22/3/14

22/3/14   SAT   COOL

今日家長日, 我又請假一天啦, 朝早又係晨咁早起身, 搞掂笨元就餵柏仲, 等老公揍佢去畫班我就餵埋柏仲先, 然後喺美孚會合入青衣, 為咗唔洗成日抱住, 所以推車仔, 入到去喺學校樓下茶餐廳食早餐先, 柏仲已經醒咗就抱住佢啦! 食完10點半上到去剛剛好, 不過就要等囉, 足足等咗45分鐘, 即11點3先到我地見, 都遇咗架啦, 早知揍埋笨元放畫班先去都仲得! 其實都冇咩特別嘢講, 因為學習上子元真係不大問題, 只係成日控制唔到自己啫, 我地見緊時柏仲就喺BB車瞓覺, 算佢合作啦! 見完程生佢地已揍咗笨元入嚟, 咁我地又可以返屋企啦, 執齊嘢笨元又要去踢波, 我就同柏仲喺屋企啦, 洗完白白食埋餐奶就瞓咗, 本來諗住放佢喺梳化落吓格先, 我就吸住塵先, 點知我吸完間房出嚟佢已經瞓咗, 好搞笑, 於是等我吸好塵先放佢入房瞓囉, 我就開始做家務等等! 隻豬今日又好好瞓喎, 一路到5點多先醒, 咪同佢玩吓, 最好笑係我放佢坐喺隔離時又唔理佢, 佢就會喊住咁講BB話, 咁見佢咁多嘢講諗住拍下啦, 點知佢見我拍佢又唔出聲, 於是幾次之下我就唔正面拍佢, 反而照樣唔啋佢, 佢就開始喊住叫媽媽, 唔止叫一聲, 係叫咗幾聲, 當佢真係叫媽媽架啦! 估唔到都唔係第一次比人叫媽媽, 都會覺得咁開心! 等老公佢地買埋晚餐返嚟食, 柏仲就自己喺車仔伸展吓啦! 食完嘢沖埋涼比笨元睇吓電視就K.O. 佢啦! 柏仲梗係又比老公K.O.埋啦, 不過12點都係要叫醒佢起身食奶先再有得瞓!

<唔洗一分鐘瞓咗!>

 <笑得好可愛呀!>

 <仲識望鏡頭!>

21/3/14

21/3/14   FRI   COOL
今日嫲嫲過嚟照顧柏仲, 咁我就唔洗咁早巳身啦, 不過柏仲7點幾都醒咗, 同佢換埋片我都要出門口啦, 唔算太趕去到巴士站, 返到去笨元如常跑嚟跑去啦, 送咗佢返學我就返工啦, 今朝返去幫老細搞埋張marco polo卡, 原來佢地係想要張卡嚟儲分第時upgrade, 咁你叫人做嘢都要講清楚架嘛, 咩資料都冇就叫人做嘢, 真係好難架嘛! 下午D老細係到都冇得好自在, 不過下星期佢又飛咗, 自由囉! 放工去埋超市入貨先返屋企, 真係坐都未坐低又要睇笨元功課, 然後要睇佢做哂功課, 8點又去合唱團, 而我地大人們就梗係去食番餐啦, 柏仲扭眼瞓, 好在程太快食完抱住咗佢我先有得食埋下半場! 夠鐘又要去揍番佢地啦, 今日小童群益會報名日, 所以冇得玩! 回家後沖涼後比佢玩到10點半先執嘢瞓, 柏仲就11點叫醒佢食奶啦, 但由於隻豬仔鍾意瞓多過食, 所以係咁喺到扭, 好在最終都食哂先再瞓! 我地就睇埋電視先瞓呢!

20/3/14

20/3/14   THU   WARM

今日我一揍二入青衣, 你話好難又唔係ge, 7點3就開始餵柏仲, 時間都好鬆動, 返到學校柏仲又瞓咗, 但再撘車去嫲嫲到時, 佢又醒咗喎, 好可愛咁對住你笑! 揍埋佢比嫲嫲我再買埋早餐返公司都係9:20, 真係算幾快! 但一朝早就比老細煩住, 佢要搞咩Marco Polo Club喎, 但又咩資料都冇, 咁叫人點找呢, 個網又廢, 打電話去係冇人聽架, 只可以email咗去先, 睇佢覆唔覆囉, 呢D嘢我又唔識喎, 都唔知點問! 搞到食晏都未掂, 唔理住啦, 約咗phoebe食lunch, 不過一個lunch真係唔夠我地吹水架! 下午做吓自己嘢之餘仲要繼續處理埋D亞洲萬里通囉, 最搞笑係老細成日話搵唔到, 但到深夜時就send 張相嚟找到張卡, 咁都係照幫佢問架咋! 放工返青衣啦, 柏仲瞓緊, 就搞掂笨元D功課先啦, 又要做珠心算呢, 食完飯快D返去沖好涼再做啦, 又搞到我發哂火, 成日都係錯嗰D嘢, 因為背錯口訣! 做到差不多10點先搞掂瞓得, 我就試吓大包比我嗰條晚裝裙, 可以出年佢結婚時著喎, 啱就啱, 但可以減多10磅就著得fit D! 到11點叫醒埋柏仲餵奶, 如常咁瞓住食哂再瞓囉, 我地都12點前瞓得啦!

<好好味的柏仲...比姑姐偷影!>

 

19/3/14

19/3/14   WED   WARM

今日奶奶過嚟揍柏仲, 咁我就可以晏D起身, 出門口時已嚟到, 老公仲未起身, 柏仲就已經醒咗, 好可愛咁同你笑, 你話點捨得出門口! 而家早到就早D出門口, 所以都趕得切車, 返到去笨元又IRON MAN上身咁啦, 不過佢唔跑唔嘈就算! 之後咪買早餐返工囉, 琴日仲幫襯緊GE大快活話執就執, 搞到我要行番一條街去買早餐呢! 上午都係做自己嘢囉, 話咁快又放LUNCH, 老細又勁早返咗嚟, 篤眼篤鼻咁啦! 下午想做吓自己嘢都唔得, 因為係咁開會, 煩死! 到四點幾先有番D私人時間, 食埋tea就放工啦, 返到去沖好涼又要睇笨元功課又要理吓柏仲, 都有D分身乏術, 好在奶奶會煮飯, 做少呢樣差好遠! 捉笨元做埋珠心算又開飯啦, 放咗柏仲喺學行車等佢自由活動吓, 放上FB前加咗句叫D人唔好話坐學行車唔好等, 廢事煩! 食完飯就陪住柏仲囉, 一放佢落床就喊, 等嫲嫲返咗屋企先放柏仲落床喊! 喊咗陣都瞓啦, 咁就K.O.埋笨元, 可以自由時間, 到十點幾就餵奶, 但仲仲都係掛住瞓多過食, 食得4安就熟睡中, 都唔迫佢囉!

 

18/3/14

18/3/14   TUE   WARM

今日阿媽過嚟揍柏仲, 因為若老公揍笨元返學就要交比程太揍, 我又唔係咁想成日麻煩人, 所以都係佢等阿媽嚟, 我揍笨元返學! 到我出門口時柏仲仍熟睡中, 冇得玩佢添! 揍咗笨元返學就閃人啦, 返到去食埋早餐就開工, 深哥過咗嚟要搞埋大龍鳳D嘢, 又寫票又寫收據, 手都軟呀! 整得嚟都12點, 終於可以做吓自己嘢, 話咁快又食晏啦, 老細勁早返咗嚟, 你話我地衰都係咁話啦, 馬上返哂去自己位, 擺明唔想見到佢啦, 我1:45落咗去樓下曬相嘛, 佢唔醒水走過嚟之餘仲要問個同事我去咗邊, 好在我同事都醒目, 話我落咗去之餘仲佢未夠2點喎! 講真1-2點係員工私人時間, 唔好以為我地係奴隸先得架! 下午做吓自己嘢吹吓水咁啦, 放工就行返屋企啦, 先同笨元沖咗涼, 再同柏仲沖, 跟住食完飯又要洗碗! 同阿媽講話5月份佢要照顧柏仲兩星期因為奶奶要做手術, 阿媽先講醫生話佢有白內障又係要做手術, 咁就等奶奶做完先到佢做囉, 唉…老人家都係開始多老人病架啦! 終於可以去沖涼啦, 沖完又要同子元溫埋書, 再叫佢洗好茶點袋, 都算做得唔錯, 冇白廢我用心教佢! 玩到9點幾瞓覺, 我地又可以hea吓啦, 十點幾我都喺梳化瞓得好冧啦, 到十二點老公叫醒我起身餵埋仲仲, 不過仲仲都係瞓住飲, 我又唔敢唔餵佢呢餐喎, 搞到一點左右先有得瞓囉!

17/3/14

17/3/14   MON   COOL

今日老公請咗假, 因奶奶要覆診, 柏仲七點幾就醒, 好可愛咁對你笑, 真係唔捨得出門口呀! 由於掛住出門口, 唔記得住笨元冇食早餐, 於是去到巴士站時買咗個包比佢食囉, 但上巴士時唔可以食住架嘛, 佢又係到唔開心, 頂! 買埋早餐返工啦, 寫好日記就hea吓先, 我D腳都仲痛緊, 真係咩都唔想做, 但當然係唔做唔得啦! 午飯後睇吓電視咁, 老細冇返嚟喎, 幾好呀! 做吓公事又做吓私事咁啦, 係老公初頭堅持話晚上出去食有D唔Like啦, 因為柏仲又係食奶時間, 出去食飯我又要抱住佢都好煩架嘛! 最終我提出都係我買餸返嚟煮, 好在佢都冇再堅持, 但就話唔洗碗囉, 原來佢怕洗碗咋嘛, 老實…佢寫完都要執手尾我寧願自己快手洗咗佢囉! 搞掂餐飯又到子元功課, 終於沖完個涼又要K.O.笨元瞓覺同執衫, 到差不多10點先可以正式休息吓! 等柏仲餐奶等到11點幾呢, 柏仲瞓住咁食, 食得4安, 好在佢夠件頭唔洗迫佢食啫, 係浪費D奶囉!

<柏仲試坐學行車!>