14/3/17

14/3/17   TUE   COOL

今日仲爺又一早就起身, 冇得唔帶佢落去, 搞掂返到學校都算早啦, 可以揍埋婷婷入去! 買埋早餐返公司食啦, 朝早都冇咩特嘢做, 可以hea吓啦, 午飯後都係睇吓電視咁啦, 老細下午返咗嚟開會, 總之就係低B盡現啦, 都冇謂講咁多! 放得工就買餸返去接笨元啦, 返到去佢又係都要做視藝, 點知又做唔掂, 所以都係得個吉, 老公7點幾返到嚟, 仲爺竟然瞓咗喎, 咁我地咪照食飯囉, 食完飯就洗碗抺地等等, 子元又呢樣未做嗰樣未做, 等佢執好哂嘢做好哂嘢可以溫書都已經9點幾, 真係比佢激死, 咁比佢做咗常識再邊對邊教番佢囉! 之後佢又話未溫今日老師話會默詞語嗰D, 所以咪話佢唔識分配時間囉! 我都冇佢咁好氣, 沖咗涼先, 終於差不多瞓得, 就攞定D練習比佢做, 沖好涼就摺衫囉, 老公明天要飛啦, 今次去濟洲, 佢話做船仲有預算, 今次做魚場唔知係點呢!

13/3/17

13/3/17   MON   WARM

今日又要返工啦, 朝早只揍笨元落樓不太趕, 返到去都係做吓自己嘢啦, 要寫番幾日日記都夠皮, 又要開會做minutes等等, 午飯要去買飯, 撘lift時遇見隔離office的一男一女, 男的話不如一齊食飯, 我都打個突, 仲以為佢地冇飯腳, 佢就話大家隔離鄰舍, 可以一齊傾吓「禁煙」問題! 咁落到去買飯時我就後悔, 早知同佢地一齊食, 因為都冇咩好食! 下午老細返過嚟一陣啦, 不知不覺咁就走咗! 所以可以勁hea等放工! 老公約咗同事食飯喎, 咁我咪唔洗買餸囉, 得我同兩個細食粉算! 返到去叫子元快手做視藝, 我接埋仲爺就煮晚餐, 今晚的雞肉西蘭化長通粉好受歡迎, 仲爺都食到9成啦! 洗碗吸塵抺地後, 就捉仲爺做功課, 係咁二都要溫吓書, 跟住就沖涼瞓覺啦, 但佢可能瞓咗晏覺, 所以未眼瞓, 走咗出嚟3次! 子元9點幾終於搞掂視藝可以對功課, 要佢做埋常識先准瞓, 我就10點幾先去沖涼囉, 摺衫時睇番ben sir研究院, 真係堅好笑囉! 老公11點幾回來, 我已經開始眼瞓, 邊打機邊睇電視, 等等吓都瞓咗, 等埋佢都差不多1點先入房瞓啦!

12/3/17

12/3/17   SUN   WARM*

今朝活動係去考奧數, 其實都冇做過, 純考天才! 11點要去到土瓜灣, 咁兩部車過去, 我地車子慧, 程家車晴晴, 過到去放低4個大細路就揍住兩隻細去遊樂場玩, 都係等時間過啫, 吹吓水咁囉! 12點多過去接番佢地就去咗長沙灣食lunch, 因為子元要踢波, 本來可以泊有優惠的停車場, 但原來特首候選人喺對面學校搞辯論, 結果要泊遠D, 可惡! 食完就各自回家啦, 返到屋企比仲爺玩陣, 3點多就要佢去瞓, 其實我次次叫佢瞓佢都好合作架喎, 但就係蝦嫲嫲囉! 笨元踢完波返得嚟食埋嘢都4點幾先開始到溫常識, 其實我都攰架, 但又冇得唔溫架嘛, 溫到仲爺起身, 差不多7點都要出去食飯架啦, 咁做練習的唯有等我印好先做囉, 去咗荃灣食牛魔, 但今日D牛肉麻麻地, 所以子元都冇食太多! 食完睇多陣玩具就走啦, 返去都係沖涼瞓覺囉!

11/3/17

11/3/17   SAT   COOL

今朝要畫班, 所以都係要早起架啦, 嗰兩隻嘢放假就實早起GE, 起身搞掂出門口, 笨元自己上畫室啦, 我地就去食早餐, 然後冇咩地方去, 過咗萬寧買D嘢囉, 計到盡咁總之平先買啦, 順手幫人換吓印花! 接埋子元就返去對陣功課等等, 笨元又要去踢波, 仲爺就要做功課, 做好咪比佢玩吓囉, 等老公2點幾過嚟接我地去AEON, 又食飯又買嘢啦, 接咗笨元就回家啦, 仲仲要瞓覺, 子元沖好涼食埋嘢就開工溫書, 都係溫到中文咋, 又要影練習佢做, 仲仲瞓到6點幾起身, 老公又出去踢波啦, 等笨元做好練習就放佢同仲仲玩, 我就煮晚餐, 食粥同炒麵咋, 不過都夠飽架啦, 食完睇吓電視咁8點幾就捉佢地去沖涼, K.O.咗仲仲, 子元又話要睇狼人喎, 結果睇到11點幾先瞓, 糖水都食埋呢!

10/3/17

10/3/17   FRI   COOL

今日仲爺要扮恐龍, 佢真係扮得好得意, 落住入lift已經好cute, 咁我地話返到學校先著啦, 佢一落車就要著, 上到去又影吓相咁囉, 個個都話爸爸好勁呢, 揍咗仲爺入去我地就食早餐, 因為我今朝直接過海攞嘢, 所以可以返上去睇吓佢地早會操, 不過仲爺可能要著番件恐龍裝先出得嚟, 所以差不多尾聲先見到佢呢! 睇完就撘車過海啦, 做完嘢本來都可以行吓先返公司, 但其實又冇咩好行, 所以都係返去算啦, 做吓嘢咁又食晏, 今日試咗麥記個包, 都唔錯啦! 老細又一早返咗嚟, 把口未停過, 好辛苦! 下午好在佢都唔算過嚟講得好耐就肯走, 但都夠皮! 等到放工先返去超市shopping, 用咗shopping list買嘢再加計清楚優惠, 真係可以平好多架! 買完返上樓快手執埋嘢就去接笨元游水, 今晚唔想煮飯啦, 等笨元游完水就去長沙灣食粥, 平平地又夠飽呢! 回家後都係沖涼瞓覺啦!

9/3/17

9/3/17   THU   COOL

今日都係咁返工返學啦, 仲爺又要跟我地去食早餐, 連婷婷都唔見啦, 所以8:45先返得到學校! 返到公司都係做吓自己嘢啦, 午飯後都係吹吓水睇吓電視, 好在老細今日唔早返, 叫做可以舒服地過一個lunch! 下午本來都冇咩做, 繼續整我兩隻豬D相準備去曬, 點知差不多放工時先有急嘢做, 好在都做得哂先行, 返去接咗笨元就直接去荃灣剪頭髮, 不過都要等, 差不多7點先有得剪, 咁都係照等架啦! 首先子元剪都冇咩問題, 只係到仲爺剪時, 開頭就咁用剪刀再用手機引開佢都可以, 但用到個機時佢就縮, 唯有再用絕招一個捉手一個捉頭, 算係剪到! 近近地去咗食燒味飯咋, 食完買吓嘢飲就回家啦, 返去快手沖好涼就K.O.仲爺先, 還要對子元功課, daddy又要努力整埋仲爺隻恐龍, 真係有排佢忙! 我沖完涼都係摺埋衫就休息吓啦, 等等吓老公都喺梳化瞓鬼咗, 12點幾先入房瞓呢!

8/3/17

8/3/17   WED   COOL

經過琴日朝的教訓, 仲爺今朝唔攞玩具玩, 同我講佢只係睇電視咋喎! 咁咪有得落去囉! 自從佢同過我地食早餐之後, 佢就要一齊食埋早餐先返學, 真係服咗佢! 今日返到公司都冇咩做, 開完會做吓自己嘢咁啦, 午飯後老細又係早返啦, 好在而家唔洗追劇啫, 午飯後都係做吓自己嘢, 但D高層開會又叫我過去聽吓喎, 查實最憎開會, 總之聽完抄完咁上吓就閃囉! 夠鐘放工等老細閃咗先可以閃, 買哂餸返屋企啦老公先打嚟話出去食, 咁條魚又唔等得, 我咪照煎咗嚟滾湯先囉, 等佢地嚟到先落樓, 其實都係去長沙灣食啫, 食完車咗我地返去先送嫲嫲返青衣, 結果我K.O.哂佢地老公先返, 咁佢又要去兩間銀行過數等等, 返得嚟沖埋涼再哄子元瞓, 佢就整埋仲爺隻恐龍, 我就hea吓囉, 11點幾12點眼瞓要瞓啦!