23/6/17

23/6/17   FRI   HOT

今日笨元包校車返學, 因為只係童樂同歡總綵排, 原來8號車得佢一個要返呢, 揍咗仲爺返學就返工啦, 都係要開吓會, 做吓自己嘢食吓午飯睇吓電視咁啦! 下午老細返咗嚟, 又要做吓嘢咁啦, 放工都閃啦, 行返屋企買吓生果咁, 返去難得可以hea吓, 我都係唔執嘢住啦, 摺哂D衫7點出門口去小童同老公會合, 去睇笨元合唱團表演, 不過要揍住兩隻細, 根本就好難專心睇囉, 老公8點幾又閃咗去踢波啦喎, 等佢地走得就去元氣食壽司, 食完程生仲車我地返去, 咁就唔洗再撘小巴! 返到去同佢地沖完涼就瞓啦, 老公11點幾就返到嚟啦, 睇埋電視就瞓!

 

 

 

 

 

22/6/17

22/6/17   THU   RAIN

今日都係照樣咁返工返學啦, 揍哂佢地咪返工囉, 星期四都冇咩忙又唔洗開會咁, 所以可以做吓自己嘢啦, 午飯又要買飯, 要諗買咩食都係煩架, 簡單D食米線囉, 又平又好食! 午飯後都係睇吓電視, 下午老細冇返, 都可以繼續做自己嘢, 放工去買餸, 今日終於可以煮飯啦, 用屋企餘下的物資去整, 只係再買咗少少嘢啫, 返到去咪煮飯囉, 老公返嚟見到好開心, 有咖哩雞扒飯呢, 食完搞掂哂D嘢就睇一睇仲爺功課, 然後出咗去做運動, 約咗勤少佢地落去踢吓波, 又行到去最遠個球場, 踢完行返番嚟時仲爺又話要玩遊樂場, 所以咁行法已經夠哂攰, 返去沖涼瞓覺!

21/6/17

21/6/17   WED   RAIN

今日都係咁返工返學啦, 買咗個包比仲爺食, 咁我地揍咗佢返學就可以照去食早餐啦! 返到公司都係開吓會咁啦, 今日老公冇返嚟都冇咩搞, 午飯後都係睇吓電視hea吓咁, 下午都係做吓自己嘢, 點知4點幾老細們返哂嚟, 咁都係要做吓嘢咁啦, 不過放工我都係即閃架啦, 因為子元今日話劇加操我要去學校接佢呢! 本來就買餸煮飯, 不過嫲嫲話要去AEON整D嘢, 所以都係出街食, 不過我同子元照返屋企先, 返到去我再執埋個梳妝櫃, 7點多老公先過到嚟接我地, 嫲嫲話去食雞煲, 又去咗潮爆食, 不過今次係食胡椒豬肚, 今日有胃口食啦, 我都係鍾意食呢類雞煲多D! 跟住去AEON confirm取消埋個分期就送嫲嫲回家, 我地返到去都10點, 要快手K.O.埋佢地就沖涼摺衫瞓覺!

 

20/6/17

20/6/17   TUE   RAIN

今日老公放假處理私務, 所以揍咗仲爺返學食埋早餐就車埋我返工, 今日都係做吓自己嘢啦, 唔知係咪臨天光先嚟發夢, 所以瞓得唔好, 今日一日個頭都痛, 午飯後飲咗杯咖啡之後就好少少啦, 今日真係冇咩特別嘢趕, 琴日比老細罰開會開咗一個下午, 今日要休息番一日先得! 放咗工直接返屋企, 因為老公同子元去睇superwoman, 再接埋仲仲先返, 咁我可以返屋企hea吓先, 又唔洗特別煮咩飯, 因為用琴晚的冬瓜湯做湯飯, 再加叉燒咋嘛, 呢兩個星期都係咁簡簡單單架咋! 等佢地返到嚟開飯, 老公食完就去踢波, 咁我又要處理佢地啦, 本來想地都唔抹, 但笨元話今日嚟度尺D人踩過哂, 咁好啦我抺啦! 搞掂埋仲爺沖涼同功課, 9點半就捉佢去瞓覺我就沖涼, 之後都係hea啦, 老公11點幾先返, 等佢沖埋涼又話肚餓, 結果又食咗宵夜先瞓, 可惡!

19/6/17

19/6/17   MON   RAIN+

今朝仲爺冇一早起身, 朝早可以自在D咁整午餐盒比笨元, 揍埋笨元上校車, 返上樓佢地都未起身, 叫佢地起身梳洗出門口啦, 朝早都係咁啦, 揍咗仲爺返學就返工, 朝早都襯機做埋自己嘢先, 又要開吓會咁, 午飯時間只可喺自己位食, 因為大陸組落嚟開會, 真係開咗一個下午, 命都比埋佢, 其實都講唔到咁耐啦, 為講而講咁, 我後來都乘機過返去做嘢閃開吓, 但始終都係要返番去現吓身, 5點多子元打嚟話佢可唔可以自己過嚟我公司, 我先記得佢今日要話劇綵排遲放, 好在佢打一打比我, 如果唔係我都唔記得要去接佢, 咁放工即跑過去學校接佢啦, 去超市買咗D肉返去煮飯, 點知返去不久老公打嚟, 嫲嫲話出去荃灣食喎, 但我D餸再唔煮唔得, 所以快手用真空煲整咗冬瓜粒湯! 佢地嚟到就落樓, 去咗食泰國嘢, 食完老公帶佢地睇玩具先, 等我地食埋就出咗去睇傢俬, 大包話要買櫃, 咁又走咗去買, 搞咗好耐, 9點多先走得, 明明係想佢地掉多D嘢, 點知又要買櫃, 唉…真係唔明! 返到屋企快手K.O.埋佢地我就沖涼休息, 12點多都瞓覺啦!

18/6/17

18/6/17   SUN   RAIN*

今朝仲爺8點先醒, 真係皇恩浩蕩, 咁我地9點前都起身啦, 喺屋企整咗早餐食就開始執嘢, 我主力執咗子元的衣櫃, 清D空位出嚟放仲爺D衫! 襯老公揍咗子元去打鼓, 我就執埋仲爺個衣櫃, 算係又執咗一大堆, 因為再執都冇地方擺, 要等老公攞咁D返公司先掂, 2點幾3點先出去食嘢, 仲要攞埋子元D玩具上去婆婆到, 跟住就出吓街, 今次去九龍灣, 主力要搞煤氣D嘢, 一來要book日子拆個乾衣機落嚟, 二來要訂埋煮食爐, 抽油煙機, 同熱水爐, 跟住都係周圍行吓啦, 行到冇咩好行又未想咁快返去食嘢, 就去咗荷李活廣場行, 咁又比老公買到crocs鞋, 做緊六折兩對, 咪買埋比仲爺囉, 佢成日想要架啦! 跟住返長沙灣食嘢啦, 子元話想食雞煲, 唔知我點解冇咩胃口, 最終食咗唔係好多就好唔舒服, 上咗車抖, 好在有笨元包底冇浪費! 回家後去吓廁所冇咩事啦, 仲仲喺車已經暈咗, 抱住佢沖個涼就瞓! 我地就要睇克勤mini concert, 聽佢講嘢真係幾好笑呢! 沖完涼睇埋妙手先瞓!

 

 

17/6/17

17/6/17   SAT   RAIN

今朝要返工, 不過之前要揍咗子元去試英文堂呢, 返到公司都9點幾, 跟住都係食個早餐做吓自己嘢啦, 然後就要做公事啦, 下星期一又要同大陸組開甚麼Annual Dinner會, 真係好X麻煩! 放工就閃了, 攞埋D紙皮箱落去, 先車咗子元去球場, 落住雨都仲要踢, 仲爺又瞓咗喎, 唯有喺車等佢啦, 等到2點幾, 老公落咗車睇佢地踢成點, 又要攞定衫去比佢換呢, 我同仲爺就喺車囉, 啱啱瞓醒又要扭喎, 等子元搞掂去食午飯啦, 食完就出街, 去咗荃灣睇吓有咩買, 結果又比我地執到床褥做特價, 平咗400幾蚊呢, 6點多又去排吓元氣食咗先, 然後去咗AEON行囉, 8點多就閃了, 返到去都冇咩mood再執嘢住, 明天先算啦!