14/3/18

14/3/18   WED   WARM*

今日仲爺又7點就起身, 咁咪一齊落樓囉! 食埋早餐返學返工啦, 今朝都係做吓商會啲嘢咁啦, 都仲有嘢要改吓, 午飯要落去買, 正正經經食啲飯類飲啖湯啦, 下午老細冇返, 可以自由自在吓先! 做吓自己嘢輕鬆吓, 反正都冇咩可以爭! 放工撘lift時有人叫我……原來係中學同學, 佢原來喺30樓做, 下個月生得喎, 問佢第幾胎, 佢話只係第一胎, 邊學得我嗰啲咁大, 咁又係, 過多10年佢先仲同小朋友溫緊書, 我已經自由自在啦! 去補習社接番子元買餸返去煮飯, 笨元都係衰架啦, 早段時間唔可以的起心肝做埋啲練習, 係要到夜晚先嚟做! 食完飯搞掂埋就同仲爺溫一溫書, 又到子元溫! 叫佢再做埋啲練習我就沖涼, 沖完涼佢仲未做好, 我都冇電啦要眠一眠先, 等佢做好對好再複習吓就放佢去瞓, 我仲要摺衫呢, 邊摺邊睇J2劇已經算係我休息時間, 我真係朝7晚11呢!

13/3/18

13/3/18   TUE   WARM

今朝仲爺都係一齊落樓, 梗係啦琴晚咁早瞓, 但我瞓入眼時就走入嚟話要去廁所, 比佢玩死! 揍咗哥哥返學就返上去沖涼, 琴晚冇食嘢, 今朝出去食豐富早餐啦, 但仲爺真係食得好慢, 8:25已經食得啦, 食到8:45先食得完, 支奶仲要一路行一路飲! 返到公司都係做吓公事啦, 朝早時間都過得快, 午飯後段老細返咗, 總監之前都通咗水叫我找機會同老闆講, 咁呢吓仲唔係機會, 三幾句同佢講番又唔係話我知錯呢D咁損自己的話, 但就同佢講咗我了解個問題會改善囉, 咁老闆反應都正面GE, 佢假之餘我又假啦, 未找到工之前都要努力去假架啦, 我又冇本事裸辭喎! 下午本來都冇咩, 但商會嗰邊收到啲感謝狀出咗事, 要補穫啦…希望搞得掂, 老實都做咗咁多年, 都唔明點會咁都搞得錯! 放工老公嚟接我, 諗諗吓不如唔好煮啦, 出去食平平地食粥算, 咁先接咗嫲嫲同仲爺再揍子元, 食完粥就車咗我地返去先, 老公才送嫲嫲返去, 咁我可以搞掂兩隻嘢沖涼做功課等等, 都真係要時間去處理佢地! 沖好涼再溫書, 都溫到10點幾呀, 真係好攰, 還要摺埋衫就可以安心睇劇!

12/3/18

12/3/18   MON   WARM

今日都係要返工啦, 笨元個午餐盒好簡單, 所以都唔算趕, 仲爺又要一齊落樓啦, 返得上去出門口都唔早啦! 揍咗佢返學就買早餐返工啦, 都係要開吓會咁, 知道老細今日實返公司, 所以都做好啲嘢先, 佢睇唔睇就另一回事啦, 午飯後睇吓電視咁, 襯佢地都未返娛樂吓嘛! 下午果然全世界返哂嚟, 開足一個下午的會, 我就襯尾段時間攞嘢過去簽, 仲要騎牛搵馬唯有忍氣吞聲先, 做吓戲都要啦, 後來總監同我講番老闆覺得我係唔同咗, 唉…平日我唔做戲啫, 返公都真係要靠戲, 今次真係人生如戲啦! 放工做埋少少嘢先返去揍笨元, 買餸煮飯啦! 跟住要溫書, 所以叫咗老公吸塵抺地等等, 仲爺返嚟就已經瞓咗, 可以專心同子元溫書, 跟住佢又話要做視藝, 都搞到11點幾先瞓!

 

11/3/18

11/3/18.  SUN.   WARM

今日瞓到10點多先起身，不過都比佢兩個嘈住！起身後快手搞掂都要出門口揍子元去打鼓，跟住我地去食早餐，接番子元後去投埋票就返屋企，又要開始同子元溫書，唔覺唔覺溫到3點幾先去食嘢，阿媽打嚟又話個抽油煙機好似甩咗嘢，所以食完嘢就去幫佢睇吓，都係好少事啫，整完又返屋企啦，本來諗過去行商場， 但其實都冇咩行，不如去遊樂場就算，返樓下玩到6點多老公就去踢波，我就同佢兩隻嘢返去，整咗煮飯啲嘢先， 叫子元做埋啲練習，仲爺就麻煩你自己玩吓啦，8點多煮埋開飯，本來之後都相安無事，但仲爺無端端喺個廳疴尿，真係迫到人發顛！子元都算按住咗我把火，仲爺就淨係喺到喊，人都顛！終於K.O.咗佢，睇埋電視10點幾去沖涼，老公都11點先返到嚟，明天又要返工啦，真係令人好冇動力，尤其條PK返咗嚟，唉。。。鬼叫你窮呀頂硬上！

10/3/18

10/3/18.  SAT.  COOL

今日長周呀，朝早未夠7點就知嗰兩隻嘢起咗身， 仲聽到子元幫仲爺沖涼，咁佢地搞得掂又冇理佢地啦， 最終鬧鐘響先起身，搞到差不多9點先出到門口，送咗子元去學英文我都返工啦， 然後都係食吓早餐做吓嘢咁， 我今日真係有做嘢架，諗住趕起咗編講辭下星期比條PK睇，佢鍾意改又好咩都好啦，我又唔係求奇做， 過得自己過得人！放工落樓同子元會合，去咗麥記食咗午餐就回家溫習，不過搞掂得嚟都差不多3點先開始溫，常識都真係要時間，做練習佢做吓又想休息吓咁，所以都未做得哂架，差不多5點又要去游水，我返嚟都冇得休息架， 到睇仲爺啲功課， 等佢返到嚟就教佢做啦，都做到子元放游水咁滯，接咗佢放游水就出吓街，去咗MEGA BOX幫子元買過對白波鞋同食晚餐，成日話想食pizza，今次就比你食啲有質素啲！買埋波鞋本來諗住比佢地睇陣玩具，但仲爺又要疴屎咁，都係冇得睇！回家後都係沖涼瞓覺啦！

9/3/18

9/3/18   FRI   COLD

今日都凍番好多, 真係要著夠衫! 仲爺又一齊要落樓, 又唔記得自己琴晚冇沖涼就瞓, 所以送咗哥哥校車就要返上去沖涼換衫啦, 今日淨係老公揍仲仲返學, 因為我今朝要去覆診, 仲爺好似好唔捨得咁, 但老公話同佢去食早餐又冇問題啦喎! 跟住我就做吓自己嘢, 整吓早餐食, 寫埋個日記咁都10點多, 仲試埋下星期大龍鳳條裙, 其實只係攞番條舊裙出嚟啫, 試咗都仲啱呀! 搞掂哂出門口, 落去撘巴士過葵涌醫院, 等等吓車先記得自己冇攞報告, 又上番去攞, 最終都係撘的士過去, 11點前去到, 登記咗就得個等字啦, 都等咗差不多1個鐘先見到醫生, 佢睇哂啲報告, 話全部都正常冇問題, 血糖血脂都正常, 驗血報告仲話壞膽固醇都係3, under3.4就係正常, 我記得上次幾年前驗時係4.6架, 即係進步咗, 真係意料之外! 咁咩都正常下, 我血壓高係遺傳性, 係基因問題, 所以都係靠食藥同生活習慣去控制! 醫生見我食之前隻藥唔係太降到, 就轉第二款比我囉! 比埋錢等攞藥, 等咗9個字先攞到藥, 都已經1點啦, 快手返屋企, 轉一轉行裝就過去阿媽到, 要放低子元個踢波袋, 買咗個燒味飯上去快吃再快腳行返公司, 都係2點多啲啫! 跟住都係做做做啦, 總監返過嚟同我地幾個單獨對話, 想知大咪姐搞咗啲咩風雨出嚟, 亦都話老闆會出封警告信比我, 我心諗是但啦, 我而家係但求喺我找到新工前比住啖飯我食咁解啫, 我已經係100%想走架啦! 放工去畫室接咗子元就快手過球場, 今日要去到中山公園都行得遠架! 仲爺嚟到開始係咁要個叔叔陪佢玩, 搞到我都勁唔好意思, 終於踢完啦, 本來諗住返長沙灣食粥, 但佢地又話肚餓咪喺到食算囉, 今次試咗間米線, 係好食呀但仲爺又話肚痛, 食完比咗支奶佢飲完又嘔, 好在佢識講, 即刻落車等佢嘔咗先, 上到車兩個瞓哂, 仲爺又唔沖涼咁瞓! 子元又話眼瞓但沖完涼又掛住打機, 真係咩都佢講哂, 我都係睇埋11點套劇就瞓啦!

8/3/18

8/3/18.   THU.   COLD

今朝仲爺又要一齊落樓，好麻煩！揍哂佢地返學就返工啦，今日都有啲嘢做吓，忙忙碌碌咗一輪又差不多食午飯，今日叫咗米線，不過只可以食清湯！要快啲好番先可以食番我鍾意嘅嘢！睇吓電視咁又要開工啦，努力做好自己啲嘢就收工， 阿媽揍咗子元過嚟， 所以可以直接返屋企煮飯，仲爺返到嚟瞓咗，叫佢都唔起身，咁碗飯就益埋阿哥啦，食完洗碗抺地， 子元要做體能練習，我就沖涼先啦，笨元而家成日都掛住玩機，都要限制番個時間先得，摺埋衫睇埋電視12點多都瞓啦！