12/5/17

12/5/17   FRI   HOT

今朝係仲仲觀課日, 所以請咗半日假, 朝早都係如常啦, 不過仲爺今日好嗲, 晨早流流已經嗲緊, 但我又要整子元飯盒又要佢地快D換好衫, 好在笨元起咗身仲爺有個競爭對象叫做快D啫! 送咗子元校車仲爺主力為等希媽, 等到包餅就拖我走, 返上樓即刻食…又要飲奶…最終個腸仔包咪食唔落囉! 送咗佢入學校睇埋讚美操, 我就同家長們食早餐啦, 大家吹吓水咁, 差不多10點就過去學校! 分咗幾個環節啦, 首先係跳讚美操唱校歌, 然後分兩組, 我地先係體能嘢, 睇佢地玩滑梯, 仲爺顛咗咁, 不過有其他同學仲顛! 然後玩先爬地墊後認字, 不過仲爺開始唔專心啦, 人地其他級別去廁所又關佢事, 係咁望! 跟住就上英文堂, 老師叫名又唔識出去, 攞咗個顔色又話唔知咩色, 但轉吓又講到, 比佢激死! 到食茶點啦, 佢地又好有程序喎, 亦都好有自理, 但到玩數學教具時又亂嚟, 唉…對住佢我真係投降! 終於放學啦, 嫲嫲同埋老爺嚟接我地, 去聯邦飲埋茶我就返工, 佢地就返美孚, 仲爺好唔想我返工個樣真係好令人軟化, 但都係要返架喎! 返到去都係做吓公事做吓自己嘢啦, 夠鐘就收工, 返屋企攞衫比子元游水, 順手去小童交埋笨元玩NURF Camp的錢, 跟住就要行過去泳池啦, 不過老公今晚返啦, 最開心係咁! 今晚嫲嫲出嚟煮飯食, 老公7點一齊來泳池join埋我返屋企, 叫醒仲爺唔好瞓咁晏, 等哥哥返嚟沖埋涼就開飯啦, 仲爺例牌食得衰架啦, 坐嫲嫲隔離嘛! 最後搞到9點幾嫲嫲就回家, 我地都開始收拾趕佢地入房啦!

11/5/17

11/5/17   THU   HOT

今日仲爺鬧鐘未響就起咗身, 所以快手搞掂D嘢出去送哥哥返學啦, 仲爺要喺樓下等到希媽嚟到…比餅餅佢, 然後就話返上樓啦, 想同loletta傾耐D都唔得! 今日撘唔切小巴, 差不多8:20先返到, 都好唔洗企咁耐, 因為都真係幾熱吓! 跟住都係買早餐返工啦, 今日又變番hea啦, 有時要你坐喺位又唔可以太過明目張膽地做自己嘢時, 都幾係難過! 午飯後都係睇吓電視咁啦, 下午繼續hea, 等子元過來會合就去林醫生到覆診, 今次去紅磡, 撘西鐵過去都唔遠, 不過去到又要找都真係唔識路! 我又肚餓喎, 快手買個包食咗先! 去到等咗一陣就有得睇啦, 都係問吓近況, 咁個衰仔食藥又真係冇咩大問題, 又冇咩副作用, 都係好事嚟GE, 藥就繼續食, 暑假可以停吓藥先, 開學前一星期再食番! 順手問吓林醫生, 細佬對聲音好敏感, 敏感到剪頭髮都唔得時, 佢話呢個都係感統問題, 真係要check要找番職業治療師, 咁都要找吓資料係咪可以早D排吓期呢! 比埋錢就閃啦, 次次比錢時都覺得比人放血咁! 返到青衣同子元食壽司, 唔控制住佢的話好似十日冇比飯佢食咁, 好麻煩! 食完就去揍仲仲啦, 但笨爺又食西瓜咁, 結果8:15先走, 嫲嫲已經比咗錢我地撘的士, 但返得去都8:45, 咪快手幫佢地沖好涼, 同仲爺做功課, 睇完雕就捉佢去瞓, 笨元亦要作埋篇文, 作咗個幾鐘先搞得掂, 仲要係咁教佢D方向點作, 搞到差不多11點先再去執書包瞓覺, 仲話好快好快……信佢先奇! 我都12點多就瞓啦!

10/5/17

10/5/17   WED   HOT

今午要出去食飯, 所以要著靚靚, 仲爺見到我咁著, 嗰句媽媽你好靚呀超誇張, 哈哈! 揍咗佢返學就返工啦, 開完會11點幾大老闆娘就返嚟話出去食飯, 因為要睇吓2018年annual dinner個場點佈置嗰D事, 12點多已經出到去, 餐飯食到2點呢, 跟住就睇場啦, 經理就趕住走咁, 要過海傾嘢喎, 所以司機就先車佢過去再返嚟接大老闆娘, 我就陪佢去睇嘢, 本來只係攞首飾GE啫, 咁又比人再sell, 又買……仲要係我一年人工咁買, 冇嘢講, 我呢D基層係唔會明! 終於4點多車到我返公司, 都係等收工啦, 放工返去接仲爺, 佢仲瞓緊要捉佢起身, 所以都要抱一排先, 落到樓我真係冇力啦, 好在佢都肯自己行, 去到婆婆到今日只係食通粉, 所以大家都比較輕鬆, 阿媽又唔洗煮一大餐, 7點幾就走啦, 早D返到去可以沖哂涼先睇電視, 仲爺就梗係比我地趕咗去瞓啦, 笨元今日話冇書要溫, 咁就早D要佢去瞓囉, 我就摺埋衫抖吓11點幾12點都瞓啦!

9/5/17

9/5/17   TUE   HOT

今朝仲爺未起身, 所以叫子元自己落樓啦, 叫炮哥幫吓眼睇到佢上咗車就OK啦! 點知送咗笨元出lift口不久仲仲就醒啦, 咁就快洗梳洗換衫出門口啦, 不過今日D車就好順暢喎, 8:10就已經到咗學校啦, 咁佢兩個可以玩吓, 我地就睇吓D暑期活動啦, 睇吓麗閣嗰間小童睇仲有咩報! 買埋早餐返公司都係做自己嘢啦, 老細今日返鄉下啦嘛, 超輕鬆! 午飯後都係睇吓電視啦, 下午連經理都閃埋, 完全可以做自己嘢! 放工返去接仲仲, 今日佢醒咗啦, 接咗佢可以直接閃, 去到阿媽到, 佢今日好似比較好火氣, 我講多兩句都唔啱咁, 有時係連自己阿媽都係相見好同住難架, 以前其實都已經係咁啦! 食完飯快D閃, 佢兩個又失控咁玩嘛, 點知check巴士班次6號要20分鐘後先有車, 咁梗係轉plan啦, 不如撘到去美孚再行返去就算, 咁8:30前都返得到去, 跟住快手同佢兩個沖好涼, 我都沖埋先睇射雕, 仲爺就一早比我趕咗入房, 但佢聽到daddy電話又走出嚟, 好好耳力咁都聽到! 睇完射雕就捉子元入房對功課溫書, 叫佢執嘢瞓覺都搞到10點幾, 太欠缺組織力! 我今晚都好攰, 11點幾都已經瞓啦!

8/5/17

8/5/17   MON   HOT

今日老公要出差, 同我地一齊揍子元上校車呢, 跟住佢就直接出發啦, 我同仲仲返上樓攞埋嘢都出門口, 不過早出門口都冇用, D車唔啱時間得個等字, 用咗50分鐘先返到學校呢! 揍咗佢地返學就買埋返工啦, 朝早都要開吓會咁啦, 午飯後不久老細就返咗嚟, 阻住哂又問呢樣嗰樣, 變相用埋你個食飯時間囉, 不過佢明天返鄉下, 有一個月唔洗見到佢, 我忍! 下午佢地D高層開足一個下午會, 都好唔洗阻住哂! 放工我就去青衣接咗仲爺先, 佢瞓緊所以要上樓接佢, 仲扭一輪搞到6點幾先走, 好在上到去巴士站見到有車快D跑去趕得到! 返到阿媽到食飯啦, 仲爺本來玩嘢食得好衰, 突然又食得好快跟手去玩! 食完未夠8點就走啦, 快手返去沖涼睇電視, 我要睇射雕英雄傳呢, 所以只係快手幫仲仲睇咗功課就捉佢去瞓, 子元就要一齊睇, 係9點半後我閂咗電視等佢入房做吓嘢, 睇埋功課我就沖涼, 之後再幫佢溫咗英文生字啦, 10點半捉佢去瞓啦, 我今日都攰, 都冇睇哂妙手就瞓!

7/5/17

7/5/17   SUN   HOT*

今朝阿媽話要入沙田, 叫我地埋兩個細入去睇吓阿婆, 所以10點多出門口接埋阿媽入沙田, 買埋早餐上去食, 不過一來時間又趕, 子元12點又要出番去學鼓, 仲爺又唔多合作, 所以都冇咩玩就走啦! 子元去學嘢, 我就同仲爺返屋企, 佢有好多功課要做呀, 叫佢執玩具唔執, 我真係打咗兩吓, 死死地氣喊住執, 到第二次再執咪乖乖去做囉, 係要人打GE! 3點捉佢入去瞓, 搞到笨元踢完波返嚟都唔煩, 最終4點多先叫做冇再搞事, 咁我又要同笨元溫中文進評啦, 溫好可以一齊休息啦, 到5點幾仲爺瞓醒啦, 不過喺房大叫媽媽我就知出事 – 賴咗尿呢! 又要換床單又要換衫啦, 跟住佢地就照睇電視, 我要裝好身出去飲, 預計7點半去到, 點知差不多7點半先出到門口呢! 老公就揍兩個去海運睇玩具食KFC, 我就飲到10點幾11點先閃, 回程喺巴士幾好瞓呀! 返到去都冇做家務啦, 好攰啦!