大年初一, 恭喜發財! 今日活動同往年差不多, 起身後食個早餐換件新衫, 執好嘢就出門口去阿媽到拜年, 今年多咗個姨丈, 又多咗佢地封利是呢! 影過合照又差不多時間去阿嫲到拜年同食午飯啦, 去到阿爸都係到, 今年阿媽冇咁黑面, 有點個頭咁啦, 玩一陣就開飯啦, 笨元梗係嫌唔好食架啦, 仲仲都係, 但都要食哂架喎! 食完吹吓水, 姑姐佢地又打電話返嚟拜吓年咁, 2點多就轉場返青衣啦, 返到去門口聽到咁嘈, 心諗大事不妙, 果然係老爺的幾位親戚在場, 咁啱柏仲已經瞓咗, 好在我D仔一向不太受外在嘈雜聲影響, 可以照瞓到, 但有條友真係short short地, 意圖整醒仲仲同佢玩, 好在老公一個身位阻住, 我亦來個單擋, 加埋有骨落地的說話, 擊退對手啫! 跟住嫲嫲再來一招, 叫我地去買嘢比佢食, 咁就趕走哂佢地啦, 等仲仲可以好好瞓覺, 我地亦可以休息吓! 仲仲都瞓到5點左右, 之後都係等姑姐返埋嚟就開飯咁啦, 食完就回家啦, 沖涼瞓覺!
沒有留言:
張貼留言