16/12/15

16/12/15   WED   COLD

今日全日要出去做嘢, 老公又兩日一夜出trip喎, 真係難做的一天! 朝早揍咗子元校車先, 仲仲瞓緊! 跟手回來執好嘢換好衫我都出門口啦, 因為約咗Nicho8:20喺美孚站等, 我都算勁, 8:10出到地鐵嗰頭, 用10分鐘連買連食, 真係好快! 8:45過到去九龍塘, 點知架車9點先到, 要班老細喺街企咁耐真係幾唔好意思, 但路面上又真係唔容許車等人GE, 大家準時到快手上車, 快手入到去囉, 因為又要影吓相又要行一輪入去, 都幾大工程, 都搞咗半個鐘先開始, 我地就買杯咖啡陪坐, 佢有佢地講, 我有我地打吓機咁, 差不多12點講座完就去參觀實驗室, 參到12點幾返番去集合又上旅遊巴, 因為要過西貢食海鮮餐, 做一個唔熟路GE導遊真係唔易, 最終安排好各位坐定定開飯, 叫做可以休息吓啦! 食到2點多埋單, 又扮哂蟹喺到碌卡, 咪又係會GE錢! 最PK係又要架旅遊巴車番科大D人返去, 好在司機快手, 加多個point都趕3點前返到九龍塘, 算係咁啦! 唉…總之佢做咩都係cheap架啦! 今日3點收得工, 趕得切返去接子元校車, 返到去柏仲都未醒, 可以消毒吓子元先, 佢學校爆手足口同猩紅熱, 要做足D保護措施! 咁阿媽問我搞唔搞得掂, OK佢就返去, 咁都冇咩特別嘢啦, 應該可以! 係仲仲醒咗後麻煩D, 成日攞玩具掟子元, 有時又唔合作, 我想同子元睇吓功課都唔得, 之後到我要煮飯, 咁易煮極都要喺廚房架, 兩個又係到嘈, 真係令人好火, 有時又唔係子元衰哂, 但佢始終唔識點控制場面都係煩! 搞到我又要變顛婆, 不過最慘係佢又係机仔經梳化再落地, 我又執緊玩具, 一嘢踩咗落我隻手到, 搞到我隻手背腫咗, 好在即刻敷冰都冇咩事, 但都比我鬧咗穫金! 終於煮完食完洗完抺埋地, 坐陣就同佢地沖涼, 打暈仲仲就同子元溫書, 跟手比佢睇陣電視因為我要沖涼, 比佢睇到沖完就哄佢瞓, 我就hea到睇完奇皇后先瞓呢!

 

15/12/15

15/12/15   TUE   COLD

今日要揍仲仲比月希媽揍, 條友可能想儲夠力去玩, 所以揍子元撘校車都未醒, 咁我就照揍子元落去啦, 上嚟見仲仲攞咗隻蕉嚟食, 真係服咗佢! 執齊嘢就一齊落去人地屋企啦, 放低嘢就一齊落樓, 姨姨帶佢去食早餐, 喺商場分手好D, 因為仲仲有街去就冇咩所謂! 跟住我地就返工啦, 之前去食個早餐先, 同老公傾之後點安排, 其實都冇咩選擇, 所以都係見步行步! 返到公司又係好忙, 最慘係連工展會搬硬幣都關我事, 咁冇所謂GE, 苦力呢D我都做慣架啦! 咁到咁上吓就出發囉, 不過因為老細返咗嚟, 整吓呢樣嗰樣嘈吓交咁又遲咗, 4點多先出到發, 過到去又唔係放低就走得, 結果返到去長沙灣都過哂5點半, 蝕哂! 同阿媽喺巴士站交收子元, 又要返去接仲仲啦, 由於冇買餸, 都係要食外賣, 不過今日就食Pizza Hut, 個飯子元可以明天帶飯用, 咁食完就要睇功課溫書啦, 期間佢地都係玩! 今日咁出吓去, 都幾攰吓!

14/12/15

14/12/15   MON   COOL

今日阿媽過嚟揍仲仲, 朝早如常揍子元校車啦, 等阿媽嚟到交帶吓就返工啦, 應該冇問題GE! 返到公司都係做吓自己嘢又做吓公事啦, 真係好忙呀! 另外又要找吓D日托中心呢, 公事已經忙, 老細朝早又返咗嚟開會, 做到食lunch呢! 下午叫做好少少但都有嘢做! 忙忙碌咁又一日, 放工返去快快手又上醫院攞飯比奶奶食, 咁啱佢幾個FD又係到, 話之後佢地攞飯上嚟, 唔洗我放工咁趕! 佢地走咗又到二姑姐上嚟, 到差不多7點我都走啦, 返落去就去食晚飯, 近近地大快活就算啦, 食完返去沖涼睇功課打暈仲仲, 好攰啦!

13/12/15

13/12/15   SUN   COOL

今朝都係照常啦, 去學畫班! 帶咗程生去德貞嗰邊間茶記食, 又去買吓餸咁, hea到夠鐘去接佢地, 返到屋企老公搞掂仲仲, 我就要同子元溫中默, 條友肯溫吓都係差少少未識, 咁星期四先默都仲有時間GE! 12點幾佢又要出門口去踢波, 我就在家睇住仲仲, 又要摺衫, 仲欠我未換季, 點知換到2點幾柏仲醒咗, 咁就唔搞住直接出去球場找笨元佢地, 一齊食午飯先回家, 返到去又要執埋D衫, 跟住又要煮咗飯比老公帶去醫院比奶奶食, 之後佢仲要去踢波喎, 得番我一揍二, 變咗冇得同子元溫書, 叫咗佢喺房自己玩, 我就喺廳睇住仲仲, 兩個唔一齊玩冇咩事架, 但到我要煮飯時, 子元就掛住睇電視完全睇唔住柏仲, 搞到佢做哂危險嘢, 又攞剪刀又玩潔手液, 真係人都顛! 終於食完餐飯洗碗, K.O.埋柏仲就沖個涼再幫子元快溫陣書, 就放佢去瞓, 我都要抖吓啦!

 

 

12/12/15

12/12/15   SAT   COOL

今日好似好忙咁呀! 朝早本來諗住同柏仲去睇醫生, 點知葉醫生下午才開, 咁都出咗去, 咪食埋餐先我就返工啦! 放工前老公就揍柏仲嚟交收, 點知隻豬仔嚟到先疴屎仲要爛嗰隻, 又冇片換喎, 只能抺乾淨佢算啦, 大開中門咁回家, 佢仲要我抱喎, 幾驚佢賴濕我呀! 未返到去已經瞓咗, 咁同佢換好片, 我自己就食嘢先, 摺埋D衫就瞓陣, 到3點幾柏仲醒就call老公, 因為話同嫲嫲過法國照隻腳順手找埋葉醫生睇, 點知過到去葉醫生已走, 咁唯有睇咗嫲嫲先, 要照X光, 原來腳跟骨移位有碎骨, 一定要做手術, 醫生知老人家冇買保險, 所以寫紙去咗PMH, 咁就撘的士過去, 路過放低我去敏瑩屋企接回子元, 因為佢仲做緊功課, 所以做埋一齊食飯先走, 回家後我就同兩隻嘢沖涼, K.O.哂佢地我先沖啦, 老公都好快, 9點幾已經搞掂奶奶入院, 因為有私家醫生D嘢, 可以直接入院快好多, 最後都係得個等字, 等消腫才可做手術! 今日堅攰, 我要休息了!

 

11/12/15

11/12/15   FRI   COOL

今朝如常揍子元啦, 之後就要等阿媽過嚟揍住仲仲, 因為嫲嫲真係要休息吓啦! 我返公司攞埋D嘢就過工展setup, 開始時都唔知點搬好, 慢慢做起咗D嘢, 抺吓搬吓咁, 都好快手喎, 做吓做吓又好快做起, 總監過咗嚟, 有人請食飯, 做到點幾出去食午飯啦, 因為都真係執哂嘢啦, 可以提早收工! 不過我都係再開第二份工啫, 本來呢幾個鐘我真係可以做好多嘢, 但因為子元仲仲都喺屋企, 我買完餸返去都3點幾4點, 仲仲又醒咗喎, 真係完全忙唔停, 一樣嘢分開幾次先做得到! 5點幾阿媽揍子元去小童, 我就揍仲仲去睇醫生, 點知個兒科冇咗價錢又double咗, 又唔肯寫學童入學健康檢查表, 仲要得嗰兩支藥水仔, 完全係被人呃咁! 去咗麥記試吓個新包, 仲仲去到識講麥當勞喎, 真係估佢唔到! 跟住去小童會合, 齊人就去換衫游水啦, 今日多埋子慧, 因為佢又一齊合唱團啦, 好在有3個大人喺到, 否則要換衫都幾亂! 三個外星人上大空船啦, 送咗佢地去游水我地就返屋企, 都係煮飯嗰D嘢啦, 餵咗柏仲食飯先, 咁佢地上到嚟就沖涼, 開飯前打暈仲, 食完飯吹水吹到11點多先散, 搞到我都唔記得睇奇皇后!