7/3/17

7/3/17   TUE   WARM

今朝仲爺唔合作嘛, 起身又掛住玩玩具唔梳洗嘛, 叫佢執玩具又唔理我, 結果我唔比佢落樓送哥哥校車, 佢咪喊囉但話知佢呀, 返到上樓我都仲嬲緊, 唔知陸生係咪又呵番佢就算, 總之叫佢地要快手搞掂出門口, 食埋早餐返學! 返到公司今日冇咁hea啦, 因為深哥一早過到嚟, 快快手手都寫咗接近兩個鐘先做完, 不過睇在$份上, 做餐死咁又夠錢兩個仔交呢樣費嗰樣費啦, 午飯後都係hea, 但老細未夠2點又返, 又係咁喺到講嘢, 真係好煩, 好想佢快D返澳洲呀! 下午佢閃咗又恢復寧靜, 但我都係hea咋, 好似冇咩要特別忙住咁, 就舒服吓先啦! 食埋個tea就放工啦, 揍咗笨元返去就煮飯, 今晚為咗襯番個生蝦刺身, 就整漢堡扒, 都煮咗飯比D男人食, 又within budget 呢幾好! 食完我就洗碗吸塵抺地, 老公就幫子元練歌, 8點幾叫佢地沖埋涼, 同仲爺溫咗陣書就瞓啦, 跟住就同子元睇功課溫中進評, 好在呢排keep住都有溫書啫, 我又覺得冇咁吃力, 定條友仔真係醒咗呢! 搞掂埋佢我就可以沖涼, 乾好衫摺埋都11點幾, 食咗個甜品, 係貓山王呀, 好味到呢! 肥住咁12點多就去瞓啦!

6/3/17

6/3/17   MON   WARM

今日都仲係好攰, 朝早又要起身整飯啦, 好在仲爺未醒唔洗煩! 返上樓就捉佢地起身梳洗出門口, 不過都係有D趕! 返到公司今日決定hea, 忙咗咁耐要休息吓! 朝早都係寫吓日記同開會啦, 已經忙咗一朝啦, 午飯買咗米線食, 下午就開始hea, 反正老細3點多就閃了! 放工去接笨元, 買餸煮飯啦! 佢話佢做哂功課, 咪叫佢再對吓先囉, 仲爺返咗嚟都比佢地玩吓架啦, 食完飯沖好涼就要睇仲爺功課, 點都要係咁二溫一溫! 等佢瞓咗就到子元功課, 都未得閒再出卷比佢進評, 但原來佢今日數學進評完都唔知呢! 做好嘢佢就幫daddy手整仲仲的“環保”衫喎! 10點幾先瞓, 我都11點幾頂唔住瞓啦!

5/3/17

5/3/17   SUN   WARM**

今日都係要早起身, 因為畫班徐老師話要教佢地調色, 諗住約埋食早餐架啦, 點知Gloria又唔知醒, 搞得嚟都9點幾佢地先到, 我地同程家就冇理啦, 帶咗D細去食麥記, 然後就揍佢地上去! 大人齊人就帶咗佢地去間新嘢食早餐, 然後都係等到夠鐘就去接番佢地啦, 車埋張家返去我就同仲爺回家做功, 子元就去學鼓, 完全估唔到仲爺突然喺學習上咁進步神速喎, 數學都係數數量圈番啱的字, 佢竟然識啦, 跟住讀Fun Fun Reading又識讀, 我真係好喜出望外, 忍唔住要拍佢片! 今朝喺畫室都係呀, 佢竟然畫到D人樣出嚟, 執筆亦進步咗呀! 2點到老公送咗子元去踢波就回來接我地過去一齊食lunch, 然後叫外賣比子元回家食, 返去先叫佢地沖涼, 再捉咗仲仲去瞓, 但佢4點幾先瞓得著, 子元食完嘢就溫書, 算係快架啦, 但我叫佢自己溫嗰D冇再跟, 星期四才中進評, 等我都抖抖先吧! 到5點幾我地才出到門口去滙合程溫張三家人喺荔枝角公園踩車, 玩到7點幾去食晚飯, 但周圍都人多, 等曼克頓山又等唔到啦, 結果係去咗四小龍的酒樓囉, 都抵食啦每家三百幾有10個餸啦喎! 食完撘巴士返去都已經10點, 快手捉佢地沖涼瞓覺, 我地就hea到12點幾才瞓!

4/3/17

4/3/17   SAT   WARM

今日真係筋疲力竭! 朝早仲爺學校運動會, 8:45已經要雜合, 所以8點半未夠已入到青衣, 同笨元佢地食埋早餐就分頭行事, 我揍仲仲去撘旅遊巴, daddy揍子元去嫲嫲到再自己去運動場! 今年只有7個項目, 叫做輕鬆D, 起碼唔洗抬佢地已經好好! 只係喺排隊時要控制住佢唔好周圍走已經夠攰, 遇咗佢會overrun架啦, 所以攞埋牌就可以走, 快手返青衣交收咗子元同仲仲, 老公就車我返屋企, 佢就帶子元去比賽, 我就喺屋企執好嘢, 等gloria嚟幫我化好妝, 3點前趕到去龍堡囉! 起初去到其實冇咩做架, 但愈來愈覺得你行到邊都有人找你GE! 我只知道嗰幾個鐘除咗開會, 我就係咁走嚟走去, 到開飯其實都冇啖好食, 都係嗰個有錢婆囉, 你可以話有錢真係大哂囉, 你話要你張枱坐前D就坐前D, 你話要個獎抽比邊個就抽比邊個, 但可以早少少話比人知同埋唔好經咁多個人傳話囉, 咁樣傳一傳就出事, 因為唔係做比佢要做嗰個人, 呢D造出嚟GE幸運, 得到都冇意思, 但我地呢D得個做字GE咁出事囉, 總之一句講哂佢就PK啦! 其實唔係佢咁搞事, 都算順利架! 最終抽錯咗咁點呢, 咪問我老細囉, 佢就話叫會攞多份出嚟抽, 咁起碼解決咗個問題, 我老細上台都有暗串人呀, 擺到明話有錢婆做馬, 佢真係夠薑! 後段我叫做可以坐吓食吓, 但真係腳都抽筋呀! 10點幾終於散得, 我就梗係要搞掂埋找數嗰D嘢先啦, 差不多11點先走, 但老公仲踢緊波未走, 於是我咪過石硤尾搵佢會合埋先入去青衣揍番仲爺囉, 我已經攰到唔想郁, 但返到去都仲要搞掂哂佢地先可以沖涼, 沖好涼已經舒服好多啦, 可以hea吓先瞓, 老公就睇波, 我冇理佢啦!

3/3/17

3/3/17   FRI   COOL

今日係最後一日預備商會D嘢, 我個人處於絕對緊張的狀態, 基本上一日都係到諗要print D咩啦, 朝早返嚟做完基本嘢就開工啦, 全日都好堅張, 午飯叫做可以鬆一鬆囉, 下午又嚟過, 真係做到放工都未做得哂, 遲咗走架! 好在只係返去攞泳衣嗰D比子元, 遲咗都唔怕, 又要去小童做埋會員證啦, 搞掂老公就車我地去泳池, 然後返屋企hea, 等子元游完水就同埋嫲嫲及大包一齊出去食晚飯, 去咗食上海嘢啫, 食完都回家啦, 返去沖得涼瞓覺都10點多, 明天我地都好忙!

2/3/17

2/3/17   THU   COOL

今日都係如常咁返工返學啦, 老公今天要返大陸陪老細睇廠D嘢, 所以我今晚要一揍二呢, 好在嫲嫲會揍仲仲出嚟, 咁我點都輕鬆D! 朝早仲爺冇喺子元出門口時才走出來了, 但我返上樓時已經見梳化有好多公仔! 今日有時間老公又要食埋早餐先, 所以冇接更揍婷婷啦! 返到公司冇咁忙, 因為要整GE嘢都整得七七八八, 又唔敢print住, 老細呢D成日會變架嘛, 陣間又唔知有咩改! 咁咪hea吓做吓自己嘢囉! 午飯後都係睇吓電視啦, 下午老細返咗嚟, 不過有經理陪住佢都唔會走嚟煩我地, 咁都可以輕鬆D! 放工接咗子元就回家, 不用買餸煮飯洗碗係好正! 不過我有幫手開飯同吸塵抺地架, 奶奶洗埋碗就走, 我就比佢地玩到8點半先沖涼, K.O. 咗仲爺就同子元對功課, 9:30已經完成哂可以沖涼, 子元就比佢睇陣電視打陣機, 10點鐘佢都瞓啦! 我就摺咗衫再繼續睇我的Harry Potter啦, 睇到12點幾眼瞓咪瞓囉!

1/3/17

1/3/17   WED   COOL

好似話咁快就3月咁, 朝早仲爺又喺出門口嗰刻走出廳, 都係推番佢入去比daddy, 好趕咁趕到校車啦, 吹吓水咁又好晏啦, 返上樓又趕, 但都係趕唔到接更, 我見而家若不是好早, 程太都想自己揍入去, 咁就由得佢唔去趕啦! 返到公司都係做吓嘢啦, 又要開吓會咁, 呢幾日做商會嘢做到眼都矇, 午飯後都係睇吓電視咁啦, 下午又繼續做嘢, 今日享受埋老細不在港的日子, 雖則佢都係照樣order你做嘢, 但要見到佢個真身硬係唔想! 放工去接笨元, 買餸返去煮飯啦, 老公都早返到嚟, 叫佢幫手煮吓囉, 開飯食完差不多8點, 老公話落去踢波, 咁咪叫佢地幫手做D家務囉, 唔係我一個做哂仲邊有時間呢! 落得去又踢吓波打吓波咁啦, 9點鐘閂門咪回家囉, 仲爺又話要去跑步, 因為平時打完波係會去跑步, 但因為又未對功課等等, 所以只係睇吓子元短跑動作咁囉! 返上去沖涼瞓覺啦, 同子元對埋功課我就可以沖涼啦, 死啦又冇同佢溫書, 月中考試都唔知點算! 沖完涼可以睇harry potter啦, 睇到12點幾才去瞓呢!