6/1/16

6/1/16   WED   COOL

今朝柏仲終於早起了, 可能知道今日要痴車坐早出門口, 所以早點起身, 子元亦都一早搞掂, 咁算順利出到門口, 又快快返上樓揍仲仲出去美孚同程生會合, 都有點趕架, 因為要7:50出到去, 真係好趕! 8點左右已經入到學校門口, 其實真係有D早, 佢兩隻豬玩足半個鐘先入得學校, 程太8:20要走啦, 婷婷有D扁嘴架, 但都叫做OK , 終於入得學校啦, 仲仲可以一齊入去喎, 咁我唔洗又再等, 去食個早餐就返工, 又收到學校電話, 我仲以為話仲仲扭計添, 原來係話仲仲都冇咩異樣, 今日可以放11:30, 同埋如無意外下星期可以放12點了! 今日都算好hea架啦, 朝早都係吹水做吓自己嘢, 午飯後睇陣電視, 下午要開會, 好在只係開咗一陣, 都係要做吓公事咁啦! 放工買埋餸返去, 阿媽都幫子元再溫吓書先, 因為有我睇住仲仲嘛, 琴日試過揹住佢煮飯, 佢今日都要我揹啦, 但揹一陣佢又要落地架喎, 煮咗陣阿媽都未走老公就回來, 快手煮埋個飯就開飯, 期間佢地沖好涼, 咁最快8點半K.O.咗仲仲我就可以幫子元溫書睇功課, 叫做go through咗個中文, 而家係未比數學佢做! 10點多佢瞓先, 我仲要摺衫執嘢等等, 11點終於可以坐定定睇電視! 老公明天要返大陸, 仲要最少3日, 我又要單打獨鬥, 又去林醫生到覆診又要去體操又要溫書, 星期六日都冇人幫到我, 加油!

5/1/16

5/1/16   TUE   COOL*

今日柏仲都係好好瞓, 我揍子元上校車佢都未起身, 要我返上樓叫醒佢呢, 快快手換好校服返學啦, 今日著西服look又唔同feel! 老公今日唔一齊揍啦, 只係送到我地去車站, 入到青衣都係去咗食早餐先, 今日食麥當勞, 不過柏仲都係食好少! 差不多9點就慢慢行返學校, 按門鐘入去, 柏仲都係乖乖跟住書記姐姐入去, 咁我就安心去撘巴士返工啦! 今日終於閒落嚟, 可以閒閒地做吓自己嘢又做吓公事啦! 午飯後睇吓電視咁, 下午又係hea吓啦! 係放工前忙一忙, 搞到又遲咗收工! 都係返到去惠康買咗D餸就返上去, 婆婆投訴子元唔合作, 做功課又慢, 佢個放假mood都仲係未趕得走, 下星期都考試, 點死! 我返得去煮飯等老公回來食完都8點多, 洗碗抺地, 等佢地沖好涼柏仲瞓覺, 我又要沖埋涼先睇子元功課, 佢數學的時鐘同日期唔多掂, 好在數學最尾先考! 今晚睇哂功課都10點多, 我寧願佢快D瞓啦, 明天要考中作, 聽天由命啦!

4/1/16

4/1/16   MON   COOL

今日係柏仲第一日返學的日子, 我都覺得自己有點緊張! 朝早老公要煮午餐盒比子元, 所以同我一齊起身, 佢有佢煮我有我梳洗同捉子元起身, 都準時出到門口, 返上樓見仲仲都瞓緊, 但因為要預番時間入青衣, 但見一定趕唔到撘44, 咁就不如撘番46X, 車密D易跟D, 換好衫食埋奶, 攞好書包梗係要影吓相啦, 出到lift口又影吓相, 入到去太興食早餐又影, 跟住一路行去學校又影, 真係好開心! 去到學校門口梗係要影啦, 9點多佢地早會操完咗就可以入去, 吳老師同陳副校都出嚟迎接柏仲, touch wood佢都好乖, 只係周圍望清楚咩事! 陳副校都趕我地出去啦, 咁我地都好合作GE! 之後老公就返工, 我就去銀行入埋錢先返工! 今日公事超忙, 真係差不多冇停過, 午飯吳老師打嚟報告吓柏仲今日情況, 話上英文堂時都好專心, 不過就唔多肯坐定同玩每樣嘢都唔玩得耐, 另外又成日要痴住吳老師, 玩玩吓又會去搵佢, 食茶點食一塊餅又想去玩唔肯坐, 要吳老師guide住, 飲嘢時飲咗奶又唔肯飲水囉! 總括柏仲都算合作架啦, 慢慢嚟啦! 午飯後下午又要開會又十萬樣嘢做, 放工都未做得完, 返到去只在附近惠康買D餸返去煮咋, 8點幾完成哂所有嘢, 柏仲先西利, 2點幾瞓到6點, 可以8點半再瞓, 叻豬! 我又要跟功課, 子元又話眼瞓, 所以比佢瞓啦! 搞掂埋柏仲的回條, 摺埋衫都11點啦, 我真係勤力過7-11!

3/1/16

3/1/16   SUN   COOL

今朝瞓到8點幾9點先起身啦, 唔出去食早餐啦叫老公煮就算, 我就同子元睇吓仲有咩功課未做, 執吓整吓食埋早餐我又摺衫喎, 想同佢溫吓書都冇, 11點半又要出門口啦, 約咗程生佢地食飯後交子元比佢載去考奧數, 我地就去咗759shopping, 都唔算買得好多, 都係飲品同餅多, for子元帶返學啫! 買完行返去時柏仲喺車仔已自我催眠了, 所以返到屋企我地就好多時間收拾, 我都係呢到執D嗰到執D, 又要預備吓陣間同子元溫書D嘢啦, 柏仲好襟瞓到4點幾我諗住出門口先醒, 不過我就要過去程生屋企同子元溫書, 老公就帶住柏仲買飯比嫲嫲等等! 過到去同佢地溫書, 都叫做溫咗2個鐘, 因為明天又英文評估又普通話口試, 子元同敏瑩溫書真係差好遠, 不過兩個一齊溫反而冇咁大壓力咁, 可以轉吓模式! 差不多8點程太瞓哂就齊齊落去買平壽司, 食完都10點先走, 返去真係要快手, 明天齊齊要返工返學呢, 不過同子元執嘢時先發現專題有嘢未做哂, 整埋都11點幾先瞓, 我都12點多先沖涼呀!

2/1/16

2/1/16   SAT   COOL

今日子元節目豐富, 朝早去體操, 我都唔知醒, 8點多才齊齊趕, 只可以買個包在巴士上食, 揍完佢我就返工, 差不多放工老公就揍咗仲仲上來, 我地去買飯團返屋企食, 行到一半就要抱, 以為佢好快瞓啦, 點知根本就唔係, 仲要呃我抱足佢全程又唔瞓, 返到屋企叫佢瞓佢就話坐定定, 咁咪比佢食埋飯先瞓囉, 都陪咗佢半個鐘先瞓著! 跟手我就要的起心肝執嘢, 主力係執玩具, 因為要整理吓, 柏仲成日攞D唔啱佢玩GE嚟玩, 不過執吓又抖吓咁, 結果執到柏仲瞓醒都未執完, 好在都近尾聲, 不過又要摺衫啦, 好在柏仲見玩具執咗位, 都係到勁探索, 搞掂就準備入沙田晚飯, 老公同子元踢完波就直接自己入去, 我同柏仲出去撘86, 撘咗差不多一個鐘呢! 入到去都係食餐飯啦, 柏仲又係到扮怕羞咁chok可愛囉! 8點幾撘車返去沖涼瞓覺, 明天唔洗畫班, 可以瞓晏D, 所以我地就夜D瞓啦!

1/1/16

1/1/16   FRI   COOL

今日覺得自己精神狀態真係超差呀, 冇辦法啦真係年紀大, 通到呢個程度GE頂已經超咗極限! 柏仲都算比面, 8點幾先醒, 但我真係冇力理佢, 只係換咗片同沖咗奶, 咁子元又起咗身喎, 咪叫子元睇住柏仲算, 我地到11點左右先肯起身, 因為佢地都肚餓啦, 要起身梳洗去食飯, 但出到廳見到好似打完仗咁, 真係執死人! 近近地去咗美心食咋, 呢排好似好食咗嘛! 食完返去都係溫咗書先, 我真係拖住一副疲勞的身軀嚟同佢溫, 都係叫佢讀一次, 字佢就係唔多識寫, 但都係叫佢將錯GE抄多兩次咋, 再比埋練習佢做我就上咗床瞓, 瞓到死咗咁, 好在老公帶咗兩隻仔出街, 咁我可以好好咁瞓, 我真係好好瞓呀, 瞓到差不多7點先起身, 知老公約咗程生佢地今晚上去打邊爐, 咁就換衫執嘢出門口啦, 老公入咗去買飯比嫲嫲, 咁撘42出嚟我咪去巴士站join囉, 等緊車時有架46X埋站, 突然有架私家車駛咗喺巴士面前喎, 根本就阻住架巴士出車, 仲要大聲夾惡, 你擺到明係違例泊車啦, 都仲要咁, 最終搞咗5分鐘都唔掂, 又有架鐵馬嚟咗喎, 咁我咪行前D同架警察講係架巴士埋咗站架私家車先駛埋嚟阻住囉! 因為我架42到啦咗, 所以我都冇得睇埋個結果, 比我係乘客實落車小爆個私家車司機! 過到去程生到先去買埋牛肉同菜, 仲買咗麥當勞先上去, 開好陣整好嘢就比佢地食, 我地就慢慢滾滾吓啦, 不過又要顧住柏仲, 都好難食得安寧, 食完hea吓到11點要走啦, 我明天仲要返工呢!