31/5/22 TUE RAIN
話咁快又第二日假期, 放假時間總係過得快! 朝早瞓到8點幾, hea到9點多先起身整早餐, 食完就捉仲爺去做功課先, 做完之後想點都唔理住! 每日各兩頁英數, 都算做得快架啦! 做完又一齊打機, 哥哥又一齊打喎, 半路中途又要煮午餐咁, 之後又接到舅父仔電話又傾咗一輪, 佢地應該又唔會返上嚟呢頭住, 果然有錢是任性, 慢慢諗都仲得! 2點幾時突然天都黑哂咁, 原來唔止落雨, 仲要落冰雹喎, 又密又大粒咁幾誇張! 差不多5點又要去揍德仔啦, 落住雨行返嚟都幾係嘢, 煮咗牛腩飯比佢又唔食, 梗係喺學校party飲飽食醉啦! 等佢爸爸嚟接走佢, 老公沖完涼就煮飯啦, 開住新追的尚食嚟送飯, 睇到9點先去洗碗然後沖涼休息!
30/5/22 MON COLD
第一日Term break, 都係瞓到7點幾8點多, 已經算好好! 起身梳洗整早餐, 食完覆埋個電郵就叫哂兩隻嘢換衫出去, 子元話要去買校服嗰件polo嘛, 咁咪要撘出出去買囉, 原來巴士加咗價呀, 而家要1.65磅, 好在來回點都一個鐘搞掂咁回程先唔洗錢! 返到大街買埋菜呀等等就回家, 先捉仲爺去做功課, 唔做哂唔准食午飯, 結果都搞到點幾先做好, 本來諗住整個pizza食就算, 但原來係唔夠架, 最終大家都要整多個麵食先得! 跟住冇咩做啦就一齊打陣switch, 差不多5點先去接德德, 終於大家都叫做病好, 因為琴日冇煮飯, 咁就用薯仔代替, 用咗薯仔煮豬肉比佢, 最終都食哂! 5點幾佢地出哂去踢波啦, 咁德仔唯有陪我睇劇啦, 等到佢爸爸嚟接咗佢我就準備煮飯, 所以都唔係好遲有得食, 之後都係清潔完沖涼休息!
29/5/22. SUN COOL
基本上今日我都冇出過街，佢老公帶咗佢兩個出去踢波，我就喺屋企休息吓！朝早七點幾就醒咗，食完早餐，佢哋就睇埋電視先出去，估唔知做咩個胃痛，可能未食早餐就食咗粒抗生素！勾到佢哋出晒去我就開始做嘢，吸塵抹地洗衫洗碗，你啲嘢都有排做！仲要打電話俾阿媽傾吓計啦，未夠兩點佢哋都返嚟啦，出去買外賣午餐，都係食Sam Sam雞！跟住都係接下衫睇吓電視咁，琴日來玩我哋敲門嗰幾個細路有測驗，有一次我最出去，佢哋即刻走，但係我都捉唔到佢哋係邊間呀，不過唔緊要，我返去即刻拍佢返CCTV啲片，總有機會俾我知佢哋去邊間屋，我一定話俾阿媽知！之後開咗套戲睇啦，差不多七點叫老公起身煮晚飯，簡簡單單食咖喱飯就算啦！
27/5/22. FRI. WARM
返埋今日就放term break啦，真係好開心！朝早都早啲食藥噴鼻要做，好彩都趕得切出門口，揍咗仲返去我又快手返學，因為而家Bella 返9:10 ，實在係冇咩時間比我hea！今日慶祝女王jubilee，學校搞咩午飯時間garden party，但其實只係分唔同年級限住佢哋坐咗喺草地上面啲枱度食午飯，都唔明個意義係邊，所以上堂啲時間掉轉晒，搞到大家都冇晒啦！咁今日都算順順利利完成所有工作放工即刻閃人，返到屋企哥哥已經接咗細佬，咁快手搞掂啲嘢就出門口去打籃球，我都冇嘢買，返屋企休息吓啦，我係病人嚟㗎嘛，又唔使湊德德㗎 ！到六點幾七點開始準備煮飯啲嘢，返到嚟八點多開飯，食完都係照樣沖涼休息！
26/5/22 THU COOL
今日要返工啦, 唔係冇糧出呀, 鬼叫我窮呀頂硬上, 好在日頭唔算太嚴重, 係有時一咳就要出課室, 唔好嚇親人啦! 今日都係跟Bella, 佢9點多先到, 但又唔想上第一堂, 於是我同老師講聲, 我陪佢企喺出面, 咁又陪佢講咗一個鐘嘢啦! 佢見我病, 冇返兩日, 佢話掛住我呀, 真係估佢唔到, 另外我記得佢明天生日, 佢亦好興奮, 我諗佢對我已經建立咗一份信任, 都幾意外! 到法文堂係考試, 我都冇咩好做坐足成堂, 小息就出去吹吓風囉! 到food technology, 遇咗佢咩都唔做, 因為佢冇帶材料, 咁頭半堂我去放飯唔理啦, 回來都就放lunch都唔郁住啦, 午飯時遇到Bio老師又傾咗陣啦, 下半堂返去終於老師忍唔住又唔知想叫bella去邊, 好在最終只係請佢去對面個房用電腦做poster, 咁我就無人看管吓可以睇吓機囉, 完咗呢堂最後上Art, 要佢地完成上次嗰堂的掃描, 全部人都算好好完成, 準時放工先返屋企, 因為細佬要玩遊樂場, 咁我4點多先過去接佢! 回家後死咗咁喺梳化半睡半醒咗大半個鐘, 6點幾就要去家長會, 好在係視像, 不過都大半個鐘, 我簡直係用埋最後的意志去完成! 咁啱諗住煮飯時舅父仔佢地打嚟, 應該諗住搬番嚟呢頭, 但找租期間要有地方住, 本來佢地之前話嚟住一兩星期我都OK, 但要起碼一個月我又有啲卻步, 始終唔係咁方便, 諗緊試吓問番之我地租嗰間BNB, 睇吓點啦! 老公煮飯我休息, 諗住都係開始食抗生素啦, 點知過咗陣一咳得勁嘔哂, 唉...真失敗, 之後食飯等等都冇哂力量, 因為真係好辛苦! 子元就好乖仔咁幫我洗埋碗, 佢真係暖男嚟, 抵我咁錫佢, 雖然有時係唔爭氣! 今晚都係冇得好瞓又鼻塞又咳架啦, 快啲好番啦我就嚟支持唔住啦
25/5/22 WED COLD
今日繼續病假, 因為真係唔多掂, 對眼琴晚係咁流水, 然後封住咗咁, 幾辛苦先打得開! 然後咳呀鼻塞冇停過, 為咗想攞到抗生素, 我都係打多次去GP再約醫生! 揍咗仲仲返學回家抖陣就行過去, 醫生又見到我, 我同佢講咗對眼等等唔舒服, 佢再幫我聽個肺係冇事, 本來都唔會開抗生素, 只係比咗眼藥水, 但佢見我咁唔安心, 或者怕我又嚟搵佢麻煩, 所以最後都開咗抗生素比我, 若果3日後都係冇進展先食, 咁攞好藥咪回家休息囉, 只係去超市買埋嘢咁, 好好休息煮個午餐等, 夠鐘又要接仲仲, 又要揍佢去學結他, 好在老公回來煮飯, 咁又可以hea吓! 明天睇怕都要返工, 因為再唔返就冇錢收架啦, 我莫水呀, 鬼叫你窮呀頂硬上!
