6/5/17

6/5/17   SAT   HOT

今日都係忙忙碌碌啦, 朝早我要返工呀, 所以都要8點起身, 捉哂佢地3個起身出得門口都9點, 返到公司都係做吓私事啦, 然後就係等放工啦, 老公攞咗架車去洗, 所以過青山道找佢食飯, 要等架車洗好先, 所以食完都要行吓街先, 都冇咩好睇, 只係去咗睇吓梳化! 等架車抺好快手去接笨元去打乒乓波, 然後就返一返屋企, 執埋嘢出去, 分頭行事, 我去小童報名, 老公做司機接送, 要報的活動都算報到, 係子元個NERF射擊camp滿咗囉, 照同佢排後備啦! 等交埋錢已經5點, 老公到樓下接埋我就出街, 去咗九龍灣行德福, 仲爺由3點幾嗰程車開始瞓一瞓到去九龍灣, 都夠2個鐘囉! 去到老公先買咗褲同鞋, 咁就買咗千幾蚊, 不過佢D褲真係著到開襠咁, 鞋又光頭, 都已經選減價嚟買, 只係而家D嘢太貴! 跟住就去睇吓玩具囉, 然後就去食晚飯, 子元話想食super sandwich喎, 咁有人提意咗就最好啦, 食完再去一期嗰邊行多陣就走啦, 返到去笨元要睇銀河守護隊喎, 我地就係到傾裝修嘢, 可能有D意見爭持, 所以笨元就有D擔心咁, 覺得我地鬧交囉, 咁傾呢D實有意見不合架啦, 咪就係要傾咁解啫! 睇完電視11點幾12點佢先瞓, 老公今晚睇波, 所以我都自己瞓先啦!

5/5/17

5/5/17   FRI   HOT

今日都係咁過啦, 朝早起身揍仔返學, 買早餐返公司, 跟住都係開吓會咁啦, 之後都係做吓公事做吓自己嘢, 午飯後都係睇吓電視咁啦, 下午老細返咗, 好在佢只係同佢D愛將開會, 唔會過嚟煩住! 放工就返去惠康買吓嘢, 補給吓飲品咁啦, 返上樓攞埋衫就去小童接子元去游水啦, 跟住我地都係返屋企收拾吓, 夠鐘就落去接埋子元過長沙灣食粥, 買埋糖水返去食, 點知仲爺食咗個西瓜布丁……半夜就賴尿啦, 因為太多水份, 好在佢賴哂落張被, 可以攞去洗, 張床可以照瞓!

4/5/17

4/5/17   THU   RAIN

今日又開始要返工返學啦, 所以又要6點幾起身整午飯比笨元, 仲爺未起身可以快手搞掂出門口, 返到學校原來今日直接喺迴旋處集合, 咁又要帶返仲爺落去, 但唔知要等到幾點, 所以交咗比個家長我就走啦! 今日返到公司都冇咩忙, 可以話好hea添! 寫好日記過吓相就等食飯, 不過午飯都要去買先有得食, 睇吓電視打吓機咁, 下午做咗少少嘢啦, 都係等收工諗吓今晚煮咩! 放工過去接咗笨元回家煮飯啦, 由得佢自己玩, 佢話做哂嘢嘛! 食完飯去咗跑步, 同子元練吓接力啦, 條友仲冇氣過我, 冇鬼用! 不過跑完又去咗食雪糕, 算是前工盡廢嗎! 返屋企沖完涼就捉兩個細瞓, 我摺埋衫已差不多12點, 跑完又攰喎, 所以睇完妙手都瞓啦!

3/5/17

3/5/17   WED   HOT

今朝仲爺8點多就起身, 服侍完佢我就再瞓啦, 9點幾起身啦, 執好今日打波D嘢就出門口, 先食咗早餐, 跟住先去深水涉買陀螺盒, 然後去咗旺角, 子元要買背囊, 佢個angry bird開始發毛, 我又去買snoopy T-shirt啦, 咁樣行吓買吓都係行咗1個鐘多D已經冇咩行, 咁咪早D去球場附近搵車位囉, 因為今次喺何文田, 唔多識路, 要D時間, 去到仲有大半個鐘, 咁老公話排吓標位先, 又比佢等到! 去到室內運動場啦, 原來呢個場係冇冷氣, 都真係幾攞命! 第一個鐘打羽毛球, 陪D細路玩吓都唔會打得咁大力, 仲爺冇得玩嘛又扭計, 老公最終比電話佢玩, 第二個鐘打籃球, 仲爺玩咗陣又唔玩, 又打機, 咁我地要打波都唯有比佢打機, 不過N年冇打過波真係唔掂, 完全唔夠氣呀, 半個鐘我起碼抖咗三四次, 但都入到吓波GE! 玩完就 返美孚同letty家食嘢, 然後各自回家先, 沖涼執嘢等等, 7點幾佢地過嚟玩, 都玩到9點多先走呀, 仲爺當然未夠9點就比我地趕咗入房瞓, 今日已經夠攰啦, 要瞓架啦! 等佢地走咗老公就煮麵食, 因為5點多食完嘢, 再食晚餐又唔知點咁! Hea到11點幾我都喺梳化瞓咗啦!

 

 

 

 

 

 

2/5/17

2/5/17   TUE   WARM

無端端要返一日工, 真係好攞命, 不過今日係得笨元一個可以連放啫, 所以朝早7點幾先起身, 一齊揍仲仲返學, 食埋早餐就喺公司樓下同阿媽交收笨元, 我就返工啦, 本來諗住今日可以hea吓, 點知老細10點幾就返咗嚟, 係咁開會開會, 但office得番我同會計今日有返工啦嘛, 點解要咁呢, 最終係車輪我地, 好在可以輪休吓, 好過冇! 午飯買咗麥樂雞, 試吓兩款醬! 下午本來諗住子元4點幾學完鼓就上嚟坐大半個鐘, 等我放工, 但老細喺到點坐咁耐呢, 所以唯有叫阿媽揍佢返屋企先, 到我放工時再返過嚟, 子元話行到好攰! 過荃灣等剪頭髮, 仲爺梗係喊哂啦, 真係好煩, 奶奶仲話下次帶佢去涌美嗰D試吓剪, 因為佢覺得Ann手勢唔好仲爺先會咁, 但其實主因係仲仲怕嗰D聲嘛, 唔關邊個剪事! 剪完去食埋叉燒飯買埋珍珠奶茶就回家, 送嫲嫲返去攞埋書包才回家, 佢已經喺到搬緊傢俬, 大件嗰D等老公放假去搬啦, 老公就好唔想搬, 因為佢話整完大包又係到嘈話咁搬, 但我角度就係, 執咗掉咁D嘢, 到時你裝修過去住都好住D嘛, 話知大包點呀, 我叫奶奶有咩你覺得冇用就掉咗佢算, 唔洗理咁多! 返到屋企都係hea吓啦, 明天又放假啦, 所以今晚都比較hea!

1/5/17

1/5/17   MON   HOT**

今日放假真係要休息吓! 朝早其實都唔係好晏起身, 因為兩個細唔知點解仲可以咁早起, 所以我地9點幾都梳洗出去食早餐, 子元話要食北海道喎, 都好近近地, 食完返去做功課, 做完我又要對啦, 仲爺就係咁玩玩具, 真係開心! 點幾搞掂嘢, 再請仲爺執好玩具出得門口已2點幾, 老公要去荃灣換番D褲, 咁嫲嫲又話一齊出去, 所以換完褲食咗嘢就去愉景新城行, 我地D城市人都係去吓有冷氣的地方好了, 活動都係睇玩具玩呀咁啦, 6點多就去食晚餐, 試咗間西餐又幾好食喎, 你話好貴又唔算, 不過5個人食差不多啦, 食完送咗嫲嫲返去就回家, 沖涼瞓覺啦, 仲爺明天要返學, 我地要返工, 係子元大人放假一天啫, 返一日又放假啦, 真係令人好冇mood呢!