22/2/17

22/2/17   WED   COOL*

今日仲爺又同我一齊彈起身, 又要一齊落去囉! 揍咗佢地返學就返工啦, 開會都開哂我D時間, 呢排真係好充實, 淨係諗排位企位坐位襟花嗰D都有排我煩! 午飯後就hea吓先啦, 下午又再開始貼嗰塊磨貼, 今次分3張貼終於成功! 之後又開始做商會D嘢, 做到放工閃人了, 返去買餸揍笨元, 回家馬上煮飯, 笨元話佢做哂功課, 咁就叫佢做咗視藝, 煮好飯食埋就沖涼, 子元教仲仲做功課, 我就幫子元對功課, 等佢地玩陣都要瞓啦! 點知收到程生電話, 話敏瑩漏咗本英文書喺功課班, 想我地print第三課比佢, 咁咪print囉, 本身話叫程生過嚟攞, 但我話叫子元明早餐比敏瑩咪得囉, 但最終, 程太再send msg嚟話敏瑩怕明早找不到子元, 驚到喊喎, 叫晴晴print! 老公睇到就發火囉, 叫我打比佢話已經print咗, 叫程生過嚟攞, 話而家喊大哂呀, 係咁媽媽叉叉! 最終程生咪過咗嚟攞囉! 我沖完涼摺埋衫都11點幾, 不過今日唔係咁眼瞓, 打吓機先瞓!

21/2/17

21/2/17   TUE   COOL

今日又正常返工返學, 放咗日假真係會積埋好多嘢做囉, 平時都唔覺我有咁多嘢做GE! 不過返到嚟又吹吓水又過吓相咁, 寫埋日記都半日囉! 午飯後都係hea吓咁啦, 下午玩第二樣, 貼玻璃門的磨沙貼, 但最終都係失敗, 明天再試! 下半場時間都係搞吓商會D嘢啦, 得番個幾星期我都諗緊我係咪真係搞得掂! 食埋hea就放工了, 去接番笨元回家煮飯啦, 今晚都好快煮起, 8點前已收碗, 本來想同佢地出去打吓籃球, 點知落雨喎, 咪喺lift口踢吓波算囉, 佢有佢地踢, 我就執吓個廚房, 門後面真係亂到你唔信, 到時裝修其實應該好多嘢要掉, 但膠袋紙袋呢類雞肋又真係好難處理! 8點幾佢地返嚟就沖涼瞓覺, 我仲要對好功課先沖涼摺衫, 已經11點多, 打咗冇兩盤機已經眼瞓!

20/2/17

20/2/17   MON   WARM

今日我地兩個都請咗假, 因為要去睇笨元的話劇表演, 但原來只係做半個鐘, 早知其實唔洗請假, 哈哈! 我都係要一早起身GE, 同仲爺食埋早餐返去泊番好車才過去子元學校, 路過體育館諗起要book camp就要今日問, 竟然真係有位喎, 就book咗先啦, 再找其他人去! 趕到學校趕好開場, 子元係一開始就係佢嘛, 比我預計中佢係多對白, 不過亦做得好好呀, 起碼我覺得好好! 睇完聽埋老師講吓嘢, 先至10點幾, 要買埋午飯比笨元才出街! 去咗旺角係咁行, 睇裝修嘢啦, 但見到唔同的房門都係好貴, 真係好唔抵, 所以老公諗到不如叫佢之前訂板嗰到做埋, 應該唔會好貴, 子元而家隻門都係$200咋嘛, 旺角嗰D吓吓2千幾蚊呀, 10倍喎! 睇到點幾食咗午飯, 再去行咗陣, 幫子元買埋白色波衫就回家hea吓, book咗4點去按腳, 不過今次按得我好痛呢, 我都係適合溫柔D! 接咗子元再接埋嫲嫲同仲爺就一齊出咗葵芳, 因為子元跟葵青隊操, 我地喺嗰頭食飯, 食完就先回家, 我搞掂仲爺仲可以hea吓, 睇吓新劇, 等笨元回來才對功課等等!

 

 

19/2/17

19/2/17   SUN   WARM

今朝要補番畫班, 所以8點多又要起身出門口, 揍咗子元我地就可以去食早餐, 再hea吓買吓嘢咁啦, 夠鐘就去接番笨元就回家溫習, 琴日完全冇做過嘢! 都算快地溫好默書同今個星期教嗰D, 咁2點幾就出門口, 去仲爺同學生日會, 其實唔知係咪有比較, 覺得有D悶同埋好似各有各喺個會所玩咁, 我同D家長又未係好熟, 所以都係食吓嘢睇住佢地玩吓咁囉! 玩到3點幾走啦, 冇咩地方好去就返咗屋企, 勁hea地休息, 老公就同仲仲入房瞓, 到7點幾點都要叫醒佢地出去食飯, 近近地去咗食米線咋, 食完回來執吓嘢咁又要佢地去瞓了, 明天要返學嘛!

 

 

 

 

18/2/17

18/2/17   SAT   WARM

今日又要返工啦, 老公就一早揍咗子元去踢比賽, 本來我都可以瞓晏D, 不過未夠7點聽到有人嗌救命, 原來樓上有人困住咗開唔到門, 真係比佢玩死, 就咁嘈醒咗! 返到公司都係做吓公事做吓自己嘢啦! 放工即閃了, 仲爺喺車瞓咗, 但子元都要返去換番運動衫攞球拍, 所以都要返屋企先, 點知我地攞完嘢落嚟仲爺已經醒咗, 咁就去咗AEON食八方雲集, 然後子元就去打乒乓球, 我地就喺AEON行吓囉, 臨接子元前帶咗仲爺上禮堂, 因為今日荔天新春團拜, 咪上去八吓囉, 不過都係hea咗陣就走! 跟住就返屋企沖個涼換個衫先出街, 入咗沙田睇吓IKEA, 又去食吓嗰間西餐, 其實都冇咩睇得啱, 大致都已經有咗個諗法! 9點多返到去都係沖涼瞓覺啦!

 

17/2/17

17/2/17   FRI   WARM

今日仲仲竟然鬧鐘響都未醒, 可能琴晚溫書真係太攰! 到我返上樓知佢起咗身, 佢仲問我哥哥去咗邊! 揍咗佢返學就返工啦, 今日都有嘢做吓, 又要開吓會咁, 時間好快過! 午飯後又係打吓機啦, 下午時間唔知點解過得慢好多, 已經又吹水又做吓私事架啦, 都過得咁慢! 終於放得工啦, 老公今晚約咗人食飯, 子元又游水, 咁都唔洗煮飯, 諗住煲啖粥算! 返去先摺好D衫才出小童接笨元去泳池, 請迪媽放游水時幫我揍一揍子元過咗馬路自己回家, 咁我就唔洗專登落樓接佢! 同仲爺返上去先煮粥啦, 跟住佢話要聽Mels, 都要開比佢聽, 希望睇多三五七次佢會識啦! 到子元回來就叫佢兩個沖涼, 然後咪食粥囉, 邊睇電視邊食實慢, 最終9點幾先K.O.到仲爺, 再叫笨元快D做功課, 明天又要足球比賽喎, 邊有時間做! 但佢做嗰D數又好深喎, 我答唔掂呀叫佢自己whatsapps問健sir! 老公10點多回來, 沖好涼有糖水食, 食完…勁眼瞓啦, 都冇等老公就瞓覺了!