21/2/16

21/2/16   SUN   COOL

今朝要畫班, 敏瑩又入咗camp唔上, 即係得我同柏仲食早餐, 揍咗子元上畫室就去到德貞嗰邊食, 已經慢慢行架啦, 但食完個早餐都仲係9:40, 仲有一個鐘要hea, 咁咪慢慢行返去街市買餸囉, 仲去咗豆腐鋪食豆花, 終於捱到夠鐘就去接笨元, 返到屋企我就馬上煮飯仔, 等仲仲瞓之前食咗飯先, 咁12點幾都已經食得, 餵完仲仲等佢落吓格先瞓, 咁就叫子元食啦, 佢竟然一句彈埋嚟話唔食, 我就發火啦! 因為我一早講咗今餐就仲仲食粥仔, 我想話等柏仲瞓咗就可以再整其他嘢佢食, 但佢咁GE態度又整火我! 於是鬧佢佢又喊, 佢喊我又再顛D, 整整喊啦, 我覺得我好慘囉, 一日都冇停過, 佢就喺到睇電視, 喊完顛完一輪都係要食啦, 不過就先K.O.咗仲仲先囉, 因為我都要食嘛! 食完就入房溫書, 把握時間呀, 可惜都趕唔切喺仲仲瞓醒之前溫哂! 老公4點幾5點打嚟, 話佢返咗香港, 已經喺屯門公路, 好嘢! 於是本來買哂餸都唔洗煮啦! 仲有Gloria約食飯, 咁最終瘋狂3人組就去咗荃灣食牛涮鍋, 等到8:45先有位, 真係餓鬼死, 不過又食得好滿足, 仲仲都算好合作, 我同老公一人照顧半場, 上半場食咗烏冬同肉, 下半場食咗2杯雪糕, 開心得佢呀! 食完都10點多, call咗ubar同埋Gloria一齊返去, 80幾蚊咋幾抵! 返到去馬上K.O.佢兩個, 明天又要一早起身返學啦!