10/12/15

10/12/15   THU   COOL

今日終於全日都喺公司, 仲要唔算太忙, 算係咁啦! 朝早都係揍子元校車啦, 跟住咪揍仲仲入去比嫲嫲囉, 食埋早餐返工, 返到去都要做吓公事, 又吹吓水咁啦, 午飯後去咗樓上開倉, 但原來都冇咩嘢睇! 下午都係做吓嘢啦, 放工準時走, 本來諗住同仲仲去睇醫生, 點知截咗症喎咁咪去食嘢算囉, 老公話去試嗰間上海嘢, 真係正宗傳統上海餸, 正好多! 食完去買咗D嘢就行啦, 點知落緊樓梯時我地搬緊車仔, 奶奶掛住望我地冇為意仲有一級, 就跌到扭親腳啦, 佢咁大份扭親真係幾難搬, 老公叫我去睇睇前面有冇跌打鋪, 見到有間中藥鋪即刻走去問做唔做跌打, 有得做就馬上返去同老公夾手夾腳抬奶奶過去囉, 時間關係就老公負責奶奶, 我揍兩隻細返去, 同佢地沖好涼就先K.O.咗仲仲, 才可以幫子元睇功課溫書, 10點前瞓到我先再沖涼, 老公都11點幾先返到嚟, 因為又要煲埋藥, 返到嚟沖好涼都瞓!

 

 

9/12/15

9/12/15   WED   COLD RAIN

今日要過去開會, 所以朝早揍完笨元返上樓後都好趕忙咁執嘢出門口, 今日仲要落雨喎, 真係好狼狽, 好多嘢攞! 返公司後都做咗一陣嘢, 都係冇停過手, 做做吓嘢就決定早D出去, 因為要交表, 又怕速遞唔安全, 反正過開海就過埋去啦! 去到灣仔都好大雨, 幾經辛苦去到交完就撘叮叮過番上環, 又唔識路又找唔到個站, 又落大雨咁, 真係幾經辛苦先過到去, 食個午飯又再幾經辛苦返上商會, 人多又濕咁我仲要著對平時唔多著GE鞋, 上到去就開工啦, 老細們陸續到啦, 但都差不多3點先開會, 有個平日唔浦頭的女人嚟, 搞串哂個party, 搞到我地冇人工加, 一百幾十都冇, 仲要又多嘢問又多嘢講又好大喜功, 正宗你講一句就洗死人嗰隻, 仲要喺到challenge我地, 咁叻你叫你秘書嚟做囉! 結果開到4點幾先開得完, 仲要等佢地吹夠水走啦我地先走得, 同平日放工差不多, 激死我啦! 返去接得笨元再返屋企, 好在嫲嫲今日出嚟煮飯咋, 起碼返到去我可以抖吓, 不過回程路上有車撞了又塞一輪, 搞到6點幾先返得到去, 好陰公! 沖好涼睇功課溫書, 食得飯就食飯, 飯後洗碗抺地, 諗住K.O.咗柏仲ok, 點知佢又咳到嘔, 好在個身冇嘔哂喺床, 咁都係換床單啫, 老公搞掂, 再哄番柏仲瞓, 又要到笨元的專題功課, 搞到9點幾我叫佢瞓先明天繼續, 終於可以hea吓, 我冇力再郁啦!

8/12/15

8/12/15   TUE   COLD

今朝!!!我竟然唔知醒!!! 係7:45先自然醒, 死未! 柏仲竟然都冇叫醒我, 結果…子元遲到了, 因為一定趕唔切啦, 老公叫我冷靜D, 齊齊梳洗出門口, 最終撘到的士過去學校都8點幾, 好在今日第一堂係周會, 唔太緊要, 算啦, 人生總要遲吓到GE! 跟手就入去青衣啦, 因為要同仲仲返康傑註冊, 嫲嫲找了位, 先喺太興食咗早餐先過去, 做好哂手續再攞埋嘢就走啦, 其實都搞咗大半個鐘, 咁柏仲喺嗰到就玩到唔捨得走, 陳副校抱住佢佢唔要我地抱喎, 可惡! 最終就陳副校抱埋佢出去啦, 我地就返工, 柏仲跟嫲嫲返屋企! 我就要過海做嘢啦, 做車證嗰D原來要$200, 我呢個窮鬼今朝撘完的士就得番$100喺身, 結果又要仆返去地鐵站攞錢, 搞到10點幾先走, 返到公司又忙忙忙囉! 午飯後都係睇吓電視啦, 老細今日又唔返, 好事! 下午都係做吓自己嘢, 又做吓公事咁啦, 難得閒閒地等收工! 心血來潮今晚打邊爐, 但要行得遠D先買齊嘢, 所以都遲咗揍笨元, 返到屋企就叫笨元沖涼先, 我就要整打邊爐D嘢, 老公都好快返到嚟, 仲仲依舊搞搞震, 我就要快手整好嘢啦, 其實比平時食飯早咗架, 但因為要烚烚吓, 所以都食得耐, 8點幾食完先K.O.咗仲仲, 老公就出咗銀行過數過票, 我先出埋份中文進評卷比子元做住先, 咁我就可以再洗碗抺地, 搞掂笨元D嘢做好清潔終於可以沖涼, 之後仲要摺衫, 12點先坐到落梳化一陣咋陰公, 轉個頭就瞓啦!

7/12/15

7/12/15   MON   COLD

今日好忙好忙呀, 我真係好怕咁忙, 我個人就好亂架啦! 朝早仲仲未醒, 咁叫醒老公整飯比子元啦, 然後就捉佢起身啦, 趕得切車返學, 跟住就揍仲仲入嫲嫲到啦, 因為佢差不多8點才起身, 所以只可以撘遲一班車, 買埋早餐返工啦, 跟住就開始做做做啦, 話咁快就食晏啦, 去咗買米線, 好滿足! 食完老細話唔返又要攞嘢落樓佢簽, 下午都係忙忙忙, OT到6點才走得, 返去接笨元仲要買埋餸, 遲咗半個鐘就所有嘢都遲半個鐘以上, 揍得佢返到去都7點多, 叫佢去沖涼我就煮飯, 不一會老公回來, 仲仲梗係周屋搞, 老公又去咗沖涼, 我都唔知顧個廚房定柏仲好, 終於煮好個飯食得, 到我可以坐低食時都冇咗一半餸, 真係好淒涼! 快手食完又洗碗啦, 抺地抺到一半仲仲已經被K.O., 咪叫老公接手抺, 因為我仲未睇子元功課, 睇完就溫書, 英默星期五默但淨係溫咗個背默, 激死! 最終有個字串極都唔識, 要佢抄20次, 抄完後…其他全部字都記得哂! 呢個方法好似又有效! 等佢做好埋視藝個功課就瞓啦, 我終於可以沖涼啦! 攰到我睇睇吓奇皇后都瞓咗!

6/12/15

6/12/15   SUN   COLD

今朝7點幾柏仲才嘈醒我, 算係咁啦! 齊齊出發去揍子元畫班, 食完早餐就去買嘢, 接番子元後就出咗旺角, 子元要買lego聖誕禮物喎, 老公又話想幫佢買波襪, 點知都係未開, 去咗新世紀終於找到mother care, 因為仲要買襪比柏仲, $90有5對都抵啦! 仲找到佢水杯個飲管喎, 可以有得換! 買齊行咗陣就過去睇lego, 最終買咗盒八百幾蚊, 我話…生日禮物都包埋啦, 實在好貴, 不過要佢忍到24/12先准開嚟玩囉! 終於返屋企啦, 柏仲喺車瞓咗, 點知返到去瞓咗一陣就醒咗, 搞到我好亂呀, 因為又要幫子元溫書, 又要處理D衫, 所以我個人都好炆! 慢慢子元溫書嗰到叫做溫咗大部份, 衫要執得咁上吓, 我個人都cool down番好多, 柏仲喺daddy監督下4點幾終於肯瞓番, 所以5點幾程生佢地上到嚟都仲瞓緊, 兩隻大GE去游水啦, 我就繼續執嘢, 又睇吓D衫, 因為都要開始找找柏仲的校服! 6點幾仲仲醒咗, 就同婷婷一齊沖涼, 7點多兩個大的返咗嚟, 沖好涼執好嘢, 8點多出到去一齊食飯啦, 都係混混亂亂咁啦, 仲同埋子慧一齊呢! 食完去埋食雪糕就散了, 返去沖得涼瞓覺都10點!