以瞓晏D, 所以我地就夜D瞓啦!

1/1/16

1/1/16   FRI   COOL

今日覺得自己精神狀態真係超差呀, 冇辦法啦真係年紀大, 通到呢個程度GE頂已經超咗極限! 柏仲都算比面, 8點幾先醒, 但我真係冇力理佢, 只係換咗片同沖咗奶, 咁子元又起咗身喎, 咪叫子元睇住柏仲算, 我地到11點左右先肯起身, 因為佢地都肚餓啦, 要起身梳洗去食飯, 但出到廳見到好似打完仗咁, 真係執死人! 近近地去咗美心食咋, 呢排好似好食咗嘛! 食完返去都係溫咗書先, 我真係拖住一副疲勞的身軀嚟同佢溫, 都係叫佢讀一次, 字佢就係唔多識寫, 但都係叫佢將錯GE抄多兩次咋, 再比埋練習佢做我就上咗床瞓, 瞓到死咗咁, 好在老公帶咗兩隻仔出街, 咁我可以好好咁瞓, 我真係好好瞓呀, 瞓到差不多7點先起身, 知老公約咗程生佢地今晚上去打邊爐, 咁就換衫執嘢出門口啦, 老公入咗去買飯比嫲嫲, 咁撘42出嚟我咪去巴士站join囉, 等緊車時有架46X埋站, 突然有架私家車駛咗喺巴士面前喎, 根本就阻住架巴士出車, 仲要大聲夾惡, 你擺到明係違例泊車啦, 都仲要咁, 最終搞咗5分鐘都唔掂, 又有架鐵馬嚟咗喎, 咁我咪行前D同架警察講係架巴士埋咗站架私家車先駛埋嚟阻住囉! 因為我架42到啦咗, 所以我都冇得睇埋個結果, 比我係乘客實落車小爆個私家車司機! 過到去程生到先去買埋牛肉同菜, 仲買咗麥當勞先上去, 開好陣整好嘢就比佢地食, 我地就慢慢滾滾吓啦, 不過又要顧住柏仲, 都好難食得安寧, 食完hea吓到11點要走啦, 我明天仲要返工呢!

 

31/12/15

31/12/15   THU   COOL*

今日當然都係holiday mood啦, 朝早瞓到8點多起身返工, 兩隻豬仔就交比婆婆啦, 買好早餐返去食完都係做吓自己嘢啦, 基本上今日都係hea過, 你話我咩都好啦, 真係冇mood! 午飯後都係睇吓電視打吓機啦, 下午又係做吓自己嘢啦! 放工準時走人, 老公本來係早放架, 但點解冇早返屋企呢, 美其名就係office仲有同事埋緊數, 冇理由唔等埋佢, 實質係因為同D老細係到踢波, 正衰人嚟架! 最終返得去買埋飯比嫲嫲都7點幾先返到嚟! 我就快手摺起D衫出發去子慧屋企, 不過咁早去到都冇用, 因為最終都要等埋程生佢地買好嘢食嚟到先開始, 但柏仲真係餓啦, 所以比咗意粉佢食先, 大嗰兩隻就喺房玩囉, 梗係又成日嗌交啦! 終於等到程生一家到啦, 快手setup開餐, 緊係肚餓, 差不多10點先晚飯呀, 餓鬼死! 食完嘢都係吹吓水咁啦, 睇陣電視就開遊戲機嚟玩, 子元最開心啦! 玩到差不多12點了, 叫佢地出嚟倒數, 柏仲都唔係好知咩事架, 但就係拍吓手囉, 開番支白酒嚟飲, 好似好多年冇試過咁樣倒數迎新年了! 倒數完都係繼續打機玩, 不過柏仲頂唔住啦, 開咗支奶比佢喺Gloria房飲完瞓咗, 我地就一路玩到點幾兩點先走呀! 柏仲喺車仔照瞓, 返去放上床就算了, 我地都沖涼瞓了, 搞得嚟都3點幾先有得瞓!

30/12/15

30/12/15   WED   COOL

放完一日假, 真係冇咩mood返工, 不過…鬼叫你窮呀頂硬上! 仲仲7點多醒咗, 當然係到搞住哂啦, 點會放過你! 8點多起身梳洗, 笨元仲瞓緊, 等阿媽過到嚟我地就返工, 同老公出去北海道食個早餐先行, 以為今日會好多嘢做啦, 點知都唔算忙, 終於可以抖啖氣吹吓水! 午飯後都係睇吓電視打吓機啦, 仲仲又打電話比我呢, 子元把聲原來喺電話都仲好BB架! 下午都係做吓公事又做吓自己嘢啦, 係咁諗吓仲有咩要做, 放工準時走人啦! 返到去就執吓屋囉, 我返到阿媽就返屋企架啦! 執好屋等老公返嚟就一齊出去, 因為佢去踢波, 咁我見兩隻細GE喺屋企困咗一日, 就比佢地出吓去啦, 不過下次都係唔好啦, 因為柏仲唔肯坐定玩, 係要周圍走, 其實睇住佢都幾攞命, 佢真係走到老遠都唔怕, 仲同我byebye, 我話冇奶奶食架啦, 佢竟然點頭, 比佢激死! 終於踢完可以走啦, 近近地去新都會食, 試咗間粥麵嘢, 佢都有晚餐GE, 咁都幾好食喎, 二百幾蚊唔算貴啦! 撘的士返屋企快手同兩隻豬沖好涼瞓覺, 我最終衫都冇摺都瞓啦, 因為真係好攰!