11/9/16

11/9/16   SUN   HOT

星期日如常畫班啦, 仲爺又發揮佢D可愛功力, 想食敏瑩個薯餅, 但敏瑩又想食, 唔比仲仲, 冇問題架, 但仲爺開始扭, 咁程生話分少少比佢啦, 仲仲一聽到, 即刻泛住淚光咁向住你笑, 我同程生都話佢實在太衰成日用呢朝, 所以我話係唔可以望佢囉! 食完早餐我地都係去買嘢配藥等等啦, 接番佢地放學後就回家啦, 同子元溫咗中英數, 跟住就去踢波, 仲仲喺車瞓, 我梗係陪佢啦, 但醒咗要出去, 真係好熱好曬, 等子元踢完波, 就去咗荃灣, 攞番琴日冇貨的奶粉, 再去咗食嘢, 然後行AEON, 6點幾返屋企, 老公去踢波, 我又一揍二再煮晚飯, 簡單地肉碎粥, 牛肉炒菜咋! 洗碗抺地後餵埋仲仲食藥可以K.O.佢, 子元就要執埋做埋D嘢啦, 10點幾先瞓, 我就沖好涼再睇吓港姐囉! 等老公回來, 又食吓嘢咁, 睇埋芉月傳12點幾瞓!

10/9/16

10/9/16   SAT   RAIN

今日我就要返工, 老公又要去康傑聽talk, 所以佢要揍仲仲去嫲嫲到, 再帶住子元去聽talk, 不過原來子元冇得坐住聽, 佢就去咗幫書記手做嘢, 咁總好過喺嫲嫲到顛! 本來子元今日有兩場波要踢, 但因為勁落雨, 冇得踢, 所以下午變咗好free! 先嚟公司接我放工, 但兩隻嘢瞓哂, 咁就諗去邊到食啦, 不如就去荃灣, 順手買奶粉, 去到停車場仲爺就醒, 子元就要拖落車咁滯! 先去食咗間便當嗰D, 跟住去咗玩夾公仔嗰間, 然後去買奶粉, 跟住就回家了, 因為我要去惠康入貨, 呢次入貨行咗幾轉, 第一次子二急屎…要帶佢返上去, 第二次係買完但用車仔推走, 第三次係要去還車, 真係行到我腳軟, 跟住返上去仲要執一輪喎, 攞命! 5點幾6點出發去AEON, 今晚去程家會所的池畔派對, 不過其實我就去得一般, 因為陸子元一有得玩就失控, 好麻煩! 我地出咗去買壽司時佢就失控, 其實若果我喺到可能會好D, 第一樣係抽獎抽唔到時佢撕飛, 跟住又好緊張人地點抽係咁控埋去, 第二樣就係喺遊戲室時有個路人甲打到佢, 佢就發老脾掉櫈, 咁真係唔啱, 我買完嘢返上去有同佢講, 我都唔想丙佢, 因為程太已經幫我丙咗, 我只可以又同佢講道理, 佢都喊架, 只希望佢自己記住! 事後老公討論番, 都係覺得佢地有時係太緊張, 老公講得好搞笑, 馬會門口成日有人撕飛啦, 你逐個話呀笨! 之後喺上面食嘢, 食完D細就入房玩啦, 又出事, 首先係仲爺, 自己爬咗上敏瑩張床, 嚇死佢地, 老公…又覺得好小事, 佢上咗去嘛唔係唔上唔落嘛, 佢要落而又落唔到就會叫救命架啦, 不過為免佢地驚, 都係要阻止仲仲咁做架啦! 第二樣就係子元啦, 佢攞咗嘢飲入房入, 其實都冇問題, 但你倒咗落地就係問題, 仲要整到落子慧到就更大問題, 佢第一時間問敏瑩攞紙巾抺地下, 又係咁大聲話佢只係唔小心, 咁子慧就梗係喊啦, 子元梗係比人講道理講獲金, 話佢做咩攞嘢飲入去, 做咩整到人唔幫人抺而係抺地下, 做咩唔係講對唔住而係講唔小心, 程太就同咗子慧出咗去講, 原來佢係怕阿媽鬧佢整濕條褲所以喊, 其實成件事真係好小事, 可以係子元問敏瑩攞咗紙巾抺咗地先, 子慧叫子元攞紙巾抺埋隻腳, 子慧要求子元講對唔住, 再同大人講睇吓洗唔洗用濕布再抺一抺個地, 咁咪和平解決咗囉! 唉…真係好煩! 好在去台灣只係我地兩家去啫! 回家後捉仲仲沖涼食藥才瞓, 我地就執埋D手尾先啦!

 

 

 

 

9/9/16

9/9/16   FRI   RAIN*

今日下午要過工展抽籤, 所以點都要著靚番少少, 朝早唔洗揍仲仲返學, 佢要休息多一日呢, 所以朝早我好閒咁慢慢先出門口返工! 返到去朝早都係做吓嘢啦, 午飯早D食, 1點出門口過海啦, 去到都係等呀等等抽籤嘛, 跟住就聽工作人員講解, 期間佢講咗個point, 係咩鬼除夕嗰晚有活動, 就算唔參加都要開到零晨1點, 即刻有人發音“痴線”, 嗰工作人員馬上停咗望實發音個方向囉, 其實嗰位仁兄真係講出大家心聲, 我幾想拍手呀! 我抽到第4, 都不過不失啦, 快手選完位就閃, 諗緊個路線點行好, 最終決定返美孚攞咗月餅後買埋餸返屋企放低才返公司, 咁放工可以直接回家整餸, 返到公司好肚餓呀, 叫tea啦…已經好少叫啦, 反正今晚夜開飯! 放工返去整起部份餸又出去接佢地游水, 然後回家煮飯, 老公就搞掂仲仲沖涼等等, 8點幾佢地返到嚟咪沖好涼開飯囉! 洗完碗食鳳梨酥, 講開高雄老公之前話復活節去, 但程太話12月頭荔天有假期, 又有平機票, 不如就去一轉, 勁興奮咁喺到討論囉! 等佢地走咗我就沖涼, 睇電視…瞓覺!

8/9/16

8/9/16   THU   RAIN

今朝起身仲仲都係有燒, 都係冇得返學架啦, 去睇醫生罷啦! 揍咗子元上校車, 返上去就打電話去法國醫院問, 葉醫生9點開咁就快手去睇啦, 等到9:10左右先睇到, 不過係第一個都好快, 發燒都係因為發炎, 找到係喉嚨, 咁都係食消炎藥等等啦, 攞埋藥老公車我返去長沙灣佢就揍仲仲返青衣才返工啦, 我就食埋早餐先回來, 上午都係做吓公事咁啦, 午飯後都係hea, 其實都應該有嘢做吓架啦, 但又真係未去到急, 所以都係hea住先! 放工去買餸接子元就回家煮飯, Barry上嚟食, 因為之後老公同佢去踢波, 咁都係買多樣肉啫! 佢地食完就出去啦, 我就要洗碗抺地再同兩隻豬沖涼, 好在子元都幫到手, 佢同仲仲沖涼時我可以幫佢睇咗D功課, 咁K.O.咗仲仲後我就可以沖涼啦, 佢就自己收拾埋D嘢, 等我沖好涼就同佢溫陣書先瞓, 都好順暢! 之後我竟然頂唔住喺梳化勁瞓, 芉月傳都唔係好睇到, 12點幾老公都搞掂哂就去瞓啦!

7/9/16

7/9/16   WED   RAIN

今日下午請假, 去子元學校家長會, 主要目的都係想見吓班主任! 朝早如常返學啦, 但老公因為話要做埋D嘢先行得, 琴晚又話眼瞓唔做, 今朝又唔早少少起身做, 我地明明7:50已出得門口, 但老公整到8:05先行得, 激死! 去到學校咪遲咗接唔到更囉, 又要排隊尾! 返到公司都係做吓公事做吓自己嘢啦, 本來老公話出來接埋我過AEON食lunch, 但最終佢1點先走, 咁我咪自己行過去囉, 去咗八方雲集攞位, 咁老公都好快過到嚟, 程生又話一齊食, 其實本來唔夠位, 但原來撘枱嗰個都係3E家長, 又識程生, 咁就迫D坐囉! 2點多行過去學校, 其實勁唔想聽校長講嘢, 但遲去又好似唔係咁好, 所以最終都係乖乖坐喺到聽, 當然係玩住手機聽啦, 我地4家人分開咗3個位置坐, 喺個group到講D嘢好好笑, 晴媽掛住瞓, 聽到斷哂片, 大家MSG來來往往好好笑! 聽咗個幾鐘, 4點多先有得入課室, 又講一大輪, 終於等到講完, 可以同班主任交代子元個情況, 咁佢都觀察到子元係會郁身郁勢, 會衝動, 可能男班主任, 對呢D男仔容忍度高D! 咁交代哂都係唯有keep住聯絡架咋! 完結就去咗AEON買埋嘢先, Gloria遲過我地閃但都過埋嚟買嘢, 買完就先去接子元再返屋企, 最後先入青衣, 仲爺發燒呀, 但又冇咩其他唔妥, 睇吓佢情況先啦! 去咗攞仲仲的校服先, 才去接埋嫲嫲去悅來間泰國嘢晚餐, 仲仲都冇咩胃口, 只係掛住睇玩具, 最終仲買埋添, 子元都有買, 因為好特價, 兩份都係百幾蚊都抵買GE! 搞掂咪返屋企囉, 仲仲食咗退燒藥, 但又掛住玩份新玩具喎, pipe的收銀機加超市車, 開心到佢呢! 最後唔肯食奶就瞓, 我仲要對功課等等, 11點才去到沖涼, 沖好山嚟邊睇電視邊摺好衫都12:30啦!