23/12/14

23/12/14   TUE   COLD

今日如常咁啦, 七點幾柏仲叫醒我啦, 期間笨元走入嚟話佢賴咗尿, 咁我只係叫佢換褲囉, 起身之後先處理佢D手尾, 8點半前落到樓, 撘到42入去, 不過都冇食早餐就走啦, 返去買咗杯Starbucks因為有現金卷呢! 之後都係做吓自己嘢啦, 跟住又要寫會嗰D議程, 下午都忙架, 好多嘢做, 忙到tea囉! 放工就入青衣, 老公今日突然公司有飯食, 得我一個入去揍佢地, 入到屋見到老爺竟然係到, 咁都冇所謂啦, 都係食飯啫, 不過之後柏仲扭瞓, 矇矇吓咁跌咗幾次, 所以早D返去啦, 笨元沖好涼老公就返啦, 咁我咪沖咗先囉, 快手K.O.埋隻仲就同笨元做埋D功課比佢玩陣, 10點幾就瞓啦! 我地都好早瞓啦!

22/12/14

22/12/14   MON   COLD

今日係冬至, 但老細勁唔識做, 今日嚟開會, 放早架嘛, 開咩鬼會! 朝早柏仲7點幾8點先叫醒我地, 搞到都趕呀, 好在落到樓就有車, 不過都9點多先入到去, 我都冇食早餐就走啦, 返到公司先買早餐食, 仲要快手寫好D日記執埋D相等等, 本來話12點開Annual Dinner會議, 點知老細早一場會12點多開完佢話要去食嘢, 咁就1點先開, 要我地早D食飯喎, 咁即係冇咗食飯個時間囉, 1點就真係開, 一直開到4點, 係開埋另外兩個會囉, 完全係馬拉松式兼快開嗰隻, 老細一講廢話就拉番佢返嚟, 咁先可以快速決定到D嘢, 4點多先走得呀, 先返屋企執一執嘢, 老公入青衣揍番兩個細出嚟, 比子元玩咗陣Lego, 6點多先出門口過阿媽到食飯, 去到柏仲又周圍走啦, 開咗飯佢都係周圍走, 又過嚟食一啖咁, 真係頂佢唔順! 食完飯食吓生果, 柏仲攞住個凍甘周屋走, 阿姨怕鬼咗佢兩隻嘢囉! 睇完愛回家就真係回家啦, 估唔到柏仲咁餓, 等唔切我沖完涼, Daddy餵都照殺, 咁K.O.咗佢就陪子元玩多陣Lego就要佢瞓啦, 因為我搵番我細個盒Lego出嚟比佢玩, 玩到10點半一定要佢瞓啦, 我地都勁攰, 新聞都未睇完就瞓!

<嘈嘈仲!>

 <靚仔笨!>

21/12/14

21/12/14   SUN   COLD

今日係忙碌的一天, 至少子元係忙碌! 七點幾起身搞掂笨元搞掂柏仲, 就揍子元去畫班, 然後買早餐返去同老公一齊食, 又開咗套“紅van”嚟睇, 係幾好睇喎, 但睇哂都唔知佢想講咩嗰吓死! 老公要去接笨元畫班再去心算, 我就揍住柏仲, 佢好快就醒咗, 咪一齊過去接佢地順手交學費食晏囉, 不過而家揍住柏仲真係顛攰, 行又未行得好, 抱佢又唔多肯, 好煩! 之後老公揍笨元去踢波, 我就揍番柏仲回家瞓! 不過佢都唔係好快瞓, 食咗奶玩吓咁, 我放咗佢入房諗住執吓嘢出門口架啦, 點知佢喺房又瞓咗喎, 咁咪唔出去住囉, 摺哂D衫都差不多4點, 佢就醒啦, 好似知道自己要出去玩咁, 期間笨元已經去敏瑩會所嗰到玩咗一轉party, 跟住又入去參加幼稚園同學的party, 大家可以家長們聯誼吓, 小朋友又顛吓咁囉, 連老師都有嚟, 吹吓水咁又個幾兩個鐘, 6點多散場, 去食錢樂園散吓錢咁, 就返嫲嫲到食冬至飯, 都係簡單一餐啫, 食完回家沖涼啦, 我已經攰到暈, 都唔知自己睇咗咩電視打咗咩幾, 總之12點幾老公叫醒我就執埋D手尾入房瞓啦!

<比較滿意的生日照!>

 <敏瑩會所聖誕party!>

 <洋洋生日會, 好亂!>

20/12/14

20/12/14   SAT   COLD

今朝七點幾八點起身啦, 餵咗柏仲我就出門口, 要返工嘛! 放咗一日假, 都好鬼多嘢做, 忙到差不多放工, 老公先揍柏仲過嚟交收, 柏仲可能話出一出嚟又返屋企啦! 返到去諗住煮烏冬, 點知柏仲食得少之餘, 仲要食食吓辨大事, 一身都係, 咪捉佢入去沖埋涼囉, 搞到我餐飯食到一半半咁! 終於搞掂哂, 諗住佢唔食粉就比奶佢啦, 點知呃咗餐奶又唔瞓, 喊到3點半終於喺床自己瞓咗! 我可以做吓家務囉, 邊有得休息! 5點多老公同笨元學完嘢返嚟, 齊齊hea到6點多柏仲醒啦, 就換衫出街, 又去愉景新城, 嗰日都未有機會睇吓衫, 今日再去過, 先去Burger King食咗嘢先, 再行入去啦! 先餵咗柏仲食奶先, 跟住影吓相, 玩吓轉轉咁, 就到我睇吓衫先, 喺間新嘢叫SPAO睇, 買咗件T, 跟住又去咗間Teenine Weenie睇, 其實有條裙好靚, 但原來呢間D嘢勁貴, 條裙要1300蚊呀, 咪得個睇字囉! 行完要比子元睇埋反斗城, 仲要買禮物明天去生日會! 行完就回家洗白白休息啦!

<好可愛咁, 但一抱佢走就喊!>

 <坐番住自己?!>

 <兩兄弟齊齊玩!>

 <又係影得好靚!>

19/12/14

19/12/14   FRI   RAIN

今日子元學校旅行日, 不過連帶之後的活動, 基本上由朝早630到晚上1200我都冇咩停過, 人都顛! 明明已經6點幾起身, 但搞掂柏仲, 掟咗佢比老公帶走入嫲嫲到之後, 仲要同子元換衫自己換衫梳洗等等, 搞到7:45先出到門口, 仲要約咗程生佢地早餐, 但落到樓又落雨又截唔到的士, 足足等咗10分鐘, 喺條街成個顛婆咁, 先找到架的士, 老公入完青衣都早過我出番嚟, 咁佢咪叫咗嘢食先囉, 我地去到就快食完過學校, 早知的士咁難截我就行出去撘小巴算! 叫做入到學校啦, 先去課室找回子元的功課, 然後落番有蓋操場等集合上車囉, 都搞咗大半個鐘先上到旅遊巴, 車上都係休息吓吹吓水啦, 其實都好快到, 不過成班貴人, 招哂D風雨返嚟, 我地已經算好彩, 啟德郵輪碼頭都叫做先進地方, 有瓦遮頭, 辛辛苦苦找到地方落腳就放好家當, 開地攤食嘢, 小朋友食完round 1後就開始玩, 我都唔理得咁多, 總之笨元唔失蹤就OK, 找埋敏瑩過嚟一齊玩吓啦, 同家長老師吹吓水咁, 兩三個鐘都好快過, 又係時候收拾, 若好天就可以喺樓下草地玩, 咁就好好多啦! 2點多上番車返學校, 我地就入青衣接番柏仲去荃灣剪頭髮, 真係快剪咋, 原來柏仲咁怕剪頭髮, 係咁避又大喊大叫, 要捉住佢嚟剪! 買D嘢食就撘地鐵返去啦, 因530又要合唱團, 老公揍笨元出去, 我就執吓嘢先, 到630接佢地嗰轉, 去體育館換得衫嚟剛趕得切去泳池, 撞到子慧媽, 講開陣間我地去吉野家食晚飯, 佢就話佢約咗嵐媽喺稻坊打邊爐, 最終咪齊齊打囉! 8點接咗D細路就各自回家沖好涼出番嚟, 9點開始入得去食, 安頓好叫得嘢嚟都9點幾, 食吓食吓咁11點先走, 柏仲顛咗好耐架啦, 咁夜喎佢仲唔顛呀! 回家後叫笨元換衫刷牙洗面就瞓, 柏仲賴咗屎, 所以要沖個涼食支奶先瞓得, 阿媽永遠係最尾一個沖, 12點我先可以坐吓個梳化抖一抖, 自由一陣就瞓, 點知半夜柏仲可能發惡夢, 顛喊, 我抱都唔要, 陸生明明坐咗起身都唔幫手, 係要柏仲喊一輪佢先話比佢抱, 個衰仔個daddy一抱就唔喊, 下次我一定第一時間交比佢!

<準備出發上車啦!>

 <來張自拍先!>

<好多嘢食呀!>

 <兩個好朋友齊齊chok!>

 <1B大合照!>

 <多謝炮哥的靚相!>

 <大機影係靚好多!>

  <捕捉子元的玩樣!>

 <好心靚表情D啦!>

<剪髮後!>

<柏仲都有剪!>

 <靚靚自拍!>

 <齊齊烚烚吓!>