19/2/16

19/2/16   FRI   COLD RAIN

今日柏仲一早醒咗啦, 所以要帶埋佢落去, 因為要服侍埋佢換衫先落樓送子元校車, 所以真係好忙亂! 返上去仲仲就飲奶我就梳頭啦, 準時出門口但check唔到班次, 因為我部手機轉咗台但我又唔識換卡, 冇咗wifi就失聯! 揍咗柏仲佢地返學就返公司啦, 都係hea吓做吓自己嘢, 午飯後睇電視打機, 夠鐘開工又係做吓自己嘢等等啦, 放工即走, 返去整少少餸又出門口, 去到小童交收柏仲阿媽又可以收工啦, 等佢地上完堂就要過去游水, 最慘係落雨, 我又要推住車仔, 雖然有雨擋但都好濕囉, 幾經辛苦過到去又要換衫, 好在行去泳池時都唔太大雨, 放咗佢3個入去我就要返去煮飯啦, 柏仲睇住電視都好OK, 煮到7:45要快手沖咗涼先啦, 佢地上到嚟都仲未煮哂, 忙忙亂亂間又要整埋飯比仲仲食, 開好飯再K.O.埋柏仲先開始食飯, 今日試咗兩款新嘢, 都幾成功! 食完吹吓水差不多10點先執嘢, 洗好碗抺埋地都10點幾, 3個細路又成日嘈交, 主力係子元同子慧囉, 真係令人好煩! 佢地最終出咗嚟玩棋, 叫做好少少, 玩到差不多11點要趕先肯走, 都唔明又要嘈又要玩, 真係好煩! 佢地走咗就趕子元瞓, 但佢又要陪我睇陣電視喎, 唔好話唔想瞓住! 比佢睇一part就入去瞓啦, 我就做吓家務等等啦, 12點幾就瞓啦!

 

18/2/16

18/2/16   THU   COLD

今朝兩隻豬好好瞓, 子元都拖得哂, 快手叫佢著好衫就出門口, 仲仲未起身我揍唔到佢落去, 叫佢跟對面婆婆落去撘校車, 連個華服樣都影唔到! 執好嘢就叫仲仲起身, 矇矇吓咁出門口囉, 今日都好嗲, 係咁痴住我, 不過入學校就入, 冇咩嘈! 返到公司整快熟通粉做早餐, 慳D嘛! 3蚊食兩日, 自己烚定隻蛋做餸, 買多個包配都係10蚊日, 抵啦! 跟住都係做吓自己嘢啦, 話咁快就食lunch, 食完都係睇吓電視打吓機咁, 下午就做吓公事做吓自己嘢囉, 係咁睇食譜睇吓有咩整嚟, 捱完一個下午可以返去啦, 不過一條友又要睇仔又要煮飯其實真係幾攰, 好在子元做好功課可以睇住仲仲, 但食飯時仲仲就衰啦, 食得一半又話唔食, 鬧佢而家唔即刻喊架, 會眼濕濕好可憐咁, 頂佢唔順! 終於餵埋佢就可以執碗洗碗抺地, 叫子元同仲仲沖涼啦, K.O.仲仲就睇子元功課, 樣樣都錯D漏D咁囉, 第一日開學係未回魂架啦! 之後同佢一齊玩薑汁撞奶但撞唔成, 衰咗冇得食! 趕埋子元去瞓就可以做自己嘢, 今晚都早攰, 12點幾未睇哂姑姑就瞓啦!

17/2/16

17/2/16   WED   COLD

今朝最後一日可以8點先起身啦, 明天又要回復正常, 我仲要一打二, 陰公! 梳洗好等阿媽過到嚟我同老公就出去食個早餐先返工, 佢今日又要小明上廣州啦! 返到公司都係hea吓做吓自己嘢啦! 午飯後同埋個同事去咗Aeon嗰邊行, 我主力買咗個書架, 仲有買咗兩包平通粉囉! 下午D Sales搞到好晏先開會, 又搞到我6點先有得收工, 好在已經買哂餸, 返到去都6點多, 又係忙煮飯等等, 子元今日都叫做睇得住柏仲, 7點多煮起飯食得, 但柏仲有D扭, 又話唔食菜, 最終都係比我迫佢食哂啦, 洗碗抺埋地就可以陪佢地坐陣睇咗半part電視又執定嘢沖涼, 早D打暈仲仲可以望一望子元有冇執齊功課! 執好嘢打暈埋子元又hea吓先去沖涼, 然後係咁睇電視睇到1點先瞓啦! 仲仲平夜又爬上嚟瞓咗老公個位喎, 咪比我搬番佢落床囉, 跟住不久又發夢喊, 要我摸住佢嚟瞓!

16/2/16

16/2/16  TUE   COLD

今日真正要開工了, 但完全提唔起勁啦, 都係hea, 冇咩急都唔會做住啦! 朝早柏仲7點幾醒咗, 自己喺房玩一輪啦, 咁差不多8點我起身服侍好佢就準備返工! 返到去都係做吓自己嘢過吓相咁啦, 之後都係勁上網, 午飯去咗買飯, 食完都係打吓機睇吓電視! 下午又係喺網上世界遊走! 放工就返屋企啦, 我返阿媽就閃啦, 叫子元睇住仲仲都係一般, 柏仲成日喺廚房門口嘈, 比我狠鬧一轉後就眼濕濕咁走返去梳化, 咁等我整好嘢咪出去同佢解釋囉, 要煮飯點抱啫, 擺明玩嘢! 老公未夠7點就返到, 咁佢都叫做可以幫手睇住佢地GE! 7點幾煮好飯食得, 食完洗好碗抺地都8點幾, 同佢兩個沖好涼, 柏仲梗係要瞓啦, 子元就想睇電視, 我見明天都仲放假就比佢放肆埋今日, 睇到10點多就去瞓, 我都仲有好多嘢做咁, 但叫陸生做佢就唔郁, 佢夠識鬧個仔叫佢唔郁, 佢自己咪又係咁, 仲要我受氣, 我咪入房同子元呻囉! 我話教佢要做好自己本份有手尾等等都係為佢好, 佢又好似明咁囉, 希望佢真係明啦! 呻完又出去話番吓老公咁, 點都要抒發咗啖氣嘛! 跟住睇電視睇到12點多老公話眼瞓! 明天老公又要出差, 都好GE係我辛苦D啫, 星期六又要找人接收柏仲咁囉!

15/2/16

15/2/16   MON   COLD

今日要返工啦, 放咗8日半, 真係唔多願返工架, 但鬼叫你窮呀頂硬上! 朝早8點多起身就馬上梳洗, 8點幾阿媽過到嚟, 交接好我就出門口, 唔食咁飽早餐只係買咗燒賣同咖啡啫! 返到公司都係hea吓等落鋪頭拜神, 我就過番手機D相落電腦, 10點多影吓相咁就落鋪頭, 落到去都係hea啦, 影吓相拜吓神就轉場去富豪午飯, 你話D嘢食好好好正咩又未至於, 但都係好味GE, 食到差不多2點先散水, 我都冇去咩地方, 直接撘巴士返美孚, 先去銀行入番錢, 再去街市買餸, 諗住呢幾日都要煮就買足3日餸, 抬住一大堆餸行返去啦, 返到去柏仲瞓緊, 子元就梗係掛住玩冇溫習架啦! 叫佢去溫默書, 我就整吓餸, 叫阿媽幫子元默埋書佢就可以放工啦! 本來諗住整定餸, 但柏仲醒咗, 痴住我唔放, 係之後忍心放低佢去整嘢, 不過老公提我先記得話咗今晚去食蛋黃哥嗰間餐廳, 於是D餸就整起咗唔食住! 柏仲係咁扭我就諗住比包奶佢飲, 點知搵極都搵唔到承住包奶個框, 好明顯柏仲唔知收咗去邊, 搵哂全屋都冇, 真係你一放棄唔搵就出番嚟, 原來喺lego盒最底! 收拾好就出門口, 約咗老公喺葵芳等, 食蛋黃哥餐廳, 嘢食一般啦, 主要喺食個主題啫! 係咁影吓相咁囉, 柏仲就係咁chok萌, 引到隔離姐姐都支持佢唔住! 食完行咗陣葵廣就回家啦! 如常細路們沖涼瞓覺, 我地都係睇吓電視hea吓咁啦!