22/2/16

22/2/16   MON   COOL

今朝真係混亂, 叫咗老公早D起身整飯比子元帶架啦, 最終件雞扒又唔熟, 校車又到啦, 點算啦! 好在托到Loletta送飯時送埋啫, 遠親不如近鄰呀! 返上樓又到仲仲趕出門口啦, 好在趕到巴士, 揍咗仲仲我就返工啦, 不過今日係返商會嗰邊, 先去青衣城食個早餐, 再撘地鐵過去, 其實都好早過到去啦, 9:40已到, 快手開工做嘢, 務求下午可以盡快走, 不過D人都好早到, 又要拜吓年搵吓食架嘛! 齊人開完會就過酒樓食開年飯, 都係邊食邊吹吓水咁啦, 食到2點多先走呀, 快D返上去做埋D手尾, 喺我全速前進下, 只係淨番少少手尾啫, 3點多就已經走得啦, 返到美孚去咗試按腳, 今日搵到咁多, 洗百幾輕鬆吓都要, 不過個姐姐都按得幾大力, 我先知原來我唔係咁受得力, 按到5點多又要返回現實, 去買餸返屋企對住兩隻馬騮! 返到去阿媽話子元又發脾氣, 因為之前數學簿唔見咗, 做咗落紙, 老師又要佢寫番落簿, 佢就覺得要做多次於是發脾氣, 係咁掟筆等等! 又喺枱瞓咗, 叫番醒佢又唔鐘意等等囉! 我唔鬧佢住, 煮飯先, 晏D先再問佢點! 煮到咁上吓見有時間就check吓佢功課, 但原來仲有數學未做就走咗出嚟, 咪叫佢做住先, 唔洗佢揍住仲仲啦! 食完飯再做埋佢, 等我洗好碗抺好地佢都未做好, 唯有stop咗佢先, 同仲仲沖咗涼先再做, 仲仲唔瞓我咩都做唔到! 跟手就同佢講吓下午單嘢囉, 到瞓嗰時都係呀, 唉…呢個仔真係好難教! 老公踢完波差不多12點先返, 沖完涼睇電視到1點多先瞓呢!