21/3/18

21/3/18   WED   WARM

今日都係如常咁返工返學啦, 不過我下午要去覆診, 所以朝早都做好啲嘢先! 朝早都係要開會啦, 收到個會議紀錄時, 見到個大咪姐寫自己當日又有出席會議又係佢做紀錄, 嗰吓真係火火地, 忍唔住同啲sales呻咗幾句, 大佬嘢就我做咗你就公開比人睇係你做, 但我又唔得反抗, 因為個從中作梗的就係經理, 要捧佢個下屬, 對住呢D人我真係好厭! 1點閃人啦, 馬上返去睇番琴晚瞓著咗冇睇的電視, 食埋飯再摺埋衫, 執埋嘢就過醫院覆診啦, 今次覆家庭醫學科, 主力睇吓你個血壓計正唔正常, 要你keep住每星期量度, 1年後先覆診, 再做埋心電圖就OK! 早知咁早搞掂我就叫子元撘8號車返嚟喺屋企等我啦! 唔洗我又過阿媽到接佢, 攞住十斤嘢過荃灣剪頭髮! 過到去都係6點多, 等我同子元剪得嚟奶奶都揍住仲爺到啦, 我地齊齊剪哂5個頭, 跟住就去熊貓酒店食泰國嘢, 食完都9點多, 送奶奶返去時佢先發現漏咗電話, 都係仲爺衰啦, 唔睇就放低行人! 好在間餐廳都係熟, 佢地keep起咗, 我地咪過去攞番囉! 搞到10點幾先返到屋企, 仲爺已暈, 唔洗理佢快手沖涼, 趕住11點睇電視嘛, 子元就做運動但冇daddy睇住就做到豬油膏咁, 激死! 睇完我都好攰啦, 好快瞓啫, 但到半夜唔知幾點又比怪喊嘈醒, 以為仲爺要VV, 點知係已經賴咗, 唯有換完褲鋪條毛巾叫佢再瞓先啦!

20/3/18

20/3/18   TUE   WIND

今日仲爺本來係有外出活動, 但就係因為天文台的錯, 令到活動取消咗, 得番觀課其實有啲可惜, 因為不但冇雷冇雨仲天氣晴朗, 激死! 咁老公請咗假架嘛, 好在佢今日仲要見工, 咁都冇浪費今日! 朝早揍咗仲爺返學就食埋早餐, 老公再車我返公司! 都係做吓公事啦, 因為深哥過咗嚟有堆嘢寫, 做好都11點幾, 真係有啲攰! 午飯後又好勤力咁上jobsdb啦, 因為當你喺一個地方失去咗存在價值, 咁就已經係時候離開, 因為你做咩喺人地眼中都係冇做, 或者你做咗GE都會比人抺去, 所以必需離開才能夠找回自己! 雖然有份工打嚟話叫我去見, 但講明要經常飛, 咁講到呢樣真係有難度, 因為我實在放唔低嗰兩隻嘢, 查實我而家係打緊兩份工嘛, 返到屋企……工人姐姐…補習老師…咩都係我, 又點飛得到呀! 所以唯有放棄! 返到屋企同子元講開, 佢都話: 媽媽你唔可以出差架, 如果唔係我地都唔知醒起身返學架! 呢啲咪就係存在感囉, 被人需要真係好重要! 放工入去青衣接仲爺, 老公負責子元踢波, 咁我地就返屋企煮晚餐就算, 一齊去買餸, 仲爺又要幫手攞…一陣咁多囉, 不過都好可愛GE! 返去叫佢自己玩我就煮飯啦, 都差不多8點先食, 老公佢地9點多返到, 又開始忙忙亂亂啦, 趕佢地去沖涼瞓覺等等都夠攰! 沖好涼摺埋衫我攰到電視都睇唔到, 喺梳化瞓咗, 老公叫醒我就刷牙瞓啦!

19/3/18

19/3/18   MON   WARM

今日出門口先見到得番一部lift, 搞到又要跑囉! 跟住又要快手食早餐再去接婷婷啦! 返到公司都算有嘢做, 又要開吓會咁, 之後都係自娛吓, 明知老細唔返架啦, 午飯後睇吓電視咁, 下午都係做吓自己嘢, 執好番份CV, 係時候出去試吓, 世界咁大係咪先! 咁放工前都send咗幾份架啦, 估唔到返到青衣時就已經收到美心電話, 雖則唔係叫我去見, 但問吓資料咁都好呀, 我當係一個練習囉! 食完飯就撘巴士返去, 老公要陪老細食飯, 我就要照顧嗰兩隻嘢啦! 不停地趕佢地做呢樣做嗰樣, 又睇功課又溫習等, K.O.完仲爺可以沖涼, 子元就打機打到10點多先肯瞓! 我之後都係打機, 不過我有摺衫架, 老公差不多12點先返, 但佢之後仲要填煤氣公司份form, 所以我都係瞓先, 已經點幾啦!

18/3/18

18/3/18   SUN   COOL

今朝對腳都仲係又攰又痛架, 所以個人都冇咩精神! 8點幾醒咗又瞓唔番, 咁兩隻豬又醒咗, 不如早啲起身去處理吓佢地, 子元11點又要打鼓! 梳洗完先去K.O.仲爺, 睇功課做功課溫習等等, 都做到10點多啦, 相對地今日佢又好合作叻咗好多咁喎! 做好叫老公起身準備出發, 因為今日子元要出旺角打鼓, 原因係四小龍學開嗰間搞事, 因為miss有堂唔記得咗上, 搞到個學生白行一趟, 跟住個家長就投訴, 咁我覺得呢啲真係好少事, 我地都試過唔記得上堂搞到miss白行啦, 但parkland你唔洗用粗口鬧走miss炒咗佢嘛, 好在miss都安排到去第二到繼續學, 子元幾驚呀! 揍咗子元上去我地就食早餐啦, 都係喺對面餐廳食咋, 跟住又有下場, 子元要去天水圍考奧數, 真係時間剛剛好, 幾經辛苦喺條邨入面找到試場嗰間學校, 跟住會合番老公泊好車就周圍行吓, 同仲爺玩吓等時間過! 夠鐘接番子元就去食嘢, 然後返咗屋企hea, 子元做練習, 仲爺唔肯瞓都係玩, 7點多出門口, 約咗敏瑩去食COCO, 等位都等咗好耐, 食得嚟都9點, 仲要上去玩機, 感覺上真係明天唔洗考試咁喎! 仲爺選擇咗玩機, 到冇得睇玩具又係到扭, 返到去沖完涼比佢玩咗5分鐘啦要瞓, 又扭, 我真係唔會理佢, 一係入房瞓一係出街瞓! 子元做埋啲數就瞓, 我就摺衫都摺咗兩個鐘!

17/3/18

17/3/18   SAT   COOL

大龍鳳的日子到了, 咁啱今日長周都係好事, 好多嘢返嚟先做! 朝早8點多起身, 兩個細梗係已經醒咗啦, 都要快手搞掂出門口, 我要返工啦, 今日活動繁忙, 辛苦老公啦! 返到去都係慢慢對多次啲嘢就開始print! 然後再化妝等等, 買文具時買埋午飯啦, 化埋妝就食埋嘢, 2點幾換埋衫先出發, 3點正啱啱過到去, 開始點吓啲嘢齊埋, 襟花感謝狀座位牌等等都齊全啦, 簡單對佢地做個簡介就可以開工, 其實有班做開的幫手都算好, 因為都唔洗點教就識做好哂! 所以開理事會前我都好輕鬆, 我今年又換好哂衫化埋妝先嚟呢! 開完理事會, 又開始執吓啲手尾, 其實都係處理埋啲抽獎嘢, 因為人多來了, 但變數的嘉賓又要處理, 都係忙忙亂亂架啦, 但望落都OK! 抽好枱獎就開餐, 但廚房又未ready, 老細又係到催! 食個豬又要上去抽獎, 今次要抽50封, 真係讀到幸美喉乾! 終於抽哂呢part, 處理埋佢地敬酒就可以放鬆吓, 去找人social吓! 今年都on time完show, 等老細social完簽埋單就可以準備散, 11點我都閃得啦! 打的返去沖涼執嘢瞓覺!

 

16/3/18

16/3/18   FRI   WARM

今日都係做自己嘢, 朝早仲爺終於冇咁早起身, 可以輕鬆啲落去吹埋水先返, 但又要趕出門口啦, 因為今日都要接婷婷! 揍哂佢地返學食埋早餐啦, 上咗地鐵先發現點解我咁少嘢攞, 原來子元個踢波袋漏咗喺車, 馬上打比老公囉, 佢今日冇機會出到嚟, 所以我要午飯時間入去攞! 朝早做好自己嘢啦, 午飯早少少食咗, 跟住就出去啦! 都話過欣澳好快架啦, 過到去攞埋返嚟都未夠2點! 下午真係做嘢啦, 雖則老細冇返, 但明天啲嘢都真係要仔細睇一次, print咗啲基本嘢先! 放工即閃去畫室接笨元, 換埋鞋快手閃, 因為今日又要去到黃竹坑踢, 我叫咗老公唔好過嚟, 喺屋企整定嘢食等, 咁悶悶地等到佢踢完就返去啦, 喺地鐵條友瞓到隻豬咁, 瞓足咁耐! 返得去都差不多9點半, 要子元沖好涼再食嘢, 但仲仲就已經扭眼瞓, 下次都係要老公同仲爺食咗先, 咁樣都係唔work! 食完都10點多, 要快啲沖埋涼, 老公好醒咁話佢執枱洗嘢, 咁我就可以去沖涼, 趕得切睇J2劇, 跟住執埋明天大龍鳳啲嘢添!