24/2/16

24/2/16   WED   COOL

今朝都係如常啦, 不過揍咗子元上校車後返上樓, 柏仲已經走咗出廳, 老公依然瞓到豬咁! 快手搞掂出門口, 啱啱好趕得切巴士咋, 去到小巴站又要等車喎, 所以又係8:25先入得切去! 揍咗佢地入學校我又返工啦, 最終都係照買大家樂早餐, 因為烚咗蛋又唔記得帶, 睇嚟我都係做唔到平食早餐, 要再諗諗辦法! 之後都係做吓公事做吓自己嘢, 午飯後睇電視咁囉, 下午又係hea吓啦, 放工返去阿媽話子元又話睇電視又話瞓, 最終5點幾先開始做功課, 咁我都冇理住, 由得佢做, 整嘢煮飯等等啦, 點知佢做極都唔完咁, 老公回來後幫忙, 但柏仲見我地兩個都入哂廚房又唔鍾意, 係到扭計, 搞到我愈來愈火! 食飯時仲仲又玩嘢, 我又阿燥上身, 不過老公算係咁幫手架啦, 只係有時唔係好幫到咁解啫! 快手洗碗抺地, 佢就同仲仲沖涼, 子元繼續做功課, 等我地K.O.咗仲仲就同佢睇功課, 完全唔掂囉, 基本上每樣都有錯, 仲要有D係錯到離哂譜, 完全冇用腦去做, 等佢沖完涼出嚟係咁叫佢改正囉, 真係要諗辦法, 放完年假後個魂魄根本返唔到嚟! 搞到10點幾先去得睇, 我turbo沖好涼睇電視, 但期間又要收拾柏仲明天玩野餐D嘢, 12點幾先瞓!