7/2/20

7/2/20     FRI     WARM

今日到我開工啦, 根本就係忙到顛, 因為一個人做四個人嘢嘛, 唔顛就奇啦, 未夠9點食咗半份早餐, 跟住又要量體溫又要睇其他嘢等等, 正所謂門口又係我, hotline又係我, 有人入嚟又要量體溫咁, 還有我自己嘢呢, 上嚟唔係過相又攞JC, 總之做死我啦, 12點幾我餓到快手食埋個包,唔理陣間食午飯! 今日同咗Joey Joyce佢地去食車仔麵, 講番今朝的慘況囉! 下午啲時間過得好慢, 又唔係冇嘢做的,但就係咁耐都未放得工咁! 終於捱到6點閃得, 帶埋加料啲餸返去, 都係雞同燒肉啫, 不過就煮少好多, 食完都係日常咁清潔沖涼睇電視啦, 係今晚老公放假嘛, 都係到咁解囉!

6/2/20

6/2/20.    THU.    WARM

今日又係work from home，我真係9點幾都未起身，係聽到電話響先醒，都真係有公事要處理架！之後上番床hea咗成個鐘先起身，大家齊齊食麥皮做早餐咋，然後就開始捉仲爺做網上功課，做完就比佢去玩！老公就12點幾出咗門口，出去跟健身教練做完運動就返工！我咪hea囉，同仲爺做完功課後就煮午餐，食完就到笨元做，今日精神都好番好多啦！行行企企咁整吓嘢又一日，因為午飯食得太少嘢，所以要食吓tea先掂，好快又晚飯，本來想煮雞飯，掛住睇機放唔切啲雞落去就已經熟了，唯有轉煮法啦，佢地都話好食！之後都係日常清潔沖涼睇電視休息！

5/2/20

5/2/20.   WED.    COLD

今日都係要返工嘅，所以又係一早起身, 返到去都係快手食埋早餐，又要量體溫又要問飯咁，忙咗一大輸先開始做自己嘢，今日都多嘢做架，唔快啲做哂明天要加監架，所以午飯時都喺位快啲做吓嘢，其實而家咁都幾好，冇人入房食飯架啦，唔洗因為嗰啲冇腦衝口而出，出口傷人的同事而唔開心！下午阿姐叫我出去買膠袋，早知嗰時就買埋廁紙啦，因為放工時去超市，啲人痴到搶廁紙，平時的隱世超市都失守咗，真係好灰，好在咼年前好多嘢 我都一早買咗，希望唔會缺貨缺咁耐啦！

4/2/20

4/2/20.   TUE.    COOL**

今日要返工了， 其實返去做吓嘢都要架啦， 咁多日放假都放到夠了， 堆積如山嘅工作仲唔清真係唔掂！7點幾起身返工啦， 只係食咗麥片咋，返到去都冇再買早餐啦，一來真係要做嘢， 二來都係要keep吓啦！全朝又要同人量體溫又要入job cert咁，真係好夠忙了，午飯時間食完就開工清email, 下午都係做啦，真係做到放工架！快手返屋企，見有時間去咗超市買啲嘢，但真係唔覺有清潔用品賣！返到嚟清潔完都有飯食啦，飯後有嫲嫲幫手洗碗，咁我就主力做清潔，之後都係沖涼睇電視，子元今日情況好似好轉咗，粒粒冇咁紅，應該慢慢消腫了！

3/2/20

3/2/20.    MON.    COOL

今日又係全日在家， 老公要返工， 我就在家工作嘛， 都真係有做吓嘢架！朝早瞓到10點多起身， 整早餐比佢地食， 齊齊食麥皮咋， 老公要幫子元搽藥， 我就摺吓衫咁， 仲爺就喺佢間房玩玩具！冇辦法啦要隔離嘛可以點呢！老公今日要返工，12點幾就出咗去， 所以我地又係hea， 2點多先煮丁麵囉， 食完又hea，跟住就預備吓煮晚餐啲嘢，笨元話喉嚨痛所以煮粥比佢食囉， 跟住都係做番清潔嘢啦，已經比平日再努力清潔吓架啦，笨元先搞笑唔想比我搽藥， 要等老公返來幫佢搽！有樣仲搞笑，下午衛生防護中心打嚟，因為子元去咗法國睇完，傳染病要上報所以要打嚟問嘢！明天我就要返工了， 一定忙到顛！

2/2/20

2/2/20     SUN     COLD

今朝子元唔知幾點走咗入嚟話好辛苦, 老公就起身梳洗同佢去法國醫院睇醫生, 我就照瞓到佢地差不多回來, 梳洗埋出門口出去食早餐, 反正都要買嘢架啦, 食完買完就返去啦, 跟住就吽足一日啦! 老公主力照顧子元, 因為佢出過水痘冇咁驚, 我真係好怕呀! 之後老公去咗瞓, 我地就各有各打機, 到餓啦就整嘢食囉, 子元成日都叫痛, 其實見佢咁真係好辛苦, 但係都冇咩幫到佢! hea到晚飯時間真係要有郁啦, 都係日常煮飯等等! 明天又係work from home, 今個星期我返二四, Ivy返一三五, 咁我地兩個夾到其實都冇咩問題! 都好可以照顧到子元, 明天老公返中, 我就要獨力支持架啦!

1/2/20

1/2/20     SAT     COOL

今日係忙碌的一天, 不過就留咗子元喺屋企一日囉! 8點多叫醒仲爺去畫班, 已經遲咗架啦,但上到去竟然一個人都冇,仲爺包場呢! 佢有佢學我就去買嘢, 不過先食咗個早餐, 再睇吓係咪真係冇哂啲消毒用品, 點知連相熟的藥房都唔比留電話了, 買埋菜買埋肉就返畫室接仲仲, 回家後又要清理一餐啦, 然後就同仲爺睇吓網上練習, 又要煮午餐比佢地食,然後再揍仲爺去學音樂, 今日只係打鼓, 但係打一個鐘, 我又冇得去食嘢打發時間, 邊行得咁多地方喎, 真係悶到一個點! 學完就撘巴士返去, 呢程車最好有得瞓, 有耳塞我就可以瞓得好好, 回家後睇吓子元咩情況, 佢話覺得好攰, 沖咗個涼就好啲, 但我都覺得佢係有啲唔妥, 因為背脊多咗好多粒粒, 影咗比老公睇佢又冇嘢, 好在佢冇得再返第3更要回來, 咁就好啦, 一睇佢就話子元出水痘, 咁我就驚啦, 因為我未出過水痘, 今次真係要自我隔離啦, 都唔知係好彩定唔好彩啦, 反正都要隔離, 咁就等全港都隔離時等佢自我隔離吓啦!