21/1/14

21/1/14   TUE   COLD

琴晚3點食過, 所以今朝7點幾蕃薯先再嘈, 啱啱又係子元返學起身的時間, 真係分唔到身, 所以真係要調較好蕃薯早奶時間喺6點幾先得! 今日真係要準時出到門口, 因為要喺巴士交收笨元比程生, 我餵完蕃薯就煮早餐同泵奶啦, 然後再做吓公事咁! 中午先同蕃薯沖涼食奶我先至食飯, 然後開始廁所大掃除, 買咗威猛先生返嚟係咁噴就掂, 呢個發明真係一流! 再執吓嘢就休息吓, 等笨元返嚟就同佢沖涼啦, 然後到我都沖個涼, 不過笨元今日喺學校又衰咗, 但好奇怪地係佢叫個同學打佢, 又講唔出原因, 後來林老師打嚟我地再傾, 覺得笨元對自己要求好高, 但又唔係咁易向人表達自己感受, 所以可能我地要做番D嘢, 例如對佢表達多D愛意咁, 因為我地始終對佢好嚴厲, 我都要學吓點平衡吓先得! 晚飯後笨元捉咗我入房喺床到要摟我, 咁就同佢摟咗一輪吹吓水, 或者呢D就係佢想要GE嘢啦! 8點出去睇愛回家時蕃薯喊足咁耐, 但我地都冇理佢, 咁佢喊到攰就會收聲啦, 因為之前理完一輪佢都係喊, 又未夠鐘喎! 睇完劇笨元又要我入番房摟吓傾吓, 點知我地傾到瞓著咗, 9點多老公入嚟救蕃薯時叫埋我起身, 仲有抱番笨元入房瞓, 餵埋蕃薯後, 就佢有佢喊, 我地有我地睇電視, 佢到夜晚就好喊得, 點解呢! 到十一點幾我地都瞓啦, 印象中蕃薯12點幾有嘈過, 但我好似只係拍佢瞓番而冇餵佢添!

20/1/14

20/1/14   MON   COLD

今朝7點幾最尷尬的時間蕃薯就叫食, 好在老公肯起身搞掂笨元出門口, 咁我餵完蕃薯就泵奶煮早餐食, 9點要睇running man, 然後趕住同蕃薯沖埋涼食埋奶落去諗住過數比老公, 點知上星期五入嗰張票可能過咗11點先入, 未有數住, 咁唯有只係去超市囉, 揹住蕃薯佢就好定檔, 瞓吓醒吓, 但返到屋企後放落床就開始唔肯瞓, 抱過佢就唔喊, 但都唔可以成日抱架, 於是食吓奶咀又由得佢喊陣咁, 本來等老公買飯返嚟, 但一路未見佢返, 到點幾佢打返嚟話whatapps咗我買唔到, 因為比老細捉住咗, 好在最終佢都買返嚟比我食, 但撞啱蕃薯食奶時間, 於是佢就餵埋先走, 都算係咁啦! 大家都食飽啦, 蕃薯唔係好願瞓, 放佢落床又喊, 不過都唔會抱佢咁多架啦, 喊吓唔係嘔奶就OK啦! 到5點幾笨元都返嚟啦, 蕃薯亦啱食完奶, 我同笨元沖涼後自己亦沖個涼, 蕃薯就有嫲嫲係咁抱住, 一個下午都冇人理, 終於有人救佢啦! 等老公回來後就開飯啦, 飯後我都係hea吓, 8點幾餵埋奶, 笨元又瞓埋覺我地兩公婆又可以打吓機睇吓電視, 不過我睇睇吓都瞓咗, 至於蕃薯, 又唔記得咗要食11點幾嗰餐, 咁我地照瞓住先啦, 結果佢3點先再嘈, 其實佢可以7個鐘唔食架啦, 只係錯咗時間, 其實佢11點幾食埋, 咁到6點再食咪成功囉, 所以係咪應該叫醒佢食咗先再比佢瞓呢, 若間啱下次試吓先, 係時候學戒夜奶啦!

19/1/14

19/1/14   SUN   COLD

今日都有活動, 就係下午要去反斗城買玩具比善孜! 朝早5點幾餵完再瞓架, 冇叫老公起身餵但由於柏仲嘔奶都係要叫醒佢, 不過唔緊要啦, 之後我地都瞓到差不多10點先起身, 老公煮早餐, 我就搞掂笨元先啦, 食完早餐先泵奶, 計過時間若又出去圖書館又超市, 蕃薯又趕唔切食下餐奶, 所以都係老公留喺屋企, 一邊搞掂笨元做珠心算, 一邊照顧蕃薯, 我去買嘢借書咁! 回來後執拾好就出街了, 撘西鐵去尖咀, 順手睇吓尖沙咀消防局開放日, 不過實在太多人, 都睇唔到D咩, 影咗幾張相去反斗城, 諗住喺KFC食個午餐, 幾辛苦先搶到位坐, 食完就去行反斗城啦, 我都知笨元好耐冇行, 但睇一樣嘢都唔洗睇咁耐嘛, 又要諗買咩比善孜, 終於選到啦, 柏仲又夠鐘食奶, 於是分頭行事我找地方餵奶, 佢帶笨元繼續行, 等我餵完再會合, 本來諗住去city super買嘢食就撘西鐵返去, 但笨元太攰, 撘西鐵老公實抬唔掂, 於是改為行番去撘巴士, 返到屋企都係6點幾, 等蕃薯食咗奶我地就晚餐, 由於笨元跌傷的地方要用大膠布, 迫住要出去買, 順手去759再入吓貨, 食到過年都冇問題! 回家後泵奶沖涼休息, 今日真係夠哂攰, 老公餵咗10點嗰餐後煮咗宵夜, 食埋先再瞓呢!

18/1/14

18/1/14   SAT   COLD

今朝搞掂蕃薯又要搞掂笨元啦, 因為要出去學畫班, 都趕得切先去麥記同敏瑩食早餐, 然後我同老公先再去茶餐廳食, 然後又上阿媽到整嘢, 諗住柏仲7點幾食咗160ml應該11點幾先再食, 所以諗住回家再食, 不過諗住去接笨元時佢又係到喊, 咪餵埋先囉, 老公去接返過嚟, 再去藥房買埋嘢先返屋企! 返到去準備吓佢地又出去, 因為笨元要踢波嘛, 咁我又如常咁照顧蕃薯hea吓啦, 點知老公3點多就打返嚟話笨元跌到唔肯再踢, 咁咪早D約阿kit接佢地再過美孚同我會合再入青衣砌床仔囉, 搞得嚟都6點幾啦, 我地再落青衣城晚飯, 試吓架車仔好唔好用咁啦! 不過蕃薯都扭扭地計搞到我都冇咩心情食, 同埋間白熊咖哩又未真係好食得咁緊要! 由於老公去踢波, 我一揍二咁返屋企, 都算順利啦, 回來後蕃薯又係時間食奶, 笨元喺嫲嫲到已沖咗涼, 只要抺身換衫就得, 咁我都叫做做少樣啦! 不過餵咗蕃薯就要同佢洗傷口換膠布等等! K.O.埋佢我先叫做可以泵埋奶沖個涼, 睇吓電視咁, 蕃薯12點才再食, 餵完老公都未返呢! 不過佢就買咗芝麻糊返嚟一齊食, 都好啦! 食完都瞓啦, 因為唔知幾多點又要再餵!

17/1/14

17/1/14   FRI   COLD

今日係好忙的一天, 朝早搞掂蕃薯就同笨元佢地一齊出門口返學啦, 點都要返去睇吓佢地班小朋友的look, 女仔始終多款好多, 不過笨元呢個look都唔弱! 睇完佢地送埋入去做服務生就吹吓水, 反正又唔洗咁早返公司, 所以咪吹到九點多先再同老公一齊去食早餐, 蕃薯就繼續瞓啦, 食完撘得巴士返公司都係10點多, sales仲喺到, 不過都冇所謂啦, 玩咗陣蕃薯叫食啦, 先同佢換咗片再食奶啦, 係食得好快呀, 不過之後嘔得仲快呢, 仲要一路食一路疴屎, 搞到一背脊都係, 同佢換片時就嘔奶, 總之要你幾狼狽就有幾狼狽啦! 大家夾手夾腳總算搞掂咗, 佢就舒服囉, 難為我要執手尾, 返去仲要洗D屎同奶! 攞埋票因為諗住唔洗咁急用錢就只係入落戶口算冇攞現金, 帶住蕃薯仲要排兩間銀行都幾係嘢, 直接返到屋企嫲嫲已經係到, 差不多時間同蕃薯沖埋涼食奶, 我又快快手食埋午飯就要出門口入青衣, 今日要做產後檢查嘛, 仲要攞番D衫比giv仔, 啱啱好2:30去到健康院, 整吓呢樣整吓嗰樣, 又順手做埋子宮頸檢查, 老公上完大陸返到嚟啱時間就喺健康院會合, 佢嚟到時我都差不多檢完, 落番學校附近食個tea再去排隊接笨元放學, 又同龍校長吹陣水先走, 返到去嫲嫲都煮好飯, 晚飯後就要去合唱團, 我咪照顧番我隻蕃薯囉, 搞掂哂我本來諗住沖涼, 但笨元佢地啱啱返, 又話龍校長一家又上咗嚟佢老爺到, 不過點都沖哂涼先過去搵佢, 終於比龍校長見識到笨元怕羞的一面, 過完龍校長到又邀請佢過嚟參觀, 再吹咗陣水就走啦! 我地搞掂D嘢都瞓覺啦!

16/1/14

16/1/14   THU   COLD

3點食過奶蕃薯6點就再叫, 若返公後可以11點幾食完到6點咁就Prefect, 因為要預番時間叫笨元起身等等工作, 唔係就會趕唔切返工返學架啦! 搞掂佢兩父子我又唔洗出去囉, 咪泵奶再煮早餐食, 然後做公事囉! 跟住就等蕃薯醒再餵奶啦! 不過由於票仲未簽好所以都係冇得返去住, 咁做好公事咪等老公買午飯返嚟食囉, 同蕃薯沖好涼食埋奶就做吓家務又hea吓咁啦, 今日真係冇咩特別, 不過又係要去揍笨元放學咁啦, 奶奶今日都唔過嚟, 老公又有嘢做去揍唔到, 不過試過幾次都冇咩問題啦! 回家後同笨元沖埋涼就比佢自由活動, 今日都評估哂囉! 等老公返嚟買埋嘢食就開餐, 之後都係預備吓笨元明天多元文化日的裝朿, 泵埋奶沖涼就瞓啦!

15/1/14

15/1/ 14   WED   COLD

今朝7點多先知醒, 結果趕唔切揍笨元返學, 不過錯有錯著, 本來諗住返公司攞票但因為老細一路冇返簽唔到票, 冇得攞住! 於是餵完奶咪自己食早餐再做吓公事寫吓日記囉! 等蕃薯醒咗就同佢沖涼食奶, 吹陣水就到我食啦, 仲係咁二周圍執吓屋洗吓衫咁, 咩都唔做好似太hea! 星期三就要打掃, 所以食完飯就打掃埋先, 今日都叫做執過吓屋, 洗廁所要買咗清潔用品先洗得! 餵埋奶諗住瞓, 但笨元5點左右就返到, 於是又要起身同佢沖涼先, 然後再瞓到6點幾蕃薯再叫食就起身, 老公回來就煮飯, 今晚都係菜飯, 不過係炒菜飯, 又真係幾好味喎, 加埋牛仔骨好正! 晚飯後我泵奶, 笨元就好快比老公K.O.咗, 泵完奶沖涼, 之後再餵一餐, 睇埋新聞就瞓啦, 都唔知蕃薯幾點再叫食, 其實佢得個幾月, 都唔好真係要求佢咁快戒到夜奶, 其實佢而家半夜只係一餐真係好比面架啦, 我只要求佢晚上唔好狂喊就得啦!