26/7/15

26/7/15   SUN   HOT

唔知係咪琴日食滯咗, 加上攰, 今朝頭痛到爆, 比柏仲D屎味"供"醒咗, 條友突然整篤吽牙屎出嚟, 一床一身都係, 咁咪一個洗仔一個洗床囉, 搞番掂都瞓唔番, 又要揍子元去畫班, 但出去食早餐都食唔落啦, 個頭痛到想嘔, 所以叫老公揍住柏仲等子元放畫班, 我返屋企瞓, 瞓番3個鐘先boot番著自己咋! 由10點幾開始瞓, 瞓到2點我先捨得起身, 期間佢地返咗嚟, 柏仲都入咗嚟瞓架, 好在佢真係瞓, 冇嘈到我, 大家照瞓囉! 瞓醒起身後都再食頭痛藥呀, 因為仲有活動嘛, hea吓咁到3點幾程生過嚟車我地一齊入青衣, 參與康傑小聚會! 去到先搬吓枱櫈, 小朋友多點時就比佢去遊戲室玩, 子元例牌濕哂架啦, 玩完遊戲室又返嚟再玩啦, 等到老公嚟到就開始set up遊戲, 佢D中英數常定向題幾好玩呀, 荔天3個小寶寶一組, 學術題係好快呀, 但要將答完題目的紙嚟砌一個塔時, 呆哂! 好搞笑囉! 仲要玩捉迷藏, 顛哂咁跑, 唯有用另一方法就係企定一個位等人去捉, 捉到就要比人估, 估中先算贏, 咁就定好多啦! 玩到咁上吓喺時候食嘢啦, 柏仲都食得唔係好多, 條友仔就開心啦, 周圍玩, 不過都痴身架, 有段時間點都唔肯落地要我抱, 不過而家識得用點頭搖頭嚟表達, 已經易估咗好多! 食完嘢佢地又出哂去遊戲室玩, 咁等陸生佢地泵好氣球就叫番佢地入嚟影大合照, 分氣球等等, 真係有得玩有得食有得拎呀! 程生車埋我地返去, 子元瞓鬼咗要我抱喎, 但沖完涼又話唔眼瞓, 頂佢呀! 柏仲就沖完涼飲埋奶就捉佢去瞓, 佢出咗嚟一次架, 比我趕番入去! 夜D到老公病病地啦, 睇嚟都係腸胃唔妥, 但都冇咩幫到佢, 學佢話都係只可靠佢自己!

 

 

 

25/7/15

25/7/15   SAT   RAIN

今日都係如常咁我返工, 老公揍仔, 不過佢係揍細囝囉, 仲仲病病地, 唔想佢走出走入, 於是我帶咗子元去學乒乓球, 夠鐘又揍番佢嚟公司先, 等夠鐘先一齊放工, 約咗入嫲嫲到, 因為嫲嫲包咗雲吞, 入到去已勁食啦, 子元就掛住睇i-pad, 柏仲就周圍搞家囉, 食咗藥之後開始眼瞓, 咁上吓就打暈咗佢, 我地就可以出去睇戲囉! 過到荃灣攞咗飛先, 行一陣等程生佢地嚟, 就買嘢食入場, inside-out真係好好睇, 大人睇會好感人囉, 都有幾次眼濕濕囉! 睇完分頭行事, 老公返去揍柏仲, 我地就去美孚攞位打邊爐, 不過真係食到飽得滯, 同埋好夜啦, 返到去馬上沖好涼捉佢地去瞓, 我地都快瞓, 好攰!

 

24/7/15

24/7/15   FRI   RAIN

今日都係落雨, 都係如常返工, 笨元冇咩事啦, 一早走入嚟搞搞震, 起身梳洗返工啦! 返到去都係做吓自己嘢, 吹吓水! 午飯又要出去買飯, 好在都冇雨啫! 食完飯都係睇吓電視啦, 冇咩特別嘢做, 亦都冇咩mood做, 吹吓水咁食埋tea就放工了, 老公打嚟話仲仲嘔, 叫我先過去小童接咗柏仲, 其實我都炆炆地, 你交比程生睇住先咪得囉, 上到去原來係怕柏仲嘔煩到程生, 所以最終我抱住柏仲去買餸, 老公推架車仔返去洗! 柏仲變咗完全靜態, 坐吓購物車, 買完嘢喺街又嘔多次, 等小巴時好乖咁企定定等, 好難得! 返到屋企完全變咗樹熊, 我又肚疴, 去得廁所再去體育館會合程生時, 兩個細已經換好衫, 叻叻呀! 揍咗佢地去泳池返上去, 邊煮飯, 邊睇吓柏仲點, 最終飯係唔肯食, 咁比支奶照番日常程序佢就肯入房瞓啦! 咁我地就照常煮飯食飯啦, 到9點幾10點佢地走啦, 子元就睇哂套美國隊長先肯瞓, 11點多時入房睇吓柏仲, 知佢實有嘔架啦, 但又冇喊, 幫佢換床時又再嘔, 唯有沖多次涼啦, 換好嘢噯兩吓再瞓番冇事, 我地就12點幾就瞓啦!

23/7/15

23/7/15   THU   RAIN

今日全日出咗去做嘢, 本來朝早要帶笨元去學乒乓, 但佢6點幾起身話又疴又嘔, 由於我瞓得唔好, 真係冇力理佢, 但到7點幾起身時, 佢已經死狗咁, 話打唔到波, 本來覺得佢係玩嘢, 但最終睇佢個樣都堅係唔掂, 不過由於老公要去食早餐, 都要帶埋佢落去, 因為我話我要返工啦嘛, 但佢完全食唔到嘢! 搞掂我就返工啦, 今朝直接過觀塘攞文件, 有巴士可以去到, 又等到車都幾好呀! On schedule做好嘢再過商會啦, 又比我找到嗰架過海巴士, 仲一去到巴士站就有車, 不過車程就差不多一個鐘! 過到去先上商會放低嘢再去食嘢, 食完返上去做嘢, 開完會走得都4點! 期間都係有肚痛, 可能我都有少少腸胃炎, 不過笨元嚴重D, 因為下午開始發燒, 老公帶咗佢去睇醫生, 不停咁瞓! 我返到去老公就出去整電話, 我主力係睇住仲仲囉, 不過睇住佢已經夠皮, 叫佢瞓陣又唔肯, 我又要煮粥比兩位食, 不過始於一對一都好D GE! 笨元瞓到7點幾就醒啦, 好在之前已餵咗柏仲, 但佢都係搶嘢食, 笨元又要餵, 真係玩死! 好在最終都解決咗佢地食嗰part, 到我要食啦, 我條腸都唔多對路, 冇咩胃口, 煮咗個麵食就算, 仲仲又要搶, 食哂又要喊, 唔講以為冇得佢食, 又嗲喎要揹住佢煮! 差不多時間就同仲仲沖涼先, 老公終於返嚟, 柏仲又嗲佢, 真係寫個服字比呢個刷鞋仔! 沖奶佢食埋就K.O.咗佢, 我先再沖涼啦, 終於可以抖吓, 比笨元hea到10點先瞓, 我地就睇埋劇先瞓!

22/7/15

22/7/15   WED   RAIN*

仲以為今日要係咁開會, 但半個鐘叫做搞掂哂D嘢, 都好! 朝早如常被人肉鬧鐘叫醒啦, 搞掂就出門口, 佢地食自己! 返到去都係做自己嘢啦, 午飯又要出去買, 落住雨咁真係幾唔想落去架, 但冇辦法! 食完都係睇吓電視咁啦, 下午準備隨時開會, 不過都等到3點幾4點先開咗嗰半個鐘咁大把! 又可以做自己嘢啦, 放工去小童接笨元, 去之前就買吓嘢咁啦, 揍咗笨元返去就煮飯, 因為嫲嫲唔舒服要返去休息! 返去煮好飯食, 因為有兩個大芒果, 咁就去買布丁粉整囉, 餘下的芒果就齊齊食咗佢, 但笨元就勁貪心一個人搶食咗大半碗, 晚上又咳囉, 唉, 對佢好D都唔得!

21/7/15

21/7/15   TUE   RAIN

今日都係如常咁要揍笨元去乒乓球啦, 柏仲而家朝朝都要爬上嚟大床, 真係幾冇覺好瞓架! 快手出門口啦, 因為落雨又要食埋早餐咁, 都幾忙亂, 9點幾揍到子元返學校, 佢自己就等到10點去上堂, 我就要返工啦! 都係返去hea吓啦, 午飯時都係睇吓電視打吓機咁, 下午都唔算有咩做, 明天開會亦冇咩要準備了, 放工就入青衣, 行過美孚同老公子元一齊撘車入去, 先上奶奶到再一齊落青衣城, 去咗食Mr. Steak, 真係好正! 柏仲都食得好enjoy! 之後去咗坐車仔, 又行吓商場咁先返屋企啦, 返得去都9點囉, 同柏仲沖好涼先餵奶K.O.咗佢, 跟住再到笨元, 然後我先沖涼, 睇吓電視咁12點左右就瞓!