5/8/14

5/8/14   TUE   HOT*

今日又係要揍子元柏仲入青衣, 朝早七點幾起身啦, 柏仲今日算係咁, 7點左右先開始叫, 笨元醒埋, 就話要抱柏仲落地下陪佢玩, 我可以hea到7點半先起身, 上咗巴士後柏仲都不是太嘈, 原來又開始眼瞓, 未落車已瞓著咗, 子元好乖仔咁連袋都幫我攞埋, 交低佢兩個我都閃了, 買埋早餐返到去都係hea啦, 不過又唔多心安咁找找Amanda, 佢FD話或者有人退房先攞到房, 要今晚先知, 但都係唔肯定的答案, 於是我都係決定自己BOOK! 上明星落咗order啦, 打去追吓有冇房, 11-12就冇但12-13之後都有, 不過都係要等佢打嚟先知喺點, 咁咪照等囉, 都冇咩可以做! 放工返到去全部都未返, 咁就摺咗柏仲D衫, 執咗游水D嘢, 不久就收到明星打嚟, 原來暑假D房搶到貴哂, 悅榕庄要六千幾蚊, 連大倉都要三四千, 真係顛架, 冇法啦唯有唔去住囉, 叫Amanda幫我問9月星期六日的房, 咁下星期就請日假去玩吓囉, 反正嫲嫲去覆診我地都要請假架啦! 夠鐘帶笨元去游水啦, 今日都游得好落力, 所以返到屋企都好餓, 老公叫外賣嘛, 又齊齊食咗好多飯, 真失敗! 10點笨元入房瞓覺, 柏仲一早七點幾就瞓咗, 原來佢喺嫲嫲到冇咩瞓, 所以一直都冇起身話食奶, 我都好攰, 連主君都唔知醒睇, 老公叫過我都唔醒! 到12點先醒到, 咁就瞓咗兩個鐘, 同柏仲換片食奶, 食完佢又搵番個daddy噯噯瞓覺, 我地hea多陣都瞓啦!

4/8/14

4/8/14   MON   HOT

今日我要揍兩隻嘢入去嫲嫲到, 柏仲都算早醒咗, 不過子元應該好攰, 點都唔醒, 真係要踢醒佢咁滯! 其實都遲咗出門口架, 但一落到去就有車, 真係好好彩! 過到去食咗一陣嘢, 隻豬仲已經開始嘈, 扭眼瞓呢, 食完早餐我就返工啦, 不過一返到去就肚痛, 唔知關唔關茶水站D嘢事! 朝早都係執番D相同寫日記囉, 午飯要去買飯呀, 下午就整理吓兩隻豬仔D相, 燒吓碟咁, 放工後就去青衣城, 因為嫲嫲冇買餸, 所以出去食上海嘢, 柏仲唔肯食奶住, 嚟到都唔肯食, 於是咪食住銀絲卷先, 食到咁上吓想飲水, 咪比奶佢飲囉, 叫咗飲咗5安啦! 跟住又繼續食包, 飽咗啦就開大, 真係比佢激死, 咪去同佢換片囉, 之後都好目標為本咁, 嫲嫲去買memory card, 我去睇咗陣衫, 最後去trendy land買埋禮物比凱淇生日會用就回家了, 撘地鐵去到荔景出閘時竟然見到愛回家個嚴律師拍緊嘢, 梗係去集吓郵啦, 哈哈! 返到屋企我同柏仲先沖好涼, 然後老公帶子元去球場練波, 我就執屋抺地, 佢兩父子真係驚做我唔死架, 超級冇手尾, 希望柏仲大D唔好係咁, 唔係真係執死我! 抺地時柏仲就係咁望住我, 佢好似知我忙咁唔嘈梗, 只要喺佢視線範圍內就OK, 一入咗房佢見唔到就會嘈! 拖好哂地柏仲就可以落地玩吓, 佢唔係周圍爬就嘈之巴閉, 同佢玩顛嘢就笑! 到九點幾頂唔住想瞓, 所以餵支奶比佢就暈咗, 可以自由啦, 不久佢兩父子就返, 沖埋涼抖陣, 子元10點幾都瞓, 我地就睇埋主君同big boy就瞓!

<兩個齊齊渣車車!>

 <細路...渣車要著鞋架喎!>

 <坐呢架柏仲要做乘客!>

 <不過走去搶嚟渣!>

<集郵...>

<老公裝飾埋另一邊牆!> 

 <好有feature wall feel!>

3/8/14

3/8/14   SUN   HOT

今日主要都係做工程啦, 瞓到八點幾不得不起身, 隻豬仲已經嘈咗好耐, 餵咗奶就到我地出去食早餐, 之後老公去咗銀行, 我就揍住兩隻返屋企, 柏仲都係未肯瞓, 要等daddy返嚟噯佢, 佢瞓咗老公可以開工油房, 遇佢油足一日架啦, 我地冇咩做可以休息吓, 柏仲瞓到12點幾, 醒咗好不安咁原來要食奶, 比佢食咗奶同食咗3湯匙通粉, 就滿足哂啦! 2點左右過咗去室內運動場嗰邊, 因為全民運動日有活動, 咪去八吓囉, 原來係分咗八九個區域比人去玩, 儲夠4個印可以換禮物, 但唔係簡單攤位遊戲, 真係做運動嗰D, 於是子元玩咗親子game, 但我抱住柏仲唔玩得, 工作人員代我玩! 之後去咗打X-BOX, 柏仲開始扭眼瞓, 搞到我都冇得玩! 到排隊玩呼拉圈時, 有政府人員嚟, 於是上一組玩耐咗, 搞到我地都等咗好耐, 我又冇得玩, 因為柏仲噯極都瞓唔到, 要抱住嚟瞓, 但我冇帶揹帶只有車仔, 一放落車佢就喊, 煩死攰死! 終於玩完集埋個印就去跳繩, 排咗一輪唔對路, 再去問先知若唔係玩4點嗰輪, 係可以就咁走去跳幾吓, 頂…又冇指示又冇講鬼知咩, 咁咪比笨元跳幾吓可以集埋個印走人囉! 去買埋魚蛋燒賣嗰D做午餐返去一齊食, 柏仲就食淨腸粉, 食到幾可愛呀! 之後老公繼續開工, 比柏仲飲埋5點支奶就打暈佢, 我同子元就係到諗吓點整房間個相架設計, 不過佢都係未識幫手, 等老公搞掂都七點幾, 出去大家樂食就算, 柏仲又係周圍引人玩啦, 撩撩吓隔離枱先知又係荔天同學仔, 咁又識到啦! 回家後清理隻臭屎仲, 等佢兩個瞓哂終於有得休息! 但就睇埋錢的化身先瞓, 咁又兩點!

<補番柏仲8月生日蛋糕>  

 <玩緊遊戲呢!>

 <呆等哥哥玩緊!>

 <難民營....>

 <老公的傑作!>

2/8/14

2/8/14   SAT   HOT

今朝老公睇住柏仲, 我揍子元去畫班然後返工, 到12點幾老公揍子元去足球選拔, 柏仲就要揍嚟公司先啦, 估唔到冇上嚟1個月左右啫, 竟然識得怕生寶喎, 一唔係我抱就喊, 死火未! 就算有時呃到吓佢, 一望到我又喊, 真係估佢唔到, 平時喺街成引人玩, 呢D時候就喊, 吹漲! 1點到就走啦, 上到巴士已經瞓咗, 返到屋企放落床都肯瞓, 咁我第一時間煮嘢食先啦, 好在都喺我食完後有得抖吓佢先至醒, 餵咗奶比佢食之後整咗D通粉, 都食咗2湯匙喎, 算唔錯! 三四點阿媽過咗嚟, 都係好事, 因為老公4點幾返嚟後就開工整子元個房, 有阿媽睇住柏仲, 有時需要我幫手都幫到手, 到6點幾阿媽閃啦, 期間奶奶都過過嚟, 不過都係放低吓嘢啫! 我就拆埋子元張床, 只留番床墊比佢喺我地房打地鋪做難民先, 等老公做埋批當等, 差不多8點先出門口去食晚飯, 笨元話想食咖哩飯, 所以咪去AEON囉, 之後仲睇埋玩具, 但到我地想行吓超市時佢就話超眼瞓要返屋企, 講到咁都要返架啦, 咁返到去咪快手沖個涼囉, 子元話有得同我地同房瞓都好開心喎, 不過我唔係好開心, 因為佢半夜係到喊, 柏仲又喊吓, 佢地好似唔會互相阻到大家瞓, 係會嘈醒我架咋, 柏仲食埋奶都瞓啦, 係我冇覺好瞓!

<食哂飯啦, 食餅算啦!>

1/8/14

1/8/14   FRI   HOT

今日要揍哂兩隻豬仔入去嫲嫲到, 因為今晚要燒街衣, 所以都早咗少少起身搞掂佢兩個, 柏仲都好早就嘈啦, 希望佢快D學識醒咗都可以自己喺床玩這回事啦! 佢地8點幾就出門口啦, 我唔洗咁早, 慢慢執埋嘢先走囉! 買埋早餐返公司, 都是hea 過, 找吓旅行的資料, 都係擔心澳門之旅啦, 始終未收到房紙嘛, 所以咩都唔book得住! 午飯後都係睇吓電視咁啦, 下午老細搖控處理佢月尾飛新加坡D嘢啦, 都半百啦, 做個決定都唔得, 咩都總監總監, 同細路仔咩都叫阿媽有咩分別, 幫佢做嘢真係好煩! 最後差不多放工先叫做定到落嚟! 放工時見個天黑哂, 唔理咁多帶埋把縮骨遮走人, 果然入到青衣後勁大雨, 行一小段路都濕哂, 返到去大家都在了, 奶奶仲煮緊豐富晚餐, 好在佢地發現就落雨前已燒好街衣, 咁食完飯就可以走了, 8點又要合唱團啦, 揍咗子元過去我地就做吓嘢, 過數呀買嘢呀咁, 去完759後發現開始行雷, 於是老公先帶柏仲返去, 我就去等子元放學再撘小巴回家, 沖好涼佢就睇電視, 柏仲都餓要食奶, 老公搞掂埋, 不過食咗奶又未願瞓, 加上我地又想搬咗個衣櫃入房先, 於是都冇比柏仲瞓住, 等我地搬好嘢先瞓, 子元就10點半要瞓啦, 唔好同我爭電視睇主君!