14/12/22 WED VERY COLD
今日都係咁返工返學啦, 要踩多咁遠其實都真係好攰! 不過今日遇啱時間返到去啱啱好夠鐘, 我就可以順利返工! 因為學生今日返10點, 所以唔洗趕, 返大房做埋啲嘢可以hea吓, 仲有去整blin blin貼面, 因為今日係咩鬼grown up day, 可以玩化妝嗰啲, 咁好多老師都貼閃閃喺面啦! 本來今日Bella都好地地, 係放飯時佢唔知點解話要去飯堂喎, 等佢個fd買飯再嚟食, 但等唔到佢個FD之餘又唔知等咗佢嗰班條咩友仔, 我又唔知佢地有咩仇口, 佢已經勁啤住佢, 啤咗10分鐘佢突然走咗去, 好在我追得切啫, 好在佢只係走咗去AL1, 本來都冇咩, 到之後HIS佢係咁想KIU頸, 搞到我不停要stop佢, 仲要扭到手指, 可惡! 睇人地唔順眼就去中佢唔係中自己囉, 傻架! 好在最尾嗰堂只係睇戲, 咁佢又好專心睇喎, 放學又冇咩就唔理啦! 快啲返去揍仲回家我仲要再出去買餸呢, 今日子元要踢波, 咁老公回來就揍佢去, 我就收拾一陣再hea吓, 夠鐘先煮飯, 今晚食肉醬意粉咋, 邊食邊睇埋世界盃準決賽, 然後都係沖涼休息啦!
13/12/22. TUE. VERY COLD
今日終於要試吓踩單車湊細佬返學然後再返工，用咗20分鐘左右先至過到去學校，都算合理，因為路面真係好凹凸，所以有啲位仲要行路唔可以踩車，結果8:30就已經返到學校，咁又未開門唯有俾佢喺公園玩一陣，但我就好凍囉！跟住到我返工啦，今日都冇乜嘢特別，只係啲學生今日放早，我哋等佢哋走晒就返去AL1做嘢，然後再準時就放工！接咗細佬就即刻返屋企啦，話晒而家要踩十幾20分鐘先返到去，唔可以喺公園玩咁耐！返到嚟先至醒起我仲要去買餸，又要坐車出去買埋餸，等佢哋兩個去晒踢波，我就開始執咗細佬間房，然後執吓個廳煮埋晚飯，終於可以休息吓！個洗衣機終於回復正常，可以好好咁洗衫啦！
10/12/22 SAT. VERY COLD
今朝七點未夠我就醒咗，但都Hea到八點幾先起身！首先要煮好早餐，補充體力先至可以繼續工作！不過今日真係好凍，周圍都結晒霜，好誇張！食完早餐一邊執嘢一邊等整寬頻嗰個人嚟安裝，大致上都順利，泡個上嚟幫我哋裝埋安博盒子同埋電視機，點知發現洗衣機一轉得高速時就開始逃走，老公用咗好多方法先叫做安頓好佢，希望再用高啲轉數嘅時候唔會有逃走啦！跟住出去食午飯，然後又要車多兩轉物資去新屋，今次除咗剩返嘅紙箱之外仲要執廚房嘢，執完仲要去IKEA買埋需要嘅物資，最後買埋晚餐就返屋企睇英法大戰，我食咗少少嘢就已經飽，可能真係太攰，但都要盡快收拾好廚房物資，所以一邊睇波一邊執，總算叫做收納好晒！咁明天才可以再睇吓有啲乜嘢需要處理，星期一就要預備返工！
9/12/22. FRI. VERY COLD
今日係搬屋嘅日子，所以老公請咗假，但係我依然繼續要返工！老公車兩個豬仔返學，我就自己返工！工作上面都冇咩特別，順利上堂，放break吹水，夠鐘就放工！返到去先放低架滑板車，然後去公園接細佬，因為老公話返嚟車我哋，所以唔使自己搭巴士過去！返到屋企見到啲傢俬消失晒，然後又好亂咁樣，諗起都攰！不過而家先嚟開始，老公先出去我哋出去一齊食啲嘢，然後開始無限輪迴咁樣運輸物資過新屋！不停搬不停執，我都唔知自己啲時間係點樣過，目標今日係切好晒三張床，收拾好廁所可以沖涼瞓覺！最終我哋差不多一點幾先至有得瞓，老公仲要作病，真係好辛苦，不過都值得嘅，因為我有我哋有自己嘅屋企！
8/12/22 THU. VERY COLD -4度
今朝因為個冰櫃漏水，搞到我又要抹地阻住晒啲時間，所以出門口都好趕，好在路程暢順返到學校！今日真係好凍，我已經將最厚嘅嘢着晒上身，都叫做夠暖啦！仲以為今日第一堂Bella唔啱上，佢唔會咁早返，點知我都未做完我應該做嘅嘢佢就返到，不過都唔緊要啦，佢今日上堂都算正常我都可以有時間做吓嘢！放break嘅時候照樣等Letty 佢哋嚟吹水，都係一日裏面最開心嘅時刻！今日12:30放飯，算係唔錯嘅時間，撞啱二姐喺度，我仲快手俾埋份假期申請表佢簽，咁又做多一樣嘢啦！返到去之後冇幾耐又到學生放午飯，我又唔係好想睇漫畫，都冇乜人咁做打機！今日都打咗好耐機，所以係幾輕鬆！最後一堂英文因為去另一個班房上， Bella又係唔肯入去，我點咗名之後就帶佢去圖書館，佢又去睇書我又打機，夠鐘就放學！去接埋細佬就快啲返屋企，又要即刻飛出去買餸煮定嘢，因為今日係子元學校parents evening，要網上見家長，所以我夾到啲時間見一陣家長，又去湊德，照顧完佢，繼續見家長！等老公返嚟之後先快手食咗個飯，本來諗住係要過去清潔執嘢，但因為又要拆床又要pack嘢，所以最終決定唔過去啦，淨係執衫執鞋拆床都整咗幾個鐘！
