28/5/22

28/5/22     SAT.    COOL

晚上都係瞓得唔好，但8點幾醒咗hea陣都起身，本來諗住比老公瞓多陣，但佢真係太慢，本來諗住去球場還番波衫比教練都還唔切，佢地都練完，咁咪直接去Costco入貨倉埋午餐，回家後無聊吓開吓戲睇，老公就煮咗鴨腿湯飯，食完睇歐聯決賽，睇到11點幾，仲爹先肯休息！

27/5/22

 27/5/22.    FRI.    WARM

返埋今日就放term break啦，真係好開心！朝早都早啲食藥噴鼻要做，好彩都趕得切出門口，揍咗仲返去我又快手返學，因為而家Bella 返9:10 ，實在係冇咩時間比我hea！今日慶祝女王jubilee，學校搞咩午飯時間garden party，但其實只係分唔同年級限住佢哋坐咗喺草地上面啲枱度食午飯，都唔明個意義係邊，所以上堂啲時間掉轉晒，搞到大家都冇晒啦！咁今日都算順順利利完成所有工作放工即刻閃人，返到屋企哥哥已經接咗細佬，咁快手搞掂啲嘢就出門口去打籃球，我都冇嘢買，返屋企休息吓啦，我係病人嚟㗎嘛，又唔使湊德德㗎 ！到六點幾七點開始準備煮飯啲嘢，返到嚟八點多開飯，食完都係照樣沖涼休息！

26/5/22

 26/5/22     THU     COOL

今日要返工啦, 唔係冇糧出呀, 鬼叫我窮呀頂硬上, 好在日頭唔算太嚴重, 係有時一咳就要出課室, 唔好嚇親人啦! 今日都係跟Bella, 佢9點多先到, 但又唔想上第一堂, 於是我同老師講聲, 我陪佢企喺出面, 咁又陪佢講咗一個鐘嘢啦! 佢見我病, 冇返兩日, 佢話掛住我呀, 真係估佢唔到, 另外我記得佢明天生日, 佢亦好興奮, 我諗佢對我已經建立咗一份信任, 都幾意外! 到法文堂係考試, 我都冇咩好做坐足成堂, 小息就出去吹吓風囉! 到food technology, 遇咗佢咩都唔做, 因為佢冇帶材料, 咁頭半堂我去放飯唔理啦, 回來都就放lunch都唔郁住啦, 午飯時遇到Bio老師又傾咗陣啦, 下半堂返去終於老師忍唔住又唔知想叫bella去邊, 好在最終只係請佢去對面個房用電腦做poster, 咁我就無人看管吓可以睇吓機囉, 完咗呢堂最後上Art, 要佢地完成上次嗰堂的掃描, 全部人都算好好完成, 準時放工先返屋企, 因為細佬要玩遊樂場, 咁我4點多先過去接佢! 回家後死咗咁喺梳化半睡半醒咗大半個鐘, 6點幾就要去家長會, 好在係視像, 不過都大半個鐘, 我簡直係用埋最後的意志去完成! 咁啱諗住煮飯時舅父仔佢地打嚟, 應該諗住搬番嚟呢頭, 但找租期間要有地方住, 本來佢地之前話嚟住一兩星期我都OK, 但要起碼一個月我又有啲卻步, 始終唔係咁方便, 諗緊試吓問番之我地租嗰間BNB, 睇吓點啦! 老公煮飯我休息, 諗住都係開始食抗生素啦, 點知過咗陣一咳得勁嘔哂, 唉...真失敗, 之後食飯等等都冇哂力量, 因為真係好辛苦! 子元就好乖仔咁幫我洗埋碗, 佢真係暖男嚟, 抵我咁錫佢, 雖然有時係唔爭氣! 今晚都係冇得好瞓又鼻塞又咳架啦, 快啲好番啦我就嚟支持唔住啦

25/5/22

 25/5/22     WED     COLD

今日繼續病假, 因為真係唔多掂, 對眼琴晚係咁流水, 然後封住咗咁, 幾辛苦先打得開! 然後咳呀鼻塞冇停過, 為咗想攞到抗生素, 我都係打多次去GP再約醫生! 揍咗仲仲返學回家抖陣就行過去, 醫生又見到我, 我同佢講咗對眼等等唔舒服, 佢再幫我聽個肺係冇事, 本來都唔會開抗生素, 只係比咗眼藥水, 但佢見我咁唔安心, 或者怕我又嚟搵佢麻煩, 所以最後都開咗抗生素比我, 若果3日後都係冇進展先食, 咁攞好藥咪回家休息囉, 只係去超市買埋嘢咁, 好好休息煮個午餐等, 夠鐘又要接仲仲, 又要揍佢去學結他, 好在老公回來煮飯, 咁又可以hea吓! 明天睇怕都要返工, 因為再唔返就冇錢收架啦, 我莫水呀, 鬼叫你窮呀頂硬上!

24/5/22

 24/5/22.    TUE.    WARM

今日係第一次請病假，因為要去GP睇醫生，但一樣要做晒朝頭早要做嘅嘢，就係送晒佢哋返學，去到GP先去Reception登記咗，跟住就去醫生房門口等，等咗15分鐘左右先有得睇，因為醫學名稱實在太難明，最終醫生用埋Google Translate，佢用英文打，我用中文睇，咁我起碼知自己咩事，原來鼻竇炎，佢淨係開咗噴鼻嘅藥俾我，但就冇開抗生素，落去攞埋藥就返屋企，跟住全日都主力休息吓，除咗要去接細佬放學，但其實真係噴鼻嘅藥，我覺得都唔係好足夠，因為到夜晚，其實係嚴重咗少少，因為隻眼都開始唔舒服，有啲結膜出現，唯有瞓之前再噴一次地，睇吓聽日好唔好啲，我都已經出email請多咗日假，咁嘅狀態冇可能返工，個鼻塞到抖唔到氣，只可以用口，間中仲有啲暈，把聲又勁衰！希望快啲好返啦，真係好辛苦啊！

23/5/22

 23/5/22     MON     WARM

今朝真係好爭札返唔返工, 因為起身時仲係好病, 但請咗假又未必咁快有醫生睇, 再睇吓今日嗰更跟Aishia, 咁就不如照返工啦! 最難係要打電話去GP登記, 8點多已經開始打, 但要出門口都未輪到我, 唯有駁住hand free繼續等, 最終都叫做打到啦, 等醫生打返嚟, 所以我整個上午都戴住head set以防有電話聽唔到! RE堂都OK, 但到Drama時又係失控啦, break後Art堂係代課, 成班喺到顛哂咁, 我都冇能力控制, 加上食咗藥又冇飲咖啡, 我一坐低就中眼瞓! 所以後來都keep住行等自己醒! 午飯時間再打去GP問, 佢都係話叫我等, 咁一路等到放學, 送咗個同學去Reception後就問吓啲同事, 若果真係要請病假時要點做, 再加番場戲啦, 等我明天請假都順利啲! 去到學校接咗仲仲就回家, 呢兩日都冇得揍德仔, 佢地全家應該仲病得西利過我地! 返到屋企又要處理吓公務, 再出去買埋餸, 回來後老公都返嚟接佢地去打波, 我亦等到GP打電話嚟, 佢見我又係同樣症狀, 所以要我明天去GP親身睇, 咁明天唯有真係請假啦! 

22/5/22

 22/5/22.     SUN.    WARM

今日冇咩可以寫，因為一個字「病」！食咗全日藥都仲係好唔舒服，聽日都唔知點返工，但又唔知點請假真係好煩！午飯煮咗啲粥食，到黃昏就睇波，因為今日係英超煞科，真係好刺激峰迴路轉！最終曼城贏咗冠軍，細佬就睇得好開心，係咁喺度F F ！晚飯簡單啲整咗粟米肉粒飯同漢堡就算啦！