10/3/14

10/3/14   MON   COLD

今朝又要趕返工返學啦, 明明好早起身架啦, 點解都搞到7點半先餵到柏仲呢, 所以都好趕咁出門口, 日日返學都好似賽跑咁! 揍咗佢返去, 我又返工啦, 今日都好忙呀, 朝早寫好日記啦就開始搞商會D嘢, 話咁快又食飯啦! 去咗買車仔麵咋, 食少D嘛! 下午咪係咁做囉, 真係天昏地暗呀! 幾快又放工呀, 返到去笨元例牌睇緊ipad架啦, 比佢睇埋少少就做功課, 因為今日練舞, 冇得做功課, 但佢就態度衰衰咁係到做, 中文字D筆劃又錯哂咁, 激死我, 好在柏仲就好乖咁疴完屎自己喺床再瞓過, 咁食完飯仲可以打陣機休息吓8點先走! 撘得車返去都8點半, 柏仲又肯繼續瞓喎, 咁我地咪沖涼再K.O.笨元囉, 到11點先叫柏仲起身飲奶, 都飲到衰衰咁, 老公就叫我唔好迫佢住, 等佢醒D再飲, 不過柏仲又係到喊, 我怕佢嘈醒笨元嘛, 唉…激死我啦!!!!!最終飲淨1安多D都冇再比佢飲, 瞓到隻豬咁囉! 咁我地12點前已可以瞓啦!

9/3/14

9/3/14   SUN   COLD

今日應該係休息日, 不過朝早9點子元就要學畫畫, 7點幾又要身了, 叫埋佢兩個起身又再餵奶等等, 佢地先出門口, 我就餵埋柏仲先出發, 由於時間關係去唔切食早餐, 咁就叫老公外賣去阿媽屋企食, 因為又要做維修, 柏仲可以照瞓好嘢, 將佢放咗喺怡張床, 後來send相比佢睇時, 佢係緊張柏仲會回吐喺佢床囉, 幾衰! 搞掂就去接番笨元就直接回家啦, 返到去要做珠心算, 其實都真係幾多, 但唔想佢閒日放學返嚟時迫佢再做, 不如星期日搞掂佢, 但要做就出唔到街啦, 佢初頭都喊架, 但真係冇辦法! 所以餵咗柏仲我就出去還書借書買埋午餐返嚟食, 仲可以睇Running Men! 之後都係hea吓咁啦, 預備定嘢煲粥做晚餐, 老公今晚去踢波嘛! 餵咗柏仲就到我地食, 但柏仲又係咁喊同扭, 好可惡, 好在我地沖涼時佢都收聲, 比笨元睇埋講動物嗰套剛好9點半, 就捉佢去瞓啦, 我就哄吓柏仲囉, 哄極都喊, 於是放番佢喺床算, 等老公返嚟噯咗陣就肯瞓! 等老公食埋飯, 又齊齊食糖水, 休息一陣叫醒埋柏仲食奶, 我地又瞓得啦!

<子元幅畫好搞笑!>

 <柏仲瞓住阿姨張床!>

 <又食手!>

 <超老積!>

8/3/14

8/3/14   SAT   COLD

今日子元學校運動會, 咁多年都係老公帶, 但今年因為要有人揍柏仲, 所以我就請假同笨元去囉, 朝早程生來載我地, 一齊食埋早餐先再集合, 但都等到第3架車先有得上! 去到程生要同程太交收, 幫佢抱住敏婷都幾吃力呀! 之後就上天台開始運動會啦, 安頓好就分兩批家長合作, 先比佢地未有賽事的落去1樓玩小遊戲, 留守的就睇時間call番我地上嚟比賽, 順手攞埋小食包! 上咗去天台就死都唔郁啦, 笨元例牌輸哂架啦, 不過就要等埋敏瑩先走得, 因為敏瑩有兩項入咗決賽呢! 好在冇入埋總決賽, 所以12點幾已走得! 等GE時間就係咁食個小食包入面D嘢囉, 基本上笨元除咗個蛋糕外都食哂架啦! 程生車埋我地去到馬鞍山市中心, 一齊食埋嘢先, 佢地就趕返去長沙灣上堂, 我地就找小巴撘去大埔踢波呢! 估唔到咁易找到架小巴, 仲要架小巴勁快, 10分鐘由馬鞍山去到大埔, 不過笨元瞓咗, 我抱咗半程路, 頂唔住要佢落地啦, 2點多已去到球場都唔知點算, 等到我悶, 笨元有得周圍跑不知幾開心, 到真係開咗場仲要落雨, 我就好慘, 又凍又攰又淋雨, 終於捱到4點半走得, 馬上換衫走人, 好在追到架72, 上咗車勁快齊齊瞓咗, 好在知醒落車, 返到屋企我已經攰到顛, 老公好似仲唔係好明咁, 我淨係想休息咋! 因為約咗7點半同程生佢地食飯, 抖完個人先叫做好番D, 去到長沙灣先諗食咩, 兩家人走咗去打邊爐, 仲好狠咁大家將個小B送咗去托管, 我地攞咗柏仲比婆婆, 佢地攞咗敏婷比姨婆, 食到10點幾先散場呢! 返到屋企馬上K.O.笨元, 沖完涼到柏仲食奶, 到差不多1點, 終於可以瞓啦!

<又嚟左擁右抱!>

< 預備比賽>

 <玩小遊戲!>

 <YEAH...>

 <有姿勢冇實際!>

 <成班嘢掛住食!>

7/3/14

7/3/14   FRI   COLD

今日都係嫲嫲過嚟照顧柏仲, 咁我揍笨元返學啦, 都幾趕架, 但點都趕到啦! 買早餐返公司食啦, 之後都係要做商會D嘢, 呢排都係預咗要OT架啦, 朝早寫好自己嘢就係咁做啦, 好在都唔多人阻住, 可以專心咁做! 午餐後齊齊出咗去惠康買零食, 買完返嚟老細們返咗, 但唔理咁多, 等佢地知道我地呢個鐘係午飯時間係有自由架! 下午就不停做排位D嘢, 做極都唔完, 不過放工都走啦, 下星期再做! 返到去又見到老爺喺到, 奶奶應該約咗佢食飯囉, 我一返到去佢地都走啦, 咁我第一時間梗係捉笨元去做功課先, 因為佢已經食咗烏冬啦! 但柏仲又嘈喎, 真係辛苦到我呢! 點都叫做同佢做好功課啦, 又餵好埋柏仲飲奶, 夠鐘就出去合唱團, 然後就同埋程太去食晚飯啦, 吹吓水咁幾快又9點! 接咗佢地後就玩咗陣先走, 返到去仲仲照瞓, K.O. 咗阿笨抖陣又餵埋柏仲, 收拾埋明天運動會的行裝, 終於可以瞓覺啦!

6/3/14

6/3/14   THU   COLD

今日凍番好多呀, 所以柏仲都冇咁早醒, 我梳洗好換衫啦佢先至醒, 仲要係咁對住你笑, 真係好可愛, 不過就係掛住同佢玩遲咗出門口, 笨元趕唔切同敏瑩一架車, 勁sad囉! 好在經過一輪安慰都好番D心情! 跟住我就返工買早餐啦, 今日寫好日記就邊吹水邊做商會嘢啦, 年年呢個時候我就頭都大埋, 話咁快就食晏, 休息吓下午再戰! 諗編位係最煩GE一樣嘢, 老細仲要好唔識做咁囉, 仲叫我出邀請函比人, 目的只為自己想約人傾生意, 其實點解要咁做呢, 好明顯人地就咁約唔理你, 你先要借商會約人啫, 希望人地唔來啦, 來我都唔知比佢坐邊! 放工後返去睇吓我兩個小寶貝啦, 柏仲今日唔乖啦, 扭計呀, 不過我都要沖好涼搞掂笨元先, 果然唔理柏仲住, 放佢喺床佢扭一陣自己就瞓咗囉, 我就睇笨元功課仲有珠心算, 教到我火火地囉! 食飯前柏仲醒咗, 放咗佢喺梳化坐, 佢又做D古怪動作, 想食手又食唔到, 個動作變咗緊握扶手咁, 好好笑! 我食飽就餵佢啦, 都食得唔多合作架啦但都食哂! 之後玩咗陣又瞓番, 咁就陪吓笨元囉, 見佢無所事事就捉佢早D瞓, 我地入埋D相都仲係10點多咋, 要等到差不多12點先餵奶, 結果我地又喺梳化齊齊瞓咗, 餵埋差距1點就瞓得啦!