7/1/18

7/1/18.   SUN.  COLD

今日我真係堅攰，攰到我真係郁都唔想郁！朝早點都要起身揍子元去打攰，都10點先起架啦，梳洗完出門口，原來行我都已經冇力，幾經辛苦上到車，先揍咗子元去打鼓跟住就去食光速餐，不過原來一個人攰係會連食嘢的力都冇，我只想盡快返屋企休息！接回子元就送我回家，因為我又肚痛又要休息，去完個廁所我喺梳化起碼攤屍咗1個鐘先開始郁，摺吓衫煮個粥做午餐，又對吓功課做吓功課咁，子元去考奧數，回來後我又覺得好攰，因為佢地真係好嘈！捉仲爺做埋啲功課就叫pizza hut食，外賣自取快好多，食完8點幾捉佢地去沖涼然後同仲爺溫書，子元就叫佢自己溫吓再比練習佢做囉，結果我都冇再點同佢溫，其實做練習好過我同佢講，做吓佢先知自己唔識咩！老公買埋糖水返嚟，不過唔係松記真係差啲！

6/1/18

6/1/18.  SAT.  COLD RAIN

今日真係好攰！朝早8點多起身子元要去學英文，咁我地去食早餐啦，跟住去759shopping完就回家，我開始要執嘢啦，執到12點多先出到門口，去公司放低嘢先過對面化妝，要到琦琦化埋先，今次盡化啦，因為戴咗隠型眼鏡嘛，就要大變身完全唔同！化好上去換衫後，等齊嘢就4點出發去酒店，好在早過老細少少上到會場，但其實冇咩可以做住，不過之後就開始忙，咩都問我咁，接待又見到我，周圍都見到我，其實忙到有啲斷片，只知自己周圍走，見到人就影吓相打吓招呼咁！忙到舞獅入場我地都仲喺場外，真係好想睇番啲舞獅可以喺咩位郁！入到去都唔係太有時間坐，因為隨時都有嘢做嘛！基本上我係3-4道菜咁食一次，出出入入咁，好在琦琦幫咗我好多手，中塲又要去幫手運公仔，搬定紀念品出嚟，原來我都唔係好多時間喺場內！轉眼咁快又差不多完場，啲人開始散我地咪出去派吓紀念品囉，又要同啲識ge吹吓水囉，最蝕喺余仔話要同我影相，但前前後後咁摟住我條腰，次次都係飲到咁醉為咩！散場都散咗好耐，真係把握時間返去，所以做好嘢就同它細講回家啦，差不多12點啦咩宆曱夠皮！今日都見有唔少出鑤， 不過算啦係咁逼下架啦！回家沖涼休息啦，超攰！

5/1/18

5/1/18.  FRI.  COOL

今日朝早都係如常揍仔返學啦，今朝仲爺都遲呀，叫極老公都唔願起身！返到公司都係要做公事啦，又要開會咁，跟住都係密密咁搞明晚100週年啲嘢，其實真係冇咩停過手，但老闆返咗嚟都要決定抽獎啲嘢，無端端又多個枱獎，又要整抽獎用的數字，本來我話就咁抽中嗰張枱就嗰張全部人有咪算囉，又要每枱一個，我地咪又要做餐死！我又要入掛牌，結果真係要OT，我又揍唔到子元放畫班，唯有叫阿媽揍佢嚟公司先，做到7點幾先做得完，老公揍埋仲爺出咗嚟接我，一齊去咗新都會晚飯，因為要去攞隱型眼鏡嘛，都冇咩行啦9點幾回家執嘢休息，明天有排忙！

4/1/18.

4/1/18.  THU.  COOL

今朝如常起身整飯揍仔返學啦，買埋早餐返公司，都唔算好忙啦，寫吓日記做吓自己嘢，吹吓水咁時間都過得好快， 話咁快就食飯時間啦， 食完大老闆娘返咗嚟又問呢樣講嗰樣啦，下午都係做吓公事啦，老細keep住有白痴嘢出啦，都遇咗佢架啦，但影響到我地嘅就要諗辦法處理佢！放工買埋餸揍咗笨元就回家煮飯，跟住都係做平常嘢， 對功課溫習等等， 沖完涼摺埋衫，我都好攰啦，老公就好努力咁處理仲爺個廣播劇，等佢自己慢慢搞！

3/1/18

3/1/18   WED   COOL

今日終於全部人都正常返工返學啦, 又要6點幾起身, 今日仲要整烏冬比佢帶, 真係趕到爆! 唔記得買奶, 所以要出去食早餐, 但就買咗個包比仲爺食就算, 8:20已經返到學校, 比程生笑我地今日咁早! 食埋早餐返工啦, 今日都算忙啦, 所以時間過得好快! 午飯後老闆娘返咗嚟都冇咩, 反而係老細返咗嚟先會煩人GE啫! 下午忙碌完可以休息吓啦, 放工準時走, 去買餸接埋笨元返屋企就煮飯囉, 老公返到嚟幫吓手咁, 7點幾開到飯, 飯後又叫笨元幫手收拾等等, 咁我先可以有多啲時間! 等佢兩個沖埋涼就同仲爺對功課溫習, 再同笨元對吓功課, 見佢做我啲練習都有心機就算啦! 老公努力搞GE仲爺個廣播劇錄音, 所以我冇理佢, 係沖完涼錄番我嗰幾句, 點知過唔到落電腦, 唯有明天返公司試吓!

2/1/18

2/1/18. TUE.  COOL+

今日我地要返工啦，佢兩隻嘢就仲放緊假，朝早7點幾先起身，仲要叫佢地搞掂出門口又已經過哂8點啦，因為要攞埋啲花過去阿媽同奶奶到，所以全程車我都要跟住， 最好笑係仲爺囉，佢去到嫲嫲到落車時竟然喊，有冇咁唔捨得呀！今朝要去觀塘交續牌嘢，所以直接過去，做完先買早餐，食埋返公司，啲老細返哂嚟， 佢有佢地喺嗰到開會，我本來都唔係好想過去，但工作上都係要面對，咁過親去佢地實有低能嘢，真係令人好激氣！午飯全世界喺到食，所以我地都係要喺自己位食，仲要做吓嘢咁添，算啦一日半日，下午借啲二落去買嘢入埋票，放工老公嚟接我，入青衣接埋嫲嫲同仲爺就去愉景新城晚飯，再去掟埋銀仔夾埋公仔咁就返屋企囉！快手叫兩位少爺搞掂啲嘢早啲瞓，明天要返學啦！

1/1/18

1/1/18.  MON.  COOL

2018年第一日，完全冇咩特別，反而係同仲爺二人世界多，因為朝早老公就帶咗子元去打比賽，我本來都唔願起身架，但仲爺見住daddy出咗門口就喊得好傷心，於是叫佢入房同佢玩陣就起身囉，執拾好佢啲爛攤子就煮早餐，只係食咗通粉咋，咁我想飲咖啡嘛唯有出去買，又去街市買雞蛋等等，可以整午餐，再要陪仲爺去公園玩，攞住雞蛋玩遊樂場夠哂好玩！跟住再去惠康shopping，買吓買吓又好多嘢咁，咪推車仔返去囉，行到半路見到有人攞住好多花又唔似零售喎，原來有個凍肉批發檔代朋友寄賣但又賣唔出，而家就咁送哂比人囉，我攞咗兩札啫，但因為要還車， 都係要行返過去，咁又再去八清楚有咩花囉，最終攞咗5札，仲影埋相放美孚谷等多啲人嚟攞，攞哂嘢返屋企又有排搞啦，仲爺又叫肚餓，嗰吓真係幾亂，終於執好嘢煮好午餐仲爺亦食得好滋味，食完睇多陣電視就捉佢去瞓，結果都係冇溫書，佢瞓覺時我要摺好多衫，等老公5點幾打嚟就出去食晚飯玩咗陣就返屋企啦！