17/1/16

17/1/16   SUN   COLD RAIN

琴晚實在太夜瞓, 但柏仲都可以咁早起身, 實在太過份, 搞到我7-8點根本就瞓得唔好, 快手搞掂出門口, 但趕唔切巴士, 最終撘的士, 又大雨喎, 好濕! 揍咗佢地上去就去食早餐啦, 之後老公又去買吓嘢咁, 由於想去廁所, 咁近近地又上咗阿嫲到, 柏仲又可以同佢玩啦! 揍埋子元就回家, 老公打暈仲仲, 我就趕子元去做功課, 之後佢咪勁睇電視囉, 考完試就放佢一次啦, 我就好努力咁改柏仲條褲, 其實只係喺褲頭加橡筋, 但對我嚟講呢D嘢真係最難, 加上冇必先利其器, 足足搞咗一個鐘, 仲有兩條等住我架, 但由於已經2點幾3點, 就去食嘢同諗住出街, 但食完嘢都3點幾, 老公話出尖沙咀但車程都個幾兩個鐘, 咁諗諗吓就不如返屋企, 係子元提出! 但我想去超市買嘢, 於是過咗惠康囉, 一買又買咗二三百蚊, 不過都抵買, 有$300減$30嘛, 子元買買吓急V, 老公就比條key佢自己返去疴, 個衰豬又OK喎, 去完識得打電話嚟講聲, 等我地唔洗擔心, 咁就繼續買啦, 返上樓後都係收拾執吓嘢囉, 老公就瞓咗覺, 6點多要起身啦, 因為約咗阿媽佢地食晚飯, 都係去番長沙灣, 但阿妹選親的餐廳都係D貴夾唔飽又唔係特別好食, 係咪大家D飲食習慣差別咁大呢! 柏仲有D攰都扭係都要我抱住食, 攞命! 食完飯返上樓切蛋糕, 9點多回家快手K.O.哂佢地我地就可以做自己嘢啦, 又hea到12點幾先瞓呢!

 

 

 

 

16/1/16

16/1/16   SAT   COLD

今朝老公要帶子元去踢比賽, 所以朝早早過我起身, 揍哂兩個仔出去, 因為去青衣北踢, 所以放咗仲仲去嫲嫲到, 因為今日落雨又凍嘛! 我就8點幾先起身返工, 今日都做公事架, 夠鐘就放工, 買個午餐先返去, 因為老公會食埋飯先返, 食完仲要摺埋衫先! 2點幾三隻嘢返嚟啦, 老公先打暈仲仲, 子元就換衫去打乒乓球, 仲有執埋今晚出去D嘢, 約咗敏瑩佢地行深水涉, 然後上佢地屋企玩! 仲仲瞓咗, 老公揍咗子元去乒乓球, 我可以好好地做埋家務, 其實都係有一堆衫等我摺啫! 仲仲4點多醒咗, 咪慢慢執埋嘢先出去囉, 同佢做埋功課先, N都有功課架, 我又唔想幫佢做咗就算, 都係開枱開櫈比佢坐好做, 雖然只係10分鐘內仲係捉住佢手仔做, 但都算係個開始! 搞掂就出門口, 約咗直接喺深水涉到等, 慢慢撘巴士行過去, 之後主力陪佢地睇嘢, 因為要買禮物比敏瑩喎, 子元就買咗幾盒假,lego的人仔囉, 亦幫柏仲買咗要交番學校的揮春, $20/8張啱啱好! 終於行完買好嘢, 就撘6C返去, 不過由於今晚等最平壽司, 所以先食咗車仔麵先! 返到去就梗係玩啦, 不過小朋友們全部要沖涼先, 唔知今晚玩到幾點嘛, 差不多時間就我同程太落去買壽司, 買完返上去都9點多啦, 食完壽司再食公仔麵, 好滿足! 子慧跳完舞後join咗, 所以食完佢地就一齊入房玩, 係要睇住兩隻細囉! 我地大人就睇番勁曲金曲, 真係好好笑, 睇到差不多12點真係要走, 好攰啦! 返去快手沖涼瞓覺!

 

15/1/16

15/1/16   FRI   COLD*

今朝兩隻豬仔都算合作, 快手落到樓上校車, 不過因為落雨, 又要抱仲又要攞傘都幾麻煩, 返上樓快手搞掂就出門口了, 老公照樣慢慢唔同我地一齊出門口, 順利趕到車, 8:10入到去, 近呢幾日兩個都乖咗, 仲仲見書記開一邊門時已經會拖住我, 等服務生入哂就入去, 唔會再周圍跑, 真係出乎意料! 揍咗佢地入去, 因為要去銀行換簿又要入票, 所以先去食個早餐, 等銀行一開門就可以去處理! 搞掂就返公司, 朝早都唔算好忙, 做吓自己嘢咁, 午飯後睇吓電視, 跟住下午又繼續做嘢啦, 本來都閒閒地, 點知臨放工前先整D煩嘢, 搞到我遲咗走, 星期五係好趕架嘛, 今日我又要去美孚大家樂買$88燒雞餐, 5:50行到去, 6:02走, 6:10返到屋企, 我都覺得好神速, 執好嘢就撘小巴去小童接佢地, 望見自己身上有7個袋, 我諗路人會覺得我好搞笑囉! 上到去見到老公已到咗, 咁可以幫手睇住仲仲囉! 等佢地出嚟執好嘢就可以出發行去換衫, 因為怕落雨我都冇帶車仔, 只用揹帶揹仲仲咋! 過去換好衫就去泳池, 剛好入得! 外星人上哂太空船我地就可以回家, 先同仲仲沖好涼, 老公整D飯佢食我就沖涼, 今晚唔洗煮飯所以我比較free, 等佢地上到嚟, 忙忙亂亂咁去沖涼啦, 所以早D打暈仲仲, 就可以開飯啦! 用焗爐整番熱D雞, 真係好正! 吹水食飯係人生最好享受! 吹到都差不多10點先執嘢, 唔係太多嘢食, 10點半前已經可以抺埋地, 再埋吓數咁, 佢地11點前就要攞車閃啦! 我都好攰啦, 但都睇埋套你們被包圍了才瞓!

14/1/16

14/1/16   THU   COLD

今日終於又正常番少少, 柏仲半夜爬過上嚟, 搞到我又瞓得唔好! 起身仲天黑黑, 真係好易唔知醒! 兩位少爺順利出到門口, 揍咗子元上校車返上樓又趕住執好嘢出門口啦, 老公起身太慢, 同唔到我地一齊出門口, 因為我要趕到7:50班車, 其實返上樓得10多分鐘架咋, 真係顛趕! 好在都趕得切, 咁就8:10已經入到去, 其實遲一班車可能都OK, 真係要找日試試, 因為實在太趕! 入到去都係比佢地玩吓啦, 夠鐘就入去, 兩個而家都好乖豬啦, 自動自覺! 買埋早餐返公司, 今朝都唔算忙, 做吓自己嘢又做吓公事咁啦, 係老闆們點幾已返到, 搞到我地冇得睇電視, 可惡! 下午又係咁開會, 好在我都唔係好關事, 始終高層開會嘛唔關我事! 期間都出出入入去report吓D事咁啦, 5點幾都未捨得走, 唔理咁多啦, 我要返去交更! 由於冇食tea好餓, 經過巴士站去咗買燒賣, 嗰位老細問我係咪ALEX老婆, 我都比佢嚇一嚇, 佢話佢係MO記的同事呀, 仲請我食嗰串燒賣, 嘻嘻! 不過咁多年佢都仲認得我真係好西利! 買埋餸返去交收完阿媽就收工啦, 今日老公去踢波, 所以得我同兩隻豬食, 買咗雞柳煮意粉加三文魚同露筍, 煮嗰時都係要時間嘛, 兩個喺出面就成日打架啦, 好煩! 7點幾煮起有得食, 子元勁捧場, 要添呀, 柏仲臨尾就要我餵! 洗好碗抺好地, 嗰兩隻就係到搞事啦, 8點多完成好就睇陣電視先同佢兩隻豬沖涼, 打暈咗柏仲就睇一睇子元D嘢, 然後我先去沖涼, 打後仲有好多嘢做, 摺衫啦, 洗杯袋, 奶樽啦, 邊做邊睇電視, 等到11點都未見老公返, 原來佢踢9點喎, 我仲以為佢踢7點添! 等到佢回來都12點, 頂唔住要瞓先啦!

13/1/16

13/1/16   WED   COLD

今日凍咗好多, 我又瞓得唔好, 精神狀態差時, 兩隻細一唔合作我就發作, 結果一朝早已經變咗顛婆, 罰咗柏仲冇得落樓送校車, 子元就比我鬧到喊, 不過出咗門口同佢再解釋都明! 返上樓再鬧番隻豬仲, 都唔知佢明唔明定係扮傻! 搞掂出門口剛趕到巴士, 入去交完更送咗佢地入去, 同龍校長吹咗陣水就返工啦, 今日都係返半日, 雖然返去都係要做大掃除, 但原來返半日的感覺超正, 朝早好忙碌咁清好D嘢先, 1點閃人買個飯返去食完摺埋衫開工, 清潔埋嗰半個廚房都差不多2個鐘, 跟住到廁所啦, 抺緊時子元返咗嚟, 就叫佢清潔好自己房, 今晚比佢貼揮春, 所以佢都好合作, 清潔好就同佢對住數學D練習, 我話佢有一條做錯, 但原來係我睇錯, 佢竟然喊喎傻豬, 我下次都要小心D啦! 等老公返到嚟, 就出街食飯, 去咗深水涉食蛇羹, 跟住去茶記食小菜, 再去松記食糖水, 好滿足咁返屋企了, 快手沖涼瞓覺, 我都係好忙, 開票呀, 執拾呀, 11點先沖到涼! Hea到12點幾才瞓!