25/1/16

25/1/16   MON   VERY COLD

今日兩個細路都唔洗返, 所以阿媽都要開OT, 8點幾就要過到嚟, 我差不多8點先起身, 所以執得嘢嚟都有D趕, 因為今晚annual dinner, 其實琴晚已經試好哂衫, 但要著哂D嘢上身都要時間! 9點先出到門口, 買埋早餐返去食, 朝早D時間過得好快, 日記都未寫得哂, 可能真係要做番哂D嘢! 忙忙碌碌到午飯, 叫咗米線要自取, 食完暖好多, 睇吓電視咁又開工, 不過因為今日要早過去酒店, 所以4點多就開始執嘢, 5點前過到去睇吓場地影吓相, 打咗一鋪麻雀, 同事怕話老細嚟到見冇人喺門口坐, 就出咗去坐, 不過我都有去唱吓K咁, 襯人少少嘛! 8點多開始了, 我只要簡單地講幾句開場白就收工, 成晚可以坐定定食, 真係好正! 係中途被捉出去唱咗首歌囉, 食到10點多都尾聲, 撘西鐵返去好快, 不過返去覺得間屋好似打完仗咁囉, 真係好亂, 你遇咗隻佬係唔會執屋架囉, 但點解呢, 係佢真係見唔到定覺得唔亂呢! 我都執咗陣先去沖涼, 所以12點先開始坐定定, 打多陣機睇吓電視先瞓呢!

 

24/1/16

24/1/16   SUN   SYPER COLD   2度

今日真係超級凍呀, 但朝早我地都要全家總動員出動出去, 因為子元要畫班, 著住褲都係好凍, 過到長沙灣都好凍, 揍咗佢地上去就去試重開的創發, 不過行返過阿媽嗰邊, 都幾大風呀! 之後再去買包書膠, 再買今晚打邊爐的雲吞, 就去接佢地放啦, 敏瑩今日早走趕下場去小童, 我地都一齊走, 反正子元都畫完, 諗住打的架, 但第一架上咗車先拒戴, 話佢過海架喎, 唯有再截, 好在有架好的, 見我地又大又細又車仔都肯載! 返到去都冇咩特別嘢做, 都係執吓嘢啦, 就係執極都執唔完, 老公哄仲仲瞓, 例牌自己都瞓埋啦, 我同子元執咗個書櫃先可以放到新書, 跟住又要包好哂佢D新書啦, 2點到去買午餐, 都係去大快活買咋, 但勁多人囉! 我地食到咁上吓仲仲都起咗身啦, 咪比埋個飯佢食囉, 但餵GE時候子元又同柏仲玩, 結果食到尾倒瀉咗, 子元比我鬧到隻嘢咁囉, 冇咗D飯我又要整番熱琴日個粥比柏仲食囉! 終於食完開始換衫執嘢, 4點幾出門口過去子慧到, 又打邊爐呀, 打足3日真係第一次! 過到去佢地玩吓先, 老公去咗葵芳買衫, 因為星期二佢要小明上廣州, 冇抵冷的衫呀所以點都要買! 之後都係等埋程生佢地嚟到就開餐啦, 其實7點幾已經食到八成, 咁又收到風明天學校停課, 所以就唔洗咁趕回家, 仲可以玩吓先, 到9點多先開始著衫走, 由於只係唔洗返學但係要返工架, 大人都要休息! 返去沖好涼就K.O.哂兩隻嘢, 我沖好涼都只係hea, 只係找找明天著的衫, 因為Annual Dinner,嘛, 點都要諗諗點! 之後完全唔想摺衫等等, 攰就瞓啦!

23/1/16

23/1/16   SAT   VERY COLD   4度

今日射咗波, 早上順手去睇埋醫生, 襯都未凍得咁緊要, 要快D去睇咗醫生先, 唔係太嚴重備定藥都要, 過到去都冇咩人, 等一陣就有, 睇完攞埋藥就喺九龍城食埋早餐, 諗住反正出咗嚟, 不如去埋旺角買嘢, 我主力想買波鞋, 我嗰對堅係爛, 買完本來想去買snoopy, 但仲未開喎, 唯有返屋企囉! 返去老公就K.O.仲仲, 我就好似好忙咁, 又要睇笨元功課又要做吓家事咁, 到兩點幾嗰兩父子仲瞓緊, 但子元又學乒乓球, 所以我帶咗佢過去, 老公3點幾打比我, 咪買埋嘢返去比佢食囉, 咁就轉更佢去揍子元跟住過AEON陪子元玩卡機, 我就喺屋企揍住仲仲, 摺哂D衫執埋D嘢, 因為約咗今晚去程家打邊爐, 係又打, 哈哈! 6點幾出門口過去, 由於今晚預咗的士走所以都冇帶車仔, 過到去都係細有細玩我地有我地setup, 邊食邊等子慧佢地8點幾過到嚟, 不過今晚我打得冇咁自在啦, 因為柏仲係到搞搞震啦, 食完都比佢地玩咗一輪先走, 但回程就慘啦, 冇的士截要行去撘地鐵, 我們仲要轉小巴返入去, 又係要等車, 大風到呢! 返到去柏仲已沖涼, 食奶就瞓得, 子元就要沖埋先, 我地hea吓都12點幾1點先瞓!

 

 

 

 

22/1/16

22/1/16  FRI   COLD

今日都係如常返學啦, 朝早都係咁揍子元返學啦, 今日都係唔洗趕接婷婷更, 可以晏D先入到康傑, 揍咗仲仲返學就買早餐返工啦, 都係做吓嘢咁啦, 午飯後去咗買餸, 今晚打邊爐仲有嘢未買, 下午要開會, 開到都唔願走, 我就心急如焚, 因為要趕住去接細路嘛, 我仲要返屋企攞埋游水嘢先去接佢地, 好在都唔係遲好多, 我已經極快速返去, 趕得切6點半前去接更, 今日老公放工都遲咗嚟唔切, 最終我同慧婆婆兩大揍住4個小朋友去換衫, 堅係辛苦囉, 我要揹住仲仲同佢兩隻嘢換, 好在佢地自己都換到大部份, 係要執嘢囉! 幾經辛苦揍咗佢地去泳池, 老公就剛到泳池, 可以幫手攞D嘢, 揹住仲仲真係好攞命! 今晚係打邊爐, 不過都要準備, 仲要煮咗嘢比仲仲食咗先, 開餐前打暈佢, 就可以輕輕鬆咁打邊爐! 食到10點幾先執嘢, 我攰到地都冇抺囉! 沖完涼瞓覺!

21/1/16

21/1/16   THU   COLD

今日都係如常咁返學返工啦, 不過今日唔洗趕巴士, 因為婷婷被請假, 佢生唇瘡, 但學校近來又有水痘咁, 所以比較緊張, 我唔洗接更就可以晏D先返去, 唔洗企咁耐某程度上都好喎! 跟住我就買早餐返工啦, 快快手手做D嘢又要出門口, 要過商會開會, 過去食個lunch先, 跟住上去做嘢, 好多嘢寫好多嘢抄架, 老細今日又請病假喎, 叫咗副嗰個開, 其實都快手GE, 但開完佢地又掛住吹水, 搞到我都係4點多先走得, 快手返去幫老公去郵局攞robi, 然後再去買餸, 返到去換好衫都係整餸, 襯阿媽未閃就整咗先, 兩隻細喺出面真係會整到好亂, 佢地破壞力真係好強! 老公7點返到就差不多開得飯, 早點食完就洗碗抺地, 佢就同兩個細沖涼, 不過之後我就愈來愈燥底, 係咁發脾氣, 因為我係咁忙但佢就好似完全唔識自動自覺幫手咁, 總之一見佢打機我就想掟爛部機, 我想佢去望吓屋企有咩係佢可以自動去做, 唔係我叫先識做, 係咪唔叫就唔識食飯唔識疴尿, 好似洗杯袋咁, 係咪可以自己攞嚟洗, 真係要我好SAD啦, 佢先識主動少少去洗奶樽, 為咩呢! 最終我叫做唔算發到好大咁, 自己邊洗杯袋邊喊, 但都係冇人理我, 喊完叫做抒發咗啩, 出番廳都係要做嘢架啦, 咁去沖好涼, 子元又要做埋佢個視藝囉, 搞到10點幾先瞓, 我就邊睇明珠邊睇摺衫啦, 兩機衫都摺到攰, 但又有衫洗緊, 冬天部洗衣機真係停唔到! 睇埋你們被包圍了就瞓啦!