19/4/17

19/4/17   WED   HOT

今日都係老公揍咗兩個入去我就返工啦, 買埋早餐返去都有D晏, 食埋就做吓嘢, 要開吓會嘛, 夠鐘就開飯, 今日起J2有番好睇的韓劇, 終於唔洗睇都市閒情! 午飯後都係做吓自己嘢, 老細返咗嚟又叫埋我一齊開會喎, 是但啦! 而家呢個新同事點都易合作過舊嗰件, 我都OK GE! 終於等到老細都走埋就可以輕鬆D! 放工直接返青衣, 但因為遲咗走, 見到巴士站條人龍都怕怕, 不過見到兩架車都係好快有都算啦, 點知第一架42A爆咗上唔到, 咁又話1分鐘後有車, 點知假GE, 咁唯有留意43C囉, 見到有車即刻跑去龍尾, 排到我時其實已經迫唔到, 但點都要上, 實在等咗太耐! 入到去等開飯, 老公又要7點多先返到嚟, 食完回家都8點幾, 沖好涼就捉佢地做埋功課, 然後仲爺玩陣就要瞓啦, 子元掛住睇電視, 功課做得好求奇, 我等對功課時先同佢算帳! 我都係如常咁沖涼摺衫睇電視啦, 老公星期日要飛呀, 仲要飛足1星期, 我又要單打獨鬥又要心掛掛啦!

18/4/17

18/4/17   TUE   HOT

4日假期真係過得太快, 轉個眼已經放完, 又要返工啦, 佢地就仲放緊假! 朝早差不多8點先起身, 老公揍兩個入去, 我就自己買早餐返工, 今日冇咩嘢趕做, 所以過得好hea, 先寫番D日記啦, 午飯後大老闆娘返咗嚟, 又要幫佢親戚整澳洲簽證D嘢, 咁又幫我過吓日神啦, 之後就係幫老細訂機票等等, 所以都算有嘢做吓又唔係好辛苦咁啦! 放工直入青衣食飯, 老公今晚幫子元約咗同學仔去踩車踢波, 所以6點幾就開飯, 7點幾過到荔枝角公園玩, 先係踩住車等, 跟住就過球場踢吓波, 到9點人地book咗場就要走啦, 老公行咗出公園先記得冇攞bag又要行番轉頭攞, 我地就企喺車邊到等佢囉, 返到去沖好涼就捉咗仲爺去瞓, 佢咁玩法都攰啦, 所以都冇嘈好快瞓, 子元就要睇埋神探先瞓, 見係放假至比佢咁咋! 我摺埋衫睇埋電視都12點幾先瞓!

17/4/17

17/4/17   MON   HOT*

話咁快就最後一日假期, 真係太快啦! 琴晚都算瞓得唔錯, 起碼我係聽到子元醒我先醒醒地, 知佢又自己走咗出去洗面刷牙, 真係好可愛呢! 我都瞓到8點幾先真係醒, 因為仲爺都醒埋, 大家都慢慢要起身梳洗出去食早餐啦, 9點多去到飯堂, 團餐嗰D食完我地可以叫粉麵, 食得嚟10點先開始玩, 去咗排射箭, 老公又帶仲仲去遊戲室, 咁射完箭就去番康樂室玩足球機, 今次camp真係好多人, 唔似得上一次咁人少少玩到好多嘢! 本來想去踩多次單車, 但已經完哂宿營那批活動, 所以只可以去吓遊樂場同打籃球, 玩到差不多12點真係太熱啦, 返房沖涼執嘢走人, 去市中心食埋嘢行咗陣就回家! 返得屋企都2點幾, 仲爺喺車瞓咗所以返到屋企唔瞓, 老公反而就勁瞓, 好在仲仲自己玩lego都玩咗好耐, 到5點幾老公仲未郁身, 睇個勢亦未必會出街食, 咁我就有點火咁去咗買餸囉, 行到出街市先有嘢好買, 返去又煮又洗咁, 抺埋地都8點幾, 捉佢地沖涼後, 子元都好生性, 又幫我K.O.仲爺, 又幫我按頭咁, 比佢睇埋9點半套劇都要瞓啦! 我地都唔算夜, 尤其我又冇瞓晏覺呢!

 

 

 

 

 

 
 

16/4/17

16/4/17   SUN   HOT

今日去camp啦, 朝早瞓到10點多先起身, 我琴晚基本上就執好嘢, 係老公未執啦, 但佢都冇咩執GE啫! 執好出去食早餐, 食完就揍子元去打鼓, 期間我地就去入吓油等等! 約咗Letty佢地喺深水涉嗰頭食嘢, 不過我地太晏食早餐, 所以都係輕食咋, 食完就渣車入去西貢啦, 聽完簡介再入得房都3點幾, 我最想去玩吓繩網, 本來想捉埋子元一齊玩, 但要10歲以上, 所以都係得我一個玩, 佢地揍哂D細去踩單車, 我玩完個有D求奇GE繩網後就過去join佢地, 子元竟然踩到兩輪車, 仲爺就上身破風咁GE feel, 下身就IQ博士電髮…電髮咁! 好好笑! 跟住佢地去咗踢波, 我想射箭所以又賣甩佢地自己去玩! 到6點多收拾出發去市中心食海鮮, 準時7點出到去就有得食, 都算OK好味啦, 食完就去番嗰間甜品食“榴槤忘返”, 真係好好味呀! 食埋就返營舍啦, 得番好少活動可以玩, 老公陪仲爺去遊戲室包場咁玩, 我地就喺康樂室玩囉, 到10點要散啦, 返房執嘢沖涼, 仲爺11點多比我地K.O., 大嗰三個就玩board game啦, 玩到12點幾比我地強制停止, 要佢地瞓覺, 我地大人就吹吓水咁, 1點多都開始要瞓啦!

 

 

 

 

 

 

 

 

 

 

 

 

 

 

15/4/17

15/4/17   SAT   HOT

今日比較hea過, 因為子元要學嘢, 所以都冇咩地方可以去! 朝早9點學畫, 咁我地就食早餐周圍行吓去吓咁啦, 夠鐘接番佢出咗陣街, 去咗油麻地, 老公想睇吓模型, 我就麻麻地啦, 仲爺又話要去廁所, 冇片就要咁服侍佢架啦! 跟住行咗去書局睇吓書, 點知仲爺今次開大, 去番剛才的廁所又太遠, 咁落到樓見到有麥記就入去啦, 點知殘廁當女廁又開唔到門, 唯有硬入男廁廁格啦, 佢POPO咪POPO囉, 又VV囉, 射到我條褲濕哂, 好在條原子褲可以除啫, 幾經辛苦終於完成, 我真係好辛苦! 過對面行咗另一間文具鋪, 再去食咗D嘢就回家了! 返去老公最叻就係同仲爺瞓覺啦, 咁子元4點游水嘛, 游完返上嚟沖埋涼就出街, 去咗mega box, 因為去到已經好肚餓, 泊完車出嚟見到有間酒樓就喺嗰到食咗先, 然後去ikea買咗肉丸放番上車, 再行吓反斗城, 跟住又上咗兒童層玩吓車仔, 最終去埋AEON買file就回家啦!