14/2/16

14/2/16   SUN   COOL


今日係情人節, 但我咩都收唔到喎, 3個情人都冇咩比我, 可惡! 朝早起身去畫班, 然後去食早餐啦, 食完都係行吓街買吓嘢咁啦, 夠鐘就揍番笨元, 返到去叫佢抄吓默書D字, 我就換咗D床單, 等老公揍咗子元去踢波, 我就K.O.仲仲, 但佢條友一叫佢瞓佢就喊, 打暈咗佢我就煮午餐, 整咗粥同炒麵, 跟住仲要接埋衫, 終於可以休息吓, 仲仲瞓到4點多, 所以都冇再去球埸搵佢地, 餵仲仲食埋碗粥就入青衣啦, 等嫲嫲有得同仲仲玩吓, 又買咗麥當勞一齊食咗先, 等老公回來就叫泰國嘢外賣, 食飽就回家啦, 返到嚟都係打暈仲仲就可以做自己嘢!

13/2/16

13/2/16   SAT   WARM WET


今朝瞓到8點3子元入嚟叫醒我揍佢去體操, 真係好想叫佢自己撘巴士過去算, 難得一日仲仲唔叫醒我, 又啱啱發完D怪夢, 真係勁唔想起身! 揍咗佢去體操就買早餐返去比兩個大爺食, 最好笑係仲仲喺我開緊早餐時問: "我坐邊?", 真係比佢笑死! 食完早餐又去揍子元啦, 返到屋企要佢做埋D數先, 跟住佢就去踢波, 我就喺屋企打暈仲仲, 然後都係做吓屋企嘢食個lunch咁啦, 但仲仲瞓得個幾鐘咋喎, 起身後比佢食D嘢就去球場, 我帶咗仲仲去咗玩遊樂場玩, 真係好攰囉! 踢完波就去新都會食飯, 去番上次食粥嗰間食, 真係好好味! 食完行陣就返去啦, 係子元買咗架pooh的tsum車囉, 返去沖涼瞓覺!

12/2/16

12/2/16   FRI   WARM


今日7點幾醒咗, 又瞓唔番就陪吓仲仲啦, 起身後收拾吓摺吓衫咁做吓家務, 叫老公起身煮早餐, 子元就快D做埋D網上功課, 食完早餐hea吓老公又K.O.過仲仲, 我都要hea吓, 抺埋地就抖吓啦, 下午約咗子慧去公園玩! 等佢地瞓醒1點左右就收拾出門口啦, 過到西環嗰邊先食嘢, 真係求奇搵間茶記食都好正! 食完就行過去中山紀念公園啦, 嗰兩個細路已經成日喺到吵架真係好煩! 去到先在遊樂場玩吓, 呢個遊樂場都幾好玩架喎, 起碼D遊樂設施平時都少見! 跟住就去草地嗰邊玩波波啦, 可惜草地濕唔係好坐到! 玩到咁上吓食吓嘢, 食完再影吓相咁, 本來想去廁所GE, 咁行到去室內運動場嗰邊, 見到有兒童遊戲室, 就比佢地入去放吓電, 玩到差不多6點就走, 兩個細路又係嘈交啦, 好煩! 撘番巴士返美孚晚飯, 去北海道食, 但仲仲要辦大事又冇心機食, 激死! 食完回家啦, 仲仲疴到喊哂咁, 真係陰公! 洗完白白仲仲就瞓啦, 子元就睇電視睇到9點幾先瞓, 我地又自由啦!

11/2/16

11/2/16   THU   WARM


今日非常有益身心, 因為一朝早起身去咗打乒乓球, book咗場9點, 但8:15先知醒, 快手梳洗就出去, 打完先食早餐, 食完返嚟開始要同子元做功課, 其實原來都幾多功課吓, 不過我都想佢今日做哂先出街, 條友打4個鐘機又唔見佢攰, 做功課就又呢樣又嗰樣! 到柏仲瞓醒咗, 我已經頂唔住頭好痛, 入房瞓陣好D GE, 但之後老公鬧柏仲時又嘈醒我, 咁我睇吓子元做功課做成點啦, 佢竟然瞓咗, 我就撞哂火啦, 鬧爆佢! 叫佢做埋嗰樣就出去食嘢先, 個個都肚餓啦, 食完嘢就出去行吓, 去咗沙田IKEA行吓食埋晚飯回家, 沖涼瞓覺! 今日飲咗3杯咖啡所以真係唔太眼瞓!

10/2/16

10/2/16   WED   WARM

今日係五條king團拜, 朝早我有我地瞓, 由得子元睇住仲仲, 起身後食D嘢, 收拾吓出門口, 撘巴士入得去再食D嘢先上去都差不多2點, 佢地一嚟到梗係玩, 我地就梗係食, 柏仲都係周圍探索吓咁啦! 就係咁食吓玩吓爭吓鬧吓, 柏仲5點到先肯瞓, 根本就已經冇哂電, 大嗰3個就梗有爭執架啦, 又要調解吓咁啦, 6點幾7點去買埋燒味咁就開飯啦, 柏仲都算食得OK, 3個大GE自己一枱食囉! 玩到9點幾又係時候閃啦, 今次你想Call車都未必有, 快手call到架就閃啦! 返到去快手沖涼K.O.哂兩個又可以休息啦!

9/2/16

9/2/16   TUE   WARM

年初二都係先去阿婆到拜年啦, 瞓醒收拾好就出咗去粥鋪食, 本來唸住撘86, 但剛走架車又要等20分鐘, 根本趕唔切, 咁就轉咗撘46X再轉車囉, 喺車到好好瞓呀, 但轉車時上上層上到一半司機就開車, 我又抱住仲仲, 失一失平衡扭到腰, 之後一日都痛, 攞命! 上到阿婆到原來未開得飯, 早知唔洗咁趕, 等齊人都差不多1點先食, 仲仲已經頂唔住食完就瞓, 到2點閃人時抱佢就醒咗, call 咗車返青衣, 佢就已經唔再瞓啦, 不過都冇辦法啦, 我地買咗飛睇dead pool, 放低佢地就落青衣城, 呢套唔怪得之3級, 因為真係勁粗口同血腥, 睇到6點就返去接佢地, 下一站契爺到拜年, 變咗兒童樂園因為有5個小朋友喺到, 叫外賣返嚟食都好, 方便D, 玩吓遊戲打吓機咁, 玩到9點幾才回家, 咁近有巴士就唔比老公call 車啦, 返到去沖涼瞓覺, 明天又有街去!

8/2/16

8/2/16   MON   WARM

大年初一, 恭喜發財! 今日活動同往年差不多, 起身後食個早餐換件新衫, 執好嘢就出門口去阿媽到拜年, 今年多咗個姨丈, 又多咗佢地封利是呢! 影過合照又差不多時間去阿嫲到拜年同食午飯啦, 去到阿爸都係到, 今年阿媽冇咁黑面, 有點個頭咁啦, 玩一陣就開飯啦, 笨元梗係嫌唔好食架啦, 仲仲都係, 但都要食哂架喎! 食完吹吓水, 姑姐佢地又打電話返嚟拜吓年咁, 2點多就轉場返青衣啦, 返到去門口聽到咁嘈, 心諗大事不妙, 果然係老爺的幾位親戚在場, 咁啱柏仲已經瞓咗, 好在我D仔一向不太受外在嘈雜聲影響, 可以照瞓到, 但有條友真係short short地, 意圖整醒仲仲同佢玩, 好在老公一個身位阻住, 我亦來個單擋, 加埋有骨落地的說話, 擊退對手啫! 跟住嫲嫲再來一招, 叫我地去買嘢比佢食, 咁就趕走哂佢地啦, 等仲仲可以好好瞓覺, 我地亦可以休息吓! 仲仲都瞓到5點左右, 之後都係等姑姐返埋嚟就開飯咁啦, 食完就回家啦, 沖涼瞓覺!