22/9/14

22/9/14   MON   HOT

今朝柏仲又一早起身啦, 想唔揍埋佢落樓都唔得, 拖笨元起身搞掂出門口啦, 落到去剛剛好校巴到咋, 返上樓搞掂埋柏仲就出門口啦, 揍咗柏仲比嫲嫲就返工啦, 朝早D老細返哂嚟, 好在食晏前已走, 咁都冇咁慘! 午飯後睇吓VS嵐啦, 下午都係做吓自己嘢, 計劃吓10月個餐單, 食埋個tea就放工, 返到去阿媽到快手叫笨元執嘢行, 仲要買埋個瓦煲先去撘車, 又等咗勁耐先有車喎, 結果6:50先返得到屋企, 剛沖好涼老公就返, 柏仲瞓咗, 煮好飯食埋佢先醒, 咁就餵佢食咗蘿蔔同節瓜咋, 洗埋碗8:45先開始同笨元睇功課溫習, 好在10點前已瞓到, 餵埋柏仲交咗比老公K.O.埋佢瞓, 終於抖得, 但睇急診睇到11點已頂唔住瞓咗!

21/9/14

21/9/14   SUN   HOT**

今日都忙忙地呀, 節目豐富架! 柏仲如常7點就起身, 真係夠哂準時, 咁我地都8點左右起身GE, 子元放假係唔洗人叫就起身架啦, 梳洗完餵埋柏仲就執吓嘢咁, 9點幾出去食早餐然後撘巴士入青衣, 因為要參加Tiger生日會, 原來10:45先開始, 係我地早咗到, 終於入得啦, 子元又失控, 亂衝亂撞, 咪要佢企埋一邊先囉, 初頭唔肯架, 最終咪又係要就範, 為咩呢! 入到場就走哂去玩架啦, 柏仲都走咗去玩, 陪佢一輪就交更比daddy啦, 然後就女人們吹吓水, 之後開始食嘢又要捉佢地返出嚟食嘢, 之後又係玩, 到切蛋糕時又要捉番佢地出嚟, 之後唔比佢再玩啦因為要去踢波, 柏仲喺切蛋糕前已瞓咗, 所以冇佢份影相, 老公揍子元去踢波, 我都free唔得幾耐柏仲就醒咗啦, 真係要自己搞佢, 其實都12點幾, 但諗住痴程生車返去, 所以未走住! 咁咪比罐飯仔柏仲食住先囉, 佢又肯食喎, 都好! 咁大家吹吓水咁過咗幾個鐘啦, 我地班又有新力軍, 又有媽媽有咗, 我地班真係算好生得! 等程生佢地走啦, 敏瑩又要去換popcorn, 我見時間唔早就餵柏仲食埋嗰罐飯啦, 叫做填飽咗個肚先, 返到去就可以食埋支奶, 仲食咗條蕉, 仲未肯疴屎, 想哄佢瞓又未瞓, 到子元踢完波返嚟差不多啦, K.O.咗柏仲就同子元溫書, 搞掂哂柏仲都未醒, 咪玩吓lego咁囉, 柏仲3點幾瞓到6點幾, 起身咪食奶囉, 等老公返到嚟美孚就出去食飯, 因為要去惠康買嘢, 本來想去食元氣, 點知多人到爆, 最終大家樂算啦, 食完買埋嘢行返去, 沖涼食奶瞓覺, 子元就執好埋嘢可以瞓! 我地就按吓香薰咁先瞓, 超正的呀, 若有錢我實去澳門時都幫襯吓!

<一早去tiger生日會>

 <要隻齊人影相唔易於>

 <玩到咁上吓要去踢波!>

 <柏仲有得玩最開心!>

 <來個自拍先!>

 <影得好靚, 包場咁!>

20/9/14

20/9/14   SAT   HOT

今日唔洗揍笨元去畫班, 所以可以晏D出門口, 但柏仲完全冇諗住放過我, 7點準時就醒, 我想瞓晏D都唔得, 拖到8點先起身, 子元都醒咗, 梳洗好咪出門口囉, 返到去都係hea吓架咋, 12點幾老公過嚟就交收番隻豬仲, 今日佢都好好心情, 玩完一輪仲好精神, 返到屋企先比支奶佢先, 我煮開通粉就比通粉佢食, 仲食咗3/4條蕉, 把口真係未停過, 2點幾3點先肯瞓, 子元踢完波又再去上番畫班, 老公揍咗佢過去就回來先, 柏仲剛剛醒咗, 咪同daddy玩吓囉, 我就執埋嘢準備一齊出去接子元, 因為出去買新波boot, 舊呢對頂腳呢! 然後去咗睇lego, 嫲嫲認購咗買一份比佢, 所以就算佢個CITY系列冇貨, 都買咗盒batman, 好滿足咁回程啦, 約咗敏瑩佢地晚飯, 食到尾子元急PO喎, 好在可以上程生到疴, 咁我地埋好單都上去接佢啦, 真係見識到佢地間屋個亂法, 其實係太多嘢囉, 今次搬新屋我估佢地可以掉半間屋GE嘢, 應該會好好多架啦! 9點幾要閃了, 柏仲要食奶瞓覺啦, 返到去馬上快手沖涼, 各自做應做GE嘢, 終於K.O.哂兩個可以抖吓, 睇埋黑執事都瞓啦!

19/9/14

19/9/14   FRI   HOT

今日柏仲又係未夠7點就醒, 反而子元就要拖佢落床, 好在準時落到去剛剛校車到, 返上樓後就比佢玩陣先餵奶, 點知反而食剩喎, 可惡! 今日嫲嫲出嚟, 所以等到8點幾佢嚟到我就返工啦! 買埋早餐返到去都仲早, 做好自己嘢又做吓公事咁啦, 超忙呀! 午飯後悶到落咗樓行吓759, 又洗咗錢啦, 都係買咗咖啡同嘢飲啫, 因為冇折都唔多想買嘢! 下午都係hea吓咁啦, skype同whatsapps吹水都吹到攰, 放工就返去揍子元, 因為今日唔洗合唱團, 只係游水, 所以我負責揍, 仲要揍埋敏瑩同婷婷, 一揍三都真係幾喺嘢, 因為佢兩隻一上車就走咗上樓上, 捉都捉唔切, 咪跟埋上去囉, 仲要坐到最後, 婷婷又唔肯坐定, 我又攞住幾袋嘢, 嗰程車真係覺得特別耐, 終於落車, 行返去時大嗰兩個行得太快, 唔抱住婷婷又追唔切, 子元又發顛咁真係好難搞! 返到屋企都六點幾, 一屋4個細路真係好嘈! 先分開兩個換好衫先, 好在老公唔夠一陣就回來了, 咁就可以睇住兩個細, 我揍兩個大的去泳池, 等咗一陣程太都到, 睇佢地入咗去我地就去超市買埋可樂回家, 返到去有咁多個大人啦, 奶奶就回家了, 我馬上煮飯, 點知個瓦煲底裂咗, D水係咁漏煲唔起, 好在仲有電飯煲咋, 馬上攞番出嚟囉, 唔係真係個個公仔麵! 差不多8點落去泳池同程生會合, 揍番佢兩個, 上去沖好涼先就開飯啦, 混混亂亂咁食完餐飯就吹吓水hea吓, 柏仲9點半扭食同瞓啦, 於是喺房餵佢後直接落床瞓, 好在佢咁嘈都瞓到! 10點多程生佢地先閃, 咁我就沖涼執埋D手尾, 叫老公K.O.埋笨元就睇電視! 老公話要按肩膀, 用香薰油嚟按真係正好多, 幫佢按完到我按番, 按到瞓著咗, 所以冇睇哂隋唐就瞓啦!

<放咗佢入去, 竟然玩得好開心!>

 

18/9/14

18/9/14   THU   HOT

今日柏仲又早醒, 又要揍埋佢落去, 應該起身嗰個就賴床, 又要我拖佢落床咁滯啦! 落到樓就校車到, 唔洗等剛剛好, 返上樓就餵柏仲然後出門口啦, 撘42A入到去都好快, 食埋早餐就返工啦, 冇咩做都係hea吓咁啦, 午飯前老細返咗嚟, 把口完全冇停過, 真係替佢把口攰! 到食飯都冇停過, 至衰又冇地方去唔可以避開佢! 好在飯後佢冇過嚟嘈住哂咋, 咁可以繼續做自己嘢啦, 食埋tea等收工去接笨元回家, 沖好涼就煮飯, 今晚試新嘢, 都唔知係西班牙定意大利啦, 總之就係西式炊飯的物體啦, 炒埋菜煎埋午餐肉, 唔係老公又投訴架啦! 食西餐有樣好, 洗少D嘢, 所以搞掂都係8:45, 但要同笨元睇功課先係戲肉, 我又變怪獸, 我諗我都要再調吓教佢GE方法先得, 唔係晚晚變怪獸都唔係辦法! 9點多柏仲又要食奶啦, 又要K.O.埋佢先可以再同笨元溫書, 默埋書10點多就放佢去瞓, 我地就睇埋急診男女先瞓!