9/6/14

9/6/14   MON   HOT**

今朝笨元要去睇醫生, 7點幾起身, 撘得車過去差不多9點有得睇, 不過隻笨都好番好多, 但唔睇又唔係, 咁又洗咗我4百幾蚊! 買埋個starbucks包比佢邊食邊等小巴, call咗車都等咗一輪先有車, 返到去都10點, 交代埋D嘢餵咗佢食藥又仆返工啦! 返到去都係做住自己嘢先, 不過公司氣氛怪怪的, 大家好似太靜咁! 午飯前程生打嚟叫我print埋青衣D小學的form比佢, 本來諗住就咁攞D form比佢就算, 不過佢又話食lunch咪陪一陪佢囉, 去咗Aeon嗰邊食方便佢2點去荔天交表! 下午我就沉醉喺個網上世界啦, 同N咁多個人chat緊, 我都覺得自己勁, 仲可以繼續做公事喎, 咁先勁嘛! 放工返到去兩隻豬仔都瞓咗, 可以沖個涼先, 沖完笨元醒咗, 陪咗佢一陣柏仲都醒埋, 就抱佢坐喺地墊睇子元玩車仔, 隻豬仲就咁睇住就滿足啦喎, 好搞笑! 老公返嚟就食飯啦, 都整咗一粒冰粥比柏仲一齊食, 食得唔錯呀! 食完飯兩父子係到玩踢波, 柏仲坐住喺架學行車度好似想踢埋一份, 最好笑係, 佢睇住爸爸同哥哥踢波佢識笑, 若個波踢咗落佢架車到仲笑得大聲, 真係可愛到爆! 玩到差不多9點就同子元沖涼然後入房同柏仲玩陣就瞓覺啦, 柏仲都瞓埋我地又可以休息! 因為仲要睇笑傲江湖, 邊睇邊餵奶!

8/6/14

8/6/14   SUN   HOT

今朝八點幾比柏仲嘈醒, 局住起身餵佢啦, 跟住叫老公起身煮早餐, 食完嘢諗住出去荃灣訂埋張床, 估唔到就係咁搞到笨元哮喘發, 因為空氣好差, 又冇帶埋支氣喺身喎, 去到荃灣後佢已經係咁咳, 入咗室內後叫做好少少, 但都係keep住咳, 比佢去睇咗玩具先, 我又買咗少少餅比柏仲, 跟住就去訂床比訂金啦, 度咗尺先有得做圖, 食埋嘢就回家了, 笨元一路勁咳, 聞咗氣叫做好少少, 但都係冇太大幫助, 咁GE勢又要去進貢! 食咗上次D藥先, 見步行步, 睇完running men佢地三條友瞓哂, 我又係到做家務囉, 仲預備咗今晚煲粥, 因為老公去踢波唔會食好多嘢, 笨元咁GE樣又唔會食好多, 所以再加個意粉就算! 煮起個粥柏仲醒咗就比佢試吓, 先比一湯匙佢試, 條友勁興奮chok哂身咁, 慢慢掌握到餵佢的方法後, 好快食哂嗰一匙, 一見我行開, 又喊又追入嚟廚房喎, 咪再加一匙比佢試囉, 就係咁食咗三湯匙, 到第四匙開始慢啦, 不過都已經好好! 到我地食埋就補番4安奶比佢, 食完竟然仲喊食, 好少有, 但唔敢比咁多佢! 扭到9點幾先瞓得著, 再K.O.埋笨元我就可以休息了, 老公仲慘, 去到球場換哂衫先話紅雨冇得踢要回來, 12點幾餵埋奶再睇埋套錢的化身先瞓, 笨元瞓入咗眼就冇咩啦, 但都係要去睇吓醫生先安樂!

7/6/14

7/6/14   SAT   HOT

星期六都係如常咁揍笨元去畫班, 然後返工啦, 買埋粥返去食, 不一會已收到Johnson消息, 敏瑩派到第18志願, 嗰吓我都勁sad, 衰D咁講係派咗全區最最最差嗰間 – 深街! 真係派深官都仲好D, 起碼間校舍都係似樣又近, 派到深街…真係想講句“仆”街! 於是佢要上嚟print嘢同填表然後去交, 咁同事們又冇咩所謂, 都係幫一幫人啫, 不過真係替佢地心煩, 叩唔到門都幾大穫! 真係只可以講句願主保佑! 12點幾老公帶埋兩隻馬騮上嚟, 柏仲又比人輪啦, 咁佢又好玩得, 冇咩所謂啦! 夠鐘就落去食KFC囉, 食完老公揍笨元去踢波我就帶柏仲返去, 隻豬仔又小睡片刻返去先開餐, 想同佢試吓食固體都唔掂, 太餓了唔願試, 沖支7安比佢轉頭就食哂! 玩到3點幾先肯瞓, 咁我就做埋D家務囉, 老公今晚踢波, 加上敏瑩佢地唔同我地食, 所以笨元返來後只係叫pizza食! 不過我就冇咩mood囉, 因為再比豬仲試糊仔佢都係唔肯食, 之後比奶佢都扭架, 不過老公同佢吹陣水佢又肯食番, 唉…我都係冇咩EQ! 搞掂我地就食嘢先, 然後同兩隻豬沖涼, 跟住老公就出咗去踢波, 柏仲八點幾瞓咗, 我就同笨元一齊睇電視到9:30就哄佢瞓, 我自己都喺梳化瞓咗, 老公打返嚟問我食唔食嘢都唔知! 最終佢都買咗嘢返嚟一齊食, hea吓餵埋餐奶先再瞓!

<唔食糊仔呀啦, 唔比奶你食!>

 <我諗佢D牙真係好痕!>

6/6/14

6/6/14  FRI   HOT

今日好在早咗出門口, 因為班車勁早, 個個著哂summer look返去, 要佢地影吓相咁啦! 買早餐返工啦, 老細今日又唔浦頭, 真係好! 朝早都係做吓自己嘢, 午飯後都係睇吓電視, 仲有講吓做運動啦, 我個肚皮位塊肌肉愈來愈突, 唔掂! 下午都係做吓自己嘢啦, 四點幾時老公打嚟話揍唔到笨元, 搞到我又要早走入去揍, 回家後馬上又要催促佢做功課, 去合唱團之前叫做做淨少少! 返到屋企時柏仲瞓咗, 可以唔洗理佢住, 到佢醒咗就比咗D餅佢食, 今次終於食得好好啦, 食哂仲嫌唔夠係到喊喎! 揍咗去合唱團我地就晚飯啦, 都係討論吓明天派位啦, 夠鐘就去接番佢地, 玩到九點幾先走, 回家後又要沖涼又要食藥, 子元仲要做埋嗰少少功課, 但做到勁唔願咁, 好乞人憎, 加埋冇得比佢玩就要瞓咪仲黑面囉! 至於柏仲等唔切我沖涼出嚟先食奶, 要daddy餵, 食飽就瞓啦! 我地就睇埋笑傲先瞓!

<食呀食...比人發現咗!>

 <冇你咁好氣! 食咗先算!>

5/6/14

5/6/14   THU   VERY HOT

今日嫲嫲屋企冇水, 所以佢過嚟揍柏仲, 老公又話要早出去, 所以未夠8點嫲嫲就過到嚟, 我地喺樓下撞見呢! 今日都算早出到門口, 所以買得切麵包撘得切巴士! 揍咗佢返學我又趕得切巴士, 買埋早餐返公司, 冇咩嘢做, 老細又全日消失冇浦過頭, 最鐘意就係咁, 下個月起佢仲消失兩個月, 超開心! 上午都係做吓自己嘢啦, 上吓網咁, 午飯後睇吓電視打吓機無聊吓, 下午又係做吓嘢時又hea吓啦! Tea有人建議食starbucks, 食阿公GE冇咩所謂啦, 不過嚟緊真係要做番吓運動, 又肥番好多, 晚上真係唔可以食飯! 放工行返去, 又要入票又要買嘢咁, 不過好在行返去咋, 因為美孚橋底炒車, 基本上係塞哂! 返到去熱到漏水咁, 要馬上沖好涼先可以理柏仲, 大包上嚟食飯, 食完又催奶奶走, 本來我洗碗都可以, 但因為太多嘢忙緊, 我只係覺得自己不停喺屋入面走嚟走去! 終於搞掂時已八點幾, 柏仲又唔多肯瞓, 晏咗一輪先肯, 放番落床都冇再嘈, 我都頂唔住喺梳化瞓咗, 不過瞓之前做咗陣situp 因為肚皮嗰塊肌肉真係被撐開得好緊要, 唔係肥而係突咗出嚟, 唔怪得縮極個肚皮都縮唔到! 睇嚟真係要提番起個心肝先得! 瞓到十點幾十一點老公叫醒我要餵仲啦, 換咗新奶咀開頭係有D漏, 不過見佢飲得舒服咗喎, 勁快飲完瞓過, 我都要瞓啦!

<子元咁快就甩第6隻牙!>