22/8/15

22/8/15   SAT   HOT+

今日如常我要返工啦, 老公睇住兩隻細, 要佢地喺屋企食呀, 反正又有丁麵喺到, 咁我返到公司都係hea架啦, 夠鐘就買埋午餐返屋企, 柏仲而家都食好多嘢, 尤其食我D飯團等等, 食完就執嘢啦, 因為子元黃昏喺葵興有波踢, 老公搵到嗰頭有D屋邨遊樂場幾好玩, 於是早D撘巴士過去玩吓, 未踢波都已經濕哂! 柏仲都玩得好開心呀, 不過始終要跟住佢, 怕佢唔知喺邊個位踢落嚟都煩! 所以4點多都已經過咗去球場嗰邊, 有D街童喺到踢波, 子元又join吓咁, 仲仲都唔怕自己變波比人踢架, 成日走出去, 最慘喺之後正式之後真係唔可以出去架啦嘛, 好在都困得住佢喺車仔, 因為佢都攰啦要佢抖吓, 踢到7點換埋衫走得啦, 我都熱到臭哂, 好在有帶衫換, 去咗新都會食晚飯, 食完就返屋企啦, 我都真係已經好攰! 返去沖好涼即刻打暈哂佢地, 我地就可以hea吓啦嘛!

 

 

 

 

 

 

21/8/15

21/8/15   FRI   HOT

今朝柏仲又晨早嘈醒我, 搞到我都好眼瞓, 梳洗好我就返工買早餐啦, 叫咗佢地唔準出去食呀, 屋企有麵! 返到去都係hea啦, 吹吓水無聊吓咁又食晏, 睇吓電視咁又夠鐘啦, 下午大老闆娘返咗嚟, 但老細出咗去開會, 見佢唔到好事! 食完tea就放工啦, 過去惠康會合老公佢地買餸買日用品, 天氣又變差喎, 又分頭行事, 兩個男人揍兩個細GE返去先, 我就去小童等佢地放學再換衫去泳池, 然後就返去煮飯啦, 今日子慧佢地又上嚟食, 要5個餸先夠, 密密煮咁冇時間沖涼呢, 程生落去接佢地上嚟後就沖涼開飯啦, 柏仲今日係咁要攞個碗, 於是比佢埋枱自己食又OK喎, 叻仔! 食完吹陣水要執嘢洗碗抺地, 仲仲已被daddy K.O.咗, 可以放心吹水, 三個細路就喺房玩, 差不多11點先走呀, 等佢地走咗我地先沖涼, 所以沖完hea吓又瞓覺啦!

20/8/15

20/8/15   THU   HOT RAIN

今日老公去昂船州見工, 本來諗住一齊揍咗兩隻嘢入去就齊齊去食早餐, 點知出了意外, 巴士如常差不多時間入到去, 但一入島就出事, 迴旋處有壞車, 完全塞死哂, 結果落車行, 行到上長康真係命都冇, 好在柏仲好行得, 唔係要抱我就真係死! 奶奶喺麥記等我地, 放低佢兩個就走啦, 因為南橋唔會有車出到去, 唯有行去地鐵站, 結果差不多由青衣南行到青衣北仲要又上又落嗰隻, 攞命! 返到公司都9點幾, 仲要買埋早餐返去食呢! 今日又可以閒吓, 老細唔會返嘛, 閒到又有D悶! 一日都係吹吓水上吓網啦, 冇咩好講! 放工同老公喺小童會合, 因為要報活動, 子元好想學捉棋, 今次同佢報咗象棋, 又報咗個聖誕假去玩桌上足球! 但由於7點先開始報, 但6點我已經喺小童, 足足要等一個鐘, 仲要得我一個睇住兩隻, 老公去咗踢波, 仲仲又唔定到, 好在子元可以自己睇吓書, 柏仲又唔知邊到找到個乒乓波, 玩咗好耐! 由於抽到個籌好前, 所以第一個報到名比埋錢走得! 返屋企就同兩隻嘢沖涼, 仲有只係煮飯啫, 食埋琴晚D餸就得, 仲有肉餅淨我明天煮個烏冬再帶! 洗好碗抺埋地, 叫子元睇住仲仲, 我就快沖個涼再K.O.埋仲仲, 可以hea吓, 到9:30就打暈埋子元, 休息自由時間!

19/8/15

19/8/15   WED   HOT

今朝老公要去見工, 咁奶奶出嚟揍兩隻嘢, 笨元又話要去飲茶, 於是安頓好佢兩個喺茶樓我就返工啦! 返到去都冇咩嘢做, 知道老細返咗HK, 下午又要開會囉, 仲唔hea埋個朝早佢呀, 都係吹吓水做吓自己嘢啦, 午飯後睇吓電視啦, 等D人返哂嚟又要開會, 老細返咗嚟又要幫佢睇吓D樓嗰D啦, 總之忙忙碌碌到差不多放工囉! 去小童同老公會合等子元放非洲鼓, 本來仲有半個鐘先放, 咁同冰miss吹吓水咁就已經放啦, 返到去我沖個涼先, 子元就做埋佢D作業, 食完飯到佢地沖涼, 柏仲發眼瞓瘟, 所以8:30就打暈佢, 子元就話要睇埋套卡通9:30就瞓覺, 到我地自由時間睇吓電視, 12點瞓覺!

18/8/15

18/8/15   TUE   HOT

今朝老公睇住兩隻細, 佢下午先見工, 所以嫲嫲可以晏D出嚟, 用琴日餘下的錢去咗食北海道早餐, 然後我就返工啦, 返到去都係做吓自己嘢啦, 又寫吓仲仲的成長記錄, 午飯後睇吓電視咁啦, 下午都係做吓公事又做吓自己嘢啦, 後來skype吹吹吓水時講到點洗錢GE問題, 又令我我D不快, 我諗我係咪真係咁大洗呢, 去到睇戲食飯都唔得, 定係我隻佬失敗, 要老婆阿媽貼之餘仲要冇責任! 又開始鑽牛角尖, 咁啱老公見完工話喺美孚等我一齊返去, 咁期間咪同佢講吓囉, 重點都係佢要有份工先有得再計劃過! 但都真係要計劃吓究竟D錢用咗去邊, 始於對上嗰次一年多前做, 洗費而家又唔同哂! 回家後沖個涼陪吓柏仲, 因為子元瞓咗, 食完飯嫲嫲洗碗我抺地, 老公同咗子元去踢波, 等佢地返嚟柏仲又要一齊沖次涼, 餵埋支奶柏仲都暈! K.O.柏仲又到子元, 叫做要做番D作業又係到hea, 大半個鐘做得嗰一頁, 我唔爆你住, 比多日時間你, 9點幾就捉佢瞓, 跟住又係到hea到11點瞓啦!

 

17/8/15

17/8/15   MON   HOT

今朝要揍仲仲入青衣呀, 本以為趕到8點多班車, 點知早咗, 唯有再等下一班, 入到去食埋早餐就返工, 返到去都係hea啦, 午飯要去買, 真係好怕諗食咩! 飯後睇吓電視咁啦, 之後都冇咩做, hea埋呢兩日啦, 老細又回歸! 下午都係超無聊, 等收工! 去揍子元再返青衣食飯, 仲仲係都要自己食, 但梗係食到衰衰咁啦, 不過都要比佢試吓囉, 食到5成啦! 食完又係周屋玩啦, 老公掛住睇電視趕唔切呢班巴士, 咁嫲嫲就比錢我地撘的士, 本來都想撘架但見下一班又啱時間, 最終都係撘番巴士都好快! 返到去快手同佢地沖好涼就打暈佢地, 我先慢慢舒服地沖涼睇電視摺衫等等! 11點幾係時候瞓覺!

16/8/15

16/8/15   SUN   RAIN

今日都係節目豐富! 朝早去畫班, 但因為要執埋之後出去D嘢, 所以都遲咗, 去到畫班都9:20! 跟住我地大人食早餐啦, 帶咗程生去試新嘢, 然後都係去元州商場行惠康, 咁都撞到小柏, 買咗糖食! Hea到夠鐘去接子元, 然後就撘巴士入沙田, 柏仲瞓咗個覺, 我都瞓埋, 入到去玩陣阿媽到埋就開飯, 因為阿婆想見吓子元柏仲佢地啫, 食完飯食埋蛋糕, 柏仲自己食一份, 食得幾專心呀! 本來老公有場波踢, 但落雨取消咗, 唔洗趕住出去, 不過等停雨我地都走啦, 返屋企休息吓都好, 返到去沖個涼hea吓, 叫子元做吓作業, 我又包吓書咁, 其實約咗6點晚飯, 但屋企個鐘冇電慢咗, 發現時已就6點, 但仲顯示5點3, 於是快手出門口, 過都去都未夠6點半, 食上海嘢就啱食過上次嗰間西餐囉! Debra都過嚟食, 我就好忙咁揍仔, 柏仲係咁食, 子元就冇咩胃口, 因為又燒番, 都係成日索鼻囉! 食到7點幾影埋相咁就散了, 回家後就沖涼再打暈佢地, 今日我都好攰呀, 放假真係攰過返工, 睇住嗰隻周屋搞的人仔真係命都冇!